Di hôya bañ soohe inyu bôt bape

1. Kii i nyis bés le masoohe més ma yé nseñ ngandak i mis ma Yéhôva?

MASOOHE ma yé likébla lilam. Di mbigda le Yéhôva a bi ti biañgel ngim minson. (Tjémbi 91:11) Yak Man wé Yésu, a bi bééga nye minson minkeñi. (Matéô 28:18) Ndi baa a bi boñ le bon ba emble masoohe més? Heni, ndik Yéhôva nyetama nyen a ñemble masoohe més. Yéhôva ‘Nu a ñemble masoohe,’ a ñemble hiki wada wés.​—Tjémbi 65:2.

2. Inyuki Paul a yéne bés ndémbél ilam?

² Di nlama soohe Yéhôva inyu mandutu més, ndi di hôya bañ soohe Yéhôva inyu bôt bape. I jam li jon ñôma Paul a bi boñ. Kiki hihéga, a bi tilna lôk kéé i likoda li Éfésô le: “Me nke . . . ni bisu i sima bé ikété masoohe mem.” (Éfésô 1:16) Paul a bé soohe yak inyu ngim lôk kéé. Kiki hihéga, a bi kal Timôtéô le: “Me nti Nyambe mayéga; . . . kekikel me nwaa bé to hoñol we ikété minyemhe nwem juu ni njamuha.” (2 Timôtéô 1:3) Paul a bé lama soohe inyu mandutu mé. (2 Korintô 11:23; 12:​7, 8) Ndi to hala, a bé yoñ ngéda i soohe inyu bôt bape.

3. Kii i yé le i boñ le di hôya soohe inyu bôt bape?

³ Ngim mangéda, di yé le di hôya soohe inyu bôt bape. Inyuki? Mankéé nu muda wada le Sabrinaa a ntimbhe i mbadga i, a nkal le: “Di pégi ngandak. Ngim mangéda, mandutu més ma nla yoña bés kayéle di kahal bat Yéhôva mam ndik inyu yés.” Baa yak we u yé u mboñ hala? Ibale u ntimbhe le ñ, wee i yigil ini i yé inyu yoñ. I ga unda bés (1) inyuki i yé loñge i soohe inyu bôt bape, (2) y’a ti ki bés makeñge ma ma ga hôla bés.

INYUKI DI NLAMA SOOHE INYU BÔT BAPE?

4-5. Lelaa masoohe di nsoohe inyu bôt bape ‘ma nla bana ngui ngandak’? (Yakôbô 5:16)

⁴ Masoohe di nsoohe inyu bôt bape ‘ma gwé ngui ngandak.’ (Añ Yakôbô 5:16.) Baa masoohe més ma nla boñ le Yéhôva a boñ jam? Ñ, ma nla. Yésu a bé yi le ñôma Pétrô a ga tañba nye. Jon a bi kal le: “Me nyemhe inyu yoñ le hémle yoñ i hoi bañ.” (Lukas 22:32) Yak Paul a bé yi le masoohe ma nla boñ le Yéhôva a boñ jam. I ngéda ba bi ha nye i mok ngi njom yo ki yo i Rôma, a bi tilna Filémôn le: “Me mbot ñem le ni njel masoohe manan, m’a témb i bééni.” (Filémôn 22) Hala ki nyen mam ma bi tagbe. Paul a bi pam i mok, a ke ni bisu i añal ñañ nlam.

⁵ Ndi hala a nkobla bé le masoohe més ma nyégsa Yéhôva i boñ i jam a lamga bé boñ. A ñemble masoohe més, ngim mangéda, a nla yak kit le a ntimbhe mo. Hala a nlama tinde bés i yemhe nye, ni i nwas mam momasôna i moo mé.​—Tjémbi 37:5; béñge 2 Korintô 1:11.

6. I ngéda di nsoohe inyu bôt bape, hala a ntinde bés i boñ kii? (1 Pétrô 3:8)

⁶ I ngéda di nsoohe inyu bôt bape, hala a mboñ le di bana “ñem ngôô.” (Añ 1 Pétrô 3:8.) Ngôô i yé lem i i ntinde bés i yi mandutu ma bôt bape, ni i hôla bo. (Markô 1:​40, 41) Mañ wada le Michael a nkal le: “I ngéda me nsoohe inyu bôt bape, hala a mboñ le me nkônde yi mandutu map, me nkônde ki gwés bo. Me ngwés bo ibabé le bomede ba yi hala.” Mañ umpe le Richard a ñéba bisai bipe di nkôs i ngéda di nsoohe inyu bôt bape. A nkal le: “I ngéda di nsoohe inyu ngim mut, hala a nkônde ti bés makénd i hôla nye.” A nkônde le: “I ngéda di nsoohe inyu ngim mut, ndi di hôla nye, a yé ndik wengoñle di yé i boñ le Yéhôva a timbhe masoohe mé.”

7. I ngéda di nsoohe inyu bôt bape, lelaa di ntehe mandutu més? (Filipi 2:​3, 4) (Béñge yak bititii.)

⁷ I ngéda di nsoohe inyu bôt bape, di nlôôha bé tôñ inyu mandutu més. (Añ Filipi 2:​3, 4.) Satan nyen a ñane nkoñ ’isi, jon hiki mut a nok ndutu. (1 Yôhanes 5:19; Masoola 12:12) I ngéda di mbéna soohe inyu bôt bape, hala a nhôla bés i bigda le ‘Ntôñ wonsôna u lôk kéé ikété nkoñ ’isi u mboma minlélém mi mandutu.’ (1 Pétrô 5:9) Nsañal wada le Katherine a nkal le: “I ngéda me nsoohe inyu bôt bape, hala a mbigdaha me le ndik metama bé nyen me mboma mandutu, yak bo ba mboma mandutu. Hala a nhôla me le me lôôha bañ tôñ inyu mandutu mem.”

BA GWÉ NGÔÑ NI MASOOHE MÉS

8. Bonjee ba gwé ngôñ ni masoohe més?

⁸ Bonjee ba gwé ngôñ ni masoohe més? Di nla soohe inyu ngandak bôt. Kii ’héga, i bôt ba nkon, boñge ba wanda ba ba nkôs ndééñga i suklu, tole mimañ mi bôt. Ngandak lôk kéé, bôt bap ba lihaa ba nkolba bo tole baane. (Matéô 10:​18, 36; Minson mi baôma 12:5) Lôk kéé ihogi i bi nyodi i mambai map inyule gwét bi bé i loñ yap. Bape, bikuu bi nkwél bo. Bebek, di nyi bé i lôk kéé i, ndi i ngéda di nsoohe inyu yap, di ñunda le di nôgôl i mbén Yésu ini le: ‘Ni gwéhna bé ni bé.’​—Yôhanes 13:34.

9. Inyuki di nlama ke ni bisu i soohe inyu lôk kéé i i nkena nson i ntôñ u Yéhôva ni inyu baa bap?

⁹ Di nla ki soohe inyu lôk kéé i i nkena nson i ntôñ u Yéhôva, hala wee lôk kéé i Juu li bakena ntôñ ni bahôla bap, lôk kéé i i nkena nson i Bétel, mimañ mi mi yé i Bétel, bagwélél ba makiiña, mimañ mi likoda ni bahôla nson. Ngandak lôk kéé mu i ntumbba inyu yés, ndi i gwé map mandutu. (2 Korintô 12:15) Kiki hihéga, ngwélél makiiña wada le Mark a nkal le: “Ndutu ikeñi yada me gwé i yé le me yé haa ni bagwal bem ba ba ñun, bo iba ba nkon. Me nyi yaga le mankéé nu muda bo nlôm ba ntééda bo, ndi i ngéda me nhoñol le memede me ta bé bo ha ipañ, hala a ntééñga me.” To di nyi mandutu ma lôk kéé, to di nyi bé mo, di nlama bé waa soohe inyu yap. (1 Tésalônika 5:​12, 13) Di nla yak soohe inyu baa ba lôk kéé i, ba ba nhôla bo i ke ni bisu i gwel nson wap.

10-11. Baa i ngéda di nsoohe inyu lôk kéé yosôna, hala a nlémél Yéhôva? Toñol.

¹⁰ Di ntehe le di mbéna soohe inyu ngandak lôk kéé. Kiki hihéga, to ibale di nyi bé môl ma lôk kéé i i mboma mandutu, di yé di nsoohe inyu lôk kéé i i yé i mok, tole lôk kéé i i nkôhna maéya. Mañ wada le Donald a nkal le: “Ngandak lôk kéé i mboma mandutu. Jon ngim mangéda, di yé di soohe Yéhôva inyu lôk kéé yosôna inyu bat nye le a hôla bo.”

¹¹ Baa i nya masoohe i, i nlémél Yéhôva? Ñ. Di nyi bé mandutu momasôna lôk kéé yés i mboma. Jon i ta bé béba i soohe inyu lôk kéé yosôna. (Yôhanes 17:20; Éfésô 6:18) I nya masoohe i, i ñéba le ‘di ngwés ntôñ u lôk kéé wonsôna.’​—1 Pétrô 2:17.

I NGÉDA DI NSOOHE INYU NGIM MANKÉÉ

12. Ibale di nyaa mis, lelaa hala a nla hôla bés i soohe inyu lôk kéé?

¹² Nyaa mis. Di nlama soohe inyu lôk kéé yés yosôna ndi ngim mangéda, di nlama yak sima môl ma ngim lôk kéé. Baa mankéé mu likoda joñ a nkon ngandak? Baa mañge wanda mu likoda joñ a nkahal tomb inyu manoodana a mboma i suklu? Baa mankéé wada nu a néñés bon bé nyetama a njo sañ inyu néñés bo “ikété biniigana ni mabéhna ma Yéhôva”? (Éfésô 6:4) Ibale u nyaa mis, u ga kônde tôñ lôk kéé, hala a boñ le u soohe inyu yap.b​—Rôma 12:15.

13. Lelaa di nla soohe inyu lôk kéé di nyi bé?

¹³ Sima môl ma lôk kéé mu masoohe moñ. Di nla yak sima môl ma lôk kéé di nyi bé. Kiki hihéga, lôk kéé i i yé i mok i Krimé, Iritré, Ruslan, ni Siñgapur. Ibale u nke i jw.org, u nla léba môl ma lôk kéé i i yé i mok.c Ngwélél makiiña wada le Brian a nkal le: “Me bi yimbe le i ngéda me ntila môl ma lôk kéé, me pahlak mo, hala a mboñ le me laa bigda môl map, me soohe ki inyu yap.”

14-15. Kii i nla hôla bés i bat Yéhôva i mam ma mbéda toi lôk kéé?

¹⁴ Bat Yéhôva le a ti lôk kéé i mam ma mbéda toi bo. Michael nu di mbôk di pôdôl a nkal le: “I ngéda me ñañ i jw.org le lôk kéé i yé i mok, me noode hégda i ndutu me bak le me nok ibale men me bak nyoo i mok. Me nyi le ibale me bak i mok, ki me nhoñol nwaa wem, me yéñék manjel i tééda nye. Jon me nyi kii me nla bat Yéhôva inyu lôk kéé i i yé i mok, i bak mbiibaga.”​—Lôk Héber 13:​3, buk isi lipep.

¹⁵ I ngéda di nhégda lelaa niñ i nla ba i ndap mok, hala a nla hôla bés i yi mam mape di nla bat Yéhôva inyu yap. Kiki hihéga, di nla soohe le batat ndap mok ba tééñga bañ lôk kéé, ni le baane ba sôña bañ bo i bégés Yéhôva. (1 Timôtéô 2:​1, 2) Di nla soohe le hémle i lôk kéé i i yé i ndap mok i lédés hémle i lôk kéé i likoda jap, tole di nla soohe le i bôt ba ta bé Mbôgi Yéhôva ba tehe ndémbél ilam i lôk kéé i i yé i ndap mok, hala a tinde bo i emble ñañ nlam. (1 Pétrô 2:12) Di nla boñ nlélém jam i ngéda di nsoohe inyu lôk kéé i i mboma mandutu mape. Ibale di nyaa mis, di sima môl ma lôk kéé mu masoohe més, di bat ki Yéhôva le a ti bo i mam ma mbéda toi bo, wee di yé i ‘hôlôs i gwéha di gwé bés ni bés.’​—1 Tésalônika 3:12.

DI SOOHE NI SUHULNYUU

16. Lelaa di nla éba le di gwé suhulnyuu i ngéda di nsoohe? (Matéô 6:8)

¹⁶ Di ntehe le masoohe més ma nla boñ le Yéhôva a boñ jam. Ndi di nlama yoñ yihe. I ngéda di nsoohe, di hoñol bañ le di yé i kal Yéhôva ngim jam a nyi bé. Di ta bé to ha inyu ti nye maéba. Yéhôva a nyi i yom i mbéda bagwélél bé ilole bomede tole bés di nyi hala. (Añ Matéô 6:8.) Inyuki di nlama ni soohe inyu bôt bape? Handugi i mam di ntehe munu yigil ini, di nsoohe inyu bôt bape inyule di ntôñ bo. Gwéha yon i ntinde bés i soohe inyu lôk kéé yés. Yéhôva a yé maséé i ngéda a ntehe bagwélél bé ba nigle i lem yé ini le gwéha.

17-18. Himbe hihéga hi nla hôla bés i nok inyuki di nlama soohe inyu lôk kéé?

¹⁷ To ibale masoohe més ma nhéñha bé jam jo ki jo, ma ñéba le di ngwés lôk kéé, hala a nkônha Yéhôva maséé. Di yoñ le hihéga inyu nok i jam li: Hégda le bagwal ba gwé bon iba, munlôm ni muda. Mañge munlôm a niñi, a nkon. Manyañ nu muda a nsoohe isañ le: “Soho boñ jam inyu mankéé nunu, ngo a nkon ngandak!” Isañ a ngwés lok yé, a mal yoñ bitelbene inyu boñ le a kôs matibla. Ndi maséé ma yé le ma nol nye i ngéda a ntehe manyañ nu muda a ntôñ nye, a soohege nye isañ le a boñ jam inyu yé.

¹⁸ Hala nyen Yéhôva a nsômbôl le di boñ, a nsômbôl le di tôñ lôk kéé yés, di soohege inyu yap. I ngéda di mboñ hala, di ñunda toi le di ntôñ lôk kéé yés. Yéhôva a ntehe hala. (2 Tésalônika 1:3; Lôk Héber 6:10) Kiki di ntehe munu yigil ini, ngim mangéda, masoohe més ma nla boñ le Yéhôva a boñ jam. Jon, di hôya bañ soohe inyu lôk kéé.