PES 52

A njés dikôô di bôt ni njel ndék bret ni tjobi

MATÉÔ 14:13-21 MARKÔ 6:30-44 LUKAS 9:10-17 YÔHANES 6:1-13

YÉSU A NJÉS 5 000 DI BÔLÔM

Baôma 12 ba nkon maséé i hônd likalô i Galiléa, ba ñañle Yésu ‘mam momasôna ba mboñ ni niiga.’ Ibabé pééna ba yé nwaak, ndi ba gwé bé to ngéda i je inyule ngandak bôt i nlo i kenek. Jon Yésu a nkal bo le: “Lona bébotama i homa a yé nwee, ni noi ndék.”—Markô 6:30, 31.

Ba mbet i môñgô bebee ni Kapernaum, ba nke i pes likôl i Lom Yordan, ii pes i Bétsaida. Ngandak bôt i ntehe bo ba nke, bape ba nok le ba nke. Bobasôna ba ñôt ngwéé mu ngwañ lép, ba yé ha ngéda môñgô u ntelep.

Ngéda Yésu a nyodi i môñgô, a ntehe limut, a nkônôl jo ngoo inyule li yé kiki mintômba mi mi gwé bé nkena. Jon a nkahal “niiga bo ngandak mam” i i mbéñge Ane. (Markô 6:34) A mélés ‘yak bôt ba nkon.’ (Lukas 9:11) Kiki ngéda i ntagbe, banigil ba nkal nye le: “I homa nunu a yé ñoñ, yak ngéda i ntagbe ngandak; huuha mamut kayéle ba ke i mambai le ba sômbôl bomede bijek.”—Matéô 14:15.

Yésu a ntimbhe bo le: “Ba nlama bé ke; tina bo bijek bébomede.” (Matéô 14:16) To hala kiki Yésu a nyi jam a ga boñ hanano, a noode Filipô ni ini mbadga le: “Hee d’a sômbôl bret inyu boñ le i bôt bana ba je?” Filipô nyen a kôli timbhe mbadga ini, inyule a nlôl bebee ni Bétsaida. Ndi nsômba bret u nla bé hôla. Bôlôm ba yé 5 000. Ibale ba nkônde bôda ni boñge, nsoñgi u nla ba ngélé iba. Filipô a ntimbhe le: “To ibale di nsomb bret bi mbôgôl dinariô iba, gw’a kola bé le hiki mut a bana ndék mu.”—Yôhanes 6:5-7.

Yésu a yé pot ni hipéda mañge munlôm nu a gwé bret bitan ni bon ba tjobi diba

Bebek inyu unda le ba nla bé jés bôt bobasôna, Andréa a nkal le: “Mañge munlôm wada a yé hana, a gwé bret bitan ni bon ba tjobi iba. Ndi baa hala a’ kola inyu ngandak bôt ini?”—Yôhanes 6:9.

Di yé ipôla sôñ Matumb ni sôñ Matôp, ndék ngéda bisu bi Pasa i nwii 32 N.Y., i ngii hikôa, bikai bi yé kwem kwem. Yésu a nkal banigil bé le ba yis bôt isi, mintôñ mi 50 ma bôt ni mintôñ mi 100 bôt. A nyoñ bret bitan ni tjobi diba, a nti Djob mayéga. I mbus, a mbek bret, a kit tjobi. Yésu a nti gwo banigil bé le ba kébha gwo bôt. Hélha jam, bôt bobasôna ba nje ba nuu!

I mbus, Yésu a nkal banigil bé le: “Koda bikét bi nyégle, le to yom i ôbi bañ.” (Yôhanes 6:12) Ba nkot, ba nyônôs bisel 12!