YIGIL 6
Imbe botñem i yé inyu bawoga?
1. Ñañ nlam inyu bawoga u yé le kii?
Ngéda Yésu a bi pam i tison i Bétania i pañ Yérusalem, liwanda jé Lasarô a bé nwok dilo dina. Yésu bo Marta ni Maria, bilôk binyañ bi bôda bi Lasarô, ba ke i soñ. Ha nyen limut li hoo kodba ni bo. Baa u nla nôgda masé Marta bo Maria ba bi kôhna ngéda Yésu a bi tugul Lasarô?—Añ Yôhanes 11:21-24, 38-44.
Marta a bé a nyi ñañ nlam inyu bawoga. A bé a nyi le Yéhôva a ga témbna bawoga le ba niñ hana isi.—Añ Hiôb 14:14, 15.
2. Kii ntagbe mbus nyemb?
Djob a bi kal Adam le: “U yé nluñ ték, w’a témp ki nluñ ték.”—BIBÔDLE 3:19.
Mut binam a yé nhegeg ni nluñ ték. (Bibôdle 2:7; 3:19) Di ta bé bihégél bi mbuu. Di yé bihégél bi minsôn, jon yom yo kiki yo ikété yés i niñ ha bé ngéda di nwo. I nyemb, boña a nsal ha bé, yak mahoñol ma mal. Jon Lasarô a bi la bé toñol mam ma bi tagbe mbus nyemb yé, inyule bawoga ba nyi bé to jam.—Añ Tjémbi 146:4; Ñañal 9:5, 6, 10.
Baa Djob a boñ le bôt ba son njonok ikété bee hié? Hala kii Bibel i ñunda le bawoga ba nyi ha bé to jam, biniigana bi bee hié bi yé bitembee, bi ñôbôs yak jôl li Djob. Djob a maa bana bé to mahoñol le a ligis bôt ikété bee hié inyule hala a nsiidaha nye ñem.—Añ Yérémia 7:31.
Béñge vidéô Libak li bawoga li yé lelaa?
3. Baa bawoga ba nla pot ni bés?
Bawoga ba nla bé pot, to nok. (Tjémbi 115:17) Ndi biañgel bipe bi bi témb i pes i satan, bi nla pôdôs bôt i pônga we bawoga. (2 Pétrô 2:4) Yéhôva a nsôña bés i noode kwélés bawoga. —Añ Ndiimba Mbén 18:10, 11.
4. Njee a ga loo i bitugne?
Didun di bôt di di yé nwok di ga témb i niñ hana isi. Ngandak ikété ba ba bi boñ bibéba bi mam inyule ba bi yi bé Djob, ba ga tuge.—Añ Lukas 23:43; Minson mi baôma 24:15.
Bôt ba ga tuge, ba ga nigil i yi Djob. Ba ga unda le ba nhémle Yésu ibale ba nôgôl nye. (Masoola 20:11-13) Ikété bôt ba ga témb i niñ, ndik bet ba ga boñ mam malam bon ba nkôhna niñ boga ni boga hana isi.—Añ Yôhanes 5:28, 29.
5. Bitugne bi niiga bés le Yéhôva a yé lelaa?
Djob a bi ti botñem i bitugne ngéda a bi ep Man wé le a wél inyu yés. Bitugne bi niiga bés karis i Yéhôva ni ngandak gwéha a gwé inyu yés. Baa njee u ga gwés tehe tôbôtôbô i bitugne?—Añ Yôhanes 3:16; Rôma 6:23.