I bôt ba gwé “libak lilam” ba ga emble bés

1. Lelaa bôt ba mbéna leege ñañ nlam? (Minson mi baôma 13:​47, 48; 16:​14, 15)

I HIAI bisu, ngandak bôt i bi hoo yila bikristen i ngéda ba bi emble ñañ nlam. (Añ Minson mi baôma 13:​47, 48; 16:​14, 15.) I len ini, ngandak bôt i yé maséé i ngéda i ñemble ñañ nlam inyu ngélé bisu. Yak i bôt ba bé gwés bé ñañ nlam, ba nla bôdôl gwés wo i mbus ngéda. Kii di nlama boñ i ngéda di mboma bôt ba ba gwé “libak lilam” i likalô?

2. Inyuki di nla kal le nson u yilha bôt banigil u yé kiki nson u wom?

² Nson u yilha bôt banigil u yé kiki nson u wom. I ngéda matam mahogi ma nhôlôl, di mbumbul mo to ibale di ngi kôôbaga hisi inyu bel mbôô ipe. Nlélém, i ngéda di ntehe mut a nleege ñañ nlam, di nlama pala hôla nye i yila nnigil Kristô, ndi di kenek ni bisu i hôla i bet ba gwé ngôñ ni ngandak ngéda inyu yila banigil ba Kristô. (Yôhanes 4:​35, 36) Pék yon y’a hôla bés i yi lelaa di nla hôla bôt di niiga Bibel. Nano, di tehe i yom di nla boñ inyu hôla i bet ba nleege ñañ nlam inyu ngélé bisu. Di tehe ki lelaa di nla hôla bo i hol.

I NGÉDA BÔT BA NLEEGE ÑAÑ NLAM

3. Kii di nla boñ i ngéda di ntehe bôt ba ngwés ñañ nlam? (1 Korintô 9:26)

³ I ngéda di ntehe bôt ba ngwés ñañ nlam, di hôla bo i kil i njel i nkena i niñ boga. Di nlama bôdôl nigil Bibel ni bo, di naña ki bo i makoda i nlélém kel.​—Añ 1 Korintô 9:26.

4. Toñol lelaa mañge muda wada a bi bôdôl yigil Bibel.

⁴ Bôdôl yigil Bibel. Ngim bôt i yé bebee i bôdôl yigil Bibel ngélé bisu di nkwel ni bo. Kiki hihéga, kel yada, i Kanada, mañge muda wada a bi lo i kak bikaat, a yoñ i man kaat nunu le Niñ ilam i boga ni boga! I sita i bé ha, i kal nye le a nla bôdôl yigil mu man kaat nu. Mañge muda a neebe, a ti sita nomba yé. Ndék ngéda i mbus, i nlélém kel, i mañge muda nu a tilna sita i i nti nye kaat, a bat nye le ba nla bôdôl yigil kekii? Sita i kal nye le ba nla bôdôl i mamélél ma sonde, mañge muda a bat nye le: “Di nla bé bôdôl yani?” I kel i bé noñ ha, ba bôdôl yigil. I mañge muda nu a bi ke i likoda i kel i bé noñ, hala wee i kel sonde, a kahal hol bihôô bihôô.

5. Kii i yé le i hôla bés i bôdôl yigil Bibel? (Béñge yak bititii.)

⁵ Bôt bobasôna ba nla bé pala hol kiki i muda di mpôdôl i liben li ntagbe. Bôt bape, i mbéda bo ngandak ngéda inyu boñ le ba hol. I bibôdle, di nla pohol minkwel mi mi nlémél bôt. Ibale di ntomb bé, di ke ni bisu i tôñ i bôt ba, i mbus ndék ngéda ndigi, yigil i nla bôdôl. Kii di nla kal inyu bôdôl yigil? Di bi bat lôk kéé i i gwé makeñge inyu bôdôl gwigil i mbadga i.

6. Inyu boñ le nkwel u kee ni bisu, kii di nla kal mut a ngwés ñañ nlam?

⁶ Di bi bat lôk kéé ihogi ni basañal kii i nhôla bo i bôdôl gwigil bi Bibel. Ba kal le ngim bahoma, di nlama keñgle bibuk kiki bo “yigil,” “yigil Bibel” tole “me niiga we” i ngéda di nsômbôl bôdôl yigil. Ba bi yimbe le bôt ba ngwés i ngéda di nkal bo le di nlo ndik “i kwel ni bo,” di “nhôla bo i nok Bibel.” Inyu boñ le nkwel u kee ni bisu, u nla kal le: “Hala a yé hélha jam i tehe le mambadga momasôna mut a nla badba, Bibel i ntimbhe mo” tole “Bibel i ta bé kiki bini bikaat bipe, Nyambe a bi boñ le ba tila yo inyu hôla bés i niñ yés.” U nla kônde le: “Me nyoñ bé we ngandak ngéda, d’a kwel ndigi 10 manut tole 15 manut, w’a tehe le u nigil ngandak mam.” Inyu boñ le a nôgda bañ le u yé ti nye bôlô, u kal bañ nye le “d’a nigil hini hilo,” tole “d’a nigil hiki sonde.”

7. Ngéda mbe bôt bahogi ba bi yi le bés bon di niiga maliga? (1 Korintô 14:​23-25)

⁷ Naña nye i likoda. I hiai bisu, i mpôna le i ngéda mut a bé a lo i likoda, ha nyen a bé a nok le bikristen bi niiga maliga. (Añ 1 Korintô 14:​23-25.) Hala nyen i yé yak munu ngéda yés. Ngandak bôt i i nigil Bibel i mpala hol i ngéda i nke i makoda. Ngéda mbe di nlama ni naña bo? Pes 10 munu kaat yés ini le Niñ ilam i boga ni boga!, i ñunda bés lelaa di nla naña bôt i makoda. Ndi to u mbolok bé nyoo, u nla naña mut i makoda i ngéda u mbôdôl nkwel ni nye, u nla naña nye i likoda li mamélél ma sonde, u nla ti nye ño nkwel u mbamba, tole u nla pôdôl i jam di ga nigil i Nkum Ntat.

8. Kii di nlama toñle mut i ngéda di naña nye i likoda? (Yésaya 54:13)

⁸ I ngéda di naña mut i likoda, di nlama toñle nye le mam ma ntagbe bé kiki i mandap ma base mape. Muda wada nu a bé nigil Bibel a bi lo i ndap Ane, a tehe lelaa yigil i Nkum Ntat i ntagbe, a bat sita i i bé niiga nye le: “Baa i mut a bak nyoo i hikôma a nyi môl ma bôt bobasôna?” Sita i toñle nye le di mboñ biliya i yi môl ma bôt bobasôna kiki di nyi yak môl ma bôt bés ba lihaa. I muda nu a yimbe le mam ma ntagbe bé i ndap Ane kiki ma ntagbe nyoo i base yé. Kiki i muda nu, ngandak bôt i nyi bé lelaa mam ma ntagbe i makoda més. (Añ Yésaya 54:13.) Di nlo i makoda inyu bégés Yéhôva, inyu nigil Bañga yé ni i tina makénd. (Lôk Héber 2:12; 10:​24, 25) Inyu hala nyen oda i yé i makoda més, di nigil ngandak mam, di ta bé ha inyu boñ binjénjé. (1 Korintô 14:40) Ndap Ane i yé ñoñok loñge, i yé loñge homa inyu yigil. Di njôp bé i mam ma mbô, jon di ta bé ha inyu pôdôl minlôñ mi mbô, di ta bé to ha inyu pééna. I yé le i ba loñge le ilole mut a nlo i likoda, di éba nye i vidéô ini le Kii i ntagbe i ndap Ane? Hala a ga hôla nye le a yi kii i mbem nye nyoo.

9-10. I ngéda di naña mut i likoda, kii di nla kal nye inyu boñ le a kon bañ woñi? (Béñge yak titii.)

⁹ Ngim bôt i nkon woñi i lo i ndap Ane inyule ba nkon woñi le ba ga kal bo le ba yila Mbôgi Yéhôva. Kal i mut u naña le di yé maséé i leege bakén, ndi di nyégsa bé mut i yila Mbôgi Yéhôva. Bagwal ba nla lo i ndap Ane to ibale ba gwé disii di boñge. I makoda més, boñge ba gwé bé wap man ndap i het ba nigil. Bagwal ba nyén homa wada ni bon bap, ba niglak ntôñ. Hala a mboñ le bagwal ba nyi i het bon bap ba yé, ba nyi ki i yom bon bap ba nigil. (Ndiimba Mbén 31:12) Di gwé bé njañgi yo ki yo i makoda més. Di nôgôl bibuk bi Yésu bini le: “Ni bi kôs yañga, tina yañga.” (Matéô 10:8) U nla ki kal i mut u naña le a gwé bé ngôñ i bana mambot ma nhee diye. Ñem won Nyambe a mbéñge, a mbéñge bé mambot.​—1 Samuel 16:7.

¹⁰ I ngéda mut a nlo i likoda, boñ le a nôgda le a yé i mbai yé. Boñ nye le a kwel ni mimañ, yak ni ini lôk kéé ipe. Ibale ba nleege nye loñge, a nla bana ngôñ i lo lisañ lipe. Ibale u nyimbe le a gwé bé Bibel, u nla ti nye Bibel yoñ. Unda nye lelaa a nla léba minlôñ mi Bibel nti nkwel a yé i añ, tole mi mi yé i kaat yigil.

I NGÉDA DI MBÔDÔL YIGIL BIBEL

11. Lelaa u nla unda le u njôha bé ni ngéda i mut u yé niiga Bibel?

¹¹ Kii di nlama bigda i ngéda di mbôdôl niiga mut Bibel? Ibale a nti bés ngeñ di nlama lôl, di lôl ha ngeñ i. To ibale bôt ba mbéna sôk i het u yé, we u nlama lo i ngeñ. I nla ki ba loñge le u boñ ndik ndék manut i yigil bisu. Ngim lôk kéé i i ma niiga ngandak bôt Bibel i nkal le, i yé loñge le u hoo mélés yigil to ibale i mut nu a nsômbôl le yigil i kee ni bisu. Keñgle ngandak hop, nwas le i mut u yé niiga nyen a pot ngandak.​—Bingéngén 10:19.

12. I ngéda di mbôdôl niiga mut Bibel, kii di nlama bé hôya?

¹² Ibôdôl yaga bibôdle, hôla i mut u yé niiga Bibel i yi Yéhôva bo Yésu ni i gwés bo. Inyu pam i boñ hala, u nlama gwélél Bañga i Djob, u ta bé ha i unda le u nyi Bibel ngandak. (Minson mi baôma 10:​25, 26) Ñôma Paul a bé béna gwélél i mam Yésu Kristô a bi niiga inyu niiga bôt bape, a bé yi le nyen Yéhôva a bi ep inyu hôla bés i yi nye ni i gwés nye. (1 Korintô 2:​1, 2) Paul a bi unda ki le i yé nseñ ngandak i hôla bôt di niiga Bibel i bana bilem bilam bi bi yé kiki gôl, silba ni tik ngok. (1 Korintô 3:​11-15) Mu bilem bi, di gwé hémle, pék, yi ni i kon Yéhôva woñi. (Tjémbi 19:​9, 10; Bingéngén 3:​13-15; 1 Pétrô 1:7) Di nigle Paul i ngéda di niiga bôt Bibel, di hôla i bet di niiga i bana hémle i ngui ni i ba mawanda ma Tata wés nu ngii le Yéhôva.​—2 Korintô 1:24.

13. I ngéda di niiga mut Bibel, lelaa di nla unda le di nok nye, di hônbaga ki nye? (2 Korintô 10:​4, 5) (Béñge yak titii.)

¹³ Kiki Yésu, i ngéda di niiga bôt, di nlama hônba bo, di nogok bo. U bat bañ mut mambadga ma ma nla wéha nye nyuu. Ibale u nyimbe le ngim mam i nlédél nye, u nla tagbe, ni tiimba ki pôdôl mu lisañ lipe. Iloole u nyégsa nye i nok i mam a nla bé nok nano, nwas le ngéda i tagbe inyu boñ le i biniigana bi, bi tihba ñem wé. (Yôhanes 16:12; Kôlôsé 2:​6, 7) Bibel i nkal le bikwéha bi biniigana bi yé kiki minkum mi mandap di nlama bôk. (Añ 2 Korintô 10:​4, 5) I ngéda mut a bi bôdôl nok ngim biniigana ibôdôl behee, i nwas gwo i ta bé bun. Inyu hala nyen, di nlama ndugi hôla i mut di niiga Bibel i bôdôl Yéhôva ñem, ha nyen a ga la nwas bikwéha bi biniigana.​—Tjémbi 91:9.

I NGÉDA MUT A NLO I LIKODA

14. Lelaa di nlama leege bôt ba ba nlo i makoda?

¹⁴ Yéhôva a niiga bés le di nlama bé todol bôt, to ba gwé bimbe bilem, to ba nyep, to ba yé ngwañ, to ba nlôl limbe litén. (Yakôbô 2:​1-4, 9) Lelaa di nla ni éba i bet ba nlo i makoda gwéha?

15-16. Kii di nla boñ le ndi bakén ba bôt ba ba maséé i ngéda ba yé i likoda?

¹⁵ Ngim bôt i yé i lo i ndap Ane ndik inyu tehe lelaa mam ma ntagbe, tole mut numpe nyen a nkal bo le ba kee i ndap Ane. I ngéda di ntehe i nya mut i, di tiige nye bebee. Di leege nye ndi di tééñga bañ nye ni ngandak mambadga. U nla kal nye le a loo a yén ni we. U nla ti nye Bibel yoñ ni bikaat bipe tole u nla boñ le a bana bikaat gwé nyemede. Yoñ yihe le u babaa bañ nye. Mut wada nu a bi lo i ndap Ane a bi kal i mankéé nu a bi leege nye le a nwo nyuu inyule a hééba bé kiki bana bôt bape. Inyu ti nye makénd, i mankéé nu a bi kal nye le ngo Mbôgi Yéhôva i yé kiki bana bôt bape. I mut nu a bi hol letee a sôblana, ndi a ma hôya bé i yom i mankéé nu a bi kal nye. Di nlama yoñ yihe i ngéda di nkwel ni mut nu a nlo i likoda, di tôñ nye ibabé i ha nyo wés i mam ma mbéñge bé bés.​—1 Pétrô 4:15.

¹⁶ Inyu boñ le i bôt ba nlo i likoda ba nôgda le ba yé i mbai yap, di nlama ti bo lipém mu minkwel nwés ni mandimbhe més, téntén i ngéda di mpôdôl bôt ba ba ta bé Mbôgi Yéhôva. Di gwélél bañ bibuk bi bi nla tééñga bo tole bi bi nla wéha bo nyuu (Titô 2:8; 3:2) Kiki hihéga, di yanak bañ bibase bipe kekikel. (2 Korintô 6:3) Lôk kéé i i nti minkwel mi mbamba i nlama yoñ yihe ha homa nu ngandak. Ba ñunda ki le ba ntôñ bakén ba bôt ba ba nlo i ndap Ane i ngéda ba ntoñol bibuk bi bi yé le ndik Mbôgi Yéhôva yon i nok.

17. Kii di nlama boñ i ngéda di mboma i bet ba gwé “libak lilam” i likalô?

¹⁷ Kiki di nkôôge bebee ni lisuk li nkoñ ’isi unu, nson wés i yilha bôt banigil u yé nseñ iloo hihéga, d’a ke ni bisu i tehe bôt ba ba gwé “libak lilam inyu kôhna niñ boga.” (Minson mi baôma 13:48) I ngéda di mboma bo, di kon bañ woñi i bôdôl yigil Bibel ni bo, di naña ki bo i ndap Ane. I ngéda di mboñ hala, di nhôla bo i jubul i “nwemel u nkena i niñ.”​—Matéô 7:14.