Lelaa u nla nigil i yi Djob

U nla nigil i yi Djob ibale u ñañ Bibel. I ngéda kôba Djob a teb ngim bôt le ba tila mahoñol mé. Bitilna bi bi nsébla le Bibel. I len ini di nigil i yi Djob i ngéda di ñañ Bibel. Kikii Bibel i gwé bañga tole nwin u Yéhôva, i nsébla ki le bañga i Djob. Di nla hémle mam Bibel i nkal inyule Yéhôva a ta a tembag bé. “Djob a nla bé tembee.” (Lôk Héber 6:18) Bañga i Djob i yé maliga.—Yôhanes 17:17.

Bibel i yé yom yada ikété makébla ma nlôôha tik Djob a bi ti bés. I yé kikii kaat isañ nu gwéha a ñômle bon bé. I ntoñle bés le Yéhôva a mbôn le a nhielel hisi homa a nlôôha nlam i niñil — paradis. I ñañle bés mam Yéhôva a bi boñ ngéda kôba, ma a mboñ hanano ni ma a’ bôñôl bon bé ba té sép. I nhôla ki bés le di pamba i mandutu ni éba bés lelaa di ba masé.—2 Timôtéô 3:16, 17.

Mbôgi i Yéhôva i yé mawanda ma Djob; b’a hôla we i nok biniigana bi Bibel. We kal ki bo le u nsômbôl nigil Bibel. Ba mbat bé we nsaa. (Matéô 10:8) U yé ki le u kahal ke i makoda map. Ba nlôhene mo i bahoma ba nsébla le Mandap ma Ane. Ibale u nke i makoda ma bikristen w’a pala hol i bana yi i Djob.

U nla nigil i yi Djob ni njel bihégél gwé. Kii héga, Bibel i nkal le: “Djob a heg ngi ni hisi.” (Bibôdle 1:1) Ngéda Yéhôva a heg “ngi”, a heg hiañga. Hala a niiga ni ki bés inyu Djob? Hala a ñéba bés le Yéhôva a gwé ngui ngandak. Nyetama nyen a nla heg yom i lipémba kiki hiañga. Hala a ñéba ki bés le Yéhôva a yé pék, inyule i heg hiañga hi hi nti bés lék ni mapubi ndi hi ligis bé bés, i nsômbla pék.

Bihégél bi Yéhôva bi ñéba le a ngwés bés. Hoñol ki mintén mi bitatam mi yé hana nkoñ isi. Yéhôva a bé le a ti ndig bés ntén bitatam wada—tole to wada yaga. Ndi Yéhôva a bi ti bés ngandak mintén mi bitatam ni nya ndi nya i maôñg, ni i binene, ni i line. Hala a ñéba le Yéhôva a ta ndig bé gwéha, ndi le a nlôôha likap ni nduña ni loñge ñem.—Hiémbi 104:24.