Bôt juem ba mpei inyu jôp i mbok yondo

Nôa, lihaa jé, ni binuga ba bi jôp i nkuu. Ha nyen Yéhôva a kwés nwemel, nop a bôdôl no. Nop a bi no ngandak, kayéle nkuu u bôdôl leñel i ngii malép. Hisi hiosôna hi bi yon ni malép. I bibéba bi bôt gwobisôna bi bi tjél jôp i nkuu, bi bi wo. Ndi Nôa ni lihaa jé ba bi pei. Hégda maséé ba bi nôgda inyule ba bi nôgôl Yéhôva!

Nop a bi no 40 ma dilo, juu ni njamuha. I mbus ngim ngéda malép ma kahal sôs ndék ni ndék. Nkuu u bi sôk tegep i ngii dikôa. Ndi malép ma bé ma ngi yii homa nyensôna, jon Nôa ni lihaa jé ba bi la bé hoo pam i nkuu.

Malép ma bi sa ndék ni ndék. Jon Nôa ni lihaa jé ba bi yégle ikété nkuu iloo nwii wada. Ngéda hisi hi bi num, Yéhôva a kal bo le ba pam i nkuu, inyu niñ hisi hi bé wengoñle mbok yondo. Ba bi kon maséé ngandak inyule Yéhôva a bi péyés bo. Jon ba bi ti nye bisesema inyu unda Yéhôva mayéga map.

Yéhôva a bi kon maséé ni bisesema bi. A bôn ki bô le, kekikel a ga tjé ha bé gwom gwobisôna i nkoñ isi ni ntida malép. A bi pémés nyum mu i ond, inyu ti bo yimbne u mbônga wé. Baa u ma tehe nyum?

I mbus mam mana, Yéhôva a kal Nôa ni lihaa jé le ba gwal bon, ba bôl, ba yônôs ki hisi.