Mabéhna ma ma nlôl ngéda kôba

Yéhôva a’ ume bé le bibéba bi bôt bi ôbôs Paradis. Ndik mawanda mé mon m’a niñil mu. Kii y’a pémél bibéba bi bôt? Inyu kôhna ndimbhe di yoñ ki ñañ u Nôa; u yé maliga. Nôa a bi niñ hala a yé dikôô di nwii len. A bé loñge mut, a jobga hiki ngéda le a boñ sômbôl i Yéhôva. Ndi bana bôt bape ba bé boñ bibéba bi mam. Jon Yéhôva a kal Nôa le a yé bebe ni lona malép inyu tjé bibéba bibôt bi gwobisô. A kal Nôa le a bañ nkuu inyu péyés ni nye ni lihaa jé ngéda ntida ­malép.—Bibôdle 6:9-18.

Nôa ni lihaa jé ba bañ nkuu. Nôa a béhe bôt le ntida malép u nlo, ndi ba emble bé nye. Ba ke ni bisu i boñ mam mabe. Ngéda Nôa a mal bañ nkuu, a jubus binuga yak nyemede ni lihaa jé ba jôb mu i kété. Ha ni nyen Yéhôva a nôs soso nop. Nop a no 40 ma dilo ni 40 ma mau. Malép ma hô nkoñ isi wonsô.—Bibôdle 7:7-12.

Bibéba bi bôt bi bi wo, ndi Nôa ni lihaa jé ba bi pei. Yéhôva a bi péyés bo ntida malép, a timbis bo i mpubhag isi. (Bibôdle 7:22, 23) Bibel i nkal le ngéda ipe i nke lo, Yéhôva a’ tjé i bet ba ntjél boñ mam ma té sép. Biloñge bi bôt gw’a tjiba bé. B’a niñ i boga ni boga i Paradis hana isi.—2 Pétrô 2:5, 6, 9.

I len ini ngandak bôt i mboñ mam mabe. Nkoñ isi u nyon ni mandutu. Yéhôva a ñom mbôgi yé om ni om i béhe bôt, ndi ngandak i kété yap i ngwés bé emble bibañga bi Yéhôva. Ba ngwés bé héñha magweleg map. Ba tob bé neebe le Djob nyen a niiga bo kii i yé loñge ni kii i yé béba. Kii y’a pémél i bôt ba? Baa b’a héñha kel yada? Ngandak y’a héñha bé kel ki kel. Ndi ngéda i nlo le bibéba bibôt gw’a tjiba mba ni mba.—Hiémbi 92:7.

Hisi hi ga tjiba bé; ndi hi ga yila paradis. I bet ba nyila mawanda ma Djob b’a niñ mba ni mba i paradis hana isi.—Hiémbi 37:29.