1 Kronika
22 Dung i didok si Daud ma, “Dison ma bahenon jabu ni Jahowa Debata na sittong i, jala di langgatan on ma halak Israel mangalehon pelean situtungon.”+
2 Disuru si Daud ma asa dipapungu akka panoppang+ na adong di Israel. Disuru ma nasida manokkok jala mamahat batu na lao dipakke pajongjokkon jabu ni Debata na sittong.+ 3 Diparade si Daud do massai godang bosi na lao dipakke mambahen pakku. Pakkeon ma pakku i mambahen akka pintu ni gerbang dohot akka barang na asing. Diparade do muse massai godang tombaga, sappe dang tartimbang alani godangna.+ 4 Diparade do muse hau ares+ na massai godang. Ai massai godang do hau ares na diboan halak Sidon+ dohot halak Tirus+ tu si Daud. 5 Didok si Daud ma, “Poso dope si Salomo anakki, jala dang diboto dope manang aha.*+ Hape ikkon balga jala bagak do jabu ni Jahowa na lao dipajongjong i,+ asa tarbarita i+ tu sude luat.+ Alani i, paradeokku ma akka na porlu tusi.” Jadi andorang so mate si Daud, nungnga massai godang diparade ibana akka na porlu lao pajongjokkon jabu i.
6 Dung i, dijou si Daud ma anakna si Salomo jala disuru ma ibana pajongjokkon jabu ni Jahowa Debata ni Israel. 7 Didok si Daud ma tu si Salomo, “Lomo do rohakku nian pajongjokkon jabu na pasangappon goar ni Jahowa Debatakku.+ 8 Alai didok Jahowa do tu au, ‘Nungnga godang jolma na dipamate ho* di tano on. Jala jotjot do ho marporang. Alani i, dang ho na lao pajongjokkon jabu na pasangappon goarhu.+ Ai nungnga godang jolma na dipamate ho di jolokku. 9 Adong do sada anakmu+ na lao bahenokku dame ngoluna. Dang adong musu na mangalo ibana.+ Ai na lao bahenon do goarna si Salomo.*+ Bahenokku ma dame jala sonang ngolu ni halak Israel saleleng mangolu ibana.+ 10 Ibana ma na lao pajongjokkon jabu na pasangappon goarhu.+ Gabe anakku ma ibana, jala Au ma na gabe bapakna.+ Na lao martahan do bahenokku harajaonna di Israel saleleng ni lelengna.’+
11 “Alani i anakku, anggiat ma sai didongani Jahowa ho. Jala anggiat ma boi pajongjongonmu jabu ni Jahowa Debatam songon naung nidokna.+ 12 Anggiat ma bahenon ni Jahowa ho marbisuk jala malo+ manottuhon dia sipillitonmu tikki mamaretta ho di Israel. Alani i, boi ma ulahononmu patik ni Jahowa Debatam.+ 13 Molo manat dioloi ho sude aturan+ dohot paretta ni Jahowa tu halak Israel na pinaboana marhite si Musa, boi ma ho marhasil.+ Ikkon barani do ho jala togu. Unang ma mabiar ho.+ 14 Nungnga hubahen sian nasa gogokku paradehon akka na porlu lao pajongjokkon jabu ni Jahowa. Huparade do 100.000 talenta* mas dohot 1.000.000 talenta perak. Huparade do muse massai godang tombaga dohot bosi,+ sappe dang tartimbang alani godangna. Jala huparade do muse akka hau dohot batu.+ Alai ikkon tambaanmu dope i. 15 Godang do parkarejo na boi mangurupi ho. Adong do akka panokkok batu, akka tukkang na mamasang batu,+ akka tukkang hau, dohot akka tukkang na asing.+ 16 Godang do muse mas, perak, tombaga, dohot bosi.+ Alani i, pajongjong ma jabu i. Anggiat ma sai didongani Jahowa ho.”+
17 Dung i disuru si Daud ma sude pejabat di Israel mangurupi anakna si Salomo. Didok ma, 18 “Didongani Jahowa Debatamuna do hamu. Jala dang adong be musu di sakalilingmuna. Ai dipasahat Debata do pangisi ni luat on tu au. Jala nungnga dirajai Jahowa dohot bangsona luat on. 19 Saonari, lului hamu ma Jahowa Debatamuna+ sian nasa rohamuna dohot sian nasa ngolumuna. Pajongjong hamu ma inganan na badia ni Jahowa Debata na sittong i.+ Dung i, boan hamu ma poti parpadanan ni Jahowa tu jabu na dipajongjong lao pasangappon goar ni Jahowa.+ Jala boan hamu ma muse tusi akka barang na dipakke lao manomba Debata na sittong i.”+