Ulaon ni Apostel

28 Dung sahat hami di darat, disi pe asa huboto hami Malta do goar ni pulo i. 2 Mansai burju do penduduk ni pulo i tu hami. Denggan do hami dijalo nasida jala dipagalak nasida do api ala nunga mulai ro udan jala mansai ngali. 3 Dipapungu si Paulus ma angka hau jala dipambahen ma i tu api i. Tompu ma kaluar ulok na marbisa alani mohop ni api i jala diturbing ma tangan ni si Paulus. 4 Tingki diida penduduk ni pulo i gantung-gantung ulok i di tangan ni si Paulus, didok nasida ma sama nasida, “Sibunu jolma do baoa on. Ai nang pe malua ibana sian parmaraan di laut, alai ndang diloas Uhum* i ibana mangolu.” 5 Dipaspashon si Paulus ma ulok i tu api jala ndang manang mahua ibana. 6 Alai dirimpu nasida do gabe magurbak tangan ni si Paulus i. Molo so i, tompu ma ibana dabu laos mate. Dung leleng dipaima nasida jala diida nasida ndang adong na masa tu ibana, gabe muba ma pingkiran ni nasida jala didok ma si Paulus debata.

7 Ndang dao sian inganan i, adong do disi tano ni si Publius sahalak na sangap di pulo i. Denggan do dijalo ibana hami jala gabe tamuna ma hami saleleng tolu ari. 8 Di tingki i, peak do amang ni si Publius di podoman ala mohop dohot disentri. Didapothon si Paulus ma ibana, diampehon ma tanganna huhut ditangiangkon. Dung i dipamalum ma ibana. 9 Alani i, gabe marroan ma sude na marsahit di pulo i mandapothon si Paulus jala dipamalum ma nasida. 10 Dilehon nasida do godang hadiah laho patuduhon hamauliateon ni nasida tu hami. Tingki naeng borhat, dilehon nasida do angka na porlu di hami saleleng di pardalanan.

11 Dung tolu bulan, borhat ma hami sian pulo i mamangke kapal na sian Aleksanderia na marlabu di pulo i saleleng ari ngali.* Dibahen do partanda ni kapal i “Angka Anak ni Zeus”. 12 Marlabu ma hami di Sirakus jala disi ma hami tolu ari. 13 Sian i manopi-nopi ma hami marlayar jala sahat ma di Regium. Marsogotna i, mangullus ma alogo sian selatan jala dung dua ari sahat ma hami di Potioli. 14 Disi, pajumpang ma hami dohot angka dongan sahaporseaon. Dijujui nasida do hami asa tading disi saleleng pitu ari. Dung i borhat ma hami tu Rom. 15 Dibege angka dongan na di Rom ma taringot tu haroronami, gabe ro ma nasida mandapothon hami sahat tu Tolu Kode* na di Pasar Appiporum. Dung diida si Paulus nasida, didok ibana ma mauliate tu Debata jala lam pos ma rohana. 16 Ujungna sahat ma hami di Rom. Disi, diloas do si Paulus tading sahalakna dohot sahalak tentara na manjaga ibana.

17 Dung tolu ari, dijou si Paulus ma marpungu angka halak Jahudi na sangap. Dung marpungu nasida, didok si Paulus ma, “Hamu angka haha anggi, nang pe ndang adong hualo bangsonta manang hasomalan ni angka ompunta, alai dipenjarahon do ahu di Jerusalem jala dipasahat tu halak Rom. 18 Dung dipareso, naeng dipalua halak Rom i ma ahu. Ai ndang adong dapot ni nasida na sala huulahon na mambahen ahu patut diuhum mate. 19 Alai dialo halak Jahudi do i, gabe terpaksa ma ahu naik banding tu Kesar. Huulahon pe songon i, ndang na laho mangaluhon bangsongku ahu disi. 20 Alani i do hupangido asa pajumpang jala mangkatai ahu dohot hamu. Ai alani pangkirimon ni halak Israel i do umbahen na dirante ahu.” 21 Didok nasida ma tu si Paulus, “Ndang adong hujalo hami surat taringot tu ho sian Judea, jala ndang adong angka dongan na ro sian i na paboahon manang na mandok na roa taringot tu ho. 22 Alai naeng do begeonnami pandapotmu, ai huboto hami do manang didia pe sude do halak mangalo sekte on.”

23 Dung i ditontuhon nasida ma sada ari laho pajumpang dohot si Paulus. Jala torop ma nasida na ro tu inganan ni si Paulus i. Sian manogot sahat tu borngin dipatorang ibana ma taringot tu Harajaon ni Debata. Dipatorang ibana ma sian Patik ni si Musa dohot na Sinurat ni Angka Panurirang asa porsea nasida tu Jesus. 24 Adong do deba na porsea tu na pinatorangna i, alai na deba nai ndang porsea. 25 Gabe marsalisi ma nasida sama nasida. Ditadingkon nasida ma inganan i, alai huhut ma didok si Paulus tu nasida songon on,

“Sintong ma na nidok ni panurirang Jesaya marhite panogu-noguon ni tondi parbadia tu angka ompumuna. 26 Ai ninna do, ‘Laho ma ho tu bangso on jala dok ma, “Dibege hamu do nian alai ndang diantusi hamu lapatanna. Diida hamu do nian alai ndang diantusi hamu. 27 Ai ndang bungka be roha ni bangso on. Ditangihon nasida do marhite pinggolna alai dipanengel-nengel, ditutup nasida do matana gabe ndang marnida, ndang marbinege pinggol ni nasida, ndang mangantusi nang rohana jala ndang mulak nasida tu ahu. Alani i, ndang pamalumonku nasida.”’ 28 Alai boto hamu ma, nunga dibaritahon haluaon na sian Debata tu angka bangso na asing. Jala tangihonon ni nasida do i.” 29 *——

30 Jadi dua taon ma si Paulus tading di jabu na disewa ni ibana jala burju do ibana manjalo sude halak na ro mandapothon ibana. 31 Ndang mabiar ibana mamaritahon Harajaon ni Debata tu nasida dohot mangajarhon taringot tu Tuan Jesus Kristus, jala ndang adong na mangambati ibana.