Mateus

7 “Unang be manguhumi, asa unang diuhumi hamu. 2 Ai panguhumon na binahenmuna laho manguhum, songon i do bahenonna laho manguhum hamu jala panuhatan na pinangkemuna laho manuhat, i do suhathononna tu hamu. 3 Boasa ma pola idaonmu durame di mata ni donganmu, hape tiang di matam sandiri ndang diida ho? 4 Manang songon dia ma ho boi mandok tu donganmu, ‘Loas ma hubuat durame sian matami,’ hape adong tiang di matam? 5 E, halak na munafik! Jumolo ma buat tiang sian matami, dung i tangkas ma idaonmu laho mambuat durame sian mata ni donganmu.

6 “Unang ma lehon angka na badia tu biang jala unang ma sampathon mutiaramuna tu babi, asa unang didege-degei, dung i marbalik laho mangkarat hamu.

7 “Sai pangido ma, ai na lehononna do i tu hamu. Sai lului ma, ai na dapotmuna do i. Sai tuktuhi ma, ai na bungkaonna do tu hamu. 8 Ai lehononna do tu ganup halak na mangido, jala dapotan do ganup halak na mangalului, jala bungkaonna do tu ganup halak na manuktuhi. 9 Sasintongna, ise sian hamu na mangalehon batu tu anakna tingki dipangido roti? 10 Manang, tingki dipangido anakna i dengke, ndang lehononna ulok, ndang i? 11 Alani i, gari hamu nang pe jahat diboto hamu mangalehon na denggan tu ianakhonmuna, tarlumobi ma Amamuna na di banua ginjang i, lehononna do angka na denggan tu halak na mangido tu Ibana!

12 “Sude na dihalomohon rohamuna bahenon ni halak tu hamu, ingkon songon i do bahenonmuna tu nasida. Sasintongna, on do na nidok ni Patik dohot na Sinurat ni Angka Panurirang.

13 “Masuk ma hamu sian harbangan na sompit, ai bidang jala lambas do dalan tu hamagoan jala godang do halak na masuk sian i. 14 Alai sompit do harbangan jala sosak do dalan tu hangoluan, jala otik do halak na jumpangan i.

15 “Jaga ma hamu tu angka panurirang na mangkatahon na so tutu* na ro tu hamu songon biru-biru, alai sasintongna serigala panoro do nasida. 16 Sian parbuena ma tandaonmuna nasida. Ndang hea diputik halak anggur dohot parbue ni hau ara sian ramba na marsuga, ndang i? 17 Songon i ma, hau na denggan marparbuehon na denggan, alai hau na so denggan marparbuehon na so hasea. 18 Ndang ro parbue na so hasea sian hau na denggan jala ndang ro parbue na denggan sian hau na so hasea. 19 Nasa hau na so marparbuehon na denggan, tabaon do i jala sampathonon tu api. 20 Alani i, sian parbuena ma tandaonmuna nasida.

21 “Ndang sude halak na mandok tu ahu, ‘Tuan, Tuan,’ masuk tu Harajaon banua ginjang i. Alai holan na mangulahon lomo ni roha ni Damang na di banua ginjang i do. 22 Torop do halak di ari i mandok tu ahu, ‘Tuan, Tuan, nda manurirangi do hami di bagasan goarmu, jala mangusir suru-suruan na jahat di bagasan goarmu, jala mangulahon godang tanda halongangan* di bagasan goarmu?’ 23 Alai dohononku ma tu nasida, ‘Ndang hutanda hamu! Laho ma hamu sian lambungkon, hamu siula na jahat!’

24 “Ganup halak na manangihon hatangkon jala mangulahonsa, dos ma i songon baoa na marbisuk na pajongjongkon jabuna di ginjang ni batu. 25 Dung i dobar ma udan, ro ma haba-haba dohot banjir manombom jabu i. Alai, ndang marumpak jabu i ala dipajongjong di ginjang ni batu. 26 Alai, ganup halak na manangihon hatangkon hape ndang mangulahonsa, dos ma i songon baoa na oto na pajongjongkon jabuna di ginjang ni pasir. 27 Dung i dobar ma udan, ro ma haba-haba dohot banjir manombom jabu i, rumpak ma jabu i jala sega ma sude.”

28 Dung sae Jesus mangkatai, longang ma natorop i mambege carana mangajari, 29 ai sian Debata do na niajarhonna i* jala ndang songon na diajarhon ni angka siboto surat.