Lelaa bipôdôl gwoñ bi nla lémél Yéhôva?

I ngéda Yéhôva a bi hek bés, a bi ti bés loñge likébla li li yé ngap i pot. Jon a mbem le di tibil gwélél likébla li. (Añ Yakôbô 1:26) Lelaa di nla gwélél likébla li kayéle di ti Yéhôva lipém?

1. Lelaa di nla tibil gwélél likébla li?

Bibel i nti bés makénd le “kena ni bisu i tina makénd bé ni bé, ni i lédhana bé ni bé.” (1 Tésalônika 5:11) Baa u nyi ngim mut i i ngwés le ba ti nye makénd? Lelaa u nla ti nye makénd? U nla kal nye le u ngwés nye ngandak. U bigdaha ki nye bilem bilam a gwé. Baa u mbigda ngim nlôñ kaat u u nla ti i mut nu makénd? Minlôñ mi Bibel mi yé ngandak. U hôya bañ le bibuk gwés bi gwé mahee, ndi yak maboñok més. Jon i yé loñge i pot ni liyômba, ibabé i babaa i mut u yé pôdôs.—Bingéngén 15:1.

2. Bimbe bibuk kristen i nlama bé gwélél?

Bibel i nkal le: “Buk ibe yo ki yo i pémél bañ i manyo manan.” (Añ Éfésô 4:29) Hala a nkobla le di nlama bé gwélél minjôha mimbe, tole bibuk bi bi mbaabana. Di nlama ki tjél hilégé, ni i tôô mam ma bôt.—Añ Bingéngén 16:28.

3. Lelaa di nla bana bipôdôl bi bi nhôlôs?

I mam di mpot mon ma yé bés i ñem. (Lukas 6:45) Jon, i yé loñge le di bok mahoñol més i ngii mam ma téé sép, ma ma yé mapubhaga, ma ma kôli le di gwés, ma ma gwé jôl lilam. (Filipi 4:8) Inyu boñ le di bok mis més i ngii nya mam i, di nlama tibil pohol mintuk nwés ni mawanda més. (Bingéngén 13:20) I yé ki loñge le, iloole di mpot, di bôk ndugi di hek pék. Di badba ki le, lelaa bôt bape ba ga nok bibañga gwem? Bibel i nkal le: “Bibañga mut a mpot nye ngi hek pék, bi yé kiki pansoñ i i nhoo, ndi hilémb hi bôt ba pék hi yé matibla.”—Bingéngén 12:18.

KÔNDE TÉM

4. Lelaa di nla tibil gwélél hilémb hiés?

I ma pémél bésbobasôna le di pot ngim jam, i mbus di tam. (Yakôbô 3:2) Añ Galatia 5:22, 23, i mbus ni kwélél mambadga mana:

• Inyu tibil gwélél hilémb hioñ, u nla soohe Yéhôva le a hôla we i hôlôs bimbe bilem? Imbe ngéda bilem bi, bi nla hôla we?

Añ 1 Korintô 15:33, i mbus ni kwélél i mbadga ini:

• Lelaa mawanda moñ ni mintuk u mpohol bi nla héñha lipodok joñ?

Añ Ñañal 3:1, 7, i mbus ni kwélél i mbadga ini:

• Imbe ngéda i yé loñge i mom nwee tole i bem loñge ngéda inyu pot?

5. Pot ndigi mam malam inyu bôt bape

VIDÉÔ: Pot “ndik mam ma nlédhana” (4:07)

• Mu vidéô, inyuki mankéé a bi tehe le a nlama héñha lipodok jé?

• Kii a bi boñ inyu héñha?

Añ Ñañal 7:16, i mbus ni kwélél i mbadga ini:

• Kii u nlama bigda i ngéda u nsômbôl pôdôl mut numpe béba?

Añ Ñañal 7:21, 22, i mbus ni kwélél i mbadga ini:

• Ibale mut a ñôbôs bés jôl, lelaa minlôñ mi Bibel mini, mi nla hôla bés i yan i jam li?

6. Pôdôs bôt ba lihaa joñ ni loñgeñem

VIDÉÔ: Gwéha ni njôôñ lipém bi ñat mahaa (3:08)

• Kii i nla hôla we i gwélél bibuk bilam inyu kwélés bôt ba lihaa joñ?

Añ Éfésô 4:31, 32, i mbus ni kwélél i mbadga ini:

• Mimbe mintén mi bibuk mi nhôlôs ndap lihaa?

Yéhôva a bi kal i mbamba le a ngwés man wé Yésu. Añ Matéô 17:5, i mbus ni kwélél mbadga ini:

• Lelaa u nla kôna Yéhôva i ngéda u nkwel ni bôt boñ ba lihaa?

I SEM KWEP

Bibuk gwés bi nla hôla bôt bape tole bi nla babaa bo. Jon, di nlama hek pék ilole di mpot, di yi imbe ngéda di pot ni lelaa di ga kal i jam li.

Mambadga ma mbigda

• Lelaa u nla tibil gwélél hilémb hioñ inyu hôla bôt bape?

• Mimbe mintén mi bibuk u nlama gwélél?

• Kii i nla hôla bés i bana bibuk bilam, ni bi bi nhôlôs hiki ngéda?

KÔNDE YÉÑ

Kii i nla hôla bés i bana bibuk bilam?

Kee ni bisu i gwélél hilémb hi bôt ba pék (8:04)

Kii i nla hôla we i waa pot mpuñgu?

“Baa i pot mpuñgu i yé toi béba?” (Kee i jw.org)

Béñge kii i nla hôla we i keñgle bibuk bibe.

Lelaa me nla nwas hilégé? (2:36)

Kee jw.org, béñge lelaa Yéhôva a bi hôla mut wada i yi gwel hilémb hié.

“Me bi bôdôl badba kii me mboñ i niñ yem” (Nkum Ntat, 1 Hikañ, 2013)