Lasarô a ntuge

I mbus le Yésu a mboma Marta bo Maria bebee ni Bétania, ba nke i soñ Lasarô. I yé hôk liaa ni soso ngok i nyip lijubul. Yésu a nkal le: “Ni héya ngok.” Marta a ta bé neebe inyule a ta bé nok inyuki Yésu a nkal hala. Marta a nkal le: “A Nwet, nano mim wé u nlama numb, inyule a bi wo hala a yé dilo dina.” Ndi Yésu a nkal nye le: “Baa me nkal bé we le ibale u nhémle, w’a tehe lipém li Nyambe?”​—Yôhanes 11:39, 40.

Ba nhéya ni ngok, i mbus, Yésu a mpaa mis mé i ngii a soohe: “A Ta, me nti we mayéga inyule u bi emble me. Ni maliga, me nyi le u ñemble me hiki ngéda; ndi me mpot inyu limut li nkéña me hana, inyu boñ le yak jo li hémle le wen u bi ep me.” Masoohe ma Yésu i mbamba ma ñunda bôt ba yé ha le jam a nsômbôl boñ li mbôña ni ngui Djob. I mbus Yésu a nlond ni kiñ keñi le: “A Lasarô, pam!” Ni Lasarô a mpam, moo ni makôô nlébék ni mabadô, yak su wé u bak nlébék ni libadô. Yésu a nkal le: “Hohlana nye, nwaha nye a kenek.”​—Yôhanes 11:41-44.

I Lôk Yuda i i nlo i lédés Maria bo Marta i ntehe i jam li hélha li, i nhémle Yésu. Ndi bape ba nke i añle Farisai jam Yésu a mboñ. Farisai ni baéga biprisi bi naña boma i Ntôñ bakéés bakeñi i Lôk Yuda. Yak Kaifa prisi keñi a yé mu. Bape ikété yap ba ntjelel le: “Kii di nlama boñ inyule i mut nunu a mboñ ngandak biyimbne. Ibale di nwas le a ke ni bisu, bôt bobasôna b’a hémle nye, ha nyen bôt ba Rôma b’a lo inyu kadal bés homa wés ni loñ yés.” (Yôhanes 11:47, 48) To hala kiki ba nok mbôgi le Yésu “a mboñ ngandak biyimbne,” i bôt bana ba ta bé maséé le Djob a mboñ mam ma, ni njel Yésu. Ba ntôñ ndugi inyu bitel gwap.

Bitugne bi Lasarô bi bi lôôha tééñga Sadukai, mu kiki i nhémle bé bitugne. Kaifa, mut Sadukai a nyoñ hop, a kal le: “Ni ta bé nok jam li yé tagbe, ni nhek bé pék le i yé loñge inyu nan le mut wada a wo inyu litén, iloole loñ yosôna i tjiba.”​—Yôhanes 11:49, 50; Minson mi baôma 5:17; 23:8.

Mahoñol ma Kaifa ma nlôl bé “ni nyemede,” Djob nyen a ntinde nye i kal hala mu kiki a yé prisi keñi. Inyu yé, Yésu a nlama nôla inyu boñ le a ke ha bañ ni bisu i  suhus bémbe ni kunde i baéga bibase ngii Lôk Yuda. Ndi mbañ Kaifa i ñunda le ni njel nyemb yé, Yésu a nlama ti binoñ he inyu Lôk Yuda yotama bé, ndi yak inyu “bon ba Nyambe ba ba bé ntjamak.”​—Yôhanes 11:51, 52.

Kaifa a bi pam i tinde Ntôñ bakéés bakeñi i ôô jimp inyu nol Yésu. Baa i nla ba le Nikôdémô, wada ikété Ntôñ bakéés nu a nôgla ni Yésu a nyeelene nye jam li? To ibale kii, Yésu a mpala nyodi i Yérusalem inyu boñ le a nôla bañ ilole ngéda Djob a bi téé i nkola.