Nsohop a noode Yésu

I mbus sôble i Yésu, mbuu mpubi u kena nye i ñoñ. Kiki a bi je bé to yom 40 ma dilo, njal ikeñi i gwel nye. Ha nyen Nsohop a bi lo i noode Yésu, a kal nye le: ‘Ibale u yé toi Man Djob, kal i ngok ini le i yila bret.’ Ndi Yésu a timbhe nye ni njel Bitilna le: ‘I yé ntilga le, inyu niñ, u gwé ngôñ ni ngim jam i nloo bijek. U nlama emble hiki bañga Yéhôva a nkal.’

Ndi Nsohop a bi telbene bé ha, a bi kônde noode Yésu, a kal nye le: ‘Ibale u yé toi Man Djob, bet i homa témpel nu a nlôôha ba i ngii, u suumbe isi. Inyule i yé ntilga le Djob a ga om biañgel gwé inyu begee we.’ Inyu timbhe nye, Yésu a bi kônde gwélél Bitilna: ‘I yé ntilga le u nlama bé noode Yéhôva.’

Ni Satan a éba Yésu biane gwobisôna bi nkoñ isi, lingwañ, ni lipémba jap, a kal Yésu le: ‘M’a ti we biane bini gwobisôna lôñni lipémba jap, ibale u mbégés me, ngélé yada ndigi.’ Ndi Yésu a timbhe le: ‘A Satan, nyodi me ha! I yé ntilga le, u bégés ndigi Yéhôva nyetama.’

Ha nyen Nsohop a bi nyodi nye bisu, biañgel bi lo, bi kébél Yésu bijek. Ibôdôl yokel nyen Yésu a bi bôdôl añal ñañ nlam u Ane. Inyu bôlô i nyen Djob a bi om nye hana isi. Bôt ba bé gwés mam Yésu a bé niiga bo, jon ba bé noñ nye to hee homa a bé ke.