Mambadga Ma Basoñgol

Baa i yé loñge le kristen i bana ngaa, kiki bo ngaa bel tole ngaa ntjep, inyu sôñ nyemede ikolba bôt bape?

Tolakii bikristen bi nla yoñ bitelbene inyu tat bomede, ba nlel bé nwaa i matiñ ma Bibel. Mon ma mbéhe bés inyu ligwéélak li mintén mi ngaa nwominsôna inyu sôñ bésbomede ikolba bôt ba binam bape. Di yoñ le ndék dihéga:

I mis ma Yéhôva, niñ​—téntén i bôt ba binam​—i yé jam li pubhaga. Ntôptjémbi le David a bé yi le Yéhôva a yé “lingen li niñ.” (Tjémbi 36:10) Jon, ibale kristen i ntep i yoñ bitelbene i sôñ nyemede tole gwom gwé, a nlama boñ kii yosôna a nla, inyu keñgle i nol mut, kayéle a bana pil matjél.​—Ndiimba Mbén 22:8; Tjémbi 51:14.

Tolakii ngandak gwom bi nla boñ le di bana pil matjél, ngaa yo, i nla hoo nol mut​—nkôôbaga to ngi kôôba.a Ni le, ibale mut nu a nyumbla we​—nu a yé ñunbak ngandak​—a ntehe le u gwé ngaa, mam ma nla bep ngandak, kayéle mim u nañal ték.

I u u nsôk i niñ i Yésu hana isi, ngéda a kal banigil bé le ba yoñ pansoñ, a bé hoñol bé le ba gwélél yo inyu sôñ bomede. (Lukas 22:36, 38) Maselna ni hala, Yésu a bé sômbôl niiga bo le, ba jo bañ bisañ, to ibale ba mboma limut li gwé bijôl bi gwét. (Lukas 22:52) Mbus le Pétrô a bi gwélél pansoñ yada inyu sebel ôô i nkol u prisi ikeñi, Yésu a ti nye oda le: “Timbis pansoñ yoñ i homa wé.” Mbus, Yésu a bi niiga maliga ma bisu bisu, ni litiñ li li ñéga banigil bé i len ini: “Ba bobasôna ba mbada pansoñ ba ntjiba ni pansoñ.”​—Matéô 26:51, 52.

Inoñnaga ni Mika 4:3, bagwélél ba Djob ba ga “ôô paminsoñ yap disoo, yak makoñ map mangwende.” Ini yimbne i bañga bikristen i nkiha ni mabéhna ma Paul: “Ni timbhe bañ mut nye ki nye béba inyu béba. . . . Hoñlana i boñ mam ma yé loñge bisu bi bôt bobasôna.” (Rôma 12:17, 18) Tolakii Paul a bi boma ngandak mandutu, “inyu mandun ma bôt ba ngadla,” a bi niñ inoñnaga ni bibañga bi, a sôñ bé nyemede kekikel kayéle a titbe matiñ ma Bibel. (2 Korintô 11:26) Ndi, a bôdôl Djob ñem, ni pék i nlôl lipôdôl jé​—pék i, “i yé loñge iloo bijôl bi gwét.”​— Ñañal 9:18.

Bikristen bi ndiihe niñ iloo bigwelmoo. Bibel i nkal le: “inyule nom mut i tane bé inyu ngandak gwom a gwé.” (Lukas 12:15) Jon, ibale bibuk bilam bi nkola bé inyu mômôs ntonba, bikristen bi bi gwé pék, bi noñ maéba ma ma yé ikété bini bibuk bi Yésu: “Nihbana mut a mboñ bé béba.” I nla béda yak le di tjôô kôti yés yak soti yés. (Matéô 5:39, 40; Lukas 6:29)b Likeñge li nlôôha lilam li yé ngôôba. Ibale di nkeñgle “humbulnyu i nom ini,” ni le di nyiba ni bôt bés ba libôga kiki Mbôgi Yéhôva i i ngwés nsañ, di ga la keñgle i ba ntén bôt mintonba mi nyéñ.​—1 Yôhanes 2:16; Bingéngén 18:10.

Bikristen bi ndiihe kiññem i bôt bape. (Rôma 14:21) Ibale i nyiba ikété likoda le mankéé wada a gwé ngaa inyu sôñ nyemede ikolba bôt bape, hala a nla tééñga bini bikristen bipe, kayéle hala a yilna yak bo ngok baagene. Gwéha i ntinde bés i bii gwéñe bi bôt bape i bisu bi gwéñe gwés, to ibale i nsômbla le di tjél boñ yom di gwé kunde i boñ.​—1 Korintô 10:32, 33; 13:4, 5.

Bikristen bi mboñ biliya i ti ndémbél ilam. (2 Korintô 4:2; 1 Pétrô 5:2, 3) Mbus a ma kôhna maéba ma nlôl Bitilna, i kristen i ngi kenek ni bisu i tééda ngaa inyu sôñ nyemede ikolba bôt bape, i nla bé ba ndémbél ilam. I ta bé le i gwel nson wo ki wo ikété likoda, to nson u tôbôtôbô. Nlélém inyu mankéé nu a ngi kenek ni bisu i begee ngaa i homa wé bôlô. Kinje loñge jam inyu yé le a yéñ bôlô ipe!c

Hiki kristen yon i nlama tep lelaa i ga sôñ nyemede, lihaa jé, ni nkus wé, yak bôlô i ga sal. Hala a nkobla le matiñ ma Bibel ma yé nyonok ni pék i Djob ni gwéha yé inyu yés. Inyu unda le ba nôgôl matiñ ma, minhôôlak mi bikristen i pes mbuu mi mpohol i tjél bana ngaa inyu sôñ bomede ikolba bôt ba binam bape. Ba nyi le bañga nwee ni i i nom mba ni mba, i yé inyu bet ba mbôdôl Djob ñem, ba niñik ki inoñnaga ni matiñ ma Bibel.​—Tjémbi 97:10; Bingéngén 1:33; 2:6, 7.