Base bikristen i ntjama ni ngandak biloñ

Baôma ba bi nôgôl oda i Yésu, ba tjam miñañ minlam ni nkoñ isi wonsôna. I nwii 47 N.Y., lôk kéé i tison Antiôkia i bi om Paul bo Barnaba i likiiña li likalô. Batéé likalô bana boba, ba bi hiôm ni Asia ntitigi nyensôna, i bahoma kiki bo Derbé, Listra ni Ikônium.

Paul bo Barnaba ba bi tééne hiki mut likalô, mingwañ mi bôt kiki diyeyeba, boñge kiki mimañ mi bôt. Ngandak i bi leege maliga inyu Kristô. Kel yada, ngéda Paul bo Barnaba ba bé tééne Sergiô Paulô​—ngomin Kiprô​—likalô, mut makañ wada a noode kéñ bo njel. Ndi Paul a añle mut makañ le: ‘Yéhôva a nkolba we.’ Kunda yada, mut makañ a kwo ndim. Kiki ngomin Paulô a ntehe hala, a yila nhémle wada.

Paul bo Barnaba ba bé téé likalô hiki homa: i mandap, i bibôm, i minloñ, ni mandap ma bibégés ma Lôk Yuda. Ngéda ba bi mélés bôk mut yada, i Listra, kiki bôt ba ntehe manyaga ma, ba hoñol le Paul bo Barnaba ba yé banyambe, ba bôdôl bégés bo. Ndi Paul bo Barnaba ba sôñga bo i boñ hala, ba kal bo le: ‘Béghana Nyambe nyetama! Bés di yé ndik bôt.’ Ndi, ngim bôt i Lôk Yuda i kéñha limut ni Paul. Limut li ôm nye ngok, li pémés nye i tison, li yék nye nyoo, li hoñlak le a nwo. Ndi Paul a bé a ngi yii yômi! Nlélém ngéda, lôk kéé i bi hôla nye, i témbna nye ikété tison. I mbus, Paul a témb i Antiôkia.

I nwii 49 N.Y., Paul a bi ke i likiiña li likalô lipe. Kiki a bi mal yuuga lôk kéé i Asia ntitigi, a ke ni bisu i téé likalô bitison bipe bi Érôpa kiki bo: Atén, Éfésô, Filipi, Tésalônika ni bahoma bape. Silas, Lukas, ni hiloga hiada le Timôtéô, ba bi ke ni Paul. Ba bi sal ntôñ i uñgus makoda ni i hôla mo le ma ôm siñ ikété hémle. Paul a bi yén i Korintô nwii wada ni pes, inyu lédés lôk kéé i ba yééne mu tison i. A bi téé likalô, a niiga, a tilna ngandak makoda bikaat. Bôlô i moo a bé sal i bé i kôñôô mandap ma mabadô. I mbus ngéda, Paul a témb i Antiôkia.

I mbus ngim ngéda, hala wee i nwii 52 N.Y., Paul a bi ke likiiña li likalô li nyônôs aa, a bôdôl i Asia nu hiônk. A kena liké jé nonok, ikepam i ñombok, i tison Filipi, ilole a nsôs i tison Korintô. A tégbaha ngandak nwii i tison Éfésô, a niigaga, a mélhak bakokon, a hôlga makoda. A bé ti ki minkwel mi mbamba hiki kel ikété ndap suklu yada. Ngandak i bi emble nye, i héñha ki. Kiki a ñañal ñañ nlam ikété ngandak minkoñ, Paul a sôk a ke i Yérusalem.