Pangungkapon

2 “Surathon ma tu suru-suruan ni huria na di Epesus: On ma hata sian na maniop pitu bintang di tangan siamunna, jala na mardalan di tonga-tonga ni pitu inganan ni lampu na sian mas i. 2 ‘Huboto do angka na niulam, halojaonmu dohot hasabaronmu. Huboto do na so dipasombu ho halak na jahat tading di tonga-tongamuna. Diuji ho do halak na mandok dirina apostel, hape ndang tutu nasida apostel jala diboto ho do nasida pargabus. 3 Dipatuduhon ho do hasabaron, martahan do ho mangadopi godang sitaonon alani goarhu jala ndang marnaloja ho. 4 Alai hupasingot ma ho, ai ndang dihaholongi ho be ahu songon na parjolo i.

5 “‘Alani i, ingot ma sadia bagas ho madabu, muba ma ho jala ulahon ma ulaonmu songon na di mulana i. Molo ndang muba ho, ro ma ahu tu ho jala bolongkononku ma inganan ni lampumi. 6 Alai adong do na huhalomohon sian ho, ai dihasogohon ho do ulaon ni sekte Nikolaus, songon na huhasogohon. 7 Manang ise na marpinggol, ditangihon ma na nidok ni tondi parbadia tu angka huria: Manang ise na monang, loasonku do ibana mangallang parbue ni hau hangoluan na di paradeiso ni Debata.’

8 “Surathon ma tu suru-suruan ni huria na di Smirna: On ma hata ni ibana ‘na Parjolo dohot na Parpudi’, naung mate jala naung mulak mangolu muse: 9 ‘Huboto do hasusaanmu dohot hapogosonmu, alai sasintongna na mora do ho. Huboto do dileai halak na mangangku Jahudi ho. Hape sasintongna ndang halak Jahudi nasida, alai sian sinagoga* ni Sibolis* do nasida. 10 Unang ma mabiar ho tu hasusaan na naeng sitaononmu. Pamasukon ni Sibolis ma deba sian hamu tu penjara asa diuji situtu hamu. Marsitaonon ma hamu saleleng sampulu ari. Patudu ma na marsihohot ho sahat tu na mate jala lehononku ma tu ho mahkota hangoluan.* 11 Manang ise na marpinggol, ditangihon ma na nidok ni tondi parbadia tu angka huria: Manang ise na monang ndang hilalaonna be hamatean na paduahon.’

12 “Surathon ma tu suru-suruan ni huria na di Pergamos: On ma hata ni ibana na marpodang sidua baba na ganjang jala na tajom: 13 Huboto do didia ho maringanan, i ma di habangsa ni Sibolis. Alai tongtong do ho marsihohot tu goarhu jala togu do haporseaonmu tu ahu nang pe tingki dibunu si Antipas, saksiku na marsihohot i di jolom, di inganan ni Sibolis i.

14 “‘Alai hupasingot ma ho, ai adong do sian tonga-tongamuna na mangihuthon ajaran ni si Bileam. Diajari ibana do si Balas laho mambahen batu partuktuhan tu halak Israel, asa mangallang sipanganon na dipelehon tu gana-ganaan jala mangulahon seks na so patut.* 15 Suang songon i, adong do sian tonga-tongamuna na mangihuthon ajaran ni sekte Nikolaus. 16 Alani i muba ma ho. Molo ndang muba ho, hatop ma ahu ro tu ho jala poranganku ma nasida dohot podang na ganjang na kaluar sian pamanganku.

17 “‘Manang ise na marpinggol, ditangihon ma na nidok ni tondi parbadia tu angka huria: Manang ise na monang, lehononku ma tu ibana manna na buni. Lehononku ma tu ibana batu na gelleng na bontar jala surathononku ma di batu i goar na imbaru na so binoto ni manang ise asing ni na manjalo i.’

18 “Surathon ma tu suru-suruan ni huria na di Tiatira: On ma hata ni Anak ni Debata, na matana songon api na marnala-nala jala patna songon tombaga: 19 Huboto do angka na niulam, holong ni roham, haporseaonmu, na niulam tu Debata, dohot hasabaronmu. Huboto do gumodang na niulam saonari sian na parjolo i.

20 “‘Alai hupasingot ma ho, ai dipasombu ho do boru-boru Izebel tading di tonga-tongamuna na mandok dirina panurirang. Diajari jala dililuhon ibana do naposongku asa mangulahon seks na so patut* dohot mangallang sipanganon na dipelehon tu gana-ganaan. 21 Hulehon do tingki tu ibana asa muba, alai ndang olo ibana muba sian ulaonna na mangulahon seks na so patut.* 22 Ida ma! Bahenonku ma ibana marsahit na posi. Manang ise na mangalangkup dohot ibana, bahenonku ma nasida tu hasusaan bolon molo ndang muba nasida sian ulaonna i. 23 Pamateonku ma angka anakkonna marhite sahit na posi, asa sude huria mamboto ahu do na mamareso na di bagasan pingkiran dohot na di roha ni halak. Baloshononku ma tu hamu hombar tu pambahenanmuna be.

24 “‘Alai anggo tu angka na deba nai na di Tiatira, i ma angka halak na so mangihuthon ajaran ni Izebel, na so mamboto na ginoaran “angka na buni di bagasan roha ni Sibolis”, hudok ma tu hamu: Ndang bahenonku be boban na asing tu hamu. 25 Alai marsihohot ma hamu sahat tu na ro ahu. 26 Manang ise na monang jala na mangoloi parentangku sahat tu ujungna, lehononku ma tu ibana huaso laho mangarajai angka bangso, 27 songon huaso na hujalo sian Damang i. Parmahanonna ma angka bangso marhite tungkot bosi asa ropuhanna nasida songon gunsi na sian tano liat. 28 Jala lehononku ma tu ibana bintang manogot-nogot. 29 Manang ise na marpinggol, ditangihon ma na nidok ni tondi parbadia tu angka huria.’