Ñane nu a gwé kunde i ngii mbuk mbebi

Bôt ba yé nhelek i tehe Yésu a njés dikôô di bôt ni hélha njel. Sôk i nsôk, ba nkal le: “Nunu toi nyen a yé Mpôdôl nu a bé lama lo i nkoñ isi.” Ba nkal le Yésu a yé Mésia ni le a nla ba loñge ñane. (Yôhanes 6:14; Ndiimba Mbén 18:18) Jon bôt ba ñôt minsoñgi inyu gwel Yésu, ni i yilha nye kiñe.

Ndi Yésu a nyi mahoñol map. A nhuuha limut, a kal banigil bé le ba témb i môñgô wap. Imbe njel ba nyoñ, hee ba yé ke? Ba nke ndugi i Bétsaida, i mbus, ba kee i Kapernaum. Yésu nye a nke ngii hikôa inyu soohe nyetama u wonsôna.

Ni mapubi ma sôñ, bebee ni maye ma kel, Yésu a mbéñge môñgô haa. Mbebi i mboñ le mangudga ma tuye ma bép môñgô ni ngui, baôma ba ‘njoba i leñ pagô inyule mbebi i nlôl bo bisu.’ (Markô 6:48) Yésu a nsôs i ngii hikôa, a bôdôl ke i ngii mangudga inyu boma banigil. Ba ma ‘leñ pagô hala a yé jam kiki bo kilôméta itan tole isamal.’ (Yôhanes 6:19) Banigil ba ntehe Yésu a nlo boma bo, ba nkon woñi, ba kahal lond le: “Yiinda i!”​—Markô 6:49.

Yésu a nlédés bo, a nkal bo le: “Ni ban miñem! Me nu! Ni kon bañ woñi.” Ndi Pétrô a nkal le: “A Nwet, ibale we nu, ti oda le yak me me kil i ngii malép, me lo me koba we.” Yésu a ntimbhe nye le: “Lok!” Ni Pétrô a sôs i môñgô a kahal ke ngii malép i boma Yésu. Ndi i ngéda a ntehe mbuk mbebi, Pétrô a nkon woñi, a bôdôl yin, a lond le: “A Nwet, tohol me!” Yésu a nsambal woo wé a gwel Pétrô a kal nye le: “A mut hémle titigi, inyuki u nwas le pééna i je we ñem?”​—Matéô 14:27-31.

Pétrô bo Yésu ba njôp ikété môñgô, mbebi i mom. Banigil ba nhel, ndi baa ba nlama hel? Ibale ba “ôt biniigana mu hélha jam a bi boñ inyu ti bret,” hala a yé ndik ndék ngeñ, kiki a njés dikôô di bôt, ki ba lam-ga bé hel i tehe nye a nke i ngii malép a mômôs ki mbebi. Nano, ba nti nye lipém, ba kalak le: “U yé toi Man Nyambe.”​—Markô 6:52; Matéô 14:33.

I mbus, ba mbol i loñge tegep homa, i Génésarét i nwelmbok i Kapernaum. Ba ntéñ môñgô, ba sôs i ngwañ. Bôt ba nyimbe Yésu, yak i bet ba yé mabôga ma yé ha bebee ba nlona bakokon i nyeni. I ngéda ba ntihba ndik linjek li mbot Yésu, ba nôgda le ba mbôôp.

Ha ngéda i, limut li li bi tehe Yésu a njés dikôô di bôt li nôgda le Yésu a nke. Jon i ngéda môñgô mi Tibéria mi nlo, bôt ba mbet mu inyu ke i Kapernaum i yéñ Yésu. Ngéda ba nléba nye, ba mbat nye le: “A Rabi, u nlo hana ngéda mbe?” (Yôhanes 6:25) Ni mahoñol malam Yésu a nkônd bo, kiki d’a ke tehe hanano.