Maséé i suhus likala jés li niñ

DANIEL BO MIRIAM ba bi biiba i sôñ Dipos i nwii 2000, ba yééne i tison i Barcelone, i loñ Panya. Daniel a nkal le: “Di bééna yom bôt ba nsébél le niñ mbomboo, inyule bibôlô gwés bi bé ti bés pôla i je i mbôm bahoma ba nuñul minlambak mi bijek, i ke liké biloñ bipe, ni i haba mambot malam kiyaga. Di yoñok ki ngaba i nson likalô hiki ngéda.” Ndi mbus, mam ma bi héñha.

I likoda li ndôn li nwii 2006, nkwel wada u bi lôôha tihba Daniel, u bé badak le: “Baa di mboñ yom yosôna di nla inyu hôla i bôt ba yé njel nyemb, i léba njel niñ boga?” (Bingéngén 24:11) Nkwel u, u bi yigye le di nlama tjam nwin tohi u Bibel. (Minson mi baôma 20:26, 27) Daniel a ngi bigdaga le: “Me bé nôgda wengoñle Yéhôva nyen a yé pôdôs me.” Nkwel u, u bi unda le ngéda mut a nkéñbaha nson wé ñañ nlam, hala a nti nye ngandak maséé. Daniel a bé yi le hala a yé maliga. Nwaa wé Miriam, a bé a ma bôdôl nson nsañal, a ban-ga ngandak bisai bi bi bé lona nye maséé.

Daniel a nkal le: “Ha nyen me bi sugus le ngéda i bi pam inyu yés le mam ma nhéñha héñha yosôna.” Hala ki nyen Daniel a bi boñ. A bi hubus ngeñ yé bôlô, a bôdôl nson nsañal, a hoñlak maséé nye ni Miriam ba bé le ba kôs ibale ba ke sal het ngôñ batéé likalô i yé keñi.

BIBÔDLE, MANDUTU​—MBUS, NWIN NLAM KIYAGA

I sôñ Mpuye u nwii 2007, Daniel bo Miriam ba bi tjôô bôlô yap, ba ke Panama, ngim loñ ba bi bôk ba yuuga. Libôga jap li likalô li bééna ngandak ôn i Bôcas del Tôrô, i mbok i tuye Karaibé, nyonok ni bôt ba ba bi gwéé ha libôga li Guami. Daniel bo Miriam ba bi hoñol le ibale ba ngwélél moni ba bi tééda, ba bé le ba yén i Panama jam kiki bo sôñ juem.

Ba bé ke ôn mbus ôn, ba gwéélak kuñga ni baskô. Ba ngi hoñlak liké jap li baskô li bisu​—bebee le 32 kilôméta i ngii dikôa di téé le pet, i si hiañgaa hi ngui. I bi yégle ndék, ki Daniel a bi nimis yi. Ndi, mandap ma ma bé mu mbaa nloñ, mahaa ma libôga li Guami ma bé leege bo loñge, téntén ngéda babiina bana ba bi bôdôl nigil ndék bibuk bi hop u libôga. Bo ngi nom, ba bé lôôs môm ima ma gwigil Bibel ni baa.

Ndi, ngéda bigwel moo gwap bi bi kahal mal, maséé ma babiina bana ma bi yila maéa. Daniel a ngi bigdaga: “Ni gwiiha i mis, di bi bôdôl hoñol matémb més i Panya. Hala a bé tééñga bés ngandak i yék bôt di bé nigil ni bo.” Ndi mbus sôñ yada, di bi kôhna nwin nlam kiyaga. Miriam a nkal le: “Ba bi bat bés le di yila basañal ba tôbôtôbô. Kinje maséé i ke ni bisu i sal nlélém libôga!”

MASÉÉ MAP MAKEÑI

I nwii 2015, ngéda ntôñ u bi témb lona mahéñha makeñi, Daniel bo Miriam ba bi témb ba yila basañal ba ngéda yosôna. Ba mboñ ni lelaa? Ba bi bôdôl unu mbônga u nlébna i kaat Tjémbi 37:5 ñem: “Bii njel yoñ yak Yéhôva; bôdôl ki nye ñem, ndi a’ boñ jam.” Ba bi léba ngim bôlô i i nhôla bo i yén basañal, i len ini, ba yé i likoda li tison Véragas, i loñ Panama.

Daniel a nkal le: “Iloo di bé nyodi i loñ Panya, di bé yi bé le di bé le di la suhus likala jés li niñ. I len ini, di mpam i niñ hala. Jam jo ki jo li nhañ bé bés.” Mambe maséé makeñi ba gwé? Ba nkal le: “I hôla bôt ba suhulnyu i yi Yéhôva i ntina maséé ma mbuma ñañ!”