Mambadga ma basoñgol
I ngéda Yésu a bé téé Bilôp bi Nwet, hee ini 70 i banigil ipe a bi ep i téé likalô i bé? Baa ba bi tjôô nye?
Di nlama bé hoñol le, kiki ini 70 i banigil ipe i bé bé ha i ngéda Yésu a bé téé Bilôp bi Nwet, wee ba bé lémél ha bé Yésu tole ba bi tjôô nye. Yésu a bé sômbôl ndigi ba lôñni baôma bé ha i ngéda i.
Yésu a bé gwés baôma ni bana banigil bé bape. Yésu a bi bôk ndugi a pohol mu ngandak yé banigil ba bôlôm 12, a sébél bo le baôma. (Lukas 6:12-16) A bé i Galiléa i ngéda “a sébél jôm ni iba,” a “ep bo i añal ñañ nlam u Ane Nyambe ni i mélés makon.” (Lukas 9:1-6) I mbus, Yésu a sôs i Yudéa, “a pohol 70 ma banigil bape, a ep bo, iba iba.” (Lukas 9:51; 10:1) Yésu a bééna banigil i ngandak bahoma ñañ wé u bé añlana.
I bon ba Lôk Yuda ba ba bi yila banigil ba Yésu ba bé ke ni bisu i bégés Pasa hiki nwii, bebek lôñni mahaa map. (Manyodi 12:6-11, 17-20) Ndék ngéda ilole a nwo, Yésu ni baôma bé ba bi ke i Yérusalem. Ndi a bi sébél bé banigil bé bobasôna inyu tégbaha soso ngand i Pasa ni bo—i bet ba bé i Yudéa, i Galiléa, ni i Péréa. I nene le, Yésu a bé sômblak ndigi ba lôñni baôma i yokela nu. A kal bo le: “Me ban-ga ngôñ ngandak i je Pasa ini lôñni bé ilole me nok ndutu.”—Lukas 22:15.
A bééna njom i tôbôtôbô i i bi tinde nye i boñ hala. Yésu a bé bebee i wo kiki “Man ntômba nu Nyambe nu a nhéya béba ikété nkoñ ’isi.” (Yôhanes 1:29) A bé lama wél i Yérusalem, tison i het ba bé ti bisesema ibôdôl behee. Nyemb Yésu i bééna nseñ iloo Pasa hikôô ngélé. Man ntômba ba bé je yokela, a bé hôñlaha bon ba Israel le Yéhôva a kobol bo i Égiptô. Ki le sesema i Yésu i bé lama kobol bôt ba binam bobasôna. (1 Korintô 5:7, 8) Ñ, i sesema i Yésu i, i bé ti baôma bé 12 pôla i yila hikuu hi likoda li li bé lama gwéé. (Éfésô 2:20-22) Ngo hikuu hi lipénd li tison ipubi le Yérusalem hi bééna “12 ngok, 12 môl ma 12 baôma ba Man ntômba” ntilga mu i ngok. (Masoola 21:10-14) Ñ, hala a ñunda le baôma ba bééna ngim nson u tôbôtôbô mu bitééne bi Nyambe. Di nla ni nok inyuki Yésu a bé gwés ba ndik ni baôma bé botama yokel i ngand i Pasa i nsôk ba bi tégbaha, ni i Bilôp bi Nwet bi bisu ba bi téé yokela.
Ini 70 i banigil ni bape ki ba bé bé Bilôp bi ni Yésu. Ndi, banigil bobasôna ba ba bi téñbe ni Yésu ba bi ôt nseñ ni Bilôp bi Nwet a bi téé yokela. Ba bobasôna ba bé lama yila minhook ba ga jôp malômbla a bi boñ ni bo inyu ngim ane kiki a kal baôma i u u.—Lukas 22:29, 30.