Johannes

4 Dung diboto Jesus* naung dibege halak Parise nunga gumodang sisean ni Jesus dohot na dididihon ibana sian sisean dohot na dididihon si Johannes, 2 (sasintongna ndang Jesus na mandidihon alai angka siseanna do) 3 ditadingkon ibana ma Judea jala laho tu Galilea. 4 Alai ingkon bolusonna do Samaria. 5 Sahat ma ibana tu sada kota di Samaria i ma Sikar, na jonok tu tano na nilehon ni si Jakkob tu anakna si Josep. 6 Adong do disi sumur ni si Jakkob. Loja do dihilala Jesus alani pardalananna, gabe hundul ma ibana di topi ni sumur i. Hira-hira jam 12* arian ma tingki i.

7 Dung i ro ma sahalak borua Samaria mangalap aek. Didok Jesus ma tu ibana, “Lehon ma tu ahu aek i inumonku.” 8 (Laho do angka siseanna manuhor sipanganon tu kota.) 9 Didok borua Samaria i ma tu ibana, “Ai halak Jahudi do ho, jala ahu halak Samaria, boasa ma pangidoonmu aek sian ahu?” (Ai ndang masipangkulingan halak Jahudi dohot halak Samaria.) 10 Didok Jesus ma tu borua i, “Aut sugari diboto ho asi ni roha ni Debata, jala aut ditanda ho na mangido aek siinumon sian ho, pangidoonmu do aek sian ibana jala lehononna ma tu ho aek hangoluan.” 11 Didok borua i ma tu ibana, “Ai timba ni Amang pe so adong jala bagas do sumur on. Sian dia ma dapot ni Amang aek hangoluan? 12 Umbalga ma ho sian ompunami si Jakkob, na mangalehon sumur on tu hami? Ai nunga diinum ibana aek sian sumur on. Songon i angka anakna nang angka pinahanna.” 13 Didok Jesus ma tu borua i, “Manang ise na manginum aek sian sumur on mauas do muse. 14 Alai manang ise na manginum aek na hulehon, ndang mauas be. Ai aek na hulehon tu ibana gabe songon mata mual ma i di bagasan dirina, na mangalehon hangoluan na saleleng ni lelengna.” 15 Didok borua i ma tu ibana, “Lehon ma tu ahu aek i Amang, asa unang mauas be ahu jala unang ro be ahu tuson mangalap aek.”

16 Didok Jesus ma tu ibana, “Laho ma ho, jou ma tunggane dolim jala ro ma hamu tuson.” 17 Didok borua i ma, “Ndang adong be tunggane dolingku.” Didok Jesus ma tu ibana, “Toho do na nidokmi, ndang adong be tunggane dolim. 18 Ai nunga lima hali ho muli jala baoa donganmu nuaeng pe ndang tunggane dolim i. Sintong do na pinaboami tu ahu.” 19 Didok borua i ma tu ibana, “Panurirang do huida ho Amang. 20 Di dolok on do ompunami manomba Debata, alai hamu halak Jahudi mandok, ingkon di Jerusalem do inganan manomba Debata.” 21 Didok Jesus ma tu borua i, “Porsea ma ho tu ahu inang, na ro ma tingkina ndang di dolok on jala ndang di Jerusalem sombaon ni halak Ama i. 22 Ai hamu, ndang ditanda hamu na sinombamuna i. Molo hami, hutanda hami do na husomba hami ai sian halak Jahudi do ro haluaon. 23 Nang pe songon i, na laho ro ma tingkina jala saonari ma i. Sombaon ni angka sisomba Debata na tutu ma Ama i marhite panogu-noguon ni tondi parbadia dohot hasintongan. Ai halak sisongon i do dilului Ama i laho manomba Ibana. 24 Ndang boi taida Debata jala di surgo* do Ibana. Sude na naeng manomba Ibana ingkon mangihuthon panogu-noguon ni tondi parbadia dohot hasintongan.” 25 Didok borua i ma tu ibana, “Huboto do na naeng ro Messias, na laos digoari Kristus. Molo dung ro ibana, patorangonna do i sude tu hami.” 26 Didok Jesus ma tu borua i, “Ahu do i, na mangkatai dohot ho.”

27 Di tingki i ro ma angka siseanna, gabe longang ma nasida ala mangkatahatai Jesus dohot sahalak borua. Alai ndang adong sahalak pe sian nasida na mandok, “Boasa mangkatahatai ho dohot ibana?” manang “Aha do na niluluanmu?” 28 Ditadingkon borua i ma gunsi inganan ni aekna i, laho ma ibana tu kota jala didok ma tu angka halak, 29 “Ro jo hamu, asa bereng hamu halak na paboahon sude na hea huulahon. Ibana do ra Kristus i.” 30 Gabe marroan ma nasida sian kota i mandapothon Jesus.

31 Laos di tingki i sai dijujui angka siseanna ma ibana, ninna ma, “Mangan ma ho Guru.” 32 Alai didok Jesus ma tu nasida, “Adong do sipanganonku, alai ndang diboto hamu manang aha i.” 33 Gabe didok angka sisean i ma sama nasida, “Ai ise do nuaeng na mangalehon sipanganon tu ibana?” 34 Didok Jesus ma tu nasida, “Sipanganonku i ma mangulahon lomo ni roha ni na marsuru ahu jala pasaehon ulaonna. 35 Didok hamu opat bulan nai nama tingkina panen. Alai hudok ma tu hamu: Tatap hamu ma hauma i. Ida hamu ma, nunga masak* jala nunga boi panenon. 36 Nunga manjalo upa angka panabi i, jala nunga dipapungu parbue tu hangoluan na saleleng ni lelengna. Gabe rap marlas ni roha ma panabur dohot panabi. 37 Alani i tutu ma hata na mandok, na sada manabur jala na sada nai manabi. 38 Husuru do hamu manabi na so sinaburmuna. Halak na asing do na manabur, alai hamu do na mandapot laba sian na sinabur ni nasida i.”

39 Godang ma halak Samaria na di kota i na gabe porsea tu Jesus alani hata ni borua i na mandok, “Dipaboa ibana do sude na hea huulahon.” 40 Dung ro angka halak Samaria mandapothon Jesus, dipangido nasida ma asa tading ibana rap dohot nasida. Jala tading ma ibana disi saleleng dua ari. 41 Ujungna, lam godang ma na porsea alani hata ni Jesus. 42 Jala didok nasida ma tu borua i, “Ndang holan alani na nidokmi umbahen na porsea hami, alai nunga dibege hami sandiri jala nunga diboto hami ibana do na paluahon portibi on.”

43 Dung salpu dua ari, borhat ma ibana sian i tu Galilea. 44 Ai hea do dipaboa ibana, ndang dipasangap jolma sahalak panurirang di hutana sandiri. 45 Dung sahat ibana di Galilea, denggan do dijalo halak na disi ibana, ala diida nasida do sude na niulahon ni Jesus tingki perayaan di Jerusalem. Ai dohot do nasida tu perayaan i.

46 Dung i laho ma muse Jesus tu Kana na di Galilea, disi do hea dibahen ibana aek gabe anggur. Adong ma disi sahalak pejabat na sian Kapernaum jala di tingki i marsahit do anakna. 47 Tingki dibege ibana ro Jesus sian Judea tu Galilea, didapothon ibana ma Jesus. Dipangido ibana ma asa ro Jesus pamalumhon anakna, ai nunga naeng mate anakna i. 48 Alai didok Jesus ma, “Molo ndang diida hamu angka tanda halongangan,* ndang na porsea hamu.” 49 Didok pejabat i ma tu ibana, “Tuan, ro ma jo ho andorang so mate anakki.” 50 Didok Jesus ma tu ibana, “Mulak ma ho, nunga malum be anakmi.” Porsea do pejabat i tu na nidok ni Jesus i jala mulak ma ibana. 51 Tingki di pardalanan dope ibana, ro ma angka hatobanna paboahon naung malum anakna i. 52 Disungkun ibana ma nasida jam piga malum anakna i. Dialusi nasida ma, “Jam sada arian* ma nantoari malum mohopna i.” 53 Gabe diingot ibana ma apala di tingki i do didok Jesus tu ibana, “Nunga malum be anakmi.” Gabe porsea ma ibana dohot sude donganna sajabu. 54 I ma tanda halongangan* na paduahon na binahen ni Jesus dung ro ibana sian Judea tu Galilea.