Di nit Nwet wés Yésu

1. Sômbôl i Yéhôva i yé le kii?

MUNU ngéda yés, sômbôl i Nyambe i yé le ñañ nlam u Ane u añlana ni nkoñ ’isi wonsôna. (Markô 13:10; 1 Timôtéô 2:3, 4) Bôlô Yéhôva i. Kiki i yé nseñ ngandak, jon a bi bééga yo Man wé Yésu. Di nyi le kiki Yésu nyen a nkena nson u, w’a mal ilole lisuk li nkola inoñnaga ni sômbôl i Yéhôva.—Matéô 24:14.

2. Kii di ga tehe munu yigil ini?

² Munu yigil ini, di ga tehe lelaa Yésu a ngwélél “nkol u maliga ni u pék,” inyu ti banigil bé biniigana ni i kena bôlô likalô ni nkoñ ’isi wonsôna. (Matéô 24:45) D’a tehe ki kii hiki wada wés a nla boñ inyu nit Yésu ni nkol u maliga ni u pék.

YÉSU A NKENA BÔLÔ LIKALÔ

3. Imbe kunde Yéhôva a bi ti Yésu?

³ Yésu nyen a nkena likalô. Kii i nyis bés hala? Ndék ngéda ilole a mbet i ngii, a bi bomna ni banigil bé bahogi i hikôa hiada i Galiléa, a kal bo le: “Me nkôhna kunde yosôna i ngii ni ’isi.” I ngéda a bi mal kal bo hala, a bi kônde le: “Jon kena, ni yilha bôt ba biloñ gwobisôna banigil.” (Matéô 28:18, 19) Jon, ikété minson Yéhôva a bi bééga Yésu, wada u bé le a kena nson likalô.

4. Kii i nyis bés le Yésu a ngi ken-ga nson likalô?

⁴ Yésu a bi kal le ñañ nlam w’a añlana “biloñ gwobisôna” ni le a ga ba ni banigil bé “dilo tjodisôna letee ni mamélél ma nkoñ ’isi.” (Matéô 28:20) Bibañga bi, bi ñéba le Yésu a ngi ken-ga nson ñañ nlam letee ni ngéda yés.

5. Kii di mboñ inyu yônôs mbañ i yé i kaat Tjémbi 110:3?

⁵ Yésu a bé hoñol bé le baañal ñañ nlam ba yé le ba hañ i mamélél ma nkoñ ’isi. A bé yi le i mbañ ini i ga yon: “Bôt boñ ba nti bomede ni ngôñ i kel lipémba joñ.” (Tjémbi 110:3) Ibale u mbéna añal ñañ nlam, wee u yé sal ni Yésu ni nkol u maliga ni u pék inyu boñ le i mbañ ini i yon. Bôlô i nke ni bisu, ndi mandutu ma yé nnayak.

6. Imbe ndutu baañal ñañ nlam ba gwé i len ini?

⁶ Ndutu yada di gwé i ngéda di ñañal ñañ nlam i yé le bôt ba nkolba bés. Batjañgbene maliga, baéga bibase ni baane ba nkoñ ’isi ba ñôbôs jôl li ntôñ u Yéhôva. I ngéda bôt bés ba lihaa, biyina gwés ni bôt di nsal ni bo ba ñemble bitembee bi, ba yé le ba tinde bés i waa gwélél Yéhôva, ni i waa añal ñañ nlam. Ngim bahoma, ba ntééñga bagwélél ba Yéhôva, ba ngwel bo, ba hak bo i mok. Hala a nhélés bé bés, Yésu a bi kal le: “Biloñ gwobisôna gw’a oo bé inyule ni yé banigil bem.” (Matéô 24:9) I ngéda ba ñoo bés hala, hala a ñunda le di nlémél toi Yéhôva. (Matéô 5:11, 12) Nsohop nyen a nsal i bôlô i yosôna, ndi a nla bé Yésu. Kiki Yésu nyen a nkena likalô, ñañ nlam u ñañlana biloñ gwobisôna. Kii i ñunda hala?

7. Kii i ñunda le kaat Masoola 14:6, 7 i yé yon?

⁷ I ngéda di ñañal ñañ nlam, ndutu ipe di yé di boma i yé le di mpot bé mahop momasôna. I kaat Masoola, Yésu a bi yis ñôma Yôhanes le bôt ba ga añal ñañ nlam ni ngandak dilémb. (Añ Masoola 14:6, 7.) Lelaa i jam li li mbôña? Di ñañle ngandak bôt ñañ nlam. Munu ngéda yés, ngandak bôt i ñañ bikaat, i béñgege bividéô i site yés jw.org ikété iloo 1 000 hi dilémb. Juu li bakena ntôñ li bi ti kunde le ba kobol i kaat ini di ngwélél inyu niiga bôt Bibel le Niñ ilam i boga ni boga! ikété iloo 700 i dilémb. Bividéô bi yé inyu bôt ba ndok, yak bikaat inyu bôt ba ndim. Di ntehe kiki mbañ i Bibel i nyon. Bôt “ba nlôl i biloñ bi dilémb tjodisôna” ba nigil “hilémb hipubi,” hala wee biniigana bi bi nlôl i Bañga i Djob. (Sakaria 8:23; Sôfônia 3:9) I bôlô i, yosôna i nséla inyule Yésu Kristô nyen a nkena mam.

8. Kii di ma boñ i nson likalô?

⁸ I len ini, Mbôgi Yéhôva i yé iloo 8 000 000 ikété 240 i biloñ. Hiki nwii, ngandak ipe i nsôblana. Ndi Mbôgi Yéhôva i ta ndik bé ngandak, i gwé yak bilem bilam, hala wee “mut yondo.” (Kôlôsé 3:8-10) Ngandak i bi nwas niñ i nyega, bisañ, mbagla, ni mam ma m’bô. Mbañ i kaat Yésaya 2:4 i yé yon, ‘ba nigil ha bé i jo gwét.’ I ngéda di njo sañ i ngui inyu haba mut yondo, hala a mboñ le bôt bape ba bana ngôñ i jôp i ntôñ u Yéhôva, di ñunda ki le di yé toi banigil ba Yésu Kristô. (Yôhanes 13:35; 1 Pétrô 2:12) Di mboñ bé i mam ma ni ngui yés bésbomede, Yésu nyen a nhôla bés i boñ mo.

YÉSU A NTÉÉ NKOL U MALIGA NI U PÉK

9. I kaat Matéô 24:45-47, Yésu a bi kal le kii i ga bôña i dilo di nsôk?

⁹ Añ Matéô 24:45-47. Yésu a bi kal le i dilo di nsôk, a ga téé “nkol u maliga ni u pék” inyu ti banigil bé bijek. Hala a nkobla le munu ngéda yés, di nlama tehe nkol u u nsal ni ngui. Hala nyen i yé. Yésu a ngwélél ndék minhook inyu ti bagwélél ba Yéhôva ni i bet ba nigil Bibel “bijek i loñge ngéda.” I bôt bana, ba ñane bé hémle i bôt bape. (2 Korintô 1:24) Ba nyi le Yésu Kristô nyen a yé “ñane ni ñéga” ntôñ Yéhôva.—Yésaya 55:4.

10. Ikété bikaat bi yé mu i titii, imbe u bi nigil?

¹⁰ Ibôdôl i nwii 1919, nkol u maliga ni u pék u mpémés bikaat inyu boñ le bôt ba nigil Bibel. I nwii 1921, nkol u maliga ni u pék u bi pémés i kaat ini le La harpe de Dieu inyu hôla bôt i yi biniigana bi bisu bi Bibel. Kiki ngéda i bé tagbe, ba bi pémés bikaat bipe. Imbe kaat u bi nigil? “Que Dieu soit reconnu pour vrai !” La vérité qui conduit à la vie éternelle, Vous pouvez vivre éternellement sur une terre qui deviendra un Paradis, La connaissance qui mène à la vie éternelle, Qu’enseigne réellement la Bible ?, Kii Bibel i niiga bés? Tole Niñ ilam i boga ni boga!, kaat yés i mondo? Bikaat bi, bi bi hôla bôt ngandak i nigil Bibel i ngéda ba bi pémés gwo.

11. Inyuki bésbobasôna di gwé ngôñ i nigil Bibel?

¹¹ Ndik i bôt di niiga Bibel bé bon ba gwé ngôñ ni yigil, bésbobasôna di nlama nigil. Ñôma Paul a kal le: “Bañga bijek i yé inyu minhôôlak mi bôt.” Paul a bi kal ki le i nya bijek i, i nhôla i yimbe maselna ipôla “loñge ni béba.” (Lôk Héber 5:14) Munu béba nkoñ ’isi unu, mam mabe ma yé nnayak, jon i nôgôl mambén ma Yéhôva i ta bé jam li ntomb. Ndi Yésu a nti bés biniigana bi bi nhôla bés i lédés hémle yés. Biniigana bi, bi mpémél i Bibel. Yésu a ngwélél nkol u maliga ni u pék inyu ti bés biniigana bi.

12. Kiki Yésu, lelaa di ñunda le di nti jôl li Djob lipém?

¹² Kiki Yésu, di nti jôl li Djob lipém. (Yôhanes 17:6, 26) Kiki hihéga, i nwii 1931 di bi kahal sébla le Mbôgi Yéhôva inyu unda le di yé maséé i ba bagwélél ba Yéhôva. (Yésaya 43:10-12) Ibôdôl i sôñ Biôôm mu nwii u, jôl li Djob li bé mu lipep li bisu li Nkum Ntat. Yak Ngobol i mbok yondo i gwé jôl li Djob homa nyensôna li nlama ba. Di mboñ bé kiki bikwéha bi bibase bi bi bi héya jôl li Yéhôva ikété ngandak bibel ba bi kobol!

YÉSU A NTJEK MAM IKÉTÉ NTÔÑ U DJOB

13. Kii i ñunda we le Yésu a ngwélél “nkol u maliga ni u pék” munu ngéda yés? (Yôhanes 6:68)

¹³ Yésu a ngwélél “nkol u maliga ni u pék” inyu tjek mam ikété ntôñ u Yéhôva. Lelaa u ntehe ntôñ u? Bebek le mahoñol moñ ma nkiha ni ma ñôma Pétrô nu a bi kal Yésu le: “D’a ke yak njee? Wen u gwé bibañga bi niñ boga.” (Yôhanes 6:68) Ibale di yila bé Mbôgi Yéhôva, ki di tééne hee? Kristô a ngwélél ntôñ unu, inyu hôla bés i lédés hémle yés. A niiga bés lelaa di nla tibil añal ñañ nlam. A nhôla yak bés i haba “mut yondo” inyu lémél Yéhôva.—Éfésô 4:24.

14. I ngéda COVID-19, bimbe bisai u bi kôs?

¹⁴ I ngéda di yé ikété ndutu, Yésu a ñéga bés. Di bi tehe i jam li i ngéda COVID-19 a bi bôdôl. Munu nkoñ ’isi unu, ngandak bôt i bé yi bé kii ba boñ. Ndi Yésu a bi boñ le di kôs biniigana inyu boñ le kon u gwel bañ bés. Ba bi kal bés le di haba masque i ngéda di yé i ti bôt, ni le di yén haa ni bôt bape. Ntôñ u bi kal yak mimañ le ba yuuga lôk kéé yosôna i likoda inyu ti bo mam ma mbéda bo. (Yésaya 32:1, 2) Di bi kôs ki biniigana bipe mu minlegla mi Juu li bakena ntôñ.

15. Bimbe biniigana di bi kôs inyu likalô ni makoda?

¹⁵ I ngéda Corona, di bi kôs biniigana inyu likalô ni makoda. Di bi pala bôdôl tégbaha makoda, makoda makeñi, ni makoda ma ndôn ni njel internet. Di bôdôl yak likalô ni biléta yak ni téléfôn. Yéhôva a bi sayap bôlô yés. Ngandak Bétel i bi kal le nsoñgi u baañal ñañ nlam u nkônde bet i boni. Ngandak bôt i bi tehe bisai bi Yéhôva munu ngéda COVID-19 ini.—Béñge minkéñék mi matila mini le “Yéhôva a nsayap likalô jés.”

16. Kii di nlama yi?

¹⁶ I ngéda COVID-19, bôt bahogi ba bé le ba hoñol le ntôñ u Yéhôva u mpéé ni bikila. Ndi i mbus ngéda, di bi tehe le maéba ma, ma bé malam. (Matéô 11:19) I ngéda di ntehe lelaa Yésu a nkena ntôñ unu, hala a nkwés bés nkaa le to imbe ndutu di mboma yani ni noma, Yéhôva bo Man wé ba ga ba ni bés.—Añ Lôk Héber 13:5, 6.

17. I ngéda u ntehe lelaa Yésu a ñéga ntôñ u Djob, kii u nôgda?

¹⁷ Di yé maséé i ba munu ntôñ unu Yésu a ñéga. Mbagla yo ki yo i ta bé munu ntôñ unu. Di gwé biniigana bi mbéda bés inyu lédés hémle yés, ni i añal ñañ nlam. Biniigana bi, bi nhôla bés i haba mut yondo, ni i gwéhna bés ni bés. Hala a yé bés bisai bikeñi i sal isi énél i Yésu!