Johannes

3 Adong ma sahalak Parise na margoar si Nikodemus. Ibana sahalak pamimpin ni halak Jahudi. 2 Ro ma ibana borngin-borngin mandapothon Jesus jala ninna ma tu ibana, “Guru, huboto hami do ho guru na sinuru ni Debata. Ai ndang adong na boi mambahen tanda halongangan* songon na binahenmi molo so didongani Debata.” 3 Dialusi Jesus ma ibana, “Tutu do na hudok on tu ho, ndang adong na boi marnida Harajaon ni Debata ianggo so ditubuhon ibana muse.”* 4 Disungkun si Nikodemus ma ibana, “Songon dia ma boi halak naung magodang ditubuhon muse? Songon dia ma ibana boi masuk tu bortian ni inangna asa ditubuhon muse?” 5 Dialusi Jesus ma, “Tutu do na hudok on tu ho, ndang adong na boi masuk tu Harajaon ni Debata, ianggo so ditubuhon sian aek dohot sian tondi parbadia. 6 Tubu sian daging do anak ni jolma, alai tubu sian tondi parbadia do anak ni Debata. 7 Unang ma longang roham, ala hudok tu ho ingkon ditubuhon do hamu muse. 8 Mangullus do alogo manang tudia lomo ni rohana, dibege ho do soarana alai ndang diboto ho sian dia i ro jala tudia i laho. Songon i ma ganup halak na tubu sian tondi parbadia.”

9 Disungkun si Nikodemus ma muse tu Jesus, “Songon dia ma parjadi ni i?” 10 Dialusi Jesus ma, “Ai ndang guru ni halak Israel ho? Boasa ndang diboto ho i? 11 Tutu do na hudok on tu ho, na huboto hami do na huhatahon hami jala na huida hami do na hupaboa hami. Alai ndang dijalo hamu na hupaboa hami i. 12 Gari angka na di tano on hupaboa tu hamu ndang dihaporseai hamu, songon dia ma hamu boi porsea molo hupaboa taringot tu na di banua ginjang? 13 Asing ni i, ndang adong jolma na hea nangkok tu banua ginjang, ia so holan Anak ni jolma naung turun sian banua ginjang i. 14 Songon si Musa na patimbohon ulok di sada tiang tingki di padang pasir,* laos songon i ma Anak ni jolma i dipatimbo. 15 Asa ganup halak na porsea tu ibana mandapot hangoluan na saleleng ni lelengna.

16 “Ai songon on do balga ni holong ni roha ni Debata di portibi on, pola do Anakna na sasada i dilehon, asa unang mate ganup na patuduhon haporseaon tu ibana, alai asa mandapot hangoluan na saleleng ni lelengna. 17 Ai ndang disuru Debata Anakna tu portibi on laho manguhum portibi on, alai asa malua do portibi on marhite ibana. 18 Manang ise na patuduhon haporseaon tu ibana ndang hona uhum. Alai manang ise na so patuduhon haporseaon nunga hona uhum, ai ndang dipatuduhon ibana haporseaon tu Anak ni Debata na sasada i. 19 Alani on do nasida diuhumi: nunga ro panondang i tu portibi on, alai na holom i do dihaholongi jolma ndang na tiur i, ai angka na jahat do diulahon nasida. 20 Manang ise na mangulahon na jahat dihasogohon i do na tiur, jala ndang ro i tu na tiur asa unang tarida* pambahenanna i. 21 Alai manang ise na mangulahon na sintong, ro do i tu na tiur asa tarida pambahenanna i hombar tu lomo ni roha ni Debata.”

22 Dung salpu i, laho ma Jesus dohot angka siseanna tu angka huta na di Judea. Disi ma nasida manang na sadia leleng jala mandidihon angka halak. 23 Si Johannes pe mandidihon do di Enon na jonok tu Salem, ai godang do aek disi. Sai marroan do angka halak jala dididi ma nasida. 24 Di tingki i ndang dipenjarahon dope si Johannes.

25 Marsoal ma angka sisean ni si Johannes tu sahalak Jahudi taringot tu ulaon paiashon diri. 26 Dung i didapothon nasida ma si Johannes jala ninna ma, “Guru, halak na rap dohot ho di bariba ni Sunge Jordan i, na pinaboami taringot tu ibana, mandidihon do ibana nuaeng. Jala sude do halak ro mandapothon ibana.” 27 Didok si Johannes ma, “Ndang adong jaloon ni sasahalak molo ndang Debata na mangalehon tu ibana. 28 Ai nunga dibege hamu tingki hudok, ‘Ndang ahu Kristus i, alai disuru Debata do ahu asa parjolo sian ibana.’ 29 Pangoli i do nampuna pengantin borua i. Alai dongan ni pangoli i, na jongjong di lambungna jala na manangihon ibana, mansai las do rohana mambege soara ni pangoli i. Alani i, nunga gok be saonari las ni rohangki. 30 Lam tu balgana ma ulaonna, alai lam tu metmetna ma ulaonku.”

31 Na ro sian ginjang i do na umbalga sian sasude. Alai na sian tano on, taringot tu na di tano on do hatahononna, ai sian tano on do ibana. Alani i, umbalga do na ro sian banua ginjang i sian sasude. 32 Taringot tu na niidana dohot na binegena do na pinaboana, alai ndang adong nanggo sahalak pe na porsea tu na pinaboana i. 33 Manang ise na porsea tu na pinaboana i, na porsea situtu* do ibana na sintong Debata. 34 Hata ni Debata do na dihatahon na sinuru ni Debata. Ai ndang holit Debata mangalehon tondi parbadiana. 35 Dihaholongi Ama i do Anak i jala dilehon do tu ibana huaso laho mangarajai sudena. 36 Manang ise na patuduhon haporseaon tu Anak i, dapotna do hangoluan na saleleng ni lelengna. Manang ise na so mangoloi Anak i, ndang dapotna hangoluan alai tongtong ma marrimas Debata tu ibana.