Johannes

14 “Unang ma susa rohamuna. Porsea ma hamu tu Debata jala porsea ma hamu tu ahu. 2 Godang do inganan di jabu ni Damang. Molo ndang tutu i, ndang dohononku songon i tu hamu. Ai na laho ma ahu paradehon inganan di hamu. 3 Dung laho ahu paradehon inganan di hamu, ro do ahu muse jala boanonku ma hamu tu jabungku asa rap hamu dohot ahu. 4 Jala diboto hamu do dalan tu inganan sitopotonki.”

5 Didok si Tomas ma tu ibana, “Ndang huboto hami manang naeng tu dia ho laho Tuan. Songon dia ma boi botoonnami dalan tusi?”

6 Didok Jesus ma tu ibana, “Ahu do dalan dohot hasintongan dohot hangoluan. Ndang adong na boi ro tu Ama i molo so marhite ahu. 7 Molo ditanda hamu ahu, tandaonmuna do nang Ama i. Sian saonari pe, nunga ditanda hamu Ibana, jala nunga diida hamu Ibana.”

8 Didok si Pilippus ma, “Tuan, patuduhon ma Ama i tu hami, asa sombu rohanami.”

9 Didok Jesus ma tu ibana, “Nunga pola leleng ahu rap dohot hamu, hape laos so ditanda ho dope ahu Pilippus? Manang ise na mangida ahu, nunga diida ibana Ama i. Boasa ma dohononmu, ‘Patuduhon ma Ama i tu hami’? 10 Na so porsea do ho na marsada ahu dohot Ama i jala Ama i marsada dohot ahu? Ndang sian diringku sandiri sude na hudok i. Alai Ama na tongtong marsada dohot ahu, i do na mangulahon ulaonna marhite ahu. 11 Porsea ma ho na marsada do ahu dohot Ama i, jala Ama i marsada dohot ahu. Molo so i, porsea ma ho tu angka na huulahon i. 12 Tutu do na hudok on tu hamu, manang ise na porsea tu ahu ulahononna do angka ulaon na huulahon i. Jala ulahononna dope angka ulaon na umbalga sian i. Ai naeng laho nama ahu tu Ama i. 13 Ulahononku do manang aha na pinangidomuna marhite goarhu. Alani i, gabe marsangap ma Ama i marhite Anak i. 14 Ulahononku do manang aha na pinangidomuna marhite goarhu.

15 “Molo dihaholongi hamu do ahu, oloanmuna do angka parentangku. 16 Pangidoonku ma tu Ama i asa dilehon tu hamu pangurupi* na asing na mandongani hamu salelengna, 17 i ma tondi parbadia na papatarhon hasintongan. Ai ndang dijalo portibi on tondi parbadia, ala ndang diida jala ndang ditanda portibi on i. Alai ditanda hamu do i, ala tongtong do i mandongani hamu jala maringanan di hamu. 18 Ndang tadingkononku hamu songon dakdanak na so marama so marina. Ro do ahu muse mandapothon hamu. 19 Satongkin nai, ndang idaon ni portibi on be ahu. Alai idaonmuna ma ahu muse. Ai mangolu do ahu jala hamu pe mangolu do. 20 Di ari i botoonmuna ma na marsada do ahu dohot Damang i, jala hamu marsada dohot ahu, jala ahu marsada dohot hamu. 21 Manang ise na manjalo jala na mangoloi parentangku, ibana ma na mangkaholongi ahu. Manang ise na mangkaholongi ahu, haholongan ni Damang i ma ibana. Haholonganku ma ibana jala tangkas ma patuduhononku diringku tu ibana.”

22 Didok si Judas (ndang si Judas lskariot) ma tu ibana, “Tuan, aha do na masa umbahen na naeng patuduhononmu dirim tu hami, ndang tu portibi on?”

23 Dialusi Jesus ma ibana, “Halak na mangkaholongi ahu, oloanna do hatangku. Haholongan ni Damang ma ibana, ro ma hami tu ibana jala maringanan ma hami rap dohot ibana. 24 Halak na so mangkaholongi ahu, ndang oloanna hatangku. Ai hata na binegemuna i ndang sian ahu i, alai sian Ama na marsuru ahu i do.

25 “Hupaboa pe i tu hamu, saleleng rap dope ahu dohot hamu. 26 Alai pangurupi i, i ma tondi parbadia na nilehon ni Ama i marhite goarhu, i ma na mangajarhon sude tu hamu jala na paingothon hamu di sude naung hupaboa tu hamu. 27 Hutadingkon do hadameon tu hamu. Hulehon do hadameonki tu hamu. Hadameon na hulehon i, ndang songon hadameon na nilehon ni portibi on. Alani i, unang ma marsak jala unang ma mabiar hamu. 28 Nunga dibege hamu hatangku na mandok, ‘Na laho ma ahu jala na ro ma ahu muse mandapothon hamu.’ Molo dihaholongi hamu ahu, las ma rohamuna ala na laho do ahu tu Ama i, ai umbalga do Ama i sian ahu. 29 Hupaboa do i saonari tu hamu andorang so masa dope i. Asa molo dung masa i, porsea ma hamu. 30 Ndang godang be sidohononku tu hamu, ai na ro ma parhuaso ni portibi on. Alai ndang marhuaso i tu ahu. 31 Huulahon do songon na diparentahon ni Ama i tu ahu, asa diboto portibi on na holong do rohangku tu Ama i. Beta, laho ma hita sian on.