PES 25

Kii i yé sômbôl i Djob inyu bôt ba binam?

Kiki kaat i mapep

Bibel i niiga le mut binam “a niñ ndik ndék ngéda, yak dilo tjé di yé nyonok ni mandutu.” (Hiôb 14:1) Baa ntén niñ u won Djob a bé gwés le di bana? Ibale ndimbhe i mbadga ini i yé le to, umbe ntén niñ Djob a gwé ni ngôñ le di bana? Baa d’a la bana i niñ i kel yada? Béñge biloñge bi mandimbhe Bibel i nti.

1. Umbe ntén niñ Yéhôva a gwé ngôñ le di bana?

Yéhôva a gwé ngôñ le niñ yés i ba ilam kiyaga. I ngéda a bi hek Adam bo Éva, bôt ba bisu i niñ hana ’isi, a bi ha bo i paradis, hala wee i wom Éden. I mbus, “Nyambe a sayap bo, a kal ki bo le: “Gwala, bôla, ni yônôs hisi ni ane ki hio.’” (Bibôdle 1:28) Yéhôva a bééna ngôñ le ba bana bon, ba yilha hisi hiosôna paradis, ba yoñ ki ndun ni binuga. Sômbôl yé i bé le bôt ba binam bobasôna ba ba mbôô i nya i yôni, ba niñ ki i boga ni boga.

To hala kii mam ma ta bé hala len, sômbôl Yéhôva i nhéñhaga bé.a (Yésaya 46:10, 11) A ngi gwéhék le i bôt ba binam ba ba nôgôl nye, ba niñ i boga ni boga ibabé ndutu yo ki yo.—Añ Masoola 21:3, 4.

2. Lelaa di nla bana loñge niñ i len ini?

Yéhôva a bi hek bés ni ngôñ i “mam ma mbuu,” hala wee ngôñ i yi nye ni i bégés nye. (Añ Matéô 5:3-6.) A nyéñ le di ba mawanda mé, le di “kil i manjel mé momasôna, di gwés nye,” ni le di gwélél ki nye ‘ni ñem [wés] wonsôna.’ (Ndiimba Mbén 10:12; Tjémbi 25:14) Ibale di mboñ mam mana, di ga ba toi maséé to ibale di mboma mandutu. I ngéda di mbégés Yéhôva hala a nlémés niñ yés, inyule inyu hala nyen di bi héga.

KÔNDE TÉM

Béñge lelaa gwéha ikeñi i Yéhôva i bi nene mu kiki a bé kôôba hisi inyu boñ le hi bane bés loñge homa liyééne; ni i mam Bibel i niiga bés inyu boñ le di bana niñ ilam.

Adam bo Éva ba yé béñge bikai ni binuga bi bi yé i loñge homa het ba yiine.

3. Yéhôva a nsômbôl le bôt ba binam ba bana niñ ilam

Tuk VIDÉÔ, i mbus ni kwélél mbadga ini:

VIDÉÔ: Inyuki Djob a bi heg hisi?—Dinyo malép (1:41)

Inyuki Djob a bi hek hisi hi bak hilam?

Añ Ñañal 3:11, i mbus ni kwélél mbadga ini:

Kii nlôñ kaat unu u niiga bés inyu Yéhôva?

4. Sômbôl i Yéhôva i nhéñha bé

Añ Tjémbi 37:11, 29 ni Yésaya 55:11, i mbus ni kwélél mbadga ini:

Lelaa di nyi le sômbôl i Yéhôva inyu yés i nhéñha bé?

A. Ndap i i yé ñôbak. Nyôl u kahal kwo, biwinda bi yé mbôgôk, yak mbédgé i yé nyonok ni mahindi. — Nlélém kiki ba nla tibil ndap ba nyôi, hala ki nyen Nyambe a ga bôñgôl hisi hi bôt ba binam ba bi ôbôs, a ti hio i bôt ba ngwés nye

B. Nlélém ndap nano ba mbôñglak yo i yé ilam. — Nlélém kiki ba nla tibil ndap ba nyôi, hala ki nyen Nyambe a ga bôñgôl hisi hi bôt ba binam ba bi ôbôs, a ti hio i bôt ba ngwés nye

5. I ngéda di mbégés Yéhôva, ha nyen niñ yés i gwé mahee

I yi sômbôl i Djob inyu yés i nla lona bés maséé. Tuk VIDÉÔ, i mbus ni kwélél mbadga ini:

VIDÉÔ: Me bi yi inyuki di niñ (5:03)

Bimbe bisai Terumi a bi kôs ngéda a bi yi inyuki di niñ?

Añ Ñañal 12:13, i mbus ni kwélél mbadga ini:

Hala kiki Yéhôva a mbôñôl bés ngandak mam malam, lelaa di nla éba le di nti nye mayéga?

BÔT BAPE BA NLA BAT LE: “Inyuki di niñ?”

Lelaa w’a timbhe?

I SEM KWEP

Yéhôva a gwé ngôñ le di niñ i boga ni boga hana ’isi ibabé ndutu yo ki yo. Ngéda di mbégés Yéhôva ni ñem wés wonsôna, di ntehe le niñ yés i gwé mahee.