2 Korint

11 Dipangido rohangku do asa sabar hamu tu ahu, nang pe songon na hurang roha ahu otik. Sasintongna sabar do nian hamu tu ahu! 2 Songon Debata na manarihon hamu, ahu pe husarihon do hamu. Ai nunga hubahen hamu gabe tunangan ni Kristus. Jala hulehon do hamu tu ibana songon sahalak namarbaju na badia. 3 Songon si Hawa na lilu alani angkal ni ulok, mabiar do ahu so tung adong na manegai pingkiranmuna, na mambahen hamu ndang marsihohot manang ndang badia di jolo ni Kristus. Ai sasintongna, ingkon badia jala ingkon marsihohot do hamu. 4 Dijalo hamu do halak na mamaritahon Jesus na asing sian Jesus na hubaritahon hami. Dijalo hamu do huaso na asing na imbar sian huaso naung adong di hamu. Jala dijalo hamu do muse barita na uli na asing sian barita na uli naung jinalomuna. 5 Didok rohangku, ndang humurang ahu martimbangkon angka apostelmuna na jago i. 6 Molo hurang malo pe ahu mangkatai, alai adong do parbinotoan di ahu. Jala nunga tangkas hupatuduhon hami i tu hamu di saluhutna.

7 Las do rohangku mamaritahon barita na uli taringot tu Debata tu hamu. Jala ndang adong hepeng hujalo sian hamu. Hupatutoru do diringku asa sangap hamu. Boha, sala do ahu disi? 8 Angka huria na asing do na mambalanjoi ahu. Boi dohonon songon na mangarampok do ahu sian nasida asa boi ahu marhobas tu hamu. 9 Tingki rap ahu dohot hamu, ndang adong hususai manang ise pe sian hamu laho mangalehon na porlu di ahu. Ai angka dongan sian Makedonia do na mangalehon sude na ringkot di ahu. Di saluhutna, hujaga do diringku asa unang gabe boban ahu di hamu. Jala tongtong do bahenonku songon i. 10 Saleleng siihuthon Kristus dope ahu, ndang adong na boi mangambati ahu marbalga ni roha taringot tusi di sude luat Akaya. 11 Boasa ndang hubahen songon i tu hamu? Na so holong do rohangku tu hamu? Diboto Debata do na holong rohangku tu hamu.

12 Adong do sian tonga-tongamuna na marbalga ni roha* na mandok dirina apostel songon hami. Alani i, tongtong do ulahononku songon naung huulahon saleleng on, laho mangambati nasida jala asa unang adong na mambahen nasida marbalga ni roha. 13 Angka apostel na so tutu do halak sisongon i. Pargabus do nasida, jala dipasuman-suman do dirina songon angka apostel ni Kristus. 14 Sasintongna, ndang pola longang roha disi. Ai Sibolis* pe dipasuman-suman do dirina songon suru-suruan hatiuron. 15 Alani i, ndang pola longang roha molo angka na mangihuthon ibana pe, dipasuman-suman do diri ni nasida songon halak na mangulahon na sintong. Alai ujungna, dapot ni nasida do songon na binahen ni nasida i.

16 Hudok ma sahali nai tu hamu: Unang ma adong sian hamu na mandok na so marroha ahu. Alai molo adong pe na mandok songon i, jalo hamu ma ahu songon na manjalo halak na so marroha, asa boi ahu marbalga ni roha saotik. 17 Saonari, ndang huihuthon be sitiruon ni Tuan i tingki mangkatai. Ai songon halak na so marroha nama ahu mangkatai na mamuji dirina sandiri. 18 Ai godang do halak na marbalga ni roha alani angka na di portibi on. Ahu pe, songon i nama bahenonku. 19 Ala didok hamu do halak “na marroha” situtu hamu, antong las ma rohamuna manjalo halak na so marroha. 20 Sasintongna, sabar do hamu tu halak na mamparhatoban hamu, na mambuat pangomoan sian hamu, na mangarampas na adong di hamu, na patimbohon dirina di tonga-tongamuna, dohot tu halak na mamastap hamu.

21 Maila do nian hami mandok i, ai gabe halak na gale do hami didok rohamuna.

Alai molo barani do halak na asing, ahu pe ingkon barani do, nang pe mangkatai ahu songon halak na so marroha. 22 Halak Heber do nasida? Ahu pe halak Heber do. Halak Israel do nasida? Ahu pe halak Israel do. Pinompar ni si Abraham do nasida? Ahu pe pinompar ni si Abraham do. 23 Parhobas ni Kristus do nasida? Hualusi ma nasida songon alus ni na rintik. Dumenggan dope ahu sian nasida. Gumodang do na huulahon sian nasida, umjotjot do ahu dipenjarahon, ndang taretong be manang na piga hali ahu dipungkuli, jala jotjot do ahu naeng mate. 24 Lima hali ma ahu dilinsingi halak Jahudi, 39 hali* sahali mangalinsing. 25 Tolu hali ma ahu dipungkuli dohot tungkot, sahali didangguri dohot batu, tolu hali naeng lonong kapal na hutompang, jala sadari saborngin ma ahu mumbang-umbang di laut. 26 Di pardalanan, jotjot do ahu mangadopi parmaraan alani sunge, alani pangarampok, alani dongan sabangsongku dohot alani bangso na asing. Masa do parmaraan tu ahu di kota, di halongonan, di laut, dohot di tonga-tonga ni dongan na so tutu dongan. 27 Mansai godang do ulaonku na borat jala loja do ahu, jotjot do ahu ndang modom, jotjot do ahu male jala mauas, jotjot do ahu hurang mangan, ngalian, jala ndang adong pangkeanku.

28 Asing ni i, ganup ari do ahu holsoan alani sude huria. 29 Molo adong halak na gale, dohot do ahu gale. Molo adong na manadingkon haporseaonna, gabe marsak do ahu.

30 Molo ingkon marbalga ni roha ahu, hagaleonki ma na mambahen ahu marbalga ni roha. 31 Diboto Debata do na so margabus ahu. Ai Ibana do Ama ni Tuanta Jesus na tama pujion saleleng ni lelengna. 32 Tingki di Damaskus, disuru gubernur ni Raja Aretas do angka panjaga tu harbangan ni kota laho manangkup ahu. 33 Alai dipaturun do ahu di bagasan karanjang na balga sian tembok ni kota, gabe malua ma ahu.