Jam jo kiki jo li bi la bé téé bo

Bôk mut yada i bé yén hiki kel i nwemel témpel, i yaglak. Kel yada, i mbus kosi, a tehe Pétrô bo Yôhanes ba yé ke jôp i témpel. A kal bo le: ‘Soho, hôlna me ni ndék yom.’ Pétrô a kal le: ‘Me gwé ngim yom i i nloo moni, yon m’a ti we. I jôl li Yésu, telep, u kee!’ Ha nyen Pétrô a bi hôla nye i telep, ni nye a telep a bôdôl ke! Limut li bi lôôha kon maséé ni manyaga ma, ngandak i bôdôl hémle.

Ndi biprisi, ni bôt ba bé sébél le Sadukai, ba bi unup. Ba gwel bana baôma, ba kena bo i ndap bikééhene, ba bat bo le: ‘Njee a nti bé ngui i mbuubaha i mut nunu?’ Pétrô a timbhe bo le: ‘Yésu Kristô nyen a nti bés i ngui i, i Yésu nu ni bi nol.’ Baéga base ba lond le: ‘Ni sima ha bañ jôl li Yésu hana!’ Ndi baôma ba kal le: ‘Di nlama ndik pot inyu yé. Di yé mbén i nwas.’

Ndik kiki ba bi pémés Pétrô bo Yôhanes mu ndap bikééhene, ba pala ke i koba banigil bape, ba toñle bo kii yosôna i mpémél bo. Bobasôna ba soohe Yéhôva ntôñ, ba bat nye le: ‘Soho ti bés makénd le di ke ni bisu i sal nson woñ.’ Yéhôva a ti bo mbuu wé mpubi, ni bo ba ke ni bisu i téé likalô ni i mélés bakokon. Hala a bi boñ le nsoñgi u bahémle u bé bet ndigi, bet ni bet. Bôt ba ntôñ Sadukai ba bé kil baôma njôñ, kayéle ba gwel bo, ba leñ bo i mok. Ndi nlélém u, Yéhôva a om añgel yada, i yibil makôga ma ndap mok, i kal baôma le: ‘Ni témb i témpel inyu niiga bôt.’

I kegla i ba noñ ha, ba kal ntôñ Bakéés, hala wee likoda li baéga base, le: ‘Ndap mok i kwihi, ndi bôt ni bi gwel ba nke! Ba yé nyoo i témpel, i niiga bôt!’ Ba témb ba gwel baôma, ba kena bo bisu bi ntôñ Bakéés. Ha nyen prisi keñi i kal le: ‘Di bi téé bé mbén le ni podok ha bañ jôl li Yésu hana!’ Ndi Pétrô a timbhe bo le: “Di nlama nôgôl Nyambe iloo bôt.”

Baéga base ba unup, ba kahal yéñ manjel i nol baôma. Ndi mut wada mu ntôñ Farisai, le Gamaliel, a yoñ hop, a kal le: ‘Yoña yihe! I nla ba le Nyambe a yé ni bôt bana. Baa ni gwé toi ngôñ i jôs Nyambe?’ Ni bo ba emble nye. Kiki ba bi mal bép baôma disôô, bakéés ba tiimba téé bo mbén le ba añal ha bañ ñañ nlam; i mbus ha, ba nwas bo. Ndi hala a bi gwel bé baôma. Ni makénd momasôna, ba bi ke ni bisu i añal ñañ nlam, ikété témpel, yak mandap ni mandap.