PES 9
Base i maliga i nla lona we yéñe i boga!
1. Kii y’a pémél bés ibale di ntiige “bebee ni Djob”?
YÉHÔVA a ngwés bôt ba nsélél nye. Ibale u mbégés Yéhôva, a’ sayap we hanano ni dilo di nke lo. Bibel i nkal le: “Kôôgana bebee ni Nyambe, ndi yak nye a’ kôôge bé bebee.”—Yakôbô 4:8
2. Lelaa di nla tiige bebee ni Djob, lelaa hala a’ hôla bés ngéda di nsoohe?
2 Inyu boñ le u tiige bebee ni Djob, u nlama nigil gwélél Bañga yé. Ngéda u nsoohe inoñnaga ni sômbôl yé, Yéhôva a’ emble masoohe moñ, a’ timhe ki mo. Ñôma Kristô le Yôhanes a tila le: “Ndi maként di gwé bisu [bi Nyambe], mo mana le ibale di nyagal nye jam kingéda sômbôl yé, wee a nôgôl bés. Ndi i ba ki le di nyi toi le a nôgôl bés inyu to kinje jam di nyagal nye, wee di nyi ki le di gwé yaga mam di bi yagal nyeni.”—1 Yôhanes 5:14, 15.
3-7. Lelaa di nla kôs pék Djob, ni lelaa i yé le i hôla bés?
3 I ngii mam momasôna, kii u mba u ntiige bebe ni Djob ha nyen a’ ti we pék i yi kena mam ma niñ yoñ. Bibel i nkal le: ‘Ibale wada ikété nan a nhañba pék, a kônde bat yo Nyambe.’—Yakôbô 1:5.
4 Lelaa pék i nlôl ni Djob i nla hôla we? Jam li bisu, i nla hôla we i yi mam ma mbébél Yéhôva. U nla ki nigil inyuki mam mana ma yé mabe ni jam u nla boñ i tjél mo. Nya yi ini i nla kéñ we i kolba ngandak mam mabe ma bôt ba nkôs. Kii héga, nôgôl maéba ma Djob ma ma nkal le di ba mapubi ikété bihiumul gwés i nkéñ litén li Djob ikolba mém ma ngi ngôôba, makon ma nlôl i ndéñg, mabii mabe ni mabos.
5 Kinje jam lipe pék i nlôl ni Djob i nla bôñôl we? I nla hôla we le u yi nôgda nseñ niñ. I nla hôla we i yoñ bikidil bilam i mam ma niñ kii bo yi gwélél moni. W’a la noñ mam ma gwé yéñe, ndi u tjél boñ mam ma nti nseñ u ndék ngéda.
6 Pék i Djob i nla ki hôla we ikété maada moñ ni bôt bape. U nla bana niñ lihaa i i nkônha maséé. U nla hôlôs mawanda ma nom ni ma maliga ni bôt bape. Bôt, to ba ba nsélél bé Djob, b’a ti we lipém.
7 Li li nloo momasô, pék i Djob y’a néhi we mis i tibil tehe mam ma niñ. Hala a’ hôla we i yémbél mandutu ma niñ momasô. W’a nun bilôl ni maséé i ba bé we piñgla to yodop. Litehge joñ li niñ li ga hôla we le u bana mbôô u mahoñol ni u nyuu.—Bingéngén 14:30; Yésaya 48:17.
8. Ibale u nsélél Djob, kii w’a kon bé woñi?
8 Ibale u nsélél Djob li maliga, w’a kon ha bé woñi kii bet ba nsélél bé nye. Inyule u nyi le bawoga ba niñ ha bé nyo ikété soñ, w’a kon ha bé bo woñi. Inyule u gwéne mbônga Djob bôdôl le a’ tugul bawoga, w’a kon bé nyemb woñi. Hala kii u nyi ki le Djob a yé ngui momasô, w’a kon bé liemb, to ngwe’ woñi.—Yôhanes 8:32.
Bôt ba téé sép b’a kôdôl hisi
9-11. Bonjee b’a niñ i Paradis, bonjee b’a niñ bé mu?
9 Ibale u ntiige bebe ni Djob, w’a kon bé bilôl woñi. Kiki di ntehe, Bibel i bôk i pôdôl ngandak mam mabe di ntehe i len ini. Yéhôva a nkal bés le mam mana ma yé inyu ngim ngéda; ndék ngéda wee Ane Djob y’a yilha hisi paradis.—Lukas 21:10, 11, 31; 23:43.
10 Ndik bet ba ntiige bebee ni Yéhôva ni gwélél nye bon b’a niñ i Paradis. Bibel i nkal le: ‘Ndék ngéda, béba mut y’a ba ha bé; w’a tibil yaga toñol homa wé, ndi a’ ba ha bé. Ndi bôt ba suhulnyu bon b’a kôdôl hisi, b’a nok maséé makeñi inyu ngandak nsañ.’—Tjémbi 37:10, 11.
11 Bôt ba miño mi nledga ba ba ntjél nôgôl mambén ma Djob ma téé sép b’a nimis biniñ gwap i boga ni boga. (2 Tésalônika 1:8, 9) B’a ba ha bé ki. B’a koba Satan ni mimbuu mimbe nwé i nyemb boga. (Masoola 20:10, 14) Ndi bet ba nigil i yi Yéhôva ba gwélak ki nye b’a kon ngandak maséé ikété Paradis hana isi.
Bilôl bi maséé bi mbuma ñañ!
12. Kinje jam Bibel i nkal inyu bilôl?
12 Yéhôva a ntééda mam ma hélha kiyaga inyu bet ba ngwés nye! Tehe ki yom Bañga yé i nkal inyu niñ i Paradis hana isi:
Ngandak bijek: “[Bijek gw’a] ba ngandak hana ’isi ngi mababat ma dikôa. Matam mé ma sôghaga kikii i lébanôn; yak bôt ba nkoñ ba took ki kii bayôôma ba ’isi.”—Tjémbi 72:16.
Mandap malam: “B’a oñ mandap, ba yén ki mu”.—Yésaya 65:21.
Nson u u nkônha maséé: “Mintebek nwem mi bôt ki nw’a togbene minson mi moo map ntandaa ngéda. B’a kéba bé ni nson mbelek.”—Yésaya 65:22, 23.
Kon w’a ba ha bé: “Mut nye kii nye a nyééne mu nkoñ u a’ kal ha bé le: ‘Me nkon.’”—Yésaya 33:24.
Bilem gw’a mal: “Ha ngéda i yon mis ma bandim m’a yiblana, yak ni maôô ma bandok m’a loñla. Ha ngéda i yon bôk mut y’a him kikii nlôm ngôlôñ; hilémp hi ngingiba hi’a sék.”—Yésaya 35:5, 6.
To ndutu, to njiiha, to nyemb: “[Nyambe] a’ tos gwiiha gwobisôna i mis map, nyemb y’a ba ha bé, to malep, to nlondok, to njiiha b’a ba ha bé. Mam ma bisu ma mal tagbe.”—Masoola 21:4.
Gwét gw’a mal: “[Nyambe a mélés] a mélés gwét letee ni lisuk li hisi.”—Tjémbi 46:10.
Niñ boga: “Bôt ba téé sép b’a kôdôl hisi, b’a yén ki mu mba ni mba.”—Tjémbi 37:29.
13. Njee nyetama a nla yilha hisi hini paradis, ni inyuki?
13 Bôt ba bi la bé lona nya mam ini, ndi Yéhôva a gwé ngui i boñ to kinje jam a nkal le a’ boñ. Yom yo ki yo i nla bé kéñ nye i boñ jam a ngwés boñ. Bibel i nkal le: “Bañga yo ki yo i nlôl yak Nyambe i nyep bé ni ngui.”—Lukas 1:37.
14. Lelaa u nla boñ i kil i njel i nkena i niñ boga?
14 Ni njel babok mbôgi bé, Yéhôva a naña bôt bobasôna to he homa ba yé le ba “jubul nwemel ntitigi” ni le ba kil i njel i nkena i niñ boga. Boñ le u ba ikété bôt ba masoda ba ba neebe nsébla unu. Boñ le u gwélél base maliga ni le u kon maséé ni bisai bi Yéhôva i boga ni boga!—Matéô 7:13, 14.