Panguhum
18 Di tikki i, dang adong raja ni halak Israel.+ Jala mangalului tano parbagianan dope marga Dan.+ Ai dang dijalo nasida dope tano parbagianan ni nasida di tonga-tonga ni marga ni halak Israel sahat tu tikki i.+
2 Dipillit marga Dan ma lima halak sian keluarga ni nasida lao gabe mata-mata. Sian Zora dohot sian Estaol+ do nasida jala boi do nasida dihaporseai. Disuru do nasida mamareso jala mandalani luat i. Didok ma tu nasida, “Lao ma hamu jala dalani hamu ma luat i.” Dung sahat nasida di inganan na mardolok-dolok di Epraim, marborngin ma nasida di jabu ni si Mika.+ 3 Tikki jonok nasida tu jabu ni si Mika, dibege nasida ma soara* ni doli-doli halak Lepi i jala ditanda nasida do i. Didapotton nasida ma doli-doli i jala disukkun ma, “Ise do na mamboan ho tuson? Aha do ulaonmu dison? Boasa dison ho tinggal?” 4 Dipaboa ibana ma tu nasida sude na binahen ni si Mika jala didok ma, “Digaji ibana do au gabe malim di ibana.”+ 5 Dung i didok nasida ma tu ibana, “Sukkun ma jo tu Debata, marhasil do pardalanannami on manang na dang?” 6 Didok malim i ma tu nasida, “Lao ma hamu di bagasan dame. Donganan ni Jahowa do hamu di pardalananmuna.”
7 Dung i lao ma nasida na lima. Sahat ma nasida di Lais.+ Diida nasida ma dame ngolu ni akka halak na disi songon halak Sidon, jala dang diurupi manang ise nasida. Sonang do ngolu ni nasida jala dang adong arsak ni roha ni nasida.+ Dang adong halak na mangarajai manang na mangganggu nasida. Pulik do nasida sian halak Sidon jala dang mardongan nasida tu manang ise pe.
8 Dung mulak nasida tu Zora dohot tu Estaol,+ disukkun akka dongan ni nasida samarga ma, “Boha do dibereng hamu huta i?” 9 Didok nasida ma, “Beta ma tataluhon nasida. Ai massai denggan do huida hami luat i. Unang pola mabiar hamu. Hatop ma hita lao asa tataluhon luat i. 10 Dung sahat hamu disi, idaonmuna ma akka halak na so adong arsak ni rohana.+ Massai bidang do luat i jala i ma luat na dumenggan na adong di tano on. Nungnga dipasahat Debata tano i tu tanganmuna.”+
11 Dung i borhat ma 600 tentara sian Zora dohot Estaol.+ Sian marga Dan do nasida sude. 12 Borhat ma nasida tu sabola barat ni Kiriat-jearim+ na di Juda jala markemah ma nasida disi. Alani i do digoari inganan i Mahane-dan*+ sahat tu sadari on. 13 Sian i, borhat ma nasida tu huta na mardolok-dolok di Epraim jala sahat ma nasida tu jabu ni si Mika.+
14 Dung i didok lima halak na hea gabe mata-mata i ma tu donganna samarga, “Diboto hamu do? Adong do baju epod di jabu i, patung terapim,* patung na diukir, dohot patung logam.+ Saonari, aha ma na lao tabahen?” 15 Ro ma nasida tu jabu ni doli-doli halak Lepi i+ na jonok tu jabu ni si Mika. Jala disukkun nasida ma kabarna. 16 Tikki i, jongjong do 600 tentara na sian marga Dan i+ di jolo ni gerbang. 17 Alai masuk ma lima halak na hea gabe mata-mata i+ lao mambuat patung na diukir, epod,+ patung terapim,*+ dohot patung logam.+ (Jongjong do tikki i malim i+ rap dohot 600 tentara i di jolo ni gerbang.) 18 Masuk ma nasida tu jabu ni si Mika jala dibuat ma patung na diukir, epod, patung terapim,* dohot patung logam. Didok malim i ma tu nasida, “Boasa dibuat hamu i?” 19 Alai didok nasida ma tu ibana, “Sip ma ho, unang be dok manang aha. Ihutton ma hami asa gabe penasehat* jala gabe malim ho di hami. Dia do dumenggan di ho, gabe malim ni sada keluarga+ do manang gabe malim ni sada marga ni Israel?”+ 20 Gabe las ma roha ni malim i. Diboan ibana ma epod, patung terapim,* dohot patung na diukir i.+ Dung i, lao ma ibana rap dohot nasida.
21 Ditorusson nasida ma pardalanan ni nasida. Jala dibahen ma di jolo ni nasida akka dakdanak, akka pinahan, dohot akka arta ni nasida. 22 Dung dao nasida sian jabu ni si Mika, marroan ma godang tetangga ni si Mika lao mangalele halak na sian Dan i. 23 Dung i gogo ma digora nasida halak Dan i. Dibereng halak Dan ma tu nasida jala didok ma tu si Mika, “Aha na masa? Boasa marroan hamu?” 24 Didok si Mika ma, “Disukkun hamu dope aha na masa? Hape nungnga dibuat hamu akka debatakku na hubahen i jala diboan hamu muse malim i. Aha nama na tinggal di au?” 25 Dialusi halak Dan i ma, “Unang songgak hami. Sotung ditopari halak na muruk on ho. Sotung dipamate ho dohot keluargam.” 26 Ditorusson halak Dan i ma pardalanan ni nasida jala mulak ma si Mika tu jabuna. Ai diboto ibana do na umgogo nasida sian ibana.
27 Dung diboan nasida malim ni si Mika dohot akka patung na binahenna i, lao ma nasida tu Lais.+ Sonang do ngolu ni akka pangisi ni kota i jala dang adong arsak ni roha ni nasida.+ Dipamate halak Dan ma nasida mamakke podang jala ditutung ma kota i. 28 Dang adong sada pe sian nasida na dipasombu mangolu. Ai dao do kota i sian Sidon jala dang mardongan nasida tu bangso na dia pe. Asing ni i, di rura na di Bet-rehob+ do kota i. Dung i dipajongjong halak Dan ma muse kota i jala tinggal ma nasida disi. 29 Dibahen nasida ma goar ni kota i Dan,+ songon goar ni ompu ni nasida si Dan anak ni si Israel.+ Alai Lais do najolo goar ni kota i.+ 30 Dipajongjong halak Dan ma patung na diukir i+ di nasida. Dibahen nasida ma si Jonatan+ pinoppar ni si Gersom+ anak ni si Musa gabe malim. Gabe malim ni halak Dan ma si Jonatan dohot akka pinopparna sahat tu na ditawan pangisi ni huta i. 31 Dipajongjong nasida do patung na diukir na binahen ni si Mika i disi. Jala disi dope patung i saleleng di Silo+ tabernakel* ni Debata na sittong.