Tjek mam i bisu bi ngéda, gwélél bañga pék

Ibabé pééna, hihéga hi man nimlaga hi Yésu a ntip ti, hi nyis bakottas, bayimbén, ni Farisai le Djob a yé bebee i nwéhél baboñbéba ba ba nhiel miñem. (Lukas 15:1-7, 11) Nano, Yésu a mpôdôs banigil bé. A nti hihéga hipe, hihéga hi ngwañ mut nu a nok le ngwélél wé wada, tole kindak i ndap yé, a mboñ béba.

Yésu a nkal le ba ñôm kindak nsohi le a mbep gwélél nkus u nwet wé. Nwet ndap a nkal kindak le a ga héya nye i bôlô. Ha nyen kindak a mbôdôl ôt mahoñol a kalak le: “M’a boñ lelaa nano, hala kiki nwet wem a yé héya me nson u kindak? Bôlô moo i nai me, yak njagi i nwéha me nyuu.” Inyu boñ le a pamba ni mandutu ma ga lôl nye mu dilo di nlo, a nkal le: “Ññ! Me nyi kii m’a boñ kayéle bôt ba leege me i mandap map ngéda b’a héya me nson u kindak.” Ha nyen a mbôdôl sébél hiki mut nu nwet wé a mbat pil, a kal hiki wada le: “Umbe pil nwet wem a mbat we?”​—Lukas 16:3-5.

Nu bisu a ntimbhe le: “Mbôgôl dihéga di môô ma ôlivé,” yom kiki bo 2 200 lita i môô. Mut nunu a bé lama bana soso wom ôlivé tole a bé mut a nuñul môô. Kindak a nkal nye le: “Témb yoñ kaat yoñ pil, yén, u pala tila le môm matan [1 100 lita].”​—Lukas 16:6.

Kindak a mbat numpe le: “Yak we, umbe pil a mbat we?” Ndimbhe i yé le: “Mbôgôl dihéga dikeñi di kôn.” Hala a yé yom kiki bo 22 000 lita. Kindak a nkal nye le: “Témb yoñ kaat yoñ pil, tila le môm juem.” A suhus pil wé jôga.​—Lukas 16:7.

Kiki kindak a ngi yii i ngii nkus u nwet wé, jon di nla kal le i ngi gwé kunde i suhus mapil ma bôt ba mbédél nwet wé moni. Kiki a yé hôyôs mapil ma bôt bana, a yé bot mawanda ni bôt ba ga hôla nye i ngéda a ga nimis bôlô yé.

Nwet ndap a ga sôk a yi jam kindak a mboñ. To ibale hala a nkobla le a ga nimis moni, likeñge li kindak li nhélés nye ngandak, a mbégés ki nye inyule to hala kiki kindak yé ‘a téé bé sép,’ a ‘ngwélél pék.’ Yésu a nkônde le: “Bon ba hiai hini ba ngwélél pék ikété maada map ni bôt ba hiai hiap iloo bon ba mapubi.”​—Lukas 16:8.

Yésu a ta bé bégés njel kindak a ngwélél, a ta bé ki to i bégés malôga ma kindak. Biniigana bi yé le kii? A nkal banigil bé le: “Boda mawanda ni nkus u ngitelepsép inyu boñ le ngéda u mal, i mawanda ma ma leege bé i mayééne ma boga.” (Lukas 16:9) Yésu a yé niiga bo i kôôba mam bisu bi ngéda, ni i gwélél bañga pék. Bagwélél ba Djob, tole “bon ba mapubi” ba nlama gwélél nkus wap ni pék i kôli, ba ban-ga niñ boga mu mahoñol map.

Ni njel Ane, Yéhôva Djob ni Man wé Yésu botama bon ba nla leege mut i Ane ngii tole i Paradis hana isi. Di nlama tibil tééda maada més ni bo. Inyu hala nyen di nlama gwélél bigwel moo gwés inyu nit gwéñe bi Ane. Ibale di mboñ hala, di ga bana niñ boga mu dilo di nlo, i ngéda gôl, moni, ni gwom bipe bi ga bana ha bé mahee tole bi ga mal.

Yésu a nkal ki le bet ba téé sép mu ligwéélak li nkus wap ni gwom bipe ba gwé, ba ga ba ki maliga i mam ma nlôôha ba nseñ. Inyu hala nyen a nkal le: “Jon ibale ni ñunda bé le ni yé maliga ni nkus u ngitelepsép, njee a’ bôdôl bé ñem inyu ti bé bañga nkus?”​—Lukas 16:11.

Yésu a yé unda banigil bé le inyu boñ le ba ‘leege bo i mayééne ma boga,’ i ga béda bo le ba yônôs matiñ ma nlôôha makeñi. Mut a ta bé le a yila bañga ngwélél Djob ibale i nlélém ngéda a yé nkol u nkus u ngitelepsép. Inyu mélés, Yésu a nkal le: “Ngwélél to wada a nla bé ba nkol u bet iba; inyule a’ oo ndigi wada, a gwés nuu numpe; tole a’ adbe wada, a yan nuu numpe. Ni nla bé ba minkol mi Nyambe ni mi Lingwañ.”​—Lukas 16:9, 13.