1 Kronika

23 Dung matua jala naeng mate si Daud, dibahen ibana ma si Salomo gabe raja ni Israel.+ 2 Dipapungu ibana ma akka pejabat di Israel, akka malim,+ dohot halak Lepi.+ 3 Dietong ma godang ni halak Lepi na marumur 30 taon tu ginjang.+ Adong ma 38.000 godang ni nasida. 4 Sian nasida, adong do 24.000 na gabe pengawas ni akka halak na martugas di jabu ni Jahowa, jala 6.000 ma na gabe pamimpin dohot hakim.+ 5 Adong do muse 4.000 halak na gabe panjaga ni gerbang,+ jala 4.000 halak na mamakke alat musik lao mamuji+ Jahowa. Si Daud do na mambahen akka alat musik i lao mamuji Debata.

6 Dung i dibagi si Daud ma nasida+ mangihutton akka anak ni si Lepi: si Gerson, si Kohat, dohot si Merari.+ 7 Sian si Gerson, i ma si Ladan dohot si Simei. 8 Adong tolu anak ni si Ladan, i ma si Jehiel, si Jetam, dohot si Joel.+ Si Jehiel ma pamimpinna. 9 Adong tolu anak ni si Simei, i ma si Selomit, si Hasiel, dohot si Haran. On ma akka pamimpin ni pinoppar ni si Ladan na saompu. 10 Adong opat anak ni si Simei, i ma si Jahat, si Sina, si Jehus, dohot si Beria. 11 Si Jahat do na gabe pamimpin, jala si Zizah na paduahon. Ala otik do anak ni si Jehus dohot si Beria, gabe dietong ma nasida saompu jala sada tugas ma nasida.

12 Adong opat anak ni si Kohat, i ma si Amram, si Ishar,+ si Hebron, dohot si Usiel.+ 13 Akka anak ni si Amram, i ma si Aron+ dohot si Musa.+ Alai, si Aron dohot akka anakna do na dipillit+ lao martugas di Inganan na Massai Badia. Nasida do muse na toktong mangalehon pelean di jolo ni Jahowa, marhobas tu Debata, dohot mamasu-masu bangso i di bagasan goar ni Debata.+ 14 Alai anggo akka anak ni si Musa naposo ni Debata na sittong i, dos do nasida songon halak Lepi na asing. 15 Akka anak ni si Musa, i ma si Gersom+ dohot si Elieser.+ 16 Pamimpin ni akka anak ni si Gersom, i ma si Sebuel.+ 17 Holan sada do anak ni si Elieser, i ma si Rehabia.+ Jala si Rehabia ma na gabe pamimpin ni pinoppar ni si Elieser, ai godang do akka anak ni si Rehabia. 18 Pamimpin ni akka anak ni si Ishar,+ i ma si Selomit.+ 19 Pamimpin ni akka anak ni si Hebron, i ma si Jeria. Dung i si Amaria ma na paduahon, si Jehasiel ma na patoluhon, jala si Jekameam+ ma na paopatton. 20 Pamimpin ni akka anak ni si Usiel,+ i ma si Mika. Jala si Ishia ma na paduahon.

21 Akka anak ni si Merari, i ma si Mahli dohot si Musi.+ Akka anak ni si Mahli, i ma si Eleasar dohot si Kis. 22 Mate ma si Eleasar, alai dang adong anakna holan akka boruna do na adong. Dung i, muli ma akka boruna i tu keluarga ni nasida, i ma akka anak ni si Kis. 23 Adong tolu akka anak ni si Musi, i ma si Mahli, si Eder, dohot si Jeremot.

24 Akka on ma pinoppar ni halak Lepi na saompu dohot akka pamimpin ni nasida na saompu naung dietong jala didaftar. Marumur 20 taon tu ginjang do nasida jala martugas di jabu ni Jahowa. 25 Ai didok si Daud do, “Dame do dibahen Jahowa ngolu ni bangso Israel.+ Jala di Jerusalem nama Ibana tinggal saleleng ni lelengna.+ 26 Alani i, dang porlu be boanon ni halak Lepi tabernakel dohot akka peralatan na dipakke lao manomba Debata.”+ 27 Alani hata ni si Daud on, gabe dietong ma sadia godang ni halak Lepi na marumur 20 taon tu ginjang. 28 Tugas ni nasida, i ma mangurupi akka anak ni si Aron+ marhobas di jabu ni Jahowa. Nasida do na manjaga alaman di bagas joro i+ dohot manjaga ruang makan. Nasida do muse na pabadiahon akka na badia, jala na mangulahon akka ulaon na asing di jabu ni Debata na sittong. 29 Dohot do muse nasida paradehon roti pelean,+ topung na halus na gabe pelean sipanganon,* roti na tipis na so marragi,+ roti na dibahen di tuangan na datar, dohot paradehon adonan na dicampur dohot miak.+ Nasida do muse na mangukkur dohot na manimbang. 30 Ganup manogot+ dohot ganup botari, dipuji nasida do Jahowa jala didok do mauliate tu Ibana.+ 31 Dohot do muse nasida paradehon pelean situtungon na dipelehon tu Jahowa tikki ari Sabat,+ tikki bulan baru,+ jala saleleng adong perayaan.+ Toktong do diulahon nasida i di jolo ni Jahowa songon na diparettahon tu nasida. 32 Diulahon nasida do tugas ni nasida di kemah parpunguan dohot di inganan na badia. Jala diurupi nasida do muse akka anak ni si Aron di jabu ni Jahowa.