YIGIL 18

I yi niiga baemble

1 Korintô 9:19-23

I SEM KWEP: Tinde baemble i hek pék inyu boñ le ba nôgda le ba nigil jam li mahee.

Hoñol mam baemble ba nyi yôha. U tiimba ndik bañ kal bo mam ba mbéna nok, ndi hôla bo i bana litehge li mondo li nkwel.

U lôôha bañ lep ngéda i toñol matode ba nyi yôha, ndi yoñ ngéda i tibil toñle bo mahoñol ma mondo.
Boñ nyiña, u soñda ki. Ibale u nla, gwélél miñañ mi mi nlôôha bé yiba, tole manwin ma ma nsôk pam, inyu toñol balôm ba mahoñol. Tibil ôt pék kiki u mba u nkôôba nkwel woñ, u yéñ ki maada ma ma yé ipôla nkwel woñ ni miñañ, tole ni manwin u gwé ngôñ i sima.

Kiki u mba u nwan nkwel woñ, sélés boña woñ ni njel mambadga mana le: ‘Kii? Inyuki? Imbe ngéda? Hee? Njee? Ni lelaa?’ Munu mambadga mana, pohol mambe u ga bat, u timbhege ki mo mu kiki u nkena nkwel woñ, inyu boñ le u kis bañ bôt ’ilo.
Unda nseñ u biniigana u nti. Toñol lelaa ngim matode mu Bitilna i nla hôla baemble ikété niñ yap i hiki kel. Sima dihéga di tôbôtôbô, maboñok, ni bilem, bi bi ntihba baemble.