Inyuki Djob a gwé ngim ntôñ?

1. Inyuki Djob a bi tjek litén li Israél nu kôba?

Djob a bi tjek mbôda i nsôgôsôgô Abraham kiki ngim litén, a ti ki bo mambén mé. Mbus, a sébél litén li le “Israél,” a yilha bo batééda mbén ni bañga libégés. (Tjémbi 147:19, 20) Jon, bôt ba matén momasôna ba bé lama kôs bisai ni njel Israél.​—Añ Bibôdle 22:18.

Djob a bi pohol Lôk Israél le ba ba mbôgi yé. Nlômbi ñañ u Lôk Israél u ñunda lelaa bôt ba nla kôhna bisai, ngéda ba nôgôl mambén ma Djob. (Ndiimba Mbén 4:6) Jon, ni njel Lôk Israél, bôt bape ba bé lama yi njee a yé bañga Djob.​—Añ Yésaya 43:10, 12.

2. Inyuki bañga bikristen ba yé ntjegeg?

Ni ngéda, Israél a bi nimis maada mé ni Djob. Jon Yéhôva a bi tjôô bo, a héñha Israél ni ntôñ bikristen. (Matéô 21:43; 23:37, 38) I len ini, bañga bikristen yon i mbok mbôgi inyu Yéhôva.​—Añ Minson mi baôma 15:14, 17.

Yésu a bi tjek banigil bé inyu tjam ñañ nlam, ni le ba yilha biloñ gwobisôna banigil. (Matéô 10:7, 11; 24:14; 28:19, 20) Nano le di niñ i masuk ma hiai hini, nson unu u pam likala li nsôk. Inyu ngélé bisu i ñañ u bôt ba binam hana isi, Yéhôva a nkôt didun di bôt di nlôl i matén momasô ikété bañga bibégés. (Masoola 7:9, 10) Bañga bikristen ba yé ntjegeg kiki ngim ntôñ inyu hôlna, ba ntina ki makénd bo ni bo. I nkoñ isi wonsô, bañga bikristen ba nkôs minlélém mi biniigana bi Bibel ikété makoda map.​—Añ Lôk Héber 10:24, 25.

3. Lelaa ntôñ u Mbôgi Yéhôva u dilo tjés u bi bôdôl?

I ñwii 1870, ndég bôt i bi bôdôl nigil Bibel. Ba bi témb ba bôdôl timbis biniigana bi maliga bi Bibel bôt ba bi tjôô. Ba bé ba nyi le Yésu a bi tjek ntôñ u likoda inyu téé likalô, jon ba bi bôdôl tjam ñañ nlam Ane ni biloñ gwobisôna. I ñwii 1931, ba bi yoñ lini jôl le: Mbôgi Yéhôva.​—Añ Minson mi baôma 1:8; 2:1, 4; 5:42.

4. Lelaa Mbôgi Yéhôva i yé ntjegeg?

Ngéda banigil ba Yésu ba bisu, ndég bôt i bé kii juu li bakena ntôñ. Bon ba bé éga makoda ma bikristen. Ba bé yi le Yésu nyen a yé Ño ntôñ. (Minson mi baôma 16:4, 5) Nlélém len ini, Mbôgi Yéhôva i nkoñ isi wonsôna i gwé minhôôlak mi mimañ mi mi yé juu li bakena ntôñ. Bon ba ñéga bôlô i nséla ikété dikuu di Mbôgi Yéhôva. Dikuu di, di nkobol, di mpémés, ni tjam bikaat bi mpôdôl inyu Bibel ikété iloo 600 dilémb. Jon juu li bakena ntôñ li ngwélél Bibel inyu ti iloo 100 000 makoda ni nkoñ isi wonsôna makénd ni inyu éga bo. Ikété hiki likoda, i bôlôm ba nyônôs manjom ma Bibel, bon ba nsal kiki mimañ tole batééda ntôñ. Bon ba ntééda bémba Djob ikété gwéha.​—Añ 1 Pétrô 5:2, 3.

Mbôgi Yéhôva i yé ntjegeg inyu añal ñañ nlam, ni yilha bôt banigil. Kiki baôma, di añal ñañ nlam ni mandap mandap. (Minson mi baôma 20:20) Di naña ki bôt ba gwés yi toi maliga i nigil Bibel ni bés. Ndi Mbôgi Yéhôva i ta ndik bé ngim tjegeg ntôñ. Di yé lihaa jada li li gwé Isañ nu gwéha wada. Di yé bilôk bikéé bi bôlôm ni bi bôba bi ntôñ bo ni bo. (2 Tésalônika 1:3) Ntôñ Mbôgi Yéhôva u yé ntjegeg inyu lémél Djob ni hôla bôt bape i yi nye. Jon lihaa lipe hana nkoñ isi li ta bé masé kiki bo.​—Añ Tjémbi 33:12; Minson mi baôma 20:35.