1 Kronika
19 Mate ma si Nahas raja ni halak Ammon jala anakna ma na manggattihon ibana gabe raja.+ 2 Didok si Daud ma, “Ikkon patuduokku do holong ni rohakku*+ tu si Hanun anak ni si Nahas i, songon holong ni roha naung pinatudu ni bapakna tu au.” Alani i, disuru si Daud ma utusan lao mangapuli si Hanun alani parmate ni bapakna i. Alai tikki sahat akka parkarejo ni si Daud di huta ni halak Ammon+ lao mangapuli si Hanun, 3 ro ma akka pamimpin ni halak Ammon i mandok tu si Hanun, “Unang ma dirippu tuan na lao pasangappon bapakmu umbahen na disuru si Daud akka parkarejona i mangapuli ho. Ai na lao gabe mata-mata do nasida mamareso kota on, asa boi taluhonon ni si Daud hita.” 4 Gabe ditakkup si Hanun ma akka parkarejo ni si Daud i. Dicukkur ma janggut ni nasida.+ Jala diribak dua ma abit ni nasida sahat tu gottingna. Dung i, disuru ma nasida lao. 5 Gabe maila situtu ma nasida. Dung dibege si Daud na masa i, disuru ma halak mandapotton nasida lao mandok, “Di Jeriko+ ma jo hamu tinggal sahat tu na tubu muse janggutmuna i, dung i pe asa mulak hamu.”
6 Di pudian ni ari, diboto halak Ammon ma na sogo hian roha ni si Daud tu nasida. Dilehon si Hanun dohot halak Ammon ma 1.000 talenta* perak lao manggaji akka tentara na marhoda sian Mesopotamia,* sian Aram-maaka, dohot sian Zoba.+ Disewa do muse akka kareta porang sian i. 7 Disewa nasida do 32.000 kareta porang. Dung i, ro ma Raja Maaka dohot akka tentarana. Jala markemah ma nasida di jolo ni Medeba.+ Ro ma muse halak Ammon sian kota ni nasida marpungu lao marporang.
8 Dung dibege si Daud na masa i, disuru ibana ma tusi si Joab+ dohot sude tentarana, dohot ma i akka tentara na unjago.+ 9 Marpungu ma halak Ammon marbaris lao marporang di gerbang ni kota. Alai, di luar ni kota do akka raja na ro i.
10 Diida si Joab ma naung marbaris akka tentara ni halak Ammon sian jolo dohot sian pudi lao mangalo nasida. Dipillit ibana ma tentara ni Israel na unjago lao marbaris mangalo halak Siria.+ 11 Jala dipasahat si Joab ma akka tentara na asing tu si Abisai abangna,+ asa ibana na mangatur nasida marbaris mangalo halak Ammon. 12 Didok si Joab ma, “Molo umgogo do halak Siria i+ sian au, ro ma ho mangurupi au. Alai molo umgogo do halak Ammon i sian ho, ro pe au mangurupi ho. 13 Pos ma rohatta jala barani ma hita!+ Marporang ma hita lao mampartahatton bangsotta dohot akka kota ni Debatanta. Sai pasauton ni Jahowa do lomo ni rohana.”
14 Dung i maju ma si Joab dohot akka tentarana marporang mangalo halak Siria. Alai, lari ma halak Siria.+ 15 Dung diida halak Ammon naung lari halak Siria, gabe lari ma nasida sian si Abisai abang ni si Joab i jala masuk tu kota. Dung i, mulak ma si Joab tu Jerusalem.
16 Dung diida halak Siria naung ditaluhon halak Israel nasida, disuru nasida ma halak manjou halak Siria tu huta na jonok tu Sunge Euprat.+ Si Sopak pamimpin ni tentara ni si Hadadeser do na mamboan nasida tusi.+
17 Dung diboto si Daud na masa i, pittor dipapungu ibana ma sude tentara ni Israel. Disuru ma nasida menyeberang sian Sunge Jordan jala marbaris lao mangalo halak Siria. Dung i, maju ma si Daud rap dohot akka tentarana mangalo halak Siria.+ 18 Alai lari ma halak Siria sian tentara ni Israel. Dipamate si Daud do 7.000 tentara ni Siria na markareta porang dohot 40.000 tentara na mardalan pat. Jala dibunu si Daud do si Sopak pamimpin ni tentara i. 19 Diboto akka halak na tunduk tu si Hadadeser ma naung talu nasida.+ Gabe dipangido ma asa mardame nasida tu si Daud jala tunduk ma nasida tu bangso Israel.+ Gabe dang olo be halak Siria mangurupi halak Ammon.