2 Samuel
9 Dung i, disukkun si Daud ma, “Adong dope tahe pinoppar ni si Saul na mangolu? Molo adong dope, naeng do hupatudu holong ni rohakku* tu ibana ala ni si Jonatan.”+ 2 Adong do sahalak parkarejo ni keluarga ni si Saul na margoar si Siba.+ Dijou ma ibana mandapotton Raja Daud. Disukkun raja ma ibana, “Ho do si Siba?” Dialusi ibana ma, “I do tuan.” 3 Didok raja i ma, “Adong dope pinoppar ni si Saul na mangolu? Molo adong dope, naeng do hupatudu holong ni rohakku* tu ibana songon holong na pinatudu ni Debata.” Dialusi si Siba ma, “Adong dope sada nai anak ni si Jonatan na mangolu. Pakpang do patna duassa.”+ 4 Disukkun raja ma, “Didia do ibana tinggal?” Dialusi si Siba ma, “Di Lo-debar do ibana, di jabu ni si Mahir+ anak ni si Ammiel.”
5 Pittor disuru Raja Daud ma halak tu Lo-debar lao mangalap anak ni si Jonatan i sian jabu ni si Mahir anak ni si Ammiel. 6 Ro ma si Mepiboset anak ni si Jonatan pahoppu ni si Saul i mandapotton si Daud. Dung diida ibana si Daud, marsinggang ma ibana. Didok si Daud ma tu ibana, “Horas Mepiboset!” Dialusi ibana ma, “Horas tuannami.” 7 Didok si Daud ma, “Unang ho mabiar. Ai patuduhonokku do holong ni rohakku*+ tu ho alani bapakmu si Jonatan. Paulakokku do sude tano ni si Saul oppungmi. Jala toktong ma ho rap mangan* dohot au di mejakku.”+
8 Mambege i, marsinggang ma si Mepiboset jala ninna ma, “Ai ise ma huroa au naposomon? Boasa ma pola burju hian ho tu* au? Hape, doshon biang na mate+ do au.” 9 Dung i, dijou raja ma si Siba parkarejo ni si Saul i. Didok ma tu ibana, “Lehonokku nama tu si Mepiboset pahoppu ni tuanmi, sude arta ni si Saul dohot sude arta ni keluargana.+ 10 Jadi, ho, akka anakmu, dohot akka parkarejom ma na mangula tano i. Dung panen, papungu hamu ma hasilna asa adong allangon ni keluarga ni si Mepiboset pahoppu ni tuanmi. Alai anggo si Mepiboset, ikkon toktong do ibana rap mangan dohot au di mejakku.”+
Adong do 15 anak ni si Siba jala 20 parkarejona.+ 11 Didok si Siba ma tu raja i, “Olo tuan. Diulahon naposomon pe sude paretta ni raja i.” Alani i, rap mangan do si Mepiboset dohot si Daud di mejana* songon akka anak ni raja. 12 Adong do sada anak ni si Mepiboset, goarna si Mika+ jala poso dope ibana. Sude halak na tinggal di jabu ni si Siba gabe parkarejo ni si Mepiboset. 13 Pakpang do duassa pat ni si Mepiboset+ jala di Jerusalem do ibana tinggal. Ai ikkon toktong do ibana rap mangan dohot raja.+