Panguhum
17 Adong ma sahalak bawa na margoar si Mika. Maringanan do ibana di huta na mardolok-dolok di Epraim.+ 2 Didok si Mika ma tu omakna, “Diingot omak dope na mago i hepeng perak ni omak na 1.100 i? Tikki i, hubege do diburai ho halak na mambuat i. Sasittongna au do na mambuat hepeng i jala di au dope i.” Didok omakna ma tu ibana, “Sai dipasu-pasu Jahowa ma ho anakku.” 3 Dipaulak ibana ma na 1.100 hepeng perak i tu omakna. Alai didok omakna ma, “Lehonokku* do hepeng perak i tu Jahowa. Alani i, pakke ma i lao mambahen patung na diukir dohot patung logam.+ Jadi lok ma di ho hepeng i.”
4 Dung dipaulak si Mika hepeng perak i tu omakna, dibuat omakna ma 200 hepeng perak sian i jala dilehon tu tukkang perak. Dibahen tukkang perak i ma patung na diukir dohot patung logam, jala dibahen ma i di jabu ni si Mika. 5 Adong do sada inganan pamelean appuna ni si Mika. Dibahen ibana ma baju epod+ dohot patung terapim,*+ jala dibahen ibana ma sada anakna gabe malim di ibana.+ 6 Di tikki i, dang adong dope raja ni halak Israel.+ Alani i, gabe masibahen lomona be ma ganup halak.+
7 Adong sahalak doli-doli na tinggal di Betlehem+ na di Juda. Sian keluarga Juda do ibana.* Alai halak Lepi+ do ibana naung leleng tinggal disi. 8 Lao ma ibana sian kota Betlehem na di Juda mangalului inganan na asing, asa disi ibana tinggal. Tikki na mangalului inganan i ibana sahat ma ibana di jabu ni si Mika, di inganan na mardolok-dolok di Epraim.+ 9 Didok si Mika ma tu ibana, “Sian dia do ho ro?” Dialusi ibana ma, “Halak Lepi do au na sian Betlehem na di Juda. Na mangalului inganan na asing do au, asa disi au tinggal.” 10 Alani i, didok si Mika ma tu ibana, “Dison ma ho tinggal, asa gabe penasehat* jala gabe malim ho di au. Ganup taon, hulehon pe tu ho sappulu hepeng perak, sapasang abit, dohot sipanganonmu.” Dung i masuk ma halak Lepi i tu jabu ni si Mika. 11 Olo do halak Lepi i rap tinggal dohot si Mika. Jala songon anakna do ibana dibahen si Mika. 12 Dibahen si Mika ma halak Lepi i gabe malim di ibana.+ Jala tinggal ma ibana di jabu ni si Mika. 13 Didok si Mika ma, “Saonari huboto ma, pasu-pasuon ni Jahowa nama au. Ai hubahen do halak Lepi gabe malim di au.”