Johannes

2 Dung dua ari, adong ma pesta parbogason di Kana na di Galilea jala disi do ina ni Jesus. 2 Digokkon do Jesus dohot angka siseanna tu pesta i.

3 Tingki naeng habis anggur, didok ina ni Jesus ma tu ibana, “Ndang adong be anggur ni nasida.” 4 Alai ninna Jesus ma, “Ndang hita na mamingkirhon i, inang. Ai ndang jumpang dope tingkingku.” 5 Didok ina ni Jesus ma tu angka parhobas, “Bahen hamu ma manang aha na nidokna tu hamu.” 6 Adong do disi onom gunsi na sian batu. Dipangke do i gabe inganan ni aek tu ulaon paiashon diri mangihuthon hasomalan ni halak Jahudi. Siat do hira-hira 44 sahat tu 66 liter aek* di ganup gunsi. 7 Didok Jesus ma tu nasida, “Isi hamu ma aek tu angka gunsi i.” Dung i diisi nasida ma sahat tu na gok. 8 Didok Jesus ma muse tu nasida, “Buat ma otik sian gunsi i, jala lehon ma tu ketua ni parhobas.” Dung i diboan nasida ma i. 9 Didai ketua ni parhobas ma aek naung muba gabe anggur i. Alai ndang diboto ibana sian dia haroro ni anggur i, holan angka parhobas na manahui aek i do na mamboto. Dung i dijou ibana ma pangoli i 10 jala ninna ma, “Sude do halak mangalehon anggur na dumenggan parjolo. Alai dung mabuk angka tamu i, dilehon ma anggur na hurang tabo daina. Hape ia ho, disimpan ho dope anggur na dumenggan sahat tu saonari.” 11 Di Kana na di Galilea i do parjolo sahali dibahen Jesus tanda halongangan.* Gabe tarida ma hasangaponna i jala gabe porsea ma angka sisean i tu ibana.

12 Dung salpu i, laho ma ibana tu Kapernaum rap dohot inana, angka anggina, dohot angka siseanna. Alai holan manang na piga ari do nasida disi.

13 Dung jonok Paska ni halak Jahudi, borhat ma Jesus tu Jerusalem. 14 Diida ibana ma di bagas joro i angka partiga-tiga lombu, biru-biru dohot darapati, jala hundul do disi angka situngkar hepeng. 15 Dibahen ibana ma linsing-linsing sian tali. Dung i, dipalao ibana ma angka partiga-tiga, biru-biru, dohot angka lombu ni nasida sian bagas joro i. Dipanserakkon ma hepeng logam ni situngkar hepeng jala ditunggalingkon ma angka meja ni nasida. 16 Didok ibana ma tu partiga-tiga darapati, “Boan hamu ma i sude sian on! Unang bahen hamu jabu ni Damang gabe inganan partiga-tigaan!”* 17 Gabe diingot angka siseanna i ma na nidok ni na tarsurat i, “Holong ni rohangku tu bagasmi dos songon api na marsigorgor.”

18 Alani i, didok angka halak Jahudi ma tu ibana, “Aha ma tanda halongangan* bahenonmu patuduhon tu hami na marhak ho mambahen songon i?” 19 Ninna Jesus ma tu nasida, “Rumpakkon hamu ma bagas joro on, jala pajongjongonku ma i di bagasan tolu ari.” 20 Dung i didok angka halak Jahudi i ma, “Boi ma pajongjongonmu i di bagasan tolu ari? Ai 46 taon lelengna dipajongjong bagas joro on.” 21 Alai sasintongna, bagas joro na nidok ni Jesus, dagingna i do. 22 Alani i, dung hehe ibana sian na mate gabe diingot angka siseanna i ma na nidokna i. Gabe porsea ma nasida tu na tarsurat i dohot tu na nidok ni Jesus.

23 Tingki di Jerusalem Jesus mangarayahon Paska, godang do halak na porsea tu ibana* dung diida nasida angka tanda halongangan* na binahenna. 24 Alai ndang pos roha ni Jesus tu nasida, ai ditanda ibana do nasida sude. 25 Jala ndang pola porlu dipatorang tu ibana manang aha taringot tu jolma, ai diboto ibana do na di bagasan roha ni jolma.