Yéhôva a nlôôha gwés we

1. Inyu yoñ Yéhôva a mpôna kii?

BAA ni ma noode hoñol kii Yéhôva a yé le a pôna? I ngéda di nkwel ni nye ikété masoohe, kii i nlo bés mahoñol? To hala kiki di ntehe bé Yéhôva, inyu pôdôl nye, Bibel i ngwélél ngandak bititii. Ba nsébél nye le “hiañgaa,” “ben” ni “hié hi hi nlighana.” (Tjémbi 84:11; Lôk Héber 12:29) Ézékiel a bi toñol lelaa Yéhôva a bé nene ikété nyiinda, kiki ngok safirô, a mbai a pôn-ga hié, a bak kiki nyum u u mbai. (Ézékiel 1:26-28) Ngim mam mu i nla hélés bés, i kônha yak bés woñi.

2. Kii i nla kéñ bôt ba bape i kôôge Yéhôva bebee?

² Kiki di nla bé tehe Yéhôva, hala a nla ba ndutu i hémle le a ngwés bés. Bôt bape ba nhoñol le Yéhôva a ta bé le a gwés bo, inyule ba bi boma ngandak mam mabe i niñ yap. Bebek ba mah bana bé isañ nu a ngwés bo. Yéhôva a nyi i yom di nôgda ni lelaa hala a ntééñga bés. Inyu hôla bés, a nyeelene bés bilem gwé bilam ikété Bañga yé.

3. Inyuki di nlama tibil wan kii i yé gwéha i Yéhôva?

³ Buk i i ntibil toñol njee a yé Yéhôva i yé gwéha. (1 Yôhanes 4:8) Bibel i nkal ha le: “Nyambe a yé gwéha.” I lem i i ntihba hiki jam a mboñ. Gwéha i Nyambe i nlôôha ilam, i gwé ki ngui kayéle yak i bôt ba ngwés bé nye, a ngwés bo. (Matéô 5:44, 45) Munu yigil ini, di ga tibil wan njee a yé Yéhôva, ni kii i yé gwéha yé. Kiki di nkônde yi Nyambe, hala ki nyen di nkônde gwés nye.

YÉHÔVA A NGWÉS BÉS NGANDAK

4. Kii u nôgda i ngéda u nyi le Yéhôva a ngwés we? (Béñge yak titii.)

⁴ “Yéhôva a yôni ni ñem gwéha.” (Yakôbô 5:11) Ikété Bibel, a nhégha nyemede ni nyañ man nu a ngwés man wé. (Yésaya 66:12, 13) Di noode le hégda nyañ man nu a nyoñ ndun ni man wé nuntitigi. A mbôôhe nye i ngii maboñ mé, a nkwel ni nye, a nôlôs nye, a mômôs ki nye. I ngéda man wé a ñee tole a nok njôghe, a mboñ kii yosôna a nla inyu ti nye i yom a gwé ngôñ. I ngéda di nok njôghe di nla bôdôl Yéhôva Nyambe nu gwéha ñem. Ntôp tjémbi a tila le: “I ngéda nduña i bé me nnayak, u bi hôgbaha me, u mômôs ki me.”—Tjémbi 94:19.

5. Kiki Yéhôva a nke ni bisu i gwés we, kii hala a niiga we?

⁵ Yéhôva a tiñi ni bagwélél bé. (Tjémbi 103:8) A ntjôô bé bés to i ngéda di mboñ béba. Litén li Israel li bi tjôô Yéhôva ngandak ngélé; ndi i ngéda ba bé tam béba yap, Yéhôva a bé unda bo gwéha i i mal bé ni bini bibuk: “Inyule u bi yila yom mahee i mis mem, me bi ti we lipém, me ngwés ki we.” (Yésaya 43:4, 5) Gwéha i Djob i nhéñha bé. Hiki ngéda, di nla bôdôl nye ñem. To ibale di mboñ hihôha hikeñi, Yéhôva a ntjôô bé bés. I ngéda di ntam béba yés, di témb yak Yéhôva, di ga nôgda le gwéha yé ipañ yés i nhéñha bé. A mbôn bés le ‘a ga nwéhél bés ngandak.’ (Yésaya 55:7) Inyu pôdôl i nwéhél i, Bibel i nhégha yo ni “mangéda ma hogbe ma [ma] nlôl yak Yéhôva nyemede.”—Minson mi baôma 3:19.

6. Kii Sakaria 2:8 a niiga bés inyu Yéhôva?

⁶ Añ Sakaria 2:8. Kiki Yéhôva a ngwés bés, a nyi i yom di nôgda, a yé yak bebee i sôñ bés. A nok njôghe i ngéda di nok njôghe. Jon di kôli soohe le: “Tééda me kiki nso woñ u jis.” (Tjémbi 17:8) Di njôha bé to ndék ni jis jés, inyule li nlôôha ba nseñ. Jon i ngeñ Yéhôva a nhégha bés ni nso wé jis, a yé wee, a yé kal le, ‘nu ni nu a nôgha bé njôghe, a bagwélél bem, wee a nôgha tik yem yom njôghe.’

7. Inyuki di nlama kônde bôdôl gwéha i Yéhôva ñem?

⁷ Yéhôva a nsômbôl le di ba nkwoog nkaa le, a ngwés hiki wada wés. Ndi a nyi le, i ngéda di nhoñol i mam di bi tégbaha i niñ yés, di yé le di pééna le a nla gwés bés. Tole di ngi bom-ga ngim mam i niñ yés, i i ntinde bés i badba too Yéhôva a ngi gwéhék bés. Kii i ga hôla bés i ba nkwoog nkaa le Yéhôva a ngwés bés? I nigil lelaa Yéhôva a ñunda le a ngwés Yésu, minhook mi bikristen, ni bésbobasôna i ga hôla bés.

LELAA YÉHÔVA A ÑUNDA GWÉHA YÉ

8. Inyuki Yésu a bé nkwoog nkaa le Isañ a ngwés nye?

⁸ Yéhôva bo Man wé nu gwéha ba bi tégbaha ngandak nwii ntôñ, kayéle ba bana maada ma bas bas. Ikété ngiinda yosôna, liwanda lipe jo ki jo li mah nom bé kiki li. Yéhôva a bi pahal i mbamba le a ngwés Yésu, kiki di ñañ i kaat Matéô 17:5. Yéhôva a bé le a kal ndigi le, ‘nunu nyen a nlémél me.’ Ndi a bé gwés le di yi le a ngwés Yésu, jon a bi sébél nye le: “Mam wem . . . man wem nu gwéha.” Yéhôva a bé maséé ni Yésu, a bé yak maséé ni i mam Yésu a bé bebee i boñ. (Éfésô 1:7) Yésu a bééna bé pééna yo ki yo le Isañ a ngwés nye. Jon Yésu a bé nôgda i gwéha i ikétékété yé. Ngandak ngélé a bi kal le, Isañ a ngwés nye, a bak nkwoog nkaa ni jam li.—Yôhanes 3:35; 10:17; 17:24.

9. Bimbe bibuk bi Yéhôva bi ñunda le a ngwés minhook? Toñol. (Rôma 5:5)

⁹ Yéhôva a ñunda ki le a ngwés minhook. (Añ Rôma 5:5.) Di yimbe bibuk bini le “i bi kuba.” (Buk isi lipep.) Kaat yada i i ntoñol Bibel i nkal ha i homa nu le, “i nkuli kiki lép.” Kinje titii i ngui inyu unda lelaa Yéhôva a nlôôha gwés minhook! Minhook mi nyi le mi yé bôt “Nyambe a ngwés.” (Yuda 1) Ñôma Yôhanes a bi kal i yom minhook mi nôgda, i ngéda a tila le: “Béñgnana umbe ntén gwéha Tata a bi unda bés, le di séblana le bon ba Nyambe!” (1 Yôhanes 3:1) Baa Yéhôva a ngwés ndigi minhook nwotama? To jam, Yéhôva a ñunda le a ngwés bésbobasôna.

10. Limbe jam li tôbôtôbô li ñunda le Yéhôva a ngwés we?

¹⁰ Limbe jam li tôbôtôbô li ñunda gwéha i Yéhôva? Binoñ. Mut nye ki nye a mah bé unda gwéha likala li! (Yôhanes 3:16; Rôma 5:8) Yéhôva a bi ti tik yé Man, a neebe le a wo inyu bôt ba binam bobasôna, inyu boñ le bibéba gwés bi nwéhlana, di laa ki ba mawanda mé. (1 Yôhanes 4:10) Kiki di ga ke ni bisu i ôt pék mu ndamba ikeñi Yéhôva bo Yésu ba bi ti, hala nyen di ga kônde nok ikepam limbe likala Yéhôva bo Yésu ba ngwés hiki wada wés. (Galatia 2:20) Ba bi saa bé binoñ ndik inyu sane yañga lipep. Binoñ bi yé likébla li gwéha. Yéhôva a bi unda gwéha yé inyu yés i ngéda a bi ti i yom i nlôôha nye tik: Yésu. Yéhôva a bi neebe le Man wé a nok ndutu, a wo inyu yés.

11. Kii kaat Yérémia 31:3 i niiga bés?

¹¹ Kiki di ntehe, Yéhôva a nôgda ndigi bé gwéha, ndi a mpahal yak yo. (Añ Yérémia 31:3.) Yéhôva a bi ôt bés ipañ yé inyule a ngwés bés. (Hégha Ndiimba Mbén 7:7, 8.) To yom yo ki yo, to mut nye ki nye a nla bé bagal bés ni gwéha yé. (Rôma 8:38, 39) Kii u nôgda i ngéda u nyi le Nyambe a ngwés we? Añ Tjémbi 23, u tehe ki kii gwéha i Yéhôva ni loñge yé ñem bi bi tinde David i nôgda, ni lelaa hala a nla tihba hiki wada wés.

KII U NÔGDA I YI LE YÉHÔVA A NGWÉS WE?

12. I sem kwep Tjémbi pes 23 a mpôdôl kii?

¹² Añ Tjémbi 23:1-6. Tjémbi pes 23 a yé hiémbi i het David a yé nkwoog nkaa ni gwéha i Yéhôva, ni le a ntééda nye. David, ntila i hiémbi hi, a ñunda maada ma ngui ma yé ipôla yé ni Ntééda wé le Yéhôva. David a bi nôgda libak li nwee mu kiki Yéhôva a bé éga nye, niñ yé yosôna i bé i moo ma Yéhôva. David a bé yi le Yéhôva a ga gwés nye niñ yé yosôna. Kii i bi tinde nye i bana i botñem i ngui i?

13. Inyuki David a bé nkwoog nkaa le Yéhôva a ga yoñ ndun ni nye?

¹³ “Yom to yada i ga héñél bé me.” David a bi nôgda matééda malam inyule Yéhôva a bé ti nye i mam ma bé béda nye hiki ngéda. David a bé ki liwanda li Yéhôva, a lémlak nye. Inyu hala nyen a bé nkwoog nkaa le, to kii i mpam i dilo di nlo, Yéhôva a ga ke ni bisu i ti nye hiki yom i mbéda nye. David a bé yi ibabé set le gwéha i Yéhôva ni loñge yé ñem bi gwé ngui iloo mam momasôna ma bé tééñga nye, ni le i bé ti nye bañga maséé ni mahak.—Tjémbi 16:11.

14. Lelaa Yéhôva a nyoñ ndun ni bés?

¹⁴ Yéhôva a nyoñ ndun ni bés ni gwéha téntén, i ngéda di mboma mam mabe i niñ yés. Claire,a nu a bi sal i Bétel iloo 20 nwii, a bi nôgda le a bééna ngôñ ni mahôla i ngéda lihaa jé li bé boma ngandak mandutu. AVC i bi bép isañ, i kwés nye bôk, ba pémés manyañ nu muda wada i ntôñ, i sabe i bé hôla lihaa jé i bana koga kel i kwo, i mbus to ndap ba bééna ha bé. Lelaa Yéhôva a bi unda le a nyoñ ndun ni bo? Claire a nkal le: “Yéhôva a bi hôla lihaa jem i bana i yom i bé béda jo hiki kel. Ngandak ngélé, Yéhôva a bé a ti bés iloo i yom me bé hégda! Me mbéna hoñol mangéda Yéhôva a bi unda me gwéha yé, me ndiihe ki mangéda ma. I bigda mangéda ma, i nhôla me le me somol bañ i bisu bi mandutu.”

15. Kii i bé boñ le David a nôgda le a ntémbna ngui yé? (Béñge yak titii.)

¹⁵ “A ntiimba ti me ngui.” Ngim mangéda, mandutu ni manoodana David a bé boma ma bé ma tômbôs nye. (Tjémbi 18:4-6) Ndi, gwéha i Yéhôva, ni tôñ a bé tôñ nye, i bé hôla nye i témbna ngui. Yéhôva a bé a kena liwanda jé li li bé nwaak “i homa bikai bi yé ngandak” ni “bahoma ba noi ba ba yé bebee ni malép.” Sôk i nsôk, David a bé a tiimba bana ngui, kayéle a ke ni bisu i gwélél nye ni maséé.—Tjémbi 18:28-32.

16. Lelaa gwéha i Yéhôva i nhôla we i témbna ngui yoñ?

¹⁶ Nlélém jam i len ini, “gwéha i Yéhôva yon i mboñ le di ngi yii i niñ, konangoo yé i mal bé” i ngéda di mboma manoodana ni mandutu i niñ yés. (Minlénd mi Yérémia 3:22; Kôlôsé 1:11) Di béñge le hihéga hi Rachel. A bi lôôha nok njôghe i ngeñ nlôm a bi tjôô nye, a tjôô yak Yéhôva, ki himala hi COVID-19 hi yé nnayak. Lelaa Yéhôva a bi hôla nye? A nkal le: “Yéhôva a bi yoñ bitelbene le me nôgda gwéha. A bi ti me ngandak mawanda i i bé yuuga me, i lon-ga me bijek, i tilnaga me, i bé éñél yak me minlôñ mi Bibel. Ma bé nol ni me, ma bigdaha me le Yéhôva a ntôñ me. Hiki ngéda, me nti Yéhôva mayéga inyule a bi ti me lihaa likeñi li li ngwés me.”

17. Inyuki David a bé ‘kon bé jam libe jo ki jo woñi’?

¹⁷ “Me nkon bé jam libe jo ki jo woñi inyule u yé lôñni me.” Ngim mangéda, David a bé le a nimis niñ yé, a ban-ga ki baoo ba ba bééna ngui ngandak. Ndi Yéhôva a bé gwés nye, hala bé boñ le a bé kon bé woñi, a nôgdaga le Yéhôva a ntat nye. Hiki ngéda David a bé nôgda le Yéhôva a nit nye, hala a bé ti nye makénd ni hogbe. Jon a bi tôp le: “[Yéhôva] a sôñ me mu mam momasôna ma bé kônha me woñi.” (Tjémbi 34:4) David a bé boma mam ma nkônha toi woñi; ndi gwéha i Yéhôva i bééna ngui iloo i mam ma.

18. I ngéda u nkon woñi, ndi u bak nkwoog nkaa le Yéhôva a ngwés we, lelaa hala a nti we ngui?

¹⁸ I ngéda di mboma mam ma nkônha bés woñi, ndi di bak nkwoog nkaa le Yéhôva a ngwés bés, lelaa hala a nti bés ngui? Nsañal wada le Susi a ntoñol i yom nye ni nlôm ba bé nôgda i ngéda lok yap i bi tjôô Yéhôva, a nkal le: “I ngéda bikuu bi nkwél we hala, u nôgda wee ngui i mal we, le u gwé bé to mut a nla hôla we. Ndi i gwéha Yéhôva a bi unda bés i bi boñ le di kon bañ woñi.” Rachel, nu di mbôk di pôdôl, a mbigda le: “U wada, ñem u bé pabla me ni woñi, me tôñôk ki ngandak, ha nyen me bi lôndôl Yéhôva. Kunda yada me nôgda le me yé nwee, ndik kiki i yé i pam le nyañ man a kôhle man wé, ha nyen hilo hi bi nip me. M’a hôya bé me hilo hi, kekikel.” Mañ wada le Tasos a bi tégbaha nwii mina i mok, inyule a bi tjél yila sônda. Lelaa a bi nôgda le Yéhôva a ngwés nye, ni le a nyoñ ndun ni nye? A nkal le: “Yéhôva a bi ti me i mam momasôna me bééna ngôñ, a ti yak me iloo ha. Hala a bi kônde kwés me nkaa le, me nla bôdôl nye ñem ni ñem wem wonsôna. Yéhôva a bi gwélél yak mbuu mpubi wé inyu hôla me i ba maséé, tolakii me bé i béba homa. Hala a bi kwés me nkaa le, kiki me nke ni bisu i sal ni nye, hala nyen me nkônde nôgda loñge yé ñem. Jon me bi yoñ nson u nsañal i ngéda yosôna, me bak i mok.”

DI KÔÔGE BEBEE NI NYAMBE WÉS NU GWÉHA

19. (a) I ngéda di nyi le Yéhôva a ngwés bés, kii di nla kal nye ikété masoohe més? (b) Umbe nlôñ u Bibel u u mpôdôl gwéha u ntihba we? (Béñge minkéñék mi matila le “Bibuk bi bi nhôla bés i nôgda gwéha i Yéhôva.”)

¹⁹ Miñañ di ntehe munu yigil ini mi ñunda bés le Yéhôva “Nyambe nu gwéha,” a yé ni bés! (2 Korintô 13:11) A ntôñ hiki wada wés. Di yé nkwoog nkaa le Yéhôva a ‘nlôôha gwés bés.’ (Tjémbi 32:10) Kiki di nke ni bisu i hoñol lelaa a bi unda bés gwéha yé, hala nyen di nkônde ba nkwoog nkaa le a yé, di nyila ki mawanda mé. Di nla yible nye ñem, di yis nye le ngôñ yés i yé le a kônde gwés bés. Di nla añle nye i mam momasôna ma ntééñga bés, di bak nkwoog nkaa le a ñemble bés, ni le a gwé ngôñ ikeñi i hôla bés.—Tjémbi 145:18, 19.

20. Lelaa gwéha i Yéhôva i ñôt bés ipañ yé?

²⁰ Kiki di ngwés di nohop hié i ngéda kel i sune ngandak, hala nyen gwéha i Yéhôva i ñôt bés i nyeni. Gwéha i Nyambe i gwé ngui ngandak, a mbob yak bés. Jon di unda hiki kel le, di nkon maséé ni gwéha i Yéhôva. Ñ, bésbobasôna di kal ni kiñ ikeñi le: “Me ngwés Yéhôva”!—Tjémbi 116:1.