2 Korint

12 Ingkon marbalga ni roha do ahu nang pe so adong gunana. Paboaonku ma saonari taringot tu parnidaan dohot tu pangungkapon na nilehon ni Tuan i tu ahu. 2 Adong do huboto sahalak baoa siihuthon Kristus, 14 taon naung salpu, diangkat do ibana tompu tu surgo na patoluhon. Alai ndang huboto dohot do dagingna i diangkat manang ndang. Debata do na mamboto i. 3 Tutu, hutanda do baoa i. Alai ndang huboto dohot do dagingna i diangkat manang ndang. Debata do na mamboto i. 4 Diboan do ibana tompu tu paradeiso. Dibege ibana ma disi angka hata na so boi dihatahon dohot na so diloas hatahonon ni jolma. 5 Balga do rohangku alani baoa i. Alai ndang balga rohangku tu diringku sandiri, ai holan alani hagaleonki do ahu marbalga ni roha. 6 Nang pe naeng marbalga ni roha ahu, ndang na hurang roha ahu, ai tutu do na huhatahon i. Alai ndang olo ahu marbalga ni roha holan asa puji-pujionmuna, alani angka na niidamuna dohot na binegemuna sian ahu. 7 Unang ma holan alani pangungkapon na dipasahat tu ahu gabe dipuji-puji hamu ahu.

Ai dipamasuk do suga tu bagasan dagingku, na songon suru-suruan ni Sibolis na sai mamungkuli* ahu, asa unang ginjang rohangku. 8 Nunga tolu hali hupangido tu Tuhan* i asa dipamago i sian ahu. 9 Alai songon on do didok tu ahu, “Nunga sae be asi ni rohangku na mansai balga i di ho. Ai lam balga do huasongku alani hagaleonmi.” Alani i, marbalga ni roha ma ahu alani hagaleonku. Asa huaso ni Kristus i na mangalinggomi ahu songon kemah. 10 Alani i, las do rohangku tingki gale ahu, tingki dileai, tingki marhahurangan, tingki manaon na hansit, manang tingki manaon hasusaan alani Kristus. Ai tingki gale ahu, gabe margogo do ahu.

11 Nunga songon halak na hurang roha ahu mangkatai. Sasintongna hamu do na mambahen ahu songon i. Ai ndang dihatahon hamu angka na denggan na huulahon. Nang pe so manang na ise ahu di hamu, alai ndang dumenggan angka apostelmuna na jago i sian ahu. 12 Jala nunga diida hamu tanda na patuduhon na sahalak apostel do ahu. Marsihohot do ahu, jala hupatudu do tu hamu angka tanda halongangan.* 13 Aha ma hurangmuna martimbangkon huria na asing? Holan on do, ndang dohot hamu hubahen mambalanjoi ahu. Nang pe songon i, sala ma ahu disi.

14 Sasintongna, on ma na patoluhalihon ahu rade naeng mandapothon hamu. Jala ndang olo ahu gabe boban di hamu. Ndang artamuna i na hulului, alai hamu do. Ai ndang ianakhon na papunguhon arta tu natua-tuana. Alai natua-tua do na papunguhon arta laho tu ianakhonna. 15 Molo ahu, las do rohangku mangalehon ngolungku dohot sude na adong di ahu tu hamu. Holong situtu do rohangku tu hamu. Alani i, nda ingkon haholonganmuna do ahu nian? 16 Nang pe songon i, ndang olo ahu gabe boban di hamu. Alai didok hamu do ahu na “angkal” jala hujorat hamu marhite “gabus”. 17 Ndang hea hubuat pangomoan sian hamu marhite angka halak na husuru, ndang i? 18 Tingki hupangido si Titus ro mandapothon hamu rap dohot donganta na asing, ndang adong dibuat nasida pangomoan sian hamu, ndang i? Dos do na hubahen hami ndang i?

19 Dirimpu hamu do na pasintongkon dirinami hami di jolomuna? Daong. Sintong do na hupaboa hami tu hamu. Ai siihuthon Kristus i do hami jala di jolo ni Debata do hami mangkatai tu hamu. Sasintongna angka dongan na huhaholongi, laho patoguhon hamu do umbahen na huulahon hami sudena on. 20 Mabiar do ahu, tingki ro ahu annon mandapothon hamu, ndang songon na hinirim ni rohangki hamu. Jala ahu pe ndang songon na hinirim ni rohamuna. Marsak do ahu molo adong na marbadai, na marlate ni roha, na muruk, na marsalisi, na paroa-roahon donganna, na pahata-hatahon donganna, na marginjang ni roha, jala na gaor. 21 Ra, tingki ro ahu muse, pasombuon ni Debata ma ahu maila di tonga-tongamuna. Ra marsak situtu ma ahu ala ndang marhamubaon dope godang halak sian dosa ni nasida di tingki naung salpu. Ndang olo nasida muba sian angka ulaon na ramun,* sian seks na so patut,* dohot sian ulaon ni halak na so umboto ila.*