Nkuu Nôa

Mu kiki ngéda i bé tagbe, hisi hi bi yon ni bôt ba binam. Ngandak yap i bé bibéba bi bôt. Yak ngim biañgel i ngii i bi yila béba. Bi bi nyodi i ngii, bi lo i niñ hana isi. Baa u nyi inyuki bi bi boñ hala? Bi bi boñ hala inyu yoñ manyuu ma bôt ba binam ni bii bôda.

Biañgel bi, bi bi gwal bon ni bôda. I bon ba, ba bi nañ, ba yila mimpémba mi bôt, ba tééñgaga ki bôt bape. Ba bé boñ bôt béba. Yéhôva a bé bé le a nwas le i mam ma, ma kônde ke ni bisu. Jon, a bi kit le a nol bibéba bi bôt ni Ntida malép.

Ndi mut wada a bé mahéñha. A bé gwés Yéhôva. Jôl jé li bé le Nôa. A bééna nwaa wada ni bon bôlôm baa. Môl map ma bé le Sém, Ham ni Yafet. Hiki wada wap a bééna nwaa. Yéhôva a kal Nôa le a bañ soso nkuu, inyu boñ le nye ni lihaa jé ba wo bañ i Ntida malép. Nkuu u yé soso kwémbé i i nla leñel ngii malép. Yéhôva a kal ki Nôa le a jubus binuga ikété nkuu, inyu boñ le yak gwo bi pei.

Nôa a bôdôl bañ nkuu i nlélém ngéda. Nôa bo lihaa jé ba bi tégbaha jam kiki bo 50 ma nwii i bañ wo. Ba bi bañ nkuu u, ndik kiki Yéhôva a bi kal bo. Mu ngéda i, Nôa a bi béhe bôt le Ntida malép u nlama lo. Ndi mut to wada a bi emble bé nye.

Ngéda ngeñ i jôp i nkuu i bi sôk i kola, kii i bi tagbe? Di béñge jam li.