1 Kronika
20 Di mula ni taon,* somal do akka raja marporang. Alani i, lao ma si Joab+ dohot sude tentarana marporang jala manaluhon halak Ammon. Alai di Jerusalem+ do si Daud tinggal. Dung i marporang ma nasida tu Rabba+ jala ditaluhon nasida ma huta i.+ 2 Dibuat si Daud ma mahkota na sian ulu ni si Malkam* jala dipakke ibana ma i. Sian mas do mahkota i. Boratna hira-hira 34 kilogram* jala dibahen do muse akka batu na arga tu mahkota i. Dibuat si Daud do godang arta ni pangisi ni kota i.+ 3 Diboan si Daud ma muse pangisi ni kota i jala dibahen ma nasida gabe parkarejona.+ Disuru ma nasida karejo mambola batu, mamakke alat na sian bosi na tajom, dohot mamakke kampak. Songon i ma dibahen si Daud tu sude kota ni halak Ammon. Ujungna, mulak ma si Daud dohot akka tentarana tu Jerusalem.
4 Dukkon i, marporang ma muse halak Israel mangalo halak Palistim di Gezer. Tikki i, dipamate si Sebekkai+ halak Husa ma si Sipai pinoppar ni si Repaim+ jala ditaluhon nasida ma halak Palistim.
5 Marporang ma muse halak Israel mangalo halak Palistim di Gob. Tikki i, dipamate si Elihanan anak ni si Jair ma si Lakmi adek ni si Goliat+ halak Gat i. Balga ni hau tombak* ni si Lakmi songon balga ni hau ni partonun.+
6 Marporang ma muse halak Israel mangalo halak Palistim di Gat.+ Tikki i, adong ma sahalak bawa na massai bolon,+ pinoppar ni si Repaim do ibana. Dua pulu opat ma jari-jarina, ai onom be jari-jari ni tanganna dohot patna.+ 7 Sai dileai+ bawa i do halak Israel. Alani i, ro ma si Jonatan anak ni si Simea+ abang ni si Daud pamatehon ibana.
8 Akka pinoppar ni si Repaim+ na sian Gat+ do nasida. Alai mate do nasida dibahen si Daud dohot akka tentarana.