2 Samuel
8 Di pudian ni ari, marporang ma si Daud dohot halak Palistim+ jala ditaluhon ibana ma nasida.+ Dibuat si Daud ma kota Meteg-ama sian tangan ni halak Palistim.
2 Ditaluhon si Daud ma muse halak Moab.+ Disuru ibana ma nasida peak marbaris di tano jala diukkur ibana ma sude na marbaris i mamakke tali. Dipamate ma dua partolu sian nasida jala dipasombu ma mangolu na sapartolu nai.+ Dung i gabe hatoban ni si Daud ma halak Moab jala ikkon gararon ni nasida do pajak* tu ibana.+
3 Ditaluhon si Daud ma muse si Hadadeser raja ni Zoba+ anak ni si Rehob. Tikki i, di pardalanan do si Hadadeser naeng lao tu akka luat na di Sunge Euprat.+ Ai naeng dirajai ibana do muse akka luat na disi. 4 Ditakkup si Daud ma akka tentara ni si Hadadeser. Ditakkup ma 1.700 tentarana na marhoda dohot 20.000 tentarana na mardalan pat. Diseat si Daud ma urat ni pat ni hoda ni nasida na manarik kareta i. Holan 100 ma na so diseat.+
5 Dung i ro ma halak Siria sian Damaskus+ lao mangurupi si Hadadeser raja ni Zoba. Alai dipamate si Daud do 22.000 halak Siria i.+ 6 Dibahen si Daud ma akka tentarana di Damaskus na di Siria. Gabe hatoban ni si Daud ma halak Siria jala ikkon gararon ni nasida do pajak* tu ibana. Sai dibahen Jahowa do monang* si Daud manang tudia pe ibana marporang.+ 7 Dibuat si Daud ma akka perisai ni tentara ni si Hadadeser jala sian mas do perisai i. Diboan ibana ma i tu Jerusalem.+ 8 Massai godang do tombaga na dibuat Raja Daud sian kota Beta dohot kota Berotai, i ma akka kota ni si Hadadeser.
9 Dibege si Tou raja ni Hamat+ ma naung ditaluhon si Daud sude tentara ni si Hadadeser.+ 10 Disuru si Tou ma si Joram anakna i mandapotton Raja Daud lao manukkun kabarna dohot mandok mauliate, ala nungnga monang Raja Daud mangalo si Hadadeser. Diboan si Joram do akka barang na sian perak, mas, dohot na sian tombaga. (Ai jotjot do ro si Hadadeser marporang mangalo si Tou.) 11 Dipasahat Raja Daud ma akka barang na diboan i tu Jahowa, songon na binahenna tu mas dohot perak na dibuat sian akka bangso na ditaluhon ibana.+ 12 Dibuat ibana do i sian Siria, sian Moab,+ sian halak Ammon, sian halak Palistim,+ sian halak Amalek,+ dohot sian si Hadadeser+ raja ni Zoba anak ni si Rehob. 13 Dung ditaluhon si Daud 18.000 halak Edom di Rura Sira,+ gabe lam tarbarita ma goarna. 14 Dibahen si Daud ma akka tentarana di saluhut luat Edom, jala gabe hatoban ni si Daud ma sude halak Edom.+ Sai dibahen Jahowa do monang* si Daud manang tudia pe ibana marporang.+
15 Torus ma si Daud mamaretta Israel.+ Adil do ibana tikki mangadili jala diulahon ibana do na sittong*+ tikki mamaretta rakyatna.+ 16 Si Joab+ anak ni si Seruya ma na gabe pamimpin ni akka tentara jala si Jehosapat+ anak ni si Ahilud ma gabe juru tulis ni raja. 17 Si Sadok+ anak ni si Ahitub dohot si Ahimelek anak ni si Abiatar ma na gabe malim. Jala si Seraya ma na gabe sekretaris. 18 Si Benaya+ anak ni si Jehoyada ma na gabe pamimpin ni akka pengawal ni si Daud.*+ Jala akka anak ni si Daud ma pejabat na untimbo pangkatna.*