PES 3
Hiun—“Ibale mut a ntogha inyu maasañ”
“Sista yada ikété likoda i bi pot me béba, i soman me le, me nyen me nip moni nwé. Kii bilôk bikéé bi likoda bi bi yi hala, bape ba bi ke nye mbus. Ndi mbus ngéda, sista a bi sôk léba le me yé ngi nsohi. To hala kii a bi lo i bat me nwéhél, me bi nôgda ikété yem ñem le ma ga la bé me nwéhél nye inyu yom a bi boñ me.”—Linda.
BAA u yé kii Linda? Baa maboñog ma bikristen bipe ma bi babal we? Hala a nsiidaha ñem le ngim bikristen i bi tjôô maliga inyule maboñog ma lôktata ipe ma bi tééñga bo. Baa hala a yé toi mbale inyu yoñ?
Wee e njee a’ “bagal bés ni gwéha Nyambe”?
Bikristen bi nlama gwéhna. (Yôhanes 13:34, 35) Ndi to hala, i nla ba ndutu i nwéhél manké nu a bi babal bés. Ibale manké a bi unbaha we, wonyu ni njôghe bi nla tééñga we.—Tjémbi 55:13.
I yé mbale le Bibel i niiga le ngim mangéda, kristen i “ntogha inyu maasañ.” (Kôlôsé 3:13) Ndi ngéda li mpémél we, ha nyen u yé u nôgda le li ta bé isii jam. Kii nla ni hôla we ngéda i? Béñge mana matiñ ma Bibel maa:
Isañ wés nu a yé ngii a ntehe hiki yom i mbôña. Yéhôva a nyi hiki yom i ntagbe. A ntehe yak ngi telepsép di nkôs ni mandutu i nlona. (Lôk Héber 4:13) Ndi iloo hala, Yéhôva a nôgda njôghe yés ngéda di yé ikété bikuu. (Yésaya 63:9) A nla bé nwas le “njiiha to bikuu” to yom yo ki yo, hala we to manké wés, le a “bagal bés ni gwéha Nyambe.” (Rôma 8:35, 38, 39) Baa u gwé ngôñ i nigle Yéhôva? U neebege bañ le yom yo ki yo, to mut nye ki nye, a bagal we ni Yéhôva.
Nwéhél mut i nkobla bé le u yé maséé ni yom a mboñ. Ngéda u nwéhél bôt ba bi unbaha we, hala a nkobla bé le u nyan béba ba bi boñ we, tole u neebe le i bé loñge jam. Hala a nkobla bé to le u ntémb bôt ba pes, tole u nit bo. Bigda le Yéhôva a neebe bé le béba i yé loñge jam, ndi a nwéhél yo ibale a gwé loñge njom i boñ hala. (Tjémbi 103:12, 13; Habakuk 1:13) Yéhôva a nti bés makénd le di nwéhél bape, inyule a ngwés le di nigle nye. Bibel i nkal le Yéhôva a ntééda “bé ki to hiun hié mba ni mba.”—Tjémbi 103:9; Matéô 6:14.
Di ntjél tééda hiun inyu loñge yés. Ni imbe njel? Béñge le hini héga: U mbada ngok i nyét bé. Ndi, u sambal woo u u gwé ngok. U kida u gwé yo. Bebeg le u ga bana bé ndutu i begel yo inyu ndég ngéda. Ndi, ibale u noode nom ni yo, baa hala a ga ba yom i ntomb? Baa u nla nom ni yo ndég manut? Baa u nla lédés inyu ngim ngeñ, tole u nla nom ni yo ngim kel? Ibabé nkaa, woo woñ u mbôdôl sôghe we! Baa ngok ini i héñha kilô? To! Ndi, inyule u nom u bééga yo, jon u nôgda le i nyét. Nlélém jam won u mpémél mut nu a ntééda hiun. Ngéda yom i unbaha we, to ibale i yé isii jam, kii u ntééda jo ntandaa ngéda, hala nyen njôghe yoñ i mba keñi. Jon, hala a nhélés bé bés le Yéhôva a nti bés makénd le di tééda bañ hiun. Ni mbale, ngéda di nwéhél bôt bape, hala a yé inyu loñge yés.—Bingéngén 11:17.
Di ntjél tééda hiun inyu loñge yés
“Me bi nôgda wengoñle Yéhôva nyemede nyen a bé pôdôs me”
Kii bi hôla Linda, le a tééda bañ hiun inyu yom bilôk biké bi bi boñ nye? Ikété gwom bi bi hôla nye, a bi yoñ ngéda i tibil wan bipes bi Bibel, bi bi ntina makénd i nwéhél. (Tjémbi 130:3, 4) Ndi yom i bi lôôha tihba Linda ñem i bé le, a bi tibil nok le Yéhôva a ga nwéhél bé nye, ibale a nwéhél bé bôt bape. (Efésô 4:32–5:2) Ngéda Linda a nhoñol lelaa gwom a bi nigil bi bi tihba nye, hala a bi tinde nye i kal le: “Me bi nôgda wengoñle Yéhôva nyemede nyen a bé pôdôs me.”
Ni ngéda, hiun hi Linda hi bi mal. A bi nwéhél, a hôya ki yom sista i, i bi boñ nye. I len ini, nye ni sista i, ba bi yila banga mawanda. Linda a nkena nson we inyu Yéhôva ni bisu. Jon, yak we, ba nkwook nkaa le, Yéhôva a nsômbôl hôla we i boñ nlélém jam.