Lelaa di nla kônde lémés masoohe més

1-2. (a) Kii i nla sôña bés i yible Yéhôva ñem i ngéda di nsoohe nye? (b) Kii i nyis bés le Yéhôva a ñemble masoohe més?

BAA NGIM mangéda, u yé u yimbe le u nkal Yéhôva minlélém mi mam ikété masoohe? Hala a nla pémél bésbobasôna. Kiki di pégi ngandak, i nla pam le di hoo soohe, di tagbe. Tole di yé le di hoñol le di kôli bé soohe Yéhôva.

² Bibel i ñunda le bibuk gwés bé gwon Yéhôva a mbéñge, a nsômbôl ndik le masoohe més ma lôl i ñem. A ñemble “minyemhe mi bôt ba suhulnyuu.” (Tjémbi 10:17) I ngéda di nsoohe, Yéhôva a nyoñ ngéda i emble bés inyule a ntôñ bés.​—Tjémbi 139:​1-3.

3. Mambe mambadga di ga timbhe munu yigil ini?

³ Di nla badba le: Inyuki di nlama bé kon woñi i soohe Yéhôva? Lelaa di yé le di kônde lémés masoohe més? Ibale di nyoñ ngéda i wan masoohe ma ma yé ikété Bibel, lelaa hala a yé le a hôla bés i kônde lémés masoohe més? Kii i nla hôla bés i ngéda di nyi bé kii di kal Yéhôva ikété masoohe? Di timbhe mambadga mana.

U KON BAÑ WOÑI I SOOHE YÉHÔVA

4. Kii i nla hôla bés le di kon bañ woñi i yible Yéhôva ñem? (Tjémbi 119:145)

⁴ I ngéda di nyi le Yéhôva a yé toi liwanda jés ni le a nsômbôl le di ba maséé, di nkon bé woñi i soohe nye. I mut a bi tila kaat Tjémbi 119 a bi noode tehe Yéhôva kiki liwanda jé. A bé boma ngandak mandutu. Bibéba bi bôt bi bé wéha nye nyuu. (Tjémbi 119:​23, 69, 78) Nyemede a bé jo sañ inyu lémél Yéhôva. (Tjémbi 119:5) Ndi to hala, a bi kon bé woñi i yible Yéhôva ñem wé.​—Añ Tjémbi 119:145.

5. Inyuki di nlama bé kon woñi i soohe? Ti hihéga.

⁵ Yak i bôt ba mboñ béba ikeñi, Yéhôva a nsômbôl le ba soohe nye. (Yésaya 55:​6, 7) Jon, jam jo ki jo li nlama bé sôña bés i soohe. Di yoñ le hihéga: I mut a nluk avioñ a nyi le a nla bat bôt ba ba nsal ni nye mahôla, to imbe ngéda. Baa a nlama kon woñi i bat mahôla i ngéda a mboñ hihôha tole a nkahal nimil? To jam! To bés, ibale di nyi bé jam di nlama boñ, tole di mboñ béba, di kon bañ woñi i bat Yéhôva mahôla.​—Tjémbi 119:​25, 176.

LELAA DI NLA KÔNDE LÉMÉS MASOOHE MÉS?

6-7. Ibale di nyoñ ngéda i hoñol bilem bi Yéhôva, lelaa hala a nla hôla bés i kônde lémés masoohe més? Ti hihéga. (Béñge yak matila isi lipep.)

⁶ I ngéda di nyible Yéhôva ñem, di kalak nye mam momasôna di nhoñol, hala a nkônde lémés masoohe més. Kii di nla ni boñ inyu kônde lémés masoohe més?

⁷ Di hoñol bilem bi Yéhôva.a I ngéda di nhoñol bilem gwé, hala a mboñ le di nkon bé woñi i yible nye ñem wés. (Tjémbi 145:​8, 9, 18) Di béñge ndémbél i Kristine nu isañ a bé tjome. A nkal le: “I tehe Yéhôva kiki papa yem i bé bé jam li ntomb. Me bé hoñol le dihôha tjem di bé le di boñ le a tjôô me.” Bimbe bilem bi Yéhôva bi bi hôla nye i kôôge nye bebee? A nkônde le: “I ngéda me bi nok le Yéhôva a ga waa bé gwés me, hala a bi boñ le me kon ha bañ woñi. Me nyi le a yé mbén i tjôô me. To me nkwo, a ntéé me. Inyu hala nyen me nyible nye ñem wem hiki ngéda inyu kal nye maséé mem ni mandutu mem.”

8-9. Inyuki i yé loñge i ôt pék ilole di nsoohe? Ti hihéga.

⁸ Ôt pék inyu yi kii w’a kal mu masoohe moñ. Ilole u mbôdôl masoohe, u nla badba ngim mambadga. Kiki hihéga, u nla badba le: ‘Imbe ndutu i yé i tééñga me nano? Baa ngim mut i yé le me nlama nwéhél? Baa me yé le me bat Yéhôva mahôla inyu ngim ndutu me ntip boma?’ (2 Bikiñe 19:​15-19) Di nla yak hoñol lelaa Yésu a bi niiga bés i soohe. Di béñge kii di yé le di bat Yéhôva inyu jôl jé, Ane yé, ni sômbôl yé.​—Matéô 6:​9, 10.

⁹ Sita yada le Aliska a bi nok le nlôm a nkon pos i boña, ni le ba nla ha bé tibil nye. A bé yi bé lelaa a soohe. A nkal le: “I jam li, li bé tééñga me ngandak, me bé yi bé to lelaa me bôdôl masoohe.” Kii i bi hôla nye? A nkal le: “Ilole me mbôdôl masoohe, me bé me yoñ ndugi ndék ngéda inyu ôt pék, hala a bé a boñ le me hoñol ndik bañ metama i ngéda me bé soohe. Hala a bé a mômôs me, hala a bé a boñ ki le me soohe Yéhôva ni mahoñol malam.”

10. Inyuki di nlama yible Yéhôva ñem? (Béñge yak bititii.)

¹⁰ Yible Yéhôva ñem woñ. Ngim mangéda, to masoohe més ma yé kidik, ma nla ba malam. Ndi inyu boñ le di kal toi Yéhôva i yom i yé bés ikétékété mahoñol, di nlama yible nye ñem wés.b Nlôm Aliska le Elijah a nkal le: “Me noode soohe Yéhôva ngandak ngélé hiki kel. Kiki me nyible nye ñem, hala a mboñ le me kônde kôôge nye bebee. Yéhôva a nkal bé me le me hoo pot me nwas nye nwee, jon me nyoñ ngéda yem yosôna i ngéda me nsoohe nye.” Noode le yéñ loñge ngéda ni loñge homa inyu soohe. I ngéda u nsoohe Yéhôva, u nla yak boñ le bibuk gwoñ bi nôga. Soohe i homa jam jo ki jo li ntééñga bé we. U bén-ga yak yible Yéhôva ñem woñ.

ÔT PÉK MU MASOOHE MA YÉ IKÉTÉ BIBEL

11. Lelaa masoohe ma ma yé ikété Bibel ma nla hôla we? (Béñge yak minkéñék mi matila mini le “Baa yak we u mboma minlélém mi mandutu?”)

¹¹ Ibale u nyoñ ngéda i ôt pék mu masoohe ni mu tjémbi di yé ikété Bibel, hala a yé le a hôla we. I ngéda u mba u ntehe lelaa bagwélél ba Yéhôva ba kôba ba bé yible nye ñem, hala a’ tinde yak we i yible nye ñem. U nla yak tehe bibuk u nla gwélél inyu bégés Yéhôva i ngéda u nsoohe nye. U nla ki tehe masoohe ma mpôdôl mandutu wemede u mboma.

12. Mambe mambadga di nla badba i ngéda di ñôt mahoñol mu masoohe ma yé ikété Bibel?

¹² I ngéda u ñôt pék mu masoohe ma yé ikété Bibel, u nla badba le: ‘Njee a bi pot bibañga bini? Mambe mandutu a bé boma? Baa yak me me mboma mandutu a mpôdôl mu masoohe mé? Bimbe biniigana me nla ôt mu masoohe mé?’ Inyu timbhe mambadga ma, i yé le i béda we le u yéñ mu bikaat bi ntôñ, nyiña u ga bane we nseñ. Di béñge ndék dihéga.

13. Kii masoohe ma Hana ma niiga bés? (1 Samuel 1:​10, 11) (Béñge yak titii)

¹³ Añ 1 Samuel 1:​10, 11. Hana a bééna mandutu ima i ngéda a bi soohe Yéhôva. A bé bé le a gwal, yak mbala yé i bé ndegle nye iloo ’héga! (1 Samuel 1:​4-7) Ibale ndutu i nai we, lelaa masoohe ma Hana ma yé le ma hôla we? Inyu kôhna hogbe, Hana a bi yible Yéhôva ñem, a bééga ki nye mbegee yé. (1 Samuel 1:​12, 18) Yak bés, ibale di nsômbôl bana hogbe, di nlama “bééga Yéhôva mbegee [yés],” di kal toi nye i mam ma yé bés i ñem.​—Tjémbi 55:22.

14. (a) Kii ipe di nigil mu ndémbél i Hana? (b) Ibale di nyoñ ngéda i ôt pék mu Bitilna, lelaa hala a ga kônde lémés masoohe més? (Béñge matila isi lipep.)

¹⁴ Ndék nwii i mbus ligwéé li man wé Samuel, Hana a bi kena nye yak prisi keñi le Éli. (1 Samuel 1:​24-28) A bi soohe Yéhôva. Mu masoohe mé, a bi unda le a nyi le Yéhôva a ntat, a ntôñ ki bagwélél bé ba ba tiñi ni nye.c (1 Samuel 2:​1, 8, 9) To hala kiki mandutu mé ma bé ngi mal, Hana a bi béñge ndik bisai Yéhôva a bi kôp nye. Kii hala a niiga bés? Ibale di mbéñge lelaa Yéhôva a nhôla bés mu niñ yés, hala a ga boñ le di laa nihbe mandutu més.

15. Lelaa masoohe ma mpôdôl Yérémia ma nla hôla bés i ngéda ba mboñ bés béba? (Yérémia 12:1)

¹⁵ Añ Yérémia 12:1. Ngim ngéda i bi pam le hala a bôdôl tééñga mpôdôl Yérémia i tehe bibéba bi bôt bi niñ loñge. Yak i mam bon ba Israel ba bé boñ nye, ma bé tééñga nye. (Yérémia 20:​7, 8) Yak bés, i ngéda di ntehe bibéba bi bôt bi niñ loñge tole bôt ba ndegle bés, hala a ntééñga bés. Yérémia a bi sôô bé le a bé ñunbak, ndi a bi ôm bé Nyambe nsohi. I ngéda a bi tehe lelaa Yéhôva a bi kogse bon ba Israel ba ba bi ndogbene nye, a bi kônde bôdôl nye ñem. (Yérémia 32:19) Yak bés, i ngéda di mboma mandutu, di yible Yéhôva ñem inyule di nyi le i loñge ngéda, a ga mélés mandutu momasôna.

16. Ibale di nla bé pam i ndap tole di yé i ndap mok, lelaa masoohe ma man Lôk Lévi ma nla hôla bés? (Tjémbi 42:​1-4) (Béñge yak bititii.)

¹⁶ Añ Tjémbi 42:​1-4. Man Lôk Lévi nu a bé i minkôm nyen a bi tila i hiémbi hini, a bé bé le a kodba ni lôk kéé yé. Hiémbi hié hi nyeelene bés ndutu a bi nok. Ibale di yé i mbai yés le di nla bé pam tole ibale ba bi ha bés i mok inyule di ñañal ñañ nlam, di nla nok nye. Len di nla ba maséé ndi yani, nduña i nai bés, ndi di nlama yible Yéhôva ñem hiki ngéda. Masoohe ma nhôla bés i yi kii i nlona bés nduña, ni i tehe mam kiki Yéhôva a ntehe mo. Kiki hihéga, i man Lôk Lévi nu a bi yimbe le ndutu yé i nla yible nye manjel mape inyu bégés Yéhôva. (Tjémbi 42:5) A bi yoñ ki ngéda i tehe lelaa Yéhôva a bé tééda nye. (Tjémbi 42:8) Masoohe ma nla hôla bés i yi inyuki di gwé nduña, ma nla hôla bés i ba nsañ, ma nla yak ti bés ngui inyu hônba.

17. (a)  Masoohe ma mpôdôl Yôna ma niiga kii bés? (Yôna 2:​1, 2) (b) Lelaa minlôñ mihogi mu kaat Tjémbi mi nla hôla bés i ngéda di mboma mandutu? (Béñge matila isi lipep.)

¹⁷ Añ Yôna 2:​1, 2. Hana homa nunu, Yôna a bi soohe Yéhôva a bak ikété libum li hiobi. A bi ndogbene Yéhôva ndi to hala, a bé yi le Yéhôva a ga emble nye. Mu masoohe mé, a bi gwélél ngandak bibuk di nléba i kaat Tjémbi.d I mpôna le a bé yi bibañga bi loñge loñge. I ngéda a bé ôt pék mu bibañga bi, hala a bé boñ le a yi le Yéhôva a ga hôla nye. Yak bés, ibale di ntééda ngim minlôñ mi Bibel, di nla bigda nwo, mi hôgbaha ki bés i ngéda di mboma mandutu.

DI KEE NI BISU I SOOHE YÉHÔVA

18-19. Ibale ngim mangéda, di nyi bé kii di kal ikété masoohe, lelaa kaat Rôma 8:​26, 27 i nla hôla bés? Ti hihéga.

¹⁸ Añ Rôma 8:​26, 27. Ngim mangéda, nduña i yé i ba bés nnayak kayéle di yi bé to kii di kal Yéhôva. To hala, Yéhôva a yé bebee i hôla bés. Mu mangéda ma, mbuu mpubi u “nyemhe” inyu yés. Lelaa? Yéhôva a bi gwélél mbuu wé mpubi inyu tinde bôt i tila ngandak masoohe ikété Bañga yé. I ngéda di nyi bé kii di kal nye ikété masoohe, a nla timbhe masoohe ma yé mukété Bañga yé wengoñle bés bon di yé i soohe.

¹⁹ I jam li, li bi hôla sita yada i loñ Ruslan le Yelena. Bisônda bi bi gwel nye ndik inyule a bé soohe, a añak Bibel. Nduña i bé nye nnayak ha ngéda i, a bé bé to le a soohe. A nkal le: “Me bi bigda le i ngéda nduña i yé me nnayak, le me nyi bé to kii me kal Yéhôva ikété masoohe, Yéhôva a nla timbhe masoohe ma bagwélél bé ba kôba . . . ma ma yé mukété Bañga yé wengoñle men me yé soohe nye. . . . Hala a bi lédés me ngandak mu béba ngéda i.”

20. I ngéda nduña i yé bés nnayak, kii di nla boñ ilole di nsoohe?

²⁰ I ngéda nduña i yé bés nnayak, di nla soohe di hoñlak mam mape. Ilole di mbôdôl soohe, di nla ndugi emble bibuk bi kaat Tjémbi. Di nla yak noode tila i mam ma ntééñga bés kiki Kiñe David a bi boñ. (Tjémbi 18, 34, 142; matila i bibôdle bi hiémbi.) Ndi ngim mbén i ta bé inyu kôôba masoohe. (Tjémbi 141:2) Boñ kiki u ntehe loñge.

21. Inyuki di nlama yible Yéhôva ñem?

²¹ Di yé maséé inyule di nyi le Yéhôva a nyi mahoñol més yak i ngéda di mpot bé. (Tjémbi 139:4) Ndi a yé maséé i ngéda di nsoohe nye inyule hala a ñunda le di mbôdôl nye ñem. Jon u kon bañ woñi i soohe Tata wés nu ngii. Ôt pék mu masoohe ma yé i Bañga yé, yible nye ñem, kal nye maséé moñ ni mandutu moñ. Yéhôva a yé we bañga liwanda, a’ tjôô bé we kekikel!