2 Samuel

15 Dung salpu sude na masa i, disuru si Absalom ma asa diparade sada kareta hoda dohot akka hoda di ibana. Jala disuru ibana ma 50 halak marlojong di jolona.+ 2 Sai tibu do si Absalom dungo manogotna i. Dung i, jongjong ma ibana di topi ni dalan na di gerbang ni kota i.+ Molo adong halak na ro lao paboahon parkarona tu raja,+ pittor dijou si Absalom ma ibana jala ninna ma, “Sian dia do ho?” Didok halak na ro i ma, “Sian sada huta ni halak Israel do naposomon.” 3 Dung i dohonon ni si Absalom ma, “Sittong do na nidokmi jala denggan do i. Alai, dang adong nanggo sahalak pe na disuru raja lao manangihon parsoalanmi.” 4 Dohonon ni si Absalom ma muse, “Autsugari ma au na dipillit gabe hakim di luat on! Molo dipillit au, bahenokku ma keputusan na sittong tu manang ise pe na ro paboahon parkarona manang parsoalanna tu au.”

5 Molo adong halak na marsinggang tu jolo ni si Absalom, pittor ditogu ibana ma halak na ro i jala diumma.+ 6 Dibahen si Absalom do songon i tu sude halak Israel na ro lao paboahon parkarona tu raja. Songon i ma carana mambuat roha ni halak Israel.+

7 Dung salpu opat taon,* didok si Absalom ma tu raja i, “Ale rajanami, loas ma au lao tu Hebron,+ asa hugarar janjikku tu Jahowa. 8 Tikki di Gesur+ na di Siria au tinggal, nungnga marjanji au.+ Hudok do, ‘Molo diboan Jahowa au mulak tu Jerusalem, ikkon lehonokku do pelean* tu Jahowa.’” 9 Didok raja i ma, “Denggan ma i, lao ma ho di bagasan dame!” Dung i lao ma si Absalom tu Hebron.

10 Nungnga disuru si Absalom akka halak gabe mata-mata tu sude huta ni marga Israel. Jala didok ibana ma tu akka mata-mata i, “Molo dibege hamu soara ni tarompet na sian tanduk, dokkon hamu ma, ‘Nungnga gabe raja be si Absalom di Hebron!’”+ 11 Adong do 200 halak ditogihon si Absalom sian Jerusalem lao tu Hebron. Alai dang sukkun-sukkun roha ni nasida jala dang diboto nasida aha na lao masa. 12 Tikki dilean si Absalom pelean tu Debata, disuru ibana ma halak manjou si Ahitopel+ halak Gilo i. Penasehat ni si Daud+ do ibana na sian kota Gilo.+ Alani i, lam godang ma halak na mangihutton si Absalom mangalo raja i.+

13 Ujungna, adong ma halak na paboahon tu si Daud. Didok ma, “Nungnga marpihak tu si Absalom be halak Israel.” 14 Pittor didok si Daud ma tu sude parkarejona na adong di Jerusalem, “Beta, lari ma hita sian on.+ Ai molo dung ro si Absalom, dang adong sian hita na boi malua! Hatop ma, sotung ditakkup hita, disiksa, jala dipamate ibana sude pangisi ni kota on mamakke podang!”+ 15 Didok akka parkarejona i ma, “Olo rajanami. Oloannami do sude na nidokmi.”+ 16 Dung i borhat ma raja i dohot sude keluargana. Alai ditinggalhon raja i do sappulu gundikna+ lao mangurus istana. 17 Kaluar ma raja i dohot sude halak na mangihutton ibana sian kota i, jala so ma nasida di Bet-merhak.

18 Dung i disuru Raja Daud ma asa mardalan sude na mangihutton ibana sian jolona, asa dipareso ibana nasida. Mardalan ma sian jolona sude parkarejona na rap dohot ibana, sude pengawalna,*+ dohot 600 halak Gat+ na mangihutton ibana sian Gat.+ 19 Dung i, didok Raja Daud ma tu si Ittai+ halak Gat i, “Boasa ma pola dohot ho mangihutton hami? Mulak ma ho jala rap tinggal ma ho dohot raja na baru i. Ai na manoppang do ho di huta i, jala dang boi be ho mulak tu hutam. 20 Baru dope ho ro, boasa ma pola boanokku ho marpinda-pinda rap dohot au. Dang huboto dope manang na tudia au lao. Mulak ma ho, boan ma sude dongan sabangsomi rap dohot ho. Anggiat ma toktong dipatudu Jahowa holong ni rohana* tu hamu!”+ 21 Didok si Ittai ma mangalusi raja i, “Songon pastina Jahowa mangolu* jala songon pastina raja i mangolu, marsumpa ma au, nang pe ikkon mate au, torus do ihuttonon ni naposomon ho manang na tudia pe ho lao!”+ 22 Gabe didok si Daud ma tu si Ittai,+ “Attong beta ma, lao ma hita.” Dung i lao ma si Ittai halak Gat i rap dohot sude parkarejona dohot anakkonna.

23 Tikki mardalan akka halak na mangihutton si Daud i sian Rura Kidron,+ gogo ma tangis pangisi ni huta na jonok tu Jerusalem. Mardalan do nasida sian rura i lao tu gurun. Tikki i, jongjong do Raja Daud di jonok ni rura i. 24 Disi do si Sadok+ rap dohot sude halak Lepi+ na mamboan poti+ parpadanan ni Debata na sittong i.+ Dipeakkon nasida do poti parpadanan ni Debata na sittong i sahat tu na mardalan sude halak na sian kota i. Jala disi do si Abiatar+ di tikki i. 25 Alai didok raja i ma tu si Sadok, “Boan hamu ma mulak poti parpadanan ni Debata na sittong i tu kota.+ Molo lomo roha ni Jahowa tu au, boanonna do au mulak. Paloasonna do au mangida poti i muse dohot inganan panimpananna.+ 26 Alai molo dang lomo roha ni Debata tu au, lok ma dibahen Ibana na denggan di rohana.” 27 Didok raja i ma tu Malim Sadok, “Halak na boi mandapot parnidaan do ho.+ Mulak ma ho tu kota di bagasan dame. Boan ma si Ahimas anakmu dohot si Jonatan+ anak ni si Abiatar rap dohot ho. 28 Hupaima pe kabar sian hamu di inganan ni halak menyeberang sian Sunge Jordan, na jonok tu gurun i.”+ 29 Diboan si Sadok dohot si Abiatar ma poti parpadanan ni Debata na sittong i mulak tu Jerusalem jala disi ma nasida tinggal.

30 Nakkok ma si Daud tu Dolok Jetun+ huhut tangis. Ditutupi ibana do uluna jala dang marsipatu ibana mardalan tusi. Jala dohot do sude halak na mangihutton ibana manutupi ulu ni nasida huhut tangis. 31 Dung i adong ma halak na mandok tu si Daud, “Nungnga marpihak+ be si Ahitopel tu si Absalom.”+ Didok Raja Daud ma, “Ale Jahowa,+ sai bahen ma poda ni si Ahitopel i songon poda ni halak na oto!”+

32 Sahat ma si Daud di pussu ni Dolok Jetun, inganan ni halak marsomba tu Debata. Tikki sahat si Daud disi, nungnga disi si Husai+ halak Arkhi+ lao manjuppangi ibana. Maribak do abitna jala martano-tano do uluna. 33 Alai didok si Daud ma tu ibana, “Dang adong na boi bahenonmu mangurupi au molo dohot ho mangihutton au. 34 Alai molo mulak ho tu kota, boi ma urupanmu au manundati poda ni si Ahitopel.+ Dokkon ma tu si Absalom, ‘Naposom do au ale raja. Najolo, naposo ni bapakmu do au. Alai saonari, naposom do au.’+ 35 Disi do Malim Sadok dohot Malim Abiatar mandongani ho. Paboa ma tu nasida manang aha na binegem di istana ni raja i.+ 36 Disi do si Ahimas+ anak ni si Sadok dohot si Jonatan+ anak ni si Abiatar. Si Ahimas dohot si Jonatan ma suru mandapotton au lao paboahon manang aha na binegem.” 37 Dung i lao ma si Husai ale-ale* ni si Daud i+ tu kota Jerusalem. Tikki i, nungnga di Jerusalem si Absalom.