Johannes

1 Sian mulana nunga adong Hata i, rap do Hata i dohot Debata. Jala debata* do Hata i. 2 Sian mulana, rap do ibana dohot Debata. 3 Marhite ibana do dibahen saluhutna jala ndang adong dibahen manang aha na so marhite ibana.

4 Marhite ibana do adong hangoluan jala hangoluan i do panondang ni jolma. 5 Marsinondang do panondang i di na holom, alai ndang boi ditaluhon na holom i panondang i.

6 Disuru Debata do sahalak baoa gabe wakilna,* goarna si Johannes. 7 Ro do ibana laho paboahon* tu angka jolma taringot tu panondang i, asa porsea sude halak marhite ibana. 8 Ndang ibana panondang i, alai laho paboahon taringot tu panondang i do umbahen na ro ibana.

9 Ai na ro ma panondang na tutu i tu portibi on na manondangi sude jolma. 10 Hea do ibana di portibi on jala marhite ibana do adong portibi on, alai ndang ditanda portibi on ibana. 11 Ro do ibana tu hutana sandiri, alai ndang dijalo bangsona i ibana. 12 Alai tu sude halak na manjalo ibana, dilehon do hak asa gabe angka anak ni Debata ala porsea do nasida tu goarna. 13 Ndang sian mudar manang sian daging nasida tubu. Jala ndang mangihuthon sangkap ni sahalak baoa nasida tubu, alai sian Debata do nasida.

14 Gabe jolma ma Hata i jala maringanan di tonga-tonganta. Nunga taida hasangaponna, i ma hasangapon songon na jinalo ni anak sasada sian amana. Gok do hasintongan dohot asi ni roha ni Debata na mansai balga i di ibana. 15 (Jou-jou do si Johannes paboahon taringot tu ibana, ninna ma, “On do halak na hutaringoti i tingki hudok, ‘Umbalga do sian ahu halak na ro di pudingku, ai nunga adong ibana andorang so adong dope ahu.’”) 16 Sude do hita manjalo asi ni roha na mansai balga sian ibana, ai gok asi ni roha na mansai balga i do ibana. 17 Marhite si Musa do dilehon Patik, alai marhite Jesus Kristus do ro hasintongan dohot asi ni roha na mansai balga. 18 Ndang adong jolma na hea mangida Debata asing ni anak na sasada i na songon debata, na di lambung* ni Ama i. Ibana do na patorangkon taringot tu Debata.

19 Disuru halak Jahudi ma angka malim dohot halak Lepi sian Jerusalem mandapothon si Johannes laho manungkun ibana, “Ai ise do ho?” 20 Dialusi ibana ma sungkun-sungkun i jala tangkas ma didok, “Ndang ahu Kristus i.” 21 Disungkun nasida ma, “Antong ise do ho? Si Elia do ho?” Dialusi ibana ma, “Daong.” Disungkun nasida ma muse, “Panurirang na naeng ro i do ho?” Dialusi ibana ma, “Daong!” 22 Dung i disungkun nasida ma ibana, “Molo songon i, ise do ho? Paboa ma jolo, asa boi hualusi hami na marsuru hami. Aha do dohononmu taringot tu dirim?” 23 Dialusi si Johannes ma, “Ahu do halak na jou-jou di padang pasir* i na mandok, ‘Patigor hamu ma dalan ni Jahowa,’ songon na nidok ni panurirang Jesaya.” 24 Halak Parise do na marsuru angka na manungkun i. 25 Dung i disungkun nasida ma ibana, ninna ma, “Antong molo so Kristus, manang si Elia, manang Panurirang na naeng ro i do ho, boasa ma didionmu halak?” 26 Dialusi si Johannes ma, “Anggo ahu aek do hudidihon tu hamu. Alai, jongjong do di tonga-tongamuna sahalak na so tinandamuna, 27 na ro di pudingku. Gari mambungka sipatuna ndang tama ahu.” 28 Di Betania do i sude masa di bariba ni Sunge Jordan, disi ma inganan ni si Johannes mandidi.

29 Marsogotna i, diida si Johannes ma Jesus ro mandapothon ibana. Didok si Johannes ma, “Ida ma, ibana do Biru-biru ni Debata na manesa dosa ni portibi on! 30 Ibana do halak na hutaringoti i tingki hudok, ‘Umbalga do sian ahu halak na ro di pudingku, ai nunga adong ibana andorang so adong dope ahu.’ 31 Ahu pe ndang hutanda hian ibana. Alai, asa patar do ibana tu bangso Israel umbahen na ro ahu mandidihon dohot aek.” 32 Dipaboa si Johannes ma muse, “Huida do tondi parbadia turun sian langit na songon darapati jala songgop* do tondi parbadia i tu atasna. 33 Ahu pe ndang hutanda hian ibana. Alai Debata na marsuru ahu asa mandidihon dohot aek, mandok tu ahu, ‘Molo diida ho turun tondi parbadia jala songgop tu atas ni sasahalak, ibana ma na laho mandidihon dohot tondi parbadia.’ 34 Nunga huida i masa jala nunga hupaboa na Anak ni Debata do ibana.”

35 Marsogotna i, jongjong do muse si Johannes rap dohot dua siseanna. 36 Tingki diida ibana Jesus mardalan, ninna ma, “Ida ma, ibana do Biru-biru ni Debata!” 37 Dung dibege sisean na dua i na nidokna i, diihuthon nasida ma Jesus. 38 Dung i diida Jesus ma dompak nasida, gabe diboto ma na diihuthon nasida ibana, didok ma, “Aha do dilului hamu?” Dialusi nasida ma ibana, “Ale Rabbi (lapatanna, “Guru”), didia do ho maringanan?” 39 Didok ibana ma tu nasida, “Beta ma asa diboto hamu.” Hira-hira jam opat botari* ma i. Gabe diihuthon nasida ma ibana, diida nasida ma ingananna jala rap ma nasida sadari i. 40 Si Andreas dongan saama ni si Simon Petrus ma sahalak sian na mambege hata ni si Johannes i jala na mangihuthon Jesus. 41 Parjolo ma dijumpangi ibana si Simon donganna saama. Ninna ma, “Nunga jumpangnami Messias i” (lapatanna “Kristus”), 42 Dung i diboan ibana ma si Simon tu Jesus. Tingki diida Jesus si Simon, ninna ma, “Si Simon do ho anak ni si Johannes, alai goaron ma ho si Kepas” (di bahasa Junani i ma “Petrus”).*

43 Marsogotna i, naeng laho ma Jesus tu Galilea. Pajumpang ma ibana dohot si Pilippus jala ninna ma tu ibana, “Ihuthon ma ahu.” 44 Sian Betsaida do si Pilippus, i ma huta ni si Andreas dohot si Petrus. 45 Pajumpang ma si Pilippus dohot si Natanael jala ninna ma, “Nunga jumpangnami halak na pinaboa ni Patik ni si Musa dohot na Sinurat ni Angka Panurirang i. Jesus anak ni si Josep na sian Nasaret i do ibana.” 46 Alai ninna si Natanael ma tu ibana, “Tarbahen ma na denggan ro sian Nasaret?” Didok si Pilippus ma tu ibana, “Beta ma asa diida ho.” 47 Tingki diida Jesus ro si Natanael mandapothon ibana, didok Jesus ma, “Ida ma, halak Israel na tutu do ibana jala ndang adong gabus di ibana.” 48 Didok si Natanael ma tu Jesus, “Sian dia ditanda ho ahu?” Dialusi Jesus ma, “Nunga huida ho di toru ni hau ara i, andorang so dijou si Pilippus dope ho.” 49 Ninna si Natanael ma, “Ale Guru,* ho do Anak ni Debata. Ho do Raja ni Israel.” 50 Ninna Jesus ma, “Ala na hudok i do huida ho di toru ni hau ara i, umbahen na porsea ho? Idaonmu dope muse angka na umbalga sian on.” 51 Didok Jesus ma muse, “Tutu do na hudok on tu hamu, idaonmuna ma bungka langit jala idaonmuna ma naik turun suru-suruan mandapothon Anak ni jolma i.”