Kôôba ñem woñ

I ngéda di nigil Bibel, ngôñ yés i yé le mahoñol ma Yéhôva ma tihba ñem wés tole mut wés kétékété. Di nla ôt biniigana bilam mu ndémbél i Ésra, nu “a bi kôôba ñem wé i wan Mbén Yéhôva.” (Ésra 7:10) Lelaa di nla kôôba ñem wés?

Soohe. Hiki ngéda ilole u mbôdôl nigil, soohe. Bat Yéhôva le a hôla we i nok ni i bii i yom u nigil i bisélél.​—Tjémbi 119:​18, 34.

Bana suhulnyuu. Nyambe a nsôô bôt ba ngôk, ba ba mbôdôl pék yap ñem, maliga. (Lukas 10:21) U nigil bañ inyu unda bôt bape le u nyi jam ngandak. Ibale mahoñol moñ ma nkiha bé ni ma Nyambe, ni suhulnyuu, boñ mahéñha.

Emble hiémbi hiada mu tjémbi tjés di Ane. Nsik u gwé ngui i tihba ñem, u nkôôba bés inyu bégés Nyambe. Jon i ngéda u ñemble hiémbi hi Ane ilole u nigil, hala a nla nhôla we i kôôba ñem woñ.