NA SINURAT NI SI MARKUS

1 On ma mula ni barita na uli taringot tu Jesus Kristus, Anak ni Debata. 2 Songon on do disurat Panurirang* Jesaya, “(Suruokku ma utusanku lao manjoloani ho. Ibana ma na lao paradehon dalanmu.)+ 3 Adong ma soara na jou-jou di padang gurun, ‘Parade hamu ma dalan ni Jahowa!* Parade hamu ma akka dalan na tigor lao sidalananna.’”+ 4 Di padang gurun do si Johannes Pandidi. Dibaritahon ibana ma na porlu tardidi akka jolma tanda naung muba nasida. Ai molo dung muba nasida, disesa Debata ma dosana.+ 5 Alani i, ro ma sude halak sian luat Judea dohot sian Jerusalem mandapotton si Johannes. Diakkui nasida ma sude dosa ni nasida, dung i, dididi* si Johannes ma nasida di Sunge Jordan.+ 6 Sian ibbulu ni unta do pakkean ni si Johannes jala sian kulit ni binatang do ikat pinggangna.+ Sihapor* dohot madu na sian tombak do sipanganonna.+ 7 Didok ibana do tu akka halak, “Na ro ma sasahalak di pudikku. Umbalga do huasona sian au. Gari mambukka tali ni sipatuna pe dang tama au.+ 8 Aek do na hudidihon tu hamu, alai didihononna do tu hamu tondi parbadia.”+

9 Tikki i, ro ma Jesus sian Nasaret na di luat Galilea mandapotton si Johannes. Dididi si Johannes ma ibana di Sunge Jordan.+ 10 Dung kaluar Jesus sian aek, diida ibana* ma bukka langit jala turun ma tu atasna tondi parbadia songon darapati.+ 11 Tarbege ma soara sian langit na mandok, “Ho do Anakku, haholongakki. Las situtu do rohakku mangida ho.”+

12 Ditogihon tondi parbadia ma Jesus tu padang gurun. 13 Saleleng 40 ari ma ibana disi rap dohot akka binatang liar. Dung i, digoda Sibolis*+ ma ibana, alai ro do akka suru-suruan patoguhon ibana.+

14 Dung ditakkup si Johannes, lao ma Jesus tu Galilea.+ Dibaritahon ibana ma disi taringot tu Debata.+ 15 Ninna ma, “Nungnga juppang tikki naung ditottuhon i, nungnga jonok Harajaon ni Debata. Pauba+ hamu ma rohamuna jala porsea ma hamu tu barita na uli i.”

16 Tikki mardalan Jesus di topi ni Laut Galilea, diida ibana ma si Simon dohot si Andreas+ na marhaha maranggi i. Pas manappakkon jala do nasida tikki i,+ ai sijala dekke do nasida.+ 17 Didok Jesus ma tu nasida, “Ihutton hamu ma au, asa hubahen hamu gabe sijala jolma.”+ 18 Dung i, pittor ditadikkon nasida ma jala ni nasida i, laos diihutton ma Jesus.+ 19 Dang dao sian i, diida Jesus ma muse dua halak na asing na marhaha maranggi, i ma si Jakobus dohot si Johannes anak ni si Sebedeus. Tikki i, padenggatton jala do nasida di parau rap dohot bapak ni nasida si Sebedeus.+ 20 Disi dijou nasida, pittor ditadikkon nasida ma parau i. Ditadikkon nasida ma si Sebedeus bapakna i dohot akka parkarejona. Diihutton nasida ma Jesus. 21 Dung i, lao ma nasida tu Kapernaum.

Dung dapot ari Sabat, masuk ma Jesus tu sinagoga* jala mangajari ma ibana disi.+ 22 Longang do roha ni nasida mambege ibana tikki mangajari. Ai mardongan huaso ni Debata do ibana tikki mangajari akka jolma, dang songon akka siboto surat.*+ 23 Adong ma disi sahalak bawa na disonggopi suru-suruan na jahat. Marsurak ma ibana mandok, 24 “Ale Jesus halak Nasaret, marhua ho ro tuson?+ Na lao pamateonmu do hami? Huboto do ise ho! Halak na badia do ho jala na sinuru ni Debata!”+ 25 Alai disonggak Jesus ma suru-suruan na jahat i. Didok ma, “Sip ma ho, kaluar ma ho sian ibana!” 26 Makkutur ma bawa i dibahen suru-suruan na jahat i. Marsurak ma bawa i gogo, dung i kaluar ma suru-suruan na jahat i sian ibana. 27 Gabe longang ma sude halak na disi jala dihatai nasida ma na masa i. Didok nasida ma, “Ai aha do on? Ajaran na baru do on. Marhuaso do ibana palaohon akka suru-suruan na jahat jala dioloi do ibana.” 28 Alani i, pittor hatop do rarat barita taringot tu ibana di sude luat Galilea.

29 Kaluar ma nasida sian sinagoga i. Dung i lao ma Jesus tu jabu ni si Simon dohot si Andreas. Didongani si Jakobus dohot si Johannes do ibana lao tusi.+ 30 Di tikki i, mohop do simatua boru+ ni si Simon jala modom do ibana di jabu i. Pittor dipaboa nasida ma taringot i tu Jesus. 31 Didapotton Jesus ma na marsahit i, ditiop ma tanganna lao manogu ibana asa hehe. Pittor malum ma ibana jala diparade ibana ma sipanganon tu nasida.

32 Dung bonom mataniari, mulai ma golap ari. Ro ma akka jolma manjuppangi Jesus, jala diboan nasida do akka na marsahit dohot na disonggopi suru-suruan na jahat.+ 33 Marpungu ma di jolo ni pintu sude halak na di kota i. 34 Dipamalum Jesus ma godang halak na marsahit.+ Jala dipalao ibana ma godang suru-suruan na jahat. Alai, dang dipaloas Jesus akka suru-suruan na jahat i makkatai taringot tu ibana. Ai diboto nasida do ibana Kristus.*

35 Sogot manogotna i, tikki holom dope ari, dungo ma Jesus. Dung i lao ma ibana tu inganan na lungun, jala martangiang+ ma ibana disi. 36 Alai, dilului si Simon dohot akka donganna ma ibana. 37 Dung juppang ni nasida Jesus, didok nasida ma, “Sude do halak mangalului ho.” 38 Alai didok Jesus ma tu nasida, “Beta ma hita lao tu inganan na asing, tu akka kota na jonok tuson, asa marbarita au disi, ai alani i do umbahen na ro au.”+ 39 Dung i, lao ma ibana marbarita tu sude sinagoga na di luat Galilea jala dipalao ibana ma akka suru-suruan na jahat.+

40 Ro ma sahalak na marsahit kusta* mandapotton Jesus. Marsinggang ma ibana jala dielek-elek ibana ma Jesus. Ninna ma, “Molo olo ho, boi do au malum*+ bahenonmu.” 41 Asi ma roha ni Jesus mangida ibana. Disurdukkon Jesus ma tanganna jala dijama ma ibana. Ninna ma, “Olo do au! Malum ma ho.”+ 42 Satokkin i, mago ma kustana i jala malum ma sahitna i. 43 Alai andorang so disuru ibana lao, takkas do didok Jesus tu ibana, 44 “Unang pola paboa na masa on manang tu ise pe. Alai lao ma ho manjuppangi malim,+ patudu ma dirim tu ibana. Jala lehon ma pelean songon na ditottuhon si Musa+ patuduhon naung malum ho.” 45 Alai dung lao bawa i, dipaboa do na masa i tu akka halak jala godang ma na mamboto i. Alani i, lao ma Jesus tu luar ni kota mangalului inganan na lungun. Ai dang boi be ibana masuk tu kota i molo diida godang halak. Alai nang pe songon i, torus do ro akka halak sian godang inganan manjuppangi ibana.+

2 Dung manang na piga ari, ro ma muse Jesus tu Kapernaum. Tarboto ma tu akka halak naung masuk Jesus tu sada jabu.+ 2 Godang ma halak na ro marpungu tu inganan i, gabe gok ma inganan i sahat tu pintu. Jala dipaboa Jesus ma barita na uli tu nasida.+ 3 Dung i, adong ma opat halak na ro mamboan sahalak bawa na lumpu.+ 4 Alani godang ni jolma i, dang boi diboan nasida bawa i tu jolo ni Jesus. Gabe dibukka ma atap ni jabu i, na pas di ginjang ni Jesus. Dung i, dipaturun ma bawa na lumpu i peak di tanduna. 5 Dung diida Jesus haporseaon ni nasida,+ ninna ma tu na lumpu i, “Ale anakku, nungnga disesa be dosam.”+ 6 Alai hundul do piga-piga siboto surat* disi. Didok nasida ma di bagasan rohana,+ 7 “Boasa didok ibana songon i? Na mangaleai Debata do ibana disi. Ai holan Debata do kan na boi manesa dosa?”+ 8 Alai diboto Jesus do na di roha ni nasida. Alani i, ninna ma, “Boasa songon i dipikkiri hamu di bagasan rohamuna?+ 9 Dia do ummura dohonon tu na lumpu on, ‘Nungnga disesa be dosam,’ manang ‘Hehe ma ho, angkat ma tandumi, jala mardalan ma ho’? 10 Alai asa diboto hamu, marhuaso do Anak ni jolma i+ manesa akka dosa di tano on.”+ Dung i ninna ma tu na lumpu i, 11 “Hudok ma tu ho, jongjong ma ho, boan ma tandumi, jala mulak ma ho tu jabum.” 12 Dung i jongjong ma ibana, diangkat ma tanduna i jala mardalan ma ibana di jolo ni akka halak na disi. Longang ma roha ni nasida sude. Dipuji nasida ma Debata, ninna ma, “Dang hea dope taida sisongon on.”+

13 Lao ma Jesus muse tu topi ni laut. Marroan ma godang halak mandapotton ibana jala diajari ma nasida. 14 Tikki mardalan ibana, diida ma si Lepi anak ni si Alpeus hundul di kantor pajak. Didok Jesus ma tu ibana, “Ihutton ma au.” Jongjong ma ibana jala diihutton ma Jesus.+ 15 Di pudian ni ari, mangan ma Jesus di jabu ni si Lepi. Jala godang do sijalo pajak dohot akka pardosa na mangan raphon Jesus dohot akka siseanna. Ai nungnga godang sian nasida na mangihutton Jesus.+ 16 Adong ma siboto surat na sian punguan ni halak Parise mangida Jesus mangan raphon akka pardosa dohot sijalo pajak. Gabe didok nasida ma tu sisean ni Jesus, “Boasa rap mangan ibana dohot sijalo pajak dohot akka pardosa?” 17 Mambege i, ninna Jesus ma tu nasida, “Dang porlu pangubati tu halak na sehat, tu na marsahit do. Ai dang na lao manjou halak na mangulahon na sittong au umbahen na ro, alai manjou pardosa i do.”+

18 Di tikki i, marpuasa do sisean ni si Johannes dohot halak Parise. Alani i, ro ma nasida manukkun Jesus, “Boasa dang marpuasa+ akka siseanmi? Hape sisean ni si Johannes dohot sisean ni halak Parise marpuasa do.” 19 Gabe didok Jesus ma tu nasida, “Molo rap dope pangoli+ dohot akka ale-alena, pasti dang marpuasa akka ale-alena i kan? Ai saleleng rap dope pangoli i dohot nasida, dang mungkin marpuasa nasida. 20 Alai na ro ma tikkina, buatonna ma pangoli i sian nasida.+ Dung masa i, marpuasa ma nasida. 21 Dang adong halak na mandukkappon abit na baru tu abit naung buruk. Ai molo dibahen songon i, lam maribak do abit i dibahen pandukkap na baru i.+ 22 Jala dang adong halak na mambahen anggur na baru tu inganan* ni anggur naung leleng. Ai molo dibahen songon i, ribak ma ingananna i dibahen anggur i. Gabe bolong ma anggur i, songon i nang ingananna i. Alai tu inganan na baru do dibahen anggur na baru.”

23 Tikki ari Sabat, mardalan ma Jesus sian ladang gandum. Diputikkon akka siseanna ma biur ni gandum jala diallang huhut mardalan.+ 24 Gabe didok halak Parise ma tu Jesus, “Boasa diulahon siseanmi ulaon na so boi diulahon di ari Sabat?” 25 Alai didok Jesus ma tu nasida, “Na so hea do dijaha hamu taringot tu si Daud tikki male ibana dohot akka donganna?+ Aha do na diulahon ibana? 26 Na so hea do dijaha hamu na masa tu si Abiatar+ malim kepala* i? Tikki i, masuk do si Daud tu bagas joro ni Debata. Diallang ibana do roti pelean, jala dilehon ibana do muse roti i allangon ni akka donganna. Hape dang boi allangonna i, ai mangihutton patik holan malim do na boi mangallang i.”+ 27 Dung i, didok Jesus ma muse, “Dibahen Debata do ari Sabat lao parohon na denggan tu jolma. Alai dang na lao mandalatton ari Sabat umbahen ditoppa Debata jolma i.”+ 28 Alani i, Anak ni jolma i do Tuan ni ari Sabat.+

3 Masuk ma muse Jesus tu sada sinagoga,* jala adong ma disi sahalak bawa na mate* tanganna sabbariba.+ 2 Alani i manat ma diparrohahon halak Parise Jesus, atik na pamalumonna do bawa i manang na dang. Ai ari Sabat do tikki i jala naeng dilului nasida do sala ni Jesus. 3 Didok Jesus ma tu bawa i, “Jongjong ma ho, ro ma ho tu tonga-tonga on.” 4 Dung i, disukkun ibana ma tu nasida, “Mangihutton patik, dia do na boi bahenon di ari Sabat: mambahen na denggan do manang mambahen na jahat? Mangurupi jolma asa mangolu do manang pasombuhon sasahalak mate?”+ Alai, hohom do nasida. 5 Gabe muruk ma Jesus mangida nasida, jala marsak ma ibana alani jogal ni roha ni nasida.+ Dung i, didok ma tu bawa i, “Patigor ma tanganmi.” Dipatigor ibana ma tanganna i, gabe malum ma tanganna i. 6 Dung i, lao ma halak Parise. Marpungu ma nasida rap dohot akka halak na sian partai ni si Herodes+ lao mambahen rencana mambunu Jesus.

7 Dung i lao ma Jesus dohot akka siseanna tu topi ni laut. Godang do halak na sian Galilea dohot na sian Judea mangihutton ibana.+ 8 Ro do muse godang halak sian Jerusalem, sian Idumea, sian bariba ni Jordan, jala sian sakaliling ni Tirus dohot Sidon mandapotton Jesus. Ai nungnga dibege nasida akka ulaon na dibahen ibana. 9 Disuru Jesus ma siseanna paradehon parau di ibana, asa unang tarhapit ibana di tonga-tonga ni jolma i. 10 Ai nungnga godang halak na marsahit dipamalum ibana. Jala tikki diida nasida i, gabe marsionjaran do akka na marsahit na posi lao manjama Jesus.+ 11 Gariada, halak na disonggopi suru-suruan na jahat pe,+ marsomba do tu jolona ganup pajuppang dohot ibana. Gogo ma didok nasida, “Anak ni Debata do ho.”+ 12 Alai, mulak-ulak do dipasingot Jesus tu nasida asa unang dipaboa-boa taringot tu ibana.+

13 Dung i, nakkok ma Jesus tu sada dolok, dijou ibana ma piga-piga sian siseanna.+ Ro ma nasida mandapotton ibana.+ 14 Dipillit Jesus ma 12 halak jala digoari ma nasida akka apostel. Nasida ma na mandongani ibana jala na naeng suruonna marbarita. 15 Dilehon do tu nasida huaso lao palaohon suru-suruan na jahat.+

16 Sisappulu dua+ halak na pinillitna i, i ma si Simon na digoari si Petrus,+ 17 si Jakobus dohot si Johannes akka anak ni si Sebedeus (digoari Jesus do nasida Boanerges, lapatanna “Akka Anak ni Ronggur”),+ 18 si Andreas, si Pilippus, si Bartolomeus, si Mateus, si Tomas, si Jakobus anak ni si Alpeus, si Tadeus, si Simon halak Kana,* 19 dohot si Judas Iskariot, na pasahatton Jesus tu musuna di pudian ni ari.

Dung i, masuk ma Jesus tu sada jabu, 20 marroan ma muse godang halak tusi, sappe so sanga be Jesus mangan rap dohot siseanna alani godang ni halak na ro i. 21 Alai tikki dibege keluargana taringot i, ro ma nasida mangalap ibana. Ai didok nasida do, “Nungnga rittik be ibana.”+ 22 Dileai akka siboto surat* na ro sian Jerusalem do muse ibana. Didok nasida do, “Na disonggopi Beelsebul* do ibana. Huaso ni pamimpin ni suru-suruan na jahat i do dipakke ibana palaohon suru-suruan na jahat.”+ 23 Alani i, dijou Jesus ma nasida. Makkatai ma Jesus tu nasida marhite tudosan, ninna ma, “Menurut hamu, boha ma bahenon ni Sibolis palaohon Sibolis? 24 Molo tarbagi jala marbadai sada harajaon, dang martahan harajaon i.+ 25 Molo tarbagi jala marbadai sada keluarga, dang martahan keluarga i. 26 Dos songon i ma, molo dialo Sibolis do dirina, gabe tarbagi ma harajaonna.* Dang na lao martahan be i jala marujung nama i. 27 Molo masuk sasahalak tu jabu ni sahalak bawa na gogo, dang boi buatonna arta ni bawa i molo dang jolo ditali bawa i. Ikkon jolo ditali ibana do bawa i asa boi buatonna artana i. 28 Tutu do na hudok on tu hamu, tung songon dia pe dosa na diulahon jolma jala tung songon dia pe hata na didok nasida tikki mangaleai, na lao disesa ma sude dosa ni nasida. 29 Alai, manang ise na mangaleai tondi parbadia, dang disesa Debata dosana saleleng ni lelengna.+ Ai dosa na so tarsesa do* na niulahonna i.”+ 30 Didok Jesus pe songon i, ala didok nasida do na disonggopi suru-suruan na jahat ibana.+

31 Dung i, ro ma omak ni Jesus dohot akka anggina.+ Jongjong ma nasida di luar, jala disuru ma halak manjou Jesus.+ 32 Didok akka halak na hundul di sakaliling ni Jesus ma, “Di luar do omakmu dohot akka anggim mangalului ho.”+ 33 Alai dialusi ibana ma nasida, “Ai ise do huroa omakku jala ise do huroa akka anggikku?” 34 Dung i, diida ibana ma tu akka halak na hundul di sakalilingna i. Ninna ma, “Nasida do omakku jala nasida do akka anggikku!+ 35 Ai manang ise na mangulahon lomo ni roha ni Debata, nasida do anggikku, ibotokku, dohot omakku.”+

4 Mangajari do muse Jesus di topi ni laut jala godang ma halak na ro tusi. Alani i, nakkok ma ibana tu sada parau. Dipadao ibana ma saotik parau i sian topi ni laut, alai anggo akka jolma i toktong do jongjong di topi ni laut.+ 2 Dung i, mulai ma Jesus mangajari nasida jala dipakke ibana do godang tudosan.+ Didok ibana do,+ 3 “Bege hamu ma hatakkon. Kaluar ma sahalak panabur lao manaburhon boni.+ 4 Tikki na manabur i ibana, madabu ma deba boni i di topi dalan, jala ro ma akka pidong mangallang i. 5 Na deba madabu di tano na marbatu-batu. Hatop ma i tubu, ai dang pola godang tano disi.+ 6 Alai dung lam mohop mataniari, malos ma i ala dang bagas dope uratna. 7 Na deba nai madabu ma di tonga-tonga ni suga-suga. Dung lam balga suga-suga i, dihapit ma suan-suanan i. Ujungna, dang marparbue be suan-suanan i.+ 8 Alai na deba nai madabu di tano na denggan. Denggan ma i tubu jala marparbue. Adong na 30 hali loppit godang ni parbuena, adong na 60 hali loppit, jala adong na 100 hali loppit.”+ 9 Didok ibana ma muse, “Manang ise na marpinggol, dibege ma i.”+

10 Dung lao akka jolma i, tinggal ma Jesus dohot piga-piga siseanna disi. Ro ma apostel na 12 i manukkun ibana taringot tu tudosan+ i. 11 Didok Jesus ma tu nasida, “Dipaboa do tu hamu rahasia+ na badia taringot tu Harajaon ni Debata, alai ianggo tu na asing holan tudosan do na dipaboa.+ 12 Marhite i, nang pe diida nasida na huulahon, alai dang diattusi nasida lapatanna. Jala nang pe dibege nasida hatakku, alai dang diattusi nasida aha lapatanna.”+ 13 Dung i, didok Jesus ma muse, “Molo so diattusi hamu do tudosan on, songon dia ma hamu boi mangattusi akka tudosan na asing?

14 “Boni na disaburhon panabur i, i ma hata ni Debata.+ 15 Boni na madabu di topi dalan, tudos ma i songon akka halak na mambege hata ni Debata, alai dang sadia leleng dung dibege nasida hata i, ro ma Sibolis+ jala dibuat ma i sian roha ni nasida.+ 16 Songon i ma muse, boni na madabu tu tano na marbatu-batu tudos ma i songon halak na mambege hata ni Debata, jala dung dibege nasida hata i, las do roha+ ni nasida manjalo i. 17 Alai dang marurat boni i di bagasan roha ni nasida, jala holan satokkin do i martahan. Tikki ro hasusaan manang sitaonon alani barita i, dang porsea be nasida tu hata i.* 18 Jala taringot tu boni na madabu di suga-suga, tudos ma i tu akka halak na mambege hata ni Debata,+ 19 alai, alani holso ni roha+ lao mamikkiri parngoluon di tikki* on,+ alani holong ni roha tu hamoraon,+ dohot alani sakkap-sakkap ni roha naung marurat di rohana, gabe dihapit ma hata i jala dang marparbue. 20 Alai anggo boni na madabu di tano na denggan, tudos ma i tu akka halak na mambege hata i, jala na denggan manjalo hata i. Marparbue ma i 30 hali loppit, 60 hali loppit, dohot 100 hali loppit.”+

21 Didok Jesus ma muse, “Dang bahenon ni halak kan lampu tu toru ni karanjang* manang tu toru ni podoman? Pasti tu inganan na timbo do i bahenonna.+ 22 Ai dang adong na buni na so dipataridahon, jala dang adong na tutup na so dibukka.+ 23 Manang ise na marpinggol, dibege ma i.”+

24 Laos didok Jesus ma tu nasida, “Parrohahon hamu ma na binegemuna.+ Ai panuhatan na dipakke hamu lao manuhat, i do pakkeonna lao manuhat tu hamu. Gariada, tambaanna do asa unggodang dilehon tu hamu. 25 Ai manang ise na adong parbinotoanna,+ dilehon do tu ibana unggodang parbinotoan. Alai manang ise na so adong parbinotoanna, gari parbinotoan naung adong hian di ibana buaton ni Debata do sian ibana.”+

26 Dung i, didok Jesus ma muse, “Tudos do Harajaon ni Debata songon halak na manaburhon boni tu tano. 27 Ganup borngin do ibana modom jala dungo marsogotna i. Di tikki na modom i ibana jala di tikki na dungo i ibana, martunas ma boni i, jala lam timbo ma tubu. Alai dang diboto ibana songon dia i masa. 28 Tano i sandiri do na mangalehon parbuena sian tikki tu tikki, mulana ro ma tumburna, dung i biurna, ujungna marisi ma biurna i. 29 Alai dung masak parbuena i, pittor disabi ma i. Ai nungnga dapot tikkina lao dipanen.”

30 Dung i didok Jesus ma muse, “Tudia ma boi dipatudos Harajaon ni Debata? Manang tudosan na dia ma na boi patorakkon i? 31 Tudos do Harajaon i tu boni na gelleng* na ummetmet sian nasa boni di tano on.+ 32 Alai dung disuan, tubu ma i jala gabe umbalga sian sude sayur. Balga ma dakkana, gabe boi ma disi marasar jala marlinggom akka pidong.”

33 Dipakke ibana do godang tudosan+ sisongon i lao mangajari akka jolma taringot tu hata ni Debata. Diajari Jesus do nasida hombar tu sadia godang na boi diattusi nasida. 34 Sasittongna, dang olo ibana mangajari akka jolma i molo so dipakke ibana tudosan. Alai, holan tu akka siseanna do dipatorang ibana lapatan ni tudosan i.+ Dipatorang ma i tikki dang adong be halak na asing disi.

35 Dung borngin, didok Jesus ma tu akka siseanna, “Lao ma hita menyeberang tu bariba ni Laut Galilea.”+ 36 Dung disuru nasida mulak akka jolma i, diboan nasida ma Jesus marparau. Parau na dihunduli Jesus tikki mangajari i do na dipakke menyeberang. Jala adong do muse parau na asing na mangihutton nasida.+ 37 Toppu ma ro alogo na massai gogo. Ro ma galumbang jala masuk ma aek tu parau i, sappe naeng gok do aek di parau i.+ 38 Modom do Jesus marbantal di pudi ni parau i. Gabe didungoi nasida ma Jesus, ninna ma, “Guru, na so parduli do ho? Nungnga naeng mate hita!” 39 Dungo ma ibana, disonggak ma alogo i jala didok ma tu laut i, “Hus! So ma!”+ Dung i, so ma alogo i. Gabe tenang ma laut i. 40 Ninna ma tu nasida, “Boasa pola mabiar hamu? Na so adong do haporseaonmuna?” 41 Gabe mabiar situtu ma nasida, didok nasida ma tu akka donganna i, “Ai ise do ibana sasittongna? Haru alogo dohot laut pe mangoloi do tu ibana.”+

5 Sahat ma nasida tu bariba ni laut, di luat ni halak Gerasa.+ 2 Disi kaluar Jesus sian parau i, ro ma sian kuburan sahalak bawa na disonggopi suru-suruan na jahat mandapotton ibana. 3 Di kuburan i do bawa i maringanan. Sahat tu tikki i, dang adong na tolap manali manang mangaratte bawa i. 4 Nungnga jotjot nian diratte tanganna jala dipasung patna. Alai digotappon do ratte i, disegai do pasungna i jala dang adong nanggo sahalak pe na tolap pasohon ibana. 5 Sai marsuraki do ibana arian nang borngin di akka kuburan dohot di akka dolok. Sai diattuki ibana do dagingna dohot batu. 6 Alai dung diida ibana Jesus sian na dao, marlojong jala marsinggang ma ibana tu jolona.+ 7 Marsurak ma ibana gogo, huhut didok, “Ale Jesus Anak ni Debata Natumimbul i, marhua ho ro tuson? Marsumpa ma ho di bagasan goar ni Debata, na so hukumonmu au.”+ 8 Ai nungnga didok Jesus tu ibana, “Ale suru-suruan na jahat, kaluar ma ho sian ibana.”+ 9 Dung i disukkun Jesus ma tu ibana, “Ise do goarmu?” Dialusi ibana ma, “Legion* do goarhu, ai godang do hami.” 10 Dielek-elek suru-suruan na jahat i ma Jesus asa unang dipalao nasida sian luat i.+

11 Di tikki i, adong ma sapunguan babi+ na mangan di dolok.+ 12 Dielek-elek suru-suruan na jahat i ma Jesus, ninna ma, “Suru ma hami lao tu akka babi na disan, asa masuk hami tu akka babi i.” 13 Dioloi Jesus ma pangidoan ni nasida, kaluar ma akka suru-suruan na jahat i jala lao tu akka babi i. Manibbung ma akka babi i sian topi ni lombang tu laut. Maup ma sude babi i, godangna hira-hira 2.000 ekor. 14 Dung i, marlojongi ma na marmahan babi i tu kota. Dipaboa ma na masa i tu akka halak na di kota dohot tu akka huta na di sakalilingna. Gabe marroan ma akka jolma lao mangida na masa i.+ 15 Dung didapotton nasida Jesus, diida ma bawa na disonggopi legion* i. Nungnga hundul ibana, denggan marpakkean jala nungnga waras pikkiranna. Gabe mabiar ma nasida sude. 16 Diceritahon halak na mangida na masa i ma tu akka na ro i aha na masa tu bawa na disonggopi suru-suruan na jahat i. Dipaboa nasida ma aha na masa tu akka babi i. 17 Ujungna, dielek-elek nasida ma Jesus asa lao sian luat i.+

18 Tikki nakkok Jesus tu parau, ro ma bawa na disonggopi suru-suruan na jahat i hian. Dielek-elek ibana ma Jesus asa dipaloas dohot mangihutton ibana.+ 19 Alai, dang diloas ibana dohot. Didok Jesus ma tu ibana, “Mulak ma ho tu keluargam. Paboa ma sude na binahen ni Jahowa* tu ho jala paboa ma songon dia Ibana patuduhon asi ni rohana tu ho.” 20 Dung i, lao ma bawa i. Dibaritahon ibana ma di luat Dekapolis* sude na binahen ni Jesus tu ibana. Jala longang do roha ni sude jolma na mambege barita i.

21 Lao ma Jesus muse marparau tu bariba ni laut. Dung jonok ibana tu topi ni laut,+ marroan ma massai godang jolma mandapotton ibana. 22 Adong do sian na ro i sahalak pamimpin ni sinagoga,* goarna si Jairus. Dung diida ibana Jesus, marsinggang ma ibana tu patna.+ 23 Sai dielek-elek ma Jesus, ninna ma, “Massai posi do nuaeng sahit ni borukku.* Ro ma jolo ho manjama borukki,+ asa malum ibana jala asa unang mate.” 24 Lao ma Jesus rap dohot ibana. Godang ma halak mangihutton Jesus jala marsionjaran ma nasida di pudina.

25 Adong ma disi sahalak borua naung 12 taon+ pendarahan.+ 26 Nungnga lao ibana marubat tu akka pangubati alai gabe susa do pakkilalaanna alani i. Ai nungnga habis artana lao marubat alai dang marnamalum sahitna i, gariada lam posi do sahitna i. 27 Dung dibege ibana barita taringot tu Jesus, ro ma ibana tu tonga-tonga ni jolma na pungu i. Dijonoki ibana ma Jesus sian pudi jala dijama ma abit luar+ ni Jesus. 28 Ai sai didok ibana do di bagas rohana, “Holan abitna i pe hujama, malum do sahitton.”+ 29 Laos satokkin i, so ma bulanna i jala dihilala ibana ma nungnga malum sahitna i.

30 Pittor diboto Jesus ma na adong huaso+ kaluar sian ibana. Dung i marbalik ma ibana, dibereng ma tu akka jolma i. Didok ibana ma, “Ise do na manjama abittu?”+ 31 Alai, ninna akka siseanna i ma tu ibana, “Dibereng ho do marsionjaran akka jolma i di pudim. Boasa pola disukkun ho ise na manjama abitmu?” 32 Alai, dibereng Jesus ma tu sakalilingna lao mangida ise na manjama abitna i. 33 Gabe ro ma borua i hitir-hitir tu jolo ni Jesus. Ai dung diboto borua i aha na masa tu dirina, gabe mabiar do ibana. Marsinggang ma ibana tu jolo ni Jesus jala diakkui ibana ma sude. 34 Didok Jesus ma tu borua i, “Ale borukku, haporseaonmi do mambahen ho malum.+ Mulak ma ho di bagasan dame jala malum ma sahitmi.”+

35 Tikki makkatai dope Jesus, ro ma manang na piga halak sian jabu ni si Jairus jala ninna ma, “Nungnga mate borumi! Boasa dope susaanmu Guru i?”+ 36 Alai dung dibege Jesus hata ni nasida i, ninna ma tu si Jairus, “Unang pola mabiar ho! Porsea ma ho.”+ 37 Dung i didok Jesus ma tu akka jolma i asa unang diihutton ibana. Holan si Petrus, si Jakobus, dohot si Johannes na marhaha maranggi i do na diloas mandongani ibana.+

38 Dung sahat nasida di jabu ni si Jairus, diida Jesus ma godang halak na tangis jala mangandungi.+ 39 Masuk ma Jesus, didok ma tu nasida, “Boasa sai tangis hamu? Jala boasa gaor hamu? Dang na mate dakdanak on, na modom do ibana.”+ 40 Alai diparekkeli nasida ma ibana. Disuru Jesus ma kaluar akka jolma i. Dung i, ditogihon ibana ma omak dohot bapak ni dakdanak i rap dohot siseanna masuk tu inganan ni dakdanak i. 41 Ditiop ibana ma tangan ni dakdanak i, jala ninna ma, “Talita kumi,” lapatanna, “Ale borua na metmet, hudok ma tu ho, hehe ma ho!”+ 42 Pittor hehe ma dakdanak i jala mardalan. (Nungnga marumur 12 taon ibana.) Dung i, longang jala las situtu ma roha ni natua-tuana i. 43 Alai, takkas do diparettahon Jesus tu nasida asa unang dipaboa-boa na masa i tu manang ise pe.+ Dung i, disuru Jesus ma asa dilehon mangan dakdanak i.

6 Dung i, borhat ma Jesus sian i jala mulak ma tu hutana.+ Dohot do akka siseanna mangihutton ibana. 2 Tikki ari Sabat, mangajari ma ibana di sinagoga.* Longang do akka jolma mambege ibana mangajari. Didok nasida ma, “Sian dia do dapotna sudena i? Ai ise do huroa ibana umbahen na massai godang parbinotoanna?+ Jala ise do huroa ibana umbahen na dilehon tu ibana huaso lao mambahen akka tanda halongangan?*+ 3 Tukkang hau do ibana kan?+ Anak ni si Maria do ibana kan?+ Ai kan abang ni si Jakobus,+ si Josep, si Judas, dohot si Simon+ do ibana kan? Kan akka ibotona do na rap dohot hita on?” Ujungna dang olo nasida porsea tu ibana. 4 Gabe didok Jesus ma tu nasida, “Sai dipasangap do panurirang.* Alai anggo di hutana, di keluargana, dohot di jabuna, dang dipasangap ibana.”+ 5 Alani i, dang godang tanda halongangan na dibahen ibana disi. Holan piga-piga halak do na dijama ibana asa malum sahit ni nasida. 6 Longang do roha ni Jesus ala dang porsea nasida. Dung i, lao ma Jesus mangajari+ tu akka huta na di sakaliling ni luat i.

7 Dijou Jesus ma apostel na 12 i. Dilehon ma tu nasida huaso palaohon akka suru-suruan na jahat.+ Dung i disuru ma nasida lao dua-dua sapardalanan.+ 8 Jala didok Jesus do tu nasida asa unang diboan roti, inganan ni sipanganon, dohot hepeng.* Holan tukkot do na boi boanon ni nasida.+ 9 Boi do dipakke nasida sipatu alai unang pola diboan nasida baju gatti.* 10 Didok Jesus ma muse tu nasida, “Molo masuk hamu tu sada jabu, disi ma hamu sahat tu na lao hamu sian inganan i.+ 11 Molo adong na so manjalo manang na so manangihon hamu di sada inganan, lao ma hamu sian i. Dung i paspasson ma orbuk sian patmuna i asa gabe sipaingot i di nasida.”+ 12 Dung i borhat ma akka sisean i. Dibaritahon ma tu akka jolma asa dipauba nasida pangalaho ni nasida.+ 13 Dipalao nasida do godang suru-suruan na jahat,+ didaisson nasida do miak tu akka na marsahit, jala dipamalum do nasida.

14 Dung i, diboto Raja Herodes ma na masa i. Ai nungnga tarbarita goar ni Jesus. Adong do na mandok, “Nungnga hehe si Johannes Pandidi sian na mate. I do alana boi dibahen ibana akka tanda halongangan i.”+ 15 Alai adong do na mandok, “Si Elia do ibana.” Na asing muse mandok, “Sahalak panurirang do ibana songon akka panurirang najolo.”+ 16 Dung dibege si Herodes taringot i, ninna ibana ma, “Si Johannes do i! Halak na huponggol i uluna. Nungnga mulak mangolu be ibana.” 17 Dibuat si Herodes do si Herodias istri ni si Pilippus abangna i lao gabe istrina. Alani i, lao pasonakkon roha ni si Herodias, disuru si Herodes ma halak manakkup si Johannes jala mangaratte ibana di penjara.+ 18 Ai sai didok si Johannes do tu si Herodes, “Mangihutton patik, dang boi buatonmu istri ni abangmi gabe istrim.”+ 19 Alani i, sogo ma roha ni si Herodias tu si Johannes. Naeng dibunu ibana do si Johannes alai dang hea boi saut. 20 Ai sai dijaga si Herodes do si Johannes. Mabiar do si Herodes mangida si Johannes. Diboto ibana do si Johannes i halak na badia+ jala mangulahon na sittong. Alani i, ganup dibege si Herodes hata ni si Johannes, dang diboto be aha sibahenonna. Ai lomo do rohana mambege hata ni si Johannes.

21 Alai, ujungna dipasaut si Herodias ma rencanana i tikki pesta ari hatutubu+ ni si Herodes. Dijou do tu pesta i akka pejabat tinggi, akka komandan militer, dohot halak na sangap na di luat Galilea.+ 22 Dung i, ro ma boru ni si Herodias tu pesta i jala manortor ma ibana. Las ma roha ni si Herodes dohot roha ni halak na rap mangan dohot ibana. Ninna raja i ma tu borua i, “Pangido ma tu au manang aha lomo ni roham, lehonokku do i tu ho.” 23 Marsumpa ma si Herodes tu borua i, “Manang aha pe na dipangido ho, lehonokku do i tu ho, agia pe satonga ni harajaokkon.” 24 Dung i, lao ma ibana manukkun omakna, ninna ma, “Aha do pangidookku sian raja i?” Didok omakna ma, “Ulu ni si Johannes Pandidi.” 25 Mulak ma ibana muse tu raja i jala didok ma, “Lehon ma tu au ulu ni si Johannes Pandidi. Jala bahen ma i di atas ni talam.”+ 26 Marsak situtu ma raja i. Alai dang tarjua ibana pangidoan ni borua i alani sumpa na binahenna di jolo ni akka tamuna i. 27 Pittor disuru raja i ma sahalak pengawal mamboan ulu ni si Johannes. Dung i lao ma pengawal i tu penjara jala diponggol ma ulu ni si Johannes disi. 28 Diboan ma uluna i di atas ni talam, dilehon ma i tu borua i jala dilehon borua i ma muse tu omakna. 29 Dung dibege akka sisean ni si Johannes na masa, ro ma nasida, dibuat ma bakkena i jala dikubur ma.

30 Marpungu ma muse akka apostel di sakaliling ni Jesus. Dipaboa nasida ma tu Jesus sude naung diulahon dohot na niajarhon ni nasida.+ 31 Dung i, didok Jesus ma tu nasida, “Lao ma hita tu inganan na lungun asa boi hita maradi satokkin.”+ Ai marlao ro do akka jolma i mandapotton ibana, gabe so sanga be Jesus dohot akka siseanna mangan. 32 Lao ma nasida marparau tu inganan na lungun asa dao sian akka jolma i.+ 33 Alai adong do halak na mangida naeng lao nasida sian i, jala godang do halak na mamboto i. Marlojongi ma akka halak sian sude kota tu inganan i jala parjolo do nasida sahat disi. 34 Dung kaluar Jesus sian parau, diida ibana ma massai godang halak disi. Gabe asi ma rohana, ai dos do nasida+ songon biru-biru na so adong parmahanna.+ Dung i, godang ma diajarhon ibana tu nasida taringot tu Debata.+

35 Dung botari, ro ma akka siseanna mandapotton ibana. Didok nasida ma, “Nungnga botari be, jala dao do inganan on.+ 36 Suru ma nasida mulak, asa boi dituhor nasida sipanganon+ di akka huta na jonok tu inganan on.” 37 Didok Jesus ma tu nasida, “Lehon hamu ma nasida mangan.” Gabe didok nasida ma tu ibana, “Attong boha do didok roham molo hupakke hami 200 dinar* lao manuhor roti allangon ni nasida?”+ 38 Ninna Jesus ma tu nasida, “Ida hamu ma jolo sadia godang do roti na adong di hamu!” Dung dipareso nasida, ninna ma, “Adong do lima roti dohot dua dekke.”+ 39 Disuru Jesus ma akka jolma i hundul sasapunguan di duhut-duhut.+ 40 Dung i hundul ma nasida, adong na 100 halak sapunguan jala adong na 50 halak. 41 Dibuat Jesus ma roti na lima i dohot dekke na dua i. Diida ibana ma tu langit jala martangiang* ma ibana.+ Dung i, diponggoli ma roti i jala dibagihon ma tu siseanna asa dilehon tu akka jolma i. Laos songon i do muse dibahen ibana tu dekke na dua i, dibagi-bagi do i tu nasida sude. 42 Mangan ma nasida sude jala butong. 43 Alai lobi dope roti i, dipapungu ma na lobi i, gok 12 karanjang asing ni dekke.+ 44 Adong do 5.000 bawa na mangallang roti i.

45 Dukkon i, pittor disuru Jesus ma akka siseanna asa parjolo lao marparau doppak Betsaida na di bariba ni laut i. Laos disuru Jesus ma mulak akka jolma i.+ 46 Dung lao akka jolma i, nakkok ma Jesus tu dolok lao martangiang.+ 47 Disi do sahalakna sahat tu borngin. Alai anggo akka siseanna na marparau i nungnga sahat tu tonga-tonga ni laut.+ 48 Dung naeng manogot,* diida Jesus ma akka siseanna loja mandayung parau i. Ai mangalo alogo do arah ni parau ni nasida. Gabe ro ma Jesus mandapotton nasida. Mardalan ma ibana di atas ni aek i, hira naeng dilewati ibana do nasida. 49 Tikki diida nasida mardalan ibana di atas ni aek, didok nasida ma, “Ai aha do i!”* Gabe marsuraki ma nasida. 50 Ai tarsonggot do nasida sude mangida ibana. Alai, didok Jesus ma tu nasida, “Au do on, unang pola mabiar hamu.+ Pos ma rohamuna!” 51 Dung i nakkok ma Jesus tu parau i jala so ma alogo i. Longang ma akka siseanna, 52 ai dang diattusi nasida dope aha lapatan ni tanda halongangan na dibahen tu akka roti i, jala maol do i diattusi nasida.

53 Dung menyeberang tu bariba, sahat ma nasida di Genesaret jala marlabu ma nasida disi.+ 54 Disi kaluar nasida sian parau, pittor ditanda akka jolma i do Jesus. 55 Marlojongi ma akka jolma i tu sude luat. Diboan nasida ma akka na marsahit di atas ni tandu tu jolo ni Jesus. 56 Manang tudia pe Jesus lao, tu huta manang tu kota, ro do akka halak mamboan na marsahit tu pasar na adong disi. Dielek-elek nasida ma Jesus asa boi dijama nasida rambu ni abit luarna,+ jala malum do sude na manjama rambu ni abitna i.

7 Ro ma halak Parise dohot piga-piga halak siboto surat* sian Jerusalem. Dikalilingi nasida ma Jesus.+ 2 Diida nasida ma mangan deba sisean ni Jesus, alai dang jolo disussi nasida tanganna. Dang diihutton akka sisean i adat ni halak Jahudi tikki manussi tangan nasida. 3 (Ai anggo halak Parise dohot halak Jahudi na asing dang olo nasida mangan molo so jolo disussi tanganna sahat tu sikuna, ai diihutton nasida do adat ni ompu ni nasida. 4 Molo mulak sian pasar, dang olo nasida mangan molo so jolo dipaias dirina. Jala godang dope adat na asing diihutton jala na dipartahatton nasida. Uppamana, mangarondam akka makkuk, akka ceret, dohot akka panci na sian tombaga di aek.)+ 5 Disukkun halak Parise dohot akka siboto surat ma Jesus, “Boasa dang diihutton akka siseanmi adat ni akka omputta? Ai mangan do nasida hape kotor dope tanganna.”+ 6 Didok Jesus ma tu nasida, “Halak na munafik do hamu. Toho ma hata ni Panurirang* Jesaya taringot tu hamu, ‘Holan di bibirna do bangso on pasangappon Au, alai dao do roha ni nasida sian Au.+ 7 Dang adong gunana nasida toktong manomba Au, ai paretta ni jolma do diajarhon nasida.’+ 8 Dang diulahon hamu paretta ni Debata alai anggo adat ni jolma torus do diihutton* hamu.”+

9 Dung i, didok Jesus ma muse tu nasida, “Malo do hamu mangalului cara asa unang diulahon hamu paretta ni Debata asa boi toktong diihutton hamu adatmuna i.+ 10 Uppamana didok si Musa do, ‘Pasangap ma omakmu dohot bapakmu,’+ jala ‘Manang ise na mangaleai* omakna manang bapakna ikkon dipamate do.’+ 11 Alai didok hamu do, ‘Boi do dokkonon ni sasahalak tu omakna dohot tu bapakna, “Sude na adong di au na lao lehonokku mangurupi omak dohot bapak, nungnga hubahen gabe korban (lapatanna, silehon-lehon tu Debata).”’ 12 Ala didok hamu songon i, dang dipaloas hamu be ibana mangulahon manang aha tu omakna manang tu bapakna.+ 13 Alani i, gabe dang marlakku be hata ni Debata alani adat na torus diajarhon hamu tu na asing.+ Jala godang dope na sarupa tusi diulahon hamu.”+ 14 Dung i, dijou Jesus ma muse akka jolma na disi. Didok ma tu nasida, “Hamu sude, tangihon hamu ma au jala marsitutu ma hamu mangattusi lapatan ni hatakkon.+ 15 Dang na masuk tu pamangan ni sasahalak na mambahen ibana ramun,* alai na kaluar sian pamanganna i do.”+ 16* ——

17 Dung ditadikkon Jesus akka jolma i, masuk ma ibana tu sada jabu. Disukkun akka siseanna ma tu ibana taringot tudosan i.+ 18 Didok Jesus ma tu nasida, “Ai na songon nasida do hamu? Na so diattusi hamu dope lapatanna? Na so diboto hamu do? Dang na masuk tu pamangan ni sasahalak na mambahen ibana ramun. 19 Ai dang tu rohana i masuk, alai tu butuhana do, dung i kaluar ma i muse.” Marhite hatana i, dipaboa Jesus ma dang adong sipanganon na ramun. 20 Didok ibana ma muse, “Na kaluar sian roha ni jolma i do na mambahen ibana ramun.+ 21 Ai sian roha ni jolma i do ro pikkiran na jahat.+ Ai sian i do ro sakkap lao mangulahon seks na so patut,* manakko, mambunu, 22 mangalakkup, roha na hisap,* mangulahon na jahat, manipu, mangulahon ulaon ni halak na so umboto ila,* marlate ni roha, mangaleai, marginjang ni roha, jala mangulahon ulaon ni halak na oto. 23 Sude akka ulaon na jahat i sian roha ni jolma do i kaluar, jala i do na mambahen ibana ramun.”

24 Dung i borhat ma Jesus sian i, lao ma ibana tu luat Tirus dohot Sidon.+ Masuk ma ibana tu sada jabu. Nang pe dang lomo rohana diboto halak naung disi ibana, alai tong do tarboto tu nasida. 25 Disi sahat Jesus, ro ma sahalak borua marsinggang tu jolona.+ Ai nungnga dibege ibana taringot tu Jesus. Di tikki i, disonggopi suru-suruan na jahat do boruna. 26 Halak Junani do borua i, alai tubu* di Siroponisia. Dielek-elek ibana ma Jesus asa dipalao suru-suruan na jahat i sian boruna. 27 Alai ninna Jesus ma tu borua i, “Dang denggan buaton roti ni dakdanak jala disappatton tu anak ni biang. Ikkon jolo butong do dakdanak i.”+ 28 Ninna borua i ma mangalusi, “Toho do i Tuan. Alai anak ni biang na di toru ni meja i pe diallang do lobi-lobi na mardabuan sian roti ni dakdanak i.” 29 Ninna Jesus ma tu borua i, “Attong mulak ma ho. Ai alani alusmi, nungnga kaluar be suru-suruan na jahat i sian borumi.”+ 30 Mulak ma borua i tu jabuna, diida ma boruna i peak di podoman jala nungnga kaluar be suru-suruan na jahat i sian boruna i.+

31 Dung i borhat ma Jesus sian luat Tirus tu Laut Galilea, lewat do ibana sian Sidon dohot sian huta na di Dekapolis.*+ 32 Dung sahat Jesus disi, diboan halak ma tu ibana sahalak bawa na nengel jala hallang makkatai.+ Dielek-elek nasida ma Jesus asa dijama ibana. 33 Diboan Jesus ma ibana lao sian akka jolma i. Dipamasuk Jesus ma jari-jarina tu pinggol ni bawa i, dibahen Jesus ma tijurna tu tanganna jala dijama ma dila ni bawa i.+ 34 Huhut diida tu langit, marhosa ganjang ma Jesus jala ninna ma tu ibana, “Hepata,” lapatanna, “Bukka ma.” 35 Pittor boi ma pinggolna mambege,+ dang hallang be dilana jala denggan ma ibana makkatai. 36 Diorai Jesus do nasida asa unang dipaboa-boa na masa i manang tu ise pe.+ Alai lam diorai, lam dipaboa-boa nasida do.+ 37 Longang do nasida mangida na binahen ni Jesus.+ Didok nasida ma, “Denggan do dibahen ibana saluhutna. Haru na nengel boi marbinege jala na bisu boi makkatai dibahen ibana!”+

8 Di tikki i, marpungu ma muse godang halak jala dang adong sipanganon ni nasida. Dijou Jesus ma akka siseanna, ninna ma, 2 “Asi do rohakku tu akka jolma on.+ Nungnga tolu ari nasida rap dohot au jala dang adong be sipanganon ni nasida.+ 3 Molo husuru nasida mulak, olo ma annon pingsan nasida di dalan alani malena. Ai adong do sian nasida na ro sian na dao.” 4 Dung i didok akka siseanna ma tu ibana, “Alai dao do inganan on sian akka huta na asing. Sian dia ma boi dapotnami roti asa cukkup allangon ni akka jolma on?” 5 Disukkun Jesus ma tu nasida, “Piga do roti na adong di hamu?” Dialusi nasida ma, “Pitu.”+ 6 Disuru Jesus ma akka jolma i hundul di tano. Dibuat ma roti na pitu i, jala didok ma mauliate tu Debata. Diponggoli ibana ma roti i jala dilehon ma tu siseanna asa dibagi tu akka jolma i.+ 7 Adong do muse manang na piga dekke ni nasida na gelleng. Dung martangiang Jesus tu Debata mandok mauliate, disuru ma muse asa dibagihon dekke i. 8 Mangan ma nasida jala butong. Alai lobi dope roti i, dipapungu ma na lobi i, gok pitu karanjang na balga.*+ 9 Adong do hira-hira 4.000 bawa na mangan i. Dung i, disuru Jesus ma nasida mulak.

10 Masuk ma Jesus tu parau rap dohot akka siseanna jala lao tu luat Dalmanuta.+ 11 Ro ma halak Parise mandapotton Jesus, mulai ma nasida marsoal dohot ibana. Diuji nasida ma Jesus. Dipangido nasida ma asa dibahen ibana tanda halongangan* sian Debata.+ 12 Marsak situtu ma Jesus, ninna ma tu nasida, “Boasa sai mangido tanda halongangan sundut on?+ Tutu do hatakkon, dang adong be tanda halongangan silehonon tu sundut on.”+ 13 Ditadikkon Jesus ma nasida, nakkok ma ibana muse tu parau jala lao ma ibana tu bariba ni Laut Galilea.

14 Alai lupa do akka sisean i mamboan roti, holan sada do roti na adong di parau i.+ 15 Dipasingot Jesus ma nasida, ninna ma, “Manat ma hamu tu ragi ni halak Parise dohot tu ragi ni si Herodes.”+ 16 Alani i, gabe marsoal ma akka sisean i ala dang adong sian nasida na mamboan roti. 17 Tikki diboto Jesus taringot i, didok ma tu nasida, “Boasa diparsoalhon hamu taringot roti? Na so diattusi hamu dope? Na maol do diattusi hamu? Na so dapot rohamuna dope hatakki? 18 ‘Marmata do hamu, alai boasa dang marnida? Marpinggol do hamu, alai boasa dang marbinege?’ Na so diingot hamu do 19 na hulehon i mangan 5.000 bawa marhite lima roti?+ Piga karanjang nai na lobi dipapungu hamu?” Dialusi nasida ma, “Adong 12 karanjang.”+ 20 “Tikki hulehon mangan 4.000 bawa marhite pitu roti, piga karanjang na balga* dipapungu hamu lobina?” Dialusi nasida ma, “Pitu karanjang.”+ 21 Didok Jesus ma tu nasida, “Saonari, nungnga diattusi hamu be lapatan ni hatakki?”

22 Sahat ma nasida di Betsaida. Diboan halak ma tu jolo ni Jesus sahalak bawa na mapitung. Dielek-elek nasida ma Jesus asa dipamalum bawa i+. 23 Ditogu Jesus ma bawa na mapitung i tu luar ni huta i. Ditijuri Jesus ma mata ni bawa i dung i dijama.+ Disukkun Jesus ma ibana, “Aha do na boi diida ho?” 24 Dibereng bawa i ma doppak jolo jala ninna ma, “Huida do nian akka jolma, alai songon akka hau na mardalan do nasida huida.” 25 Dijama Jesus ma muse mata ni bawa i, malum ma ibana jala takkas ma diida sude. 26 Dung i disuru Jesus ma ibana mulak, alai didok do tu ibana, “Unang be lao ho tu huta i.”

27 Dung i, lao ma Jesus dohot akka siseanna tu akka huta di Kaesarea Pilippi. Di tonga dalan, disukkun ibana ma tu akka siseanna, “Ise do au didok halak?”+ 28 Dialusi nasida ma, “Si Johannes Pandidi.+ Adong muse na mandok si Elia.+ Na asing muse mandok sahalak sian panurirang* do ho.” 29 Disukkun Jesus ma muse tu nasida, “Alai menurut hamu, ise do au?” Dialusi si Petrus ma, “Kristus i do ho.”+ 30 Dung i, takkas ma diorai Jesus nasida asa unang dipaboa-boa manang tu ise pe taringot tu ibana.+ 31 Laos di tikki i, mulai ma dipatorang Jesus tu akka siseanna aha na ikkon ditaon Anak ni jolma i. Dipaboa ibana do na lao godang hasusaan ditaon ibana alani akka pangituai,* malim kepala,* dohot siboto surat.* Dang na lao dijalo nasida ibana alai bunuon ni nasida do ibana.+ Dung tolu ari ibana mate, dipahehe ma ibana muse.+ 32 Takkas do dipatorang Jesus taringot i tu nasida. Alai ditarik si Petrus ma Jesus tu labbungna, jala dipasingot ma ibana.+ 33 Marbalik ma Jesus, dibereng ma doppak akka siseanna jala dipissang ma si Petrus, ninna ma, “Lao ma ho tu pudikku Bolis! Ai dang pikkiran ni Debata dipikkirhon ho, pikkiran ni jolma do.”+

34 Dung i dijou ibana ma akka jolma na pungu i rap dohot akka siseanna, ninna ma, “Manang ise na naeng mangihutton au, ikkon disoadahon do dirina* jala ikkon dituhuk ibana do hau partinaonan* i jala toktong ma diihutton au.+ 35 Manang ise na marsitutu paluahon ngoluna, na lao mate do ibana. Alai manang ise na mate alani au dohot alani barita na uli, na lao mulak mangolu do ibana muse.+ 36 Aha ma gunana dapot ni sasahalak sude na di portibi on molo gabe mate do ibana?+ 37 Aha ma na boi lehonon ni sasahalak gatti ni ngoluna?+ 38 Ai manang ise na maila mananda au, jala maila alani akka hatakku di tonga-tonga ni sundut na so setia* jala pardosa on, Anak ni jolma i pe maila do mangida ibana+ di tikki ro di bagasan hasangapon ni Amana. Ai na lao ro do Anak ni jolma i rap dohot akka suru-suruan na badia.”+

9 Didok Jesus ma muse tu nasida, “Tutu do na hudok on tu hamu, adong do sian na jongjong dison na so mate dope molo so jolo diida nasida mamaretta Harajaon ni Debata.”+ 2 Onom ari dukkon i, ditogihon Jesus ma si Petrus, si Jakobus, dohot si Johannes nakkok tu dolok na timbo. Holan nasida do na lao tusi. Dung i, diida nasida ma muba rupa ni Jesus.+ 3 Massai bottar ma diida nasida pakkean ni Jesus. Dang adong jolma di tano on na boi manussi pakkean sappe songon i bottarna. 4 Diida nasida do muse si Elia dohot si Musa makkata-hatai dohot Jesus. 5 Dung i didok si Petrus ma tu Jesus, “Guru,* las do rohanami dison. Hupajongjong hami ma tolu kemah dison ate. Sada di ho, sada di si Musa, jala sada di si Elia.” 6 Sasittongna didok si Petrus pe songon i, na so diboto ibana be aha sidohononna. Ai mabiar situtu do nasida. 7 Dung i, ro ma ombun mangalinggomi nasida laos tarbege ma soara+ sian ombun i na mandok, “On do Anakku, haholongakki.+ Tangihon hamu ma ibana.”+ 8 Dung i, dibereng nasida ma tu sakaliling ni nasida, alai dang adong be diida nasida manang ise disi asing ni Jesus.

9 Tikki turun nasida sian dolok i, dipaingot Jesus do nasida asa unang dipaboa-boa manang tu ise pe na niida ni nasida i,+ sahat tu na dipahehe Anak ni jolma i sian hamatean.+ 10 Dioloi nasida ma hatana i.* Alai dibahas nasida na tolu do boasa didok Jesus na lao dipahehe ibana sian na mate. 11 Dung i disukkun nasida ma ibana, “Boasa didok akka siboto surat* na ikkon parjolo ro si Elia+ sian Kristus i?”+ 12 Dialusi ibana ma, “Tutu, parjolo do ro si Elia lao padenggatton sude.+ Alai boasa adong tarsurat na ikkon manaon godang hasusaan+ Anak ni jolma i jala marlea?+ 13 Hudok ma tu hamu, sasittongna nungnga ro si Elia+ alai lomo-lomo ni nasida do dibahen tu ibana, songon naung tarsurat hian taringot tu ibana.”+

14 Tikki mulak nasida mandapotton sisean na asing, diida nasida ma godang halak makkaliangi akka sisean i. Jala marsoal do akka siboto surat dohot akka sisean i.+ 15 Tikki diida akka jolma i Jesus, tarsonggot ma nasida. Marlojong ma nasida mandapotton ibana. 16 Dung i disukkun Jesus ma nasida, “Aha do na diparsoalhon hamu dohot nasida?” 17 Adong ma sahalak sian nasida mandok, “Guru, naeng tu ho hian do huboan anakkon, ai nungnga bisu ibana dibahen suru-suruan na jahat.+ 18 Molo dirajai suru-suruan na jahat i ibana, didabuhon do ibana tu tano. Margumo-gumo ma babana jala marsiharatan ma ngingina, dung i gale ma ibana. Hupangido do tu akka siseanmi asa dipalao suru-suruan na jahat i, alai dang tolap nasida.” 19 Didok Jesus ma mangalusi nasida, “Sundut na so porsea jala na lilu do hamu.+ Sadia leleng nai ikkon sai rap au dohot hamu? Sadia leleng nai ikkon sabar au maradoppon hamu? Boan ma ibana tuson.”+ 20 Diboan nasida ma dakdanak i tu Jesus. Alai tikki diida ibana Jesus, marsitoltol ma dakdanak i dibahen suru-suruan na jahat i. Dabu ma dakdanak i tu tano, marguling-guling ma ibana jala margumo-gumo ma babana. 21 Disukkun Jesus ma bapak ni dakdanak i, “Nungnga sadia leleng ibana songon i?” Didok bapakna i ma, “Sian na gelleng. 22 Jotjot do didabuhon suru-suruan na jahat i ibana tu api dohot tu aek lao pamatehon ibana. Alai molo tarpamalum ho do ibana, asi ma roham jala urupi ma hami.” 23 Didok Jesus ma tu ibana, “Boasa dohononmu ‘molo tarpamalum ho urupi ma hami’? Dang adong na so boi diulahon halak na porsea.”+ 24 Marsurak ma bapak ni dakdanak i, ninna ma, “Porsea do au! Urupi ma au na hurang porsea on!”+

25 Dung diida Jesus marroan akka jolma i, disonggak ma suru-suruan na jahat i ninna ma, “Ho suru-suruan na jahat, na mambahen bisu jala nengel. Huparettahon ma tu ho, lao ma ho sian ibana jala unang be ro ho tu ibana!”+ 26 Dung marsurak dakdanak i jala marsitoltol ibana, lao ma suru-suruan na jahat i. Songon na mate ma dakdanak i, gabe godang ma halak mandok, “Nungnga mate be ibana!” 27 Alai ditiop Jesus ma tangan ni dakdanak i. Ditogu ma ibana, dung i jongjong ma dakdanak i. 28 Masuk ma muse Jesus tu sada jabu. Tikki dang adong halak na asing disi, disukkun akka siseanna ma ibana, “Boasa dang tarpalao hami suru-suruan na jahat i?”+ 29 Ninna Jesus ma tu nasida, “Holan marhite tangiang do boi tarpalao sisongon i.”

30 Borhat ma nasida sian i, jala dibolus nasida ma luat Galilea. Dang lomo roha ni Jesus botoon ni halak manang na didia ibana. 31 Ai naeng mangajari siseanna do ibana. Didok ma tu nasida, “Pasahatonna ma Anak ni jolma i tu akka musuna jala bunuon ni nasida ma ibana.+ Alai dung tolu ari dipahehe do ibana muse.”+ 32 Dang diattusi akka sisean i lapatan ni hata i, alai mabiar do nasida manukkun ibana.

33 Dung i, sahat ma nasida di Kapernaum. Dung masuk Jesus tu sada jabu, disukkun ibana ma tu akka siseanna, “Aha do na diparsoalhon hamu tikki di dalan?”+ 34 Alai sip do akka sisean i. Ai diparsoalhon nasida do taringot ise na ussangap di tonga-tonga ni nasida. 35 Dung i hundul ma Jesus, dijou ma apostel na 12 i, ninna ma, “Manang ise na naeng parjolo, ikkon gabe na parpudi do ibana sian sasude jala ikkon gabe parhobas ni sude halak.”+ 36 Dijou Jesus ma sahalak dakdanak jala disuru ma ibana jongjong di tonga-tonga ni nasida. Dihaol ma dakdanak i jala didok ma tu nasida, 37 “Manang ise na manjalo* sahalak dakdanak+ na songon on alani goarhu, na manjalo au do i. Jala manang ise na manjalo au, dang holan au na dijalo ibana disi, alai dohot do Ibana na marsuru au.”+

38 Didok si Johannes ma tu ibana, “Guru, adong do huida hami halak na palaohon suru-suruan na jahat mamakke goarmu. Alai huorai hami do ibana ala dang diihutton ibana hita.”+ 39 Alai ninna Jesus ma, “Unang pola orai hamu ibana. Ai dang adong halak na paroa-roahon au dung dibahen ibana tanda halongangan* marhite goarhu. 40 Ai manang ise na so mangalo hita, donganta do i.+ 41 Tutu do na hudok on tu hamu, manang ise na mangalehon sacakkir aek inumonmuna ala siihutton Kristus hamu,+ dang mago upana.+ 42 Alai, manang ise na mambahen sahalak sian na metmet on gabe dang porsea be tu au,* tumagon ma digattukkon batu gilingan na balga* tu rukkungna jala dilonokkon tu laut.+

43 “Molo tartuktuk ho dibahen tanganmi, ponggol ma i. Ai tumagon do ponggol tanganmi alai dapotmu hangoluan, sian apala disi duassa tanganmi alai gabe dibolokkon ho tu Gehena,* tu bagasan api na so ra mittop.*+ 44* —— 45 Jala molo tartuktuk ho dibahen patmu, ponggol ma i. Ai tumagon do pakpang ho alai dapotmu hangoluan, sian apala disi duassa patmi alai gabe dibolokkon ho tu Gehena.*+ 46* —— 47 Jala molo mardosa* ho dibahen matam, pulsikkon ma i.+ Ai tumagon do sada matam alai dohot ho masuk tu Harajaon ni Debata, sian apala disi duassa matami alai gabe dibolokkon ho tu Gehena,*+ 48 tu inganan ni akka gilok-gilok na so ra mate dohot tu inganan ni api na so ra mittop.+

49 “Ai dos songon sira na disaburhon tu sipanganon, songon i ma api na lao diparo tu ganup halak.+ 50 Denggan do sira i, alai molo mago do assim ni sira i, boha be bahenon asa assim i?+ Songon sira ma hamu+ jala toktong ma hamu mardame+ dohot akka donganmuna.”

10 Borhat ma Jesus sian i jala sahat ma ibana di parbatasan ni Judea di bariba ni Sunge Jordan. Godang ma halak ro mandapotton ibana jala songon na somal diajari ibana ma nasida.+ 2 Ro ma akka halak Parise manguji ibana. Disukkun nasida ma tu Jesus, “Mangihutton patik, boi do disirakkon sahalak bawa istrina?”+ 3 Dialusi Jesus ma nasida, “Songon dia do diparettahon si Musa tu hamu?” 4 Didok nasida ma, “Diloas si Musa do sahalak bawa mambahen surat sirang lao manirakkon istrina.”+ 5 Ninna Jesus ma tu nasida, “Alani takkang ni rohamuna+ do disuratton si Musa paretta i.+ 6 Alai sian mulana i do ‘ditoppa Ibana bawa dohot borua.+ 7 Alani i, ikkon tadikkonon ni bawa ma omakna dohot bapakna,+ 8 jala gabe sada daging+ ma nasida na dua.’ Jadi, dang dua be nasida alai sada nama. 9 Alani i, naung dipasada Debata,* dang boi sirangon ni jolma.”+ 10 Dung masuk nasida tu sada jabu, disukkun akka sisean i ma muse taringot i tu Jesus. 11 Didok Jesus ma tu nasida, “Manang ise na manirakkon istrina jala mangoli muse tu na asing, na mangalakkup+ do ibana disi jala nungnga mardosa be ibana tu istrina i. 12 Laos songon i ma muse, molo adong sahalak borua na manirakkon suamina jala muli muse tu na asing, na mangalakkup do ibana disi.”+

13 Diboan akka halak ma dakdanak tu Jesus, asa diappehon ibana tanganna tu dakdanak i. Alai muruk ma akka sisean i tu nasida.+ 14 Tikki diida Jesus na masa i, muruk ma ibana tu akka siseanna i. Didok ma, “Loas ma ro akka dakdanak i tu au. Unang ma orai hamu nasida. Ai akka halak sisongon i do nappuna Harajaon ni Debata.+ 15 Tutu do na hudok on tu hamu, ikkon songon dakdanak on do halak na naeng manjalo Harajaon ni Debata. Ai molo dang songon i, dang boi ibana masuk tu Harajaon i.”+ 16 Dung i, dihaol ibana ma akka dakdanak i, diappehon ma tanganna tu atas ni nasida jala dipasu-pasu ma nasida.+

17 Tikki ditorusson Jesus pardalananna, ro ma sahalak bawa marlojong jala marsinggang tu jolona. Didok ibana ma tu Jesus, “Guru na Burju, aha do na ikkon huulahon asa dapottu hangoluan na saleleng ni lelengna?”+ 18 Didok Jesus ma tu ibana, “Boasa didok ho au na burju? Dang adong na burju asing ni Debata.+ 19 Diboto ho do akka paretta on, ‘Unang mambunu,+ unang mangalakkup,+ unang manakko,+ unang makkatindakkon na so tutu,+ unang manipu,+ jala pasangap ma omakmu dohot bapakmu.’”+ 20 Didok bawa i ma tu ibana, “Guru, nungnga huulahon i sude mulai sian dakdanak au.” 21 Diida Jesus ma ibana. Alani holongna tu ibana, ninna ma, “Sada do na hurang di ho. Lao ma ho, gadis ma sude artam, jala lehon ma i tu na pogos asa adong artam di banua ginjang. Dung i, ihutton ma au.”+ 22 Dung dibege bawa i hatana i, gabe marsak ma ibana jala lao. Ai godang do artana.+

23 Diida Jesus ma tu sakalilingna jala didok ma tu akka siseanna, “Maol do halak na godang hepengna masuk tu Harajaon ni Debata!”+ 24 Tarsonggot ma akka sisean mambege hata ni Jesus i. Didok Jesus ma muse, “Hamu akka anakku, maol situtu do masuk tu Harajaon ni Debata! 25 Ummura do unta masuk tu lubang ni jarum sian apala sahalak na mora masuk tu Harajaon ni Debata.”+ 26 Lam tarsonggot ma nasida jala ninna ma tu ibana,* “Attong, ise ma na boi malua?”+ 27 Huhut diida tu akka siseanna, ninna Jesus ma, “Dang tarbahen ni jolma i, alai dang adong na so tarbahen ni Debata.”+ 28 Didok si Petrus ma tu Jesus, “Nungnga hutadikkon hami sude lao mangihutton ho.”+ 29 Dung i, didok Jesus ma muse, “Tutu do na hudok on tu hamu, manang ise na manadikkon jabuna, haha anggina, ibotona, omakna, bapakna, anakkonna, manang tanona alani au dohot alani barita na uli,+ 30 jaloonna do 100 hali loppit unggodang di tikki on. Jaloonna do unggodang jabu, haha anggi, iboto, omak, anakkon, dohot tano, nang pe ikkon manaon na haccit ibana.+ Jala jaloonna do hangoluan saleleng ni lelengna di tikki* na naeng ro. 31 Alai, godang do na parjolo gabe na parpudi jala na parpudi gabe na parjolo.”+

32 Tikki di pardalanan lao tu Jerusalem, di jolo do Jesus mardalan. Longang do roha ni akka apostel na 12 i mangihutton ibana, alai anggo akka na asing na mardalan di pudi ni nasida gabe mabiar do. Ditogihon Jesus ma muse akka apostel na 12 i mandao sian akka na asing. Dung i, dipaboa ibana ma tu nasida aha na lao masa tu ibana.+ 33 Didok ibana ma tu nasida, “Saonari naeng nakkok nama hita tu Jerusalem. Disi ma pasahatonna Anak ni jolma i tu malim kepala* dohot tu siboto surat.* Jala bahenon ni nasida ma hukuman mate tu ibana. Pasahaton ni nasida ma ibana tu akka bangso. 34 Direhei ma ibana, ditijuri, dilissingi, jala dipamate. Alai dung tolu ari, dipahehe do ibana.”+

35 Didapotton si Jakobus dohot si Johannes akka anak ni si Sebedeus+ ma Jesus, jala ninna ma, “Guru, adong pangidoannami tu ho, lehon ma i.”+ 36 Didok ibana ma tu nasida, “Ai aha do huroa dipangido hamu lao bahenokku tu hamu?” 37 Dialusi nasida ma ibana, “Paloas ma hami hundul di labbungmu molo dung mamaretta ho di Harajaonmi.* Sada di sabola kananmu jala sada di sabola kirim.”+ 38 Didok Jesus ma tu nasida, “Dang diboto hamu manang aha na pinangidomuna. Tolap do hamu minum sian makkuk panginumakki? Manang, tarbahen hamu ma tardidi songon pandidion na tu au i?”+ 39 Dialusi nasida ma, “Tarbahen hami.” Dung i didok Jesus ma tu nasida, “Tutu do i nian! Na lao minum do hamu sian makkuk panginumakki. Jala na lao dididi do hamu songon pandidion na tu au i.+ 40 Alai dang au na manottuhon ise na lao hundul di sabola kananku manang di sabola kirikku. Debata do na mamillit halak na lao hundul disi.”

41 Tikki dibege sisean na sappulu nai taringot i, muruk ma nasida tu si Jakobus dohot tu si Johannes.+ 42 Gabe dijou Jesus ma nasida jala ninna ma, “Diboto hamu do, mamaretta do akka halak na gabe pamimpin ni akka bangso tu rakyatna. Jala, marhuaso do akka na sangap tu rakyatna.+ 43 Alai unang ma songon i hamu, manang ise na naeng sangap di tonga-tongamuna ikkon rade do ibana makkobasi na asing.+ 44 Jala manang ise sian hamu na naeng parjolo, ikkon gabe hatoban ni sude jolma do ibana. 45 Gari Anak ni jolma i, dang na lao dihobasi ibana umbahen na ro. Alai ro do ibana lao makkobasi na asing+ jala mangalehon ngoluna lao manobus godang jolma.”+

46 Dung i sahat ma nasida di Jeriko. Alai tikki kaluar Jesus dohot akka siseanna sian Jeriko rap dohot akka jolma i, adong ma sahalak na mapitung na margoar si Bartimeus (anak ni si Timeus) hundul mangido-ido di pinggir dalan.+ 47 Tikki dibege ibana lewat Jesus halak Nasaret i, jou-jou ma ibana mandok, “Jesus, Anak ni si Daud,+ asi ma roham di au!”+ 48 Gabe godang ma halak na muruk tu ibana, jala disuru ma ibana asa sip. Alai lam gogo do didok ibana, “Anak ni si Daud, asi ma roham di au!” 49 Jadi so ma Jesus, ninna ma, “Jou hamu ma ibana tuson.” Dijou nasida ma na mapitung i, didok ma tu ibana, “Pos ma roham! Jongjong ma ho, ai nungnga dijou ibana ho.” 50 Hatop ma ibana jongjong, disappatton ma abit luarna, jala didapotton ma Jesus. 51 Disukkun Jesus ma ibana, “Aha do dipangido ho lao bahenokku tu ho?” Dialusi bawa na mapitung i ma Jesus, “Gurunami,* bahen ma au marnida.” 52 Dung i didok Jesus ma tu ibana, “Mulak ma ho. Haporseaonmi do mambahen ho malum.”+ Pittor boi ma ibana marnida,+ jala mardalan ma ibana mangihutton Jesus.

11 Nungnga lam jonok be Jesus dohot akka siseanna tu Jerusalem. Ai nungnga sahat be nasida di Dolok Jetun. Disi do huta Betpage dohot huta Betania.+ Dung sahat nasida disi, disuru Jesus ma lao dua halak siseanna.+ 2 Didok ma tu nasida, “Lao ma hamu tu huta na di jolo an. Dung sahat hamu disi, juppangmuna do annon disi sada anak ni halode na tartabbat. Dang hea dope dihunduli halak halode i. Bukka ma talina i jala boan ma tuson. 3 Molo adong na manukkun hamu songon on, ‘Boasa dibukka hamu tali ni halode i?’ dokkon hamu ma, ‘Porlu halode on pakkeon ni Tuan jala hatop do i paulakonna muse tuson.’” 4 Lao ma akka sisean i jala juppang ni nasida ma halode i. Tartabbat do halode i di jolo ni pintu ni sada jabu na adong di pinggir dalan. Dung i, dibukka nasida ma talina i.+ 5 Alai, adong ma piga-piga halak jongjong disi. Disukkun ma nasida, “Boasa dibukka hamu tali ni halode i?” 6 Gabe dialusi nasida ma songon na nidok ni Jesus, dung i dipaloas ma nasida lao.

7 Diboan nasida ma anak ni halode+ i tu Jesus. Dibahen nasida ma pakkean ni nasida tu halode i jala hundul ma Jesus di atasna.+ 8 Godang do halak na pahembangkon pakkean ni nasida di dalan. Jala adong do muse na manerakkon akka ratting ni hau na dibuat nasida sian ladang.+ 9 Adong do akka halak na mardalan di jolo dohot di pudi ni Jesus, jala sai didok nasida do, “Sai lehon ma haluaon!+ Dipasu-pasu ma na ro di bagasan goar ni Jahowa!*+ 10 Dipasu-pasu ma Harajaon na lao ro i, Harajaon ni si Daud amangta i!+ Ale Debata na di banua ginjang, sai lehon ma haluaon tu ibana!” 11 Dung masuk Jesus tu Jerusalem, lao ma ibana tu bagas joro. Dung i diparrohahon ibana ma akka na adong di sakalilingna. Alai, ala nungnga botari lao ma ibana tu Betania rap dohot apostel na 12 i.+

12 Marsogotna i, tikki borhat nasida sian Betania male ma Jesus.+ 13 Sian na dao, diida ibana ma sada hau ara na godang bulungna. Lao ma ibana tusi lao mangida atik boha adong parbuena. Alai dung sahat disi, dang adong dapotna nanggo sada pe parbuena. Holan bulungna do na godang, ai dang dapot dope tikkina marparbue. 14 Dung i didok ma tu hau i, “Tung so adong be na mangallang parbuem salelengna.”+ Dibege akka siseanna i do hatana i.

15 Dung sahat nasida di Jerusalem, masuk ma Jesus tu bagas joro. Dipalao ibana ma sude akka partiga-tiga dohot panuhor na adong disi. Dibalikkon ibana ma meja ni akka situkkar hepeng dohot bangku ni partiga-tiga darapati.+ 16 Jala dang dipaloas ibana akka halak na mamboan barang lewat sian bagas joro i. 17 Diajari ibana ma nasida, ninna ma, “Adong do tarsurat, ‘Didok nama jabukki gabe jabu partangiangan ni sude bangso’.+ Alai dibahen hamu do i gabe inganan* ni akka pangarampok.”+ 18 Dibege akka malim kepala* dohot siboto surat* do i, gabe dilului nasida ma dalan lao mambunu Jesus.+ Alai mabiar do nasida tu ibana, ai sude do akka jolma i longang alani na niajarhonna.+

19 Dung botari, lao ma Jesus dohot akka siseanna sian kota Jerusalem. 20 Alai tikki mardalan muse nasida manogotna i, diida nasida ma nungnga malos hau ara i sahat tu uratna.+ 21 Diingot si Petrus ma hau ara i, ninna ma tu Jesus, “Guru, ida ma! Nungnga malos hau ara na binuraanmi.”+ 22 Didok Jesus ma tu nasida, “Porsea ma hamu tu Debata. 23 Tutu do na hudok on tu hamu, manang ise na mandok tu dolok on, ‘Pinda ma ho sian on jala dabu ma ho tu laut,’ sai na saut do i. Alai ikkon porsea do ibana na ikkon saut na nidokna i jala dang ganggu rohana.+ 24 Alani i do hudok tu hamu, molo porsea hamu na lao jaloonmuna manang aha pe na dipangido hamu di bagasan tangiang, pasti dapotmuna do i.+ 25 Tikki jongjong hamu lao martangiang, sesa hamu ma sala ni donganmuna tu hamu, asa disesa Amamuna na di banua ginjang i salamuna.”+ 26* ——

27 Ro ma muse nasida tu Jerusalem. Tikki mardalan Jesus di bagas joro, ro ma akka malim kepala, akka siboto surat dohot akka pangituai* mandapotton ibana. 28 Ninna ma tu Jesus, “Huaso ni ise do dipakke ho mangulahon on? Ise do na mangalehon tu ho huaso lao mangulahon i sude?”+ 29 Didok Jesus ma tu nasida, “Alusi hamu ma jo sukkun-sukkunkon. Dung i paboaokku ma tu hamu marhite huaso ni ise au mangulahon i sude. 30 Sian ise do dijalo si Johannes+ huaso lao mandidi jolma? Sian banua ginjang do manang sian jolma? Alusi hamu ma au.”+ 31 Gabe didok nasida ma tu akka donganna, “Molo tadok sian banua ginjang, dohononna ma tu hita, ‘Attong boasa dang porsea hamu tu ibana?’ 32 Manang, barani do hita mandok i sian jolma?” Mabiar do nasida mandok songon i, ai sude do halak porsea molo si Johannes i sahalak panurirang.*+ 33 Dialusi nasida ma Jesus, “Dang huboto hami.” Didok Jesus ma tu nasida, “Au pe, dang paboaokku tu hamu marhite huaso ni ise au mangulahon i sude.”

12 Dung i makkatai ma Jesus tu nasida marhite tudosan, “Adong ma sahalak bawa na manuan anggur di ladangna.+ Dihandangi ibana ma sakaliling ni ladangna i. Dibahen ma inganan pamoroan ni anggur jala dipajongjong ma sada menara inganan ni panjaga.+ Dipasewahon ma i tu akka pangula, dung i lao ma ibana tu luat na asing.+ 2 Dung juppang tikki panen, disuru ibana ma sahalak hatobanna manjalo anggur bagianna sian pangula i. 3 Ditakkup akka pangula i ma hatoban i, dipukkuli, jala dipaulak ma ibana. Alai dang adong dilehon manang aha lao boanonna. 4 Disuru nappunasa i ma muse hatoban na asing manjuppangi akka pangula i. Alai dipukkuli nasida do ulu ni hatoban i jala dileai.+ 5 Dung i disuru ma muse hatoban na asing, alai dibunu pangula i do hatoban i. Godang dope akka na asing disuru, alai dipukkuli nasida do na deba jala na deba nai dibunu nasida. 6 Ujungna, disuru nappunasa ladang anggur i ma anak haholonganna+ manjuppangi akka pangula i. Ai ninna rohana, ‘Habiaran ni nasida do ra anakki.’ 7 Didok akka pangula i ma tu akka donganna, ‘Tu ibana do lao dilehon ladang on.+ Beta, tapamate ma ibana asa di hita parbagiananna i.’ 8 Dung i, ditakkup nasida ma ibana. Disarat ma ibana tu luar ni ladang i jala dipamate ma ibana.+ 9 Attong aha ma bahenon ni nappuna ladang anggur i? Ro ma ibana pamatehon akka pangula i. Jala pasahatonna ma ladang anggur i tu na asing.+ 10 Na so hea do dijaha hamu na tarsurat i? Didok do, ‘Batu na dibolokkon akka tukkang nungnga gabe batu parsuhi-suhi* na rumikkot.+ 11 Sian Jahowa* do i jala longang do rohatta mangida i.’”+

12 Dung dibege akka siboto surat* dohot akka malim kepala* hatana i, naeng ditakkup nasida ma Jesus. Ai diboto nasida do taringot tu nasida do na nidok ni Jesus di tudosanna i. Alai mabiar do nasida tu akka halak na disi, gabe ditinggalhon nasida ma Jesus.+

13 Dung i, disuru nasida ma deba halak Parise dohot deba sian partai ni si Herodes manjorat Jesus marhite hatana.+ 14 Dung sahat nasida, didok ma tu Jesus, “Guru, huboto hami do na sittong ho jala dang dilului ho hasangapon sian jolma, ai dang hea dipaimbar-imbar ho jolma. Sai sittong do na niajarhonmu taringot tu dalan ni Debata. Mangihutton Patik ni si Musa, boi do gararon pajak* tu Kesar manang na dang? 15 Ikkon tagarar do i manang na dang?” Alai diboto Jesus do na jahat pikkiran ni nasida. Gabe didok ma, “Boasa ujionmuna au? Boan ma tuson sada hepeng dinar.”* 16 Diboan nasida ma sada hepeng logam jala didok Jesus ma tu nasida, “Gombar dohot goar ni ise do na di hepeng on?” Dialusi nasida ma, “Kesar.” 17 Dung i ninna Jesus ma, “Lehon ma tu Kesar appuna ni Kesar,+ jala tu Debata appuna ni Debata.”+ Gabe longang ma roha ni nasida mambege hatana i.

18 Dung i ro ma muse halak Saduse manjuppangi Jesus. Dang porsea nasida na boi mulak mangolu halak na mate.+ Didok nasida ma tu Jesus,+ 19 “Guru, disuratton si Musa do tu hita molo adong bawa na mate hape dang sanga dope adong anakkonna, ikkon buaton ni anggina* do istri ni abangna i lao gabe istrina asa adong pinoppar ni abangna naung mate i.+ 20 Hea do adong pitu na marhaha maranggi dison. Mangoli ma siakkangan, alai dang sanga dope adong anakkonna mate ma ibana. 21 Dung i, dibuat anggina na paduahon i ma istrina i, alai dang sanga dope adong anakkonna mate ma ibana. Songon i do muse na masa tu anggina na patoluhon 22 sahat tu na papituhon. Ujungna mate ma borua i. 23 Attong di ari haheheon i, ise do sian nasida na gabe suami ni borua i? Ai sude do bawa na pitu i hea gabe suamina.” 24 Didok Jesus ma tu nasida, “Sian i tarida ma na sala hamu. Ai dang diattusi hamu isi ni Surat na Badia i jala dang diattusi hamu songon dia balga ni huaso ni Debata.+ 25 Ai molo dung hehe nasida sian na mate, dang masa be mangoli manang muli, ai songon suru-suruan na di banua ginjang+ i nama nasida. 26 Na so hea do dijaha hamu di bukku ni si Musa taringot tu ramba na marsuga? Marhite hata ni Debata tu si Musa, dipatudu Ibana do na lao dipahehe halak naung mate. Ai didok Ibana do, ‘Au do Debata ni si Abraham, Debata ni si Isak, dohot Debata ni si Jakkob.’+ 27 Dang Debata ni halak na mate Ibana, alai Debata ni halak na mangolu do. Nungnga tung sala hamu.”+

28 Adong do disi sahalak siboto surat na mambege nasida marsoal. Diboto ibana do na denggan alus ni Jesus tu nasida. Alani i disukkun ibana ma Jesus, “Sian sude paretta ni Debata, dia do paretta na uppetting?”*+ 29 Dialusi Jesus ma, “On do paretta na uppetting: ‘Ale Israel, tangihon ma! Anggo Debatanta, Jahowa* do. Holan sada do Jahowa.* 30 Ikkon haholonganmu do Jahowa* Debatamuna sian nasa rohamuna, sian nasa ngolumuna,* sian nasa pikkiranmuna, dohot sian nasa gogomuna.’+ 31 Na paduahon, ‘Ikkon haholonganmuna do donganmuna jolma doshon dirimuna.’+ Dang adong paretta na asing na umbalga sian akka paretta on.” 32 Didok siboto surat* i ma tu Jesus, “Guru, denggan do na nidokmi jala sittong, ‘Holan Ibana do Debata. Dang adong Debata, asing ni Ibana.’+ 33 Jala ikkon haholongan do Debata sian nasa roha, sian nasa pikkiran, dohot sian nasa gogo. Dung i, ikkon haholongan do dongan jolma doshon diriniba sandiri. Uppetting do on sian sude silehon-lehon dohot sian pelean situtungon.”+ 34 Dung diida Jesus na marbisuk bawa i tikki mangalusi, didok Jesus ma tu ibana, “Dang dao ho sian Harajaon ni Debata.” Gabe dang adong be na barani manukkun manang aha tu Jesus.+

35 Alai tikki mangajari Jesus di bagas joro, disukkun ibana ma, “Boasa didok akka siboto surat anak ni si Daud do Kristus i?+ 36 Ai marhite panogu-noguon ni tondi parbadia,+ didok si Daud do, ‘Didok Jahowa* do tu Tuanku, “Hundul ma ho di sabola kananku paima hubahen akka musum gabe sidege-degean ni patmu.”’+ 37 Didok si Daud do ibana Tuan, alani i songon dia ma ibana gabe anak ni si Daud?”+

Lomo do roha ni akka jolma i manangihon Jesus. 38 Tikki na mangajari i Jesus, ninna ma, “Manat ma hamu tu akka siboto surat* na mardalani tusan tuson mamakke jubah. Tikki dipakkulingi nasida di pasar,+ ikkon ussangap do nasida dibahen sian na asing. 39 Tikki di parpestaan, lomo hian do roha ni nasida hundul di inganan na sangap+ jala sai di jolo do nasida hundul di akka sinagoga.* 40 Dirampok nasida do jabu* ni akka na mabalu. Marganjang-ganjang do tangiang ni nasida holan asa diida halak. Alani i, ubborat ma dibahen hukuman tu nasida sian tu na asing.”

41 Dung i hundul ma Jesus di jonok ni poti inganan ni pelean.+ Diparrohahon ibana do akka halak na pamasukkon hepeng tu poti i. Diida ibana do akka na mora pamasukkon godang hepeng logam.+ 42 Dung i, ro ma sahalak ina na mabalu jala na pogos. Dipamasuk ibana do dua hepeng logam na otik argana.*+ 43 Dijou ibana ma akka siseanna i, didok ma tu nasida, “Tutu do na hudok on tu hamu, unggodang do na dipamasuk ina na mabalu na pogos on, sian sude na dipamasuk halak na asing tu poti inganan ni pelean i.+ 44 Ai sude do nasida pamasukkon sian lobi-lobi ni hamoraonna. Alai anggo ina na mabalu on nang pe pogos, dilehon ibana do sude na adong di ibana.”+

13 Tikki kaluar Jesus sian bagas joro, didok sahalak sian siseanna ma tu ibana, “Guru, ida ma balga ni akka batu i jala uli ni akka bangunan i!”+ 2 Didok Jesus ma tu ibana, “Diida ho do akka bangunan na balga i? Na lao maruppak nama sudena i. Dang na lao adong be dison nanggo sada pe batu na martindi.”+

3 Tikki hundul Jesus di Dolok Jetun menghadap bagas joro, holan si Petrus, si Jakobus, si Johannes dohot si Andreas do na adong disi. Disukkun nasida ma Jesus, 4 “Andigan do masa akka i? Jala aha do tandana naung jonok ujung ni sasudena i?”+ 5 Didok Jesus ma tu nasida, “Manat ma hamu asa unang sappe lilu hamu dibahen halak.+ 6 Ai lao godang do halak na ro mamakke goarhu. Jala didok nasida do, ‘Au do ibana,’ gabe godang ma lilu dibahen nasida. 7 Asing ni i, molo dibege hamu soara ni na marporang dohot barita taringot tu akka parporangan, unang pola mabiar hamu. Ai ikkon masa do akka i, alai dang i dope ujungna.+

8 “Ai marporang ma bangso tu bangso jala harajaon tu harajaon.+ Masa ma gempa dohot haraparon di godang inganan.+ Alai sudena i, holan mula ni hasusaan i dope.*+

9 “Hamu pe, manat ma hamu. Ai boanon ni nasida do hamu tu akka pengadilan.+ Pukkulanna ma hamu di akka sinagoga.*+ Boanonna ma hamu tu jolo ni akka gubernur dohot tu jolo ni akka raja alani au. Paboaonmuna ma taringot tu au di jolo ni nasida.+ 10 Alai ikkon jolo dibaritahon do barita na uli i tu sude bangso.+ 11 Tikki diboan nasida hamu tu pengadilan, unang ma marsak hamu mamikkiri aha na lao dohononmuna. Alai hatahon hamu ma na dipaboa tondi parbadia tu hamu di tikki i. Ai dang sian pikkiranmuna sandiri hata na lao dohononmuna i, alai sian tondi parbadia ni Debata do.+ 12 Asing ni i, pasahaton ni na marhaha maranggi ma haha anggina tu hamatean, jala songon i ma nang ama tu anakna. Aloon ni akka anakna ma natua-tuana jala pasahatonna ma nasida lao dipamate.+ 13 Jala sogo ma roha ni sude jolma tu hamu alani goarhu,+ alai paluaonna+ do manang ise na setia jala na martahan sahat tu ujungna.+

14 “Alai, molo diida hamu akka na dihagigihon Debata na mambahen hancur+ jongjong di na so ingananna hian (ikkon manat do on diparrohahon akka na manjaha), ikkon lari do halak na di Judea tu dolok.+ 15 Unang ma turun halak na di atap* ni jabu lao masuk mambuat manang aha sian jabuna. 16 Jala unang ma mulak halak na di ladang lao mambuat abit luarna. 17 Marjea ma borua na hamil jala na manusui poso-poso di tikki i!+ 18 Sai martangiang ma hamu asa unang masa i di musim dingin. 19 Ai masa ma hasusaan di akka ari i.+ Dang hea dope masa hasusaan sisongon i sian mulai ditoppa Debata jolma di tano on sahat tu saonari, jala dang na lao masa be i muse.+ 20 Sasittongna, molo dang diorui Jahowa* akka ari na susa i, dang adong na boi selamat. Alai, alani akka na tarpillit i, diorui ma akka ari i.+

21 “Dung i muse, unang ma porsea hamu molo adong na mandok, ‘Dison do Kristus i!’ manang molo adong na mandok, ‘Disan do!’+ 22 Ai na lao ro ma akka Kristus palsu dohot panurirang na makkatahon na so tutu.+ Bahenon ni nasida ma akka tanda halongangan* lao mangaliluhon akka jolma. Molo boi, naeng dililuhon nasida do akka na tarpillit i. 23 Alani i, jaga ma hamu.+ Nungnga hupaboa hian i sude tu hamu.

24 “Alai tikki i, dung salpu hasusaan i, makkolom ma mataniari jala dang marsinondang be bulan.+ 25 Mardabuan ma akka bintang sian langit jala humutur ma akka huaso na di langit. 26 Dung i, idaon ni nasida ma Anak ni jolma+ ro di atas ni ombun na di langit mardongan huaso dohot hasangapon na massai balga.+ 27 Jala suruonna ma akka suru-suruan lao tu opat suhi ni tano on.* Dipapungu akka suru-suruan i ma akka na tarpillit i sian ujung ni portibi on sahat tu ujung ni langit.+

28 “Buat ma parsiajaran sian tudosan taringot tu hau ara: Molo tubu dakka na baru jala marbulung, botoonmuna ma naung jonok musim panas.+ 29 Songon i ma, molo diida hamu masa sudena i, botoonmuna ma nungnga naeng sahat* Anak ni jolma i.+ 30 Tutu do na hudok on tu hamu, dang na lao mate sude jolma na mangolu di tikki saonari on molo dang jolo masa i sude.+ 31 Lao salpu do langit dohot tano on,+ alai dang na lao salpu hatakki.+

32 “Taringot tu ari manang jamna dang adong na mamboto i, nang akka suru-suruan na di banua ginjang, nang anak i, holan Ama i do na mamboto.+ 33 Sai jaga ma, sai dungo ma,+ ai dang diboto hamu tikki naung ditottuhon i.+ 34 Tudos do i tu sahalak bawa na manadikkon jabuna jala lao tu luat na dao.+ Dung i, disuru ma akka hatobanna mangaradoti jabuna. Dilehon ma tugas ni nasida be jala disuru ma panjaga pintu asa toktong dungo.+ 35 Alani i sai jaga ma hamu, ai dang diboto hamu sadihari ro nappunasa jabu i,+ mandapotton borngin do, manang di tonga borngin, manang andorang so martahuak manuk, manang tikki manogot.+ 36 Molo toppu ibana ro, unang ma tarpodom+ hamu juppangna. 37 Na huhatahon tu hamu, huhatahon do i tu sude jolma: Sai dungo ma hamu.”+

14 Dua ari nai+ nama Perayaan Paska+ dohot Perayaan Roti na So Marragi.+ Dibahen akka malim kepala* dohot akka siboto surat* ma rencana na jahat lao manakkup Jesus. Dilului nasida do dalan lao mambunu Jesus.+ 2 Alai ninna nasida ma, “Unang ma tikki perayaan i tatakkup ibana asa unang gaor akka jolma i.”

3 Tikki mangan Jesus di Betania, di jabu ni si Simon na marsahit kusta* i, ro ma sahalak borua mandapotton ibana. Diboan borua i do botol* na marisi miak nardus* na angur jala na massai arga. Dibukka* ibana ma botol i jala diusehon ma miak i tu ulu ni Jesus.+ 4 Tikki diida akka halak na binahen ni borua i, muruk ma nasida. Didok nasida ma tu akka halak na disi, “Ai boasa dipambolokkon ibana miak na angur i! 5 Ai boi do gadison miak i lobi sian 300 dinar* jala tuhorna i boi dilehon tu na pogos!” Gabe dimuruki nasida ma borua i. 6 Alani i ninna Jesus ma, “Pasombu hamu ma dibahen ibana songon i. Boasa gugaanmuna ibana? Ulaon na denggan do na binahenna i tu au.+ 7 Ai anggo halak na pogos toktong do adong rap dohot hamu.+ Boi do bahenonmu na denggan tu nasida manang sadihari pe lomo rohamuna. Alai anggo au,+ dang sai rap au dohot hamu. 8 Dibahen ibana do nasa na tarbahenna. Diusehon ibana pe miak i tu dagingku, lao paradehon ari panguburanku do i.+ 9 Tutu do na hudok on tu hamu, manang didia pe barita na uli dibaritahon di liat portibi on,+ dibaritahon do tong na binahen ni borua on lao gabe parningotan di ibana.”+

10 Dung i, lao ma si Judas Iskariot sahalak sian apostel na 12 i mandapotton akka malim kepala. Sipsip ma si Judas pasahatton Jesus tu nasida.+ 11 Las ma roha ni nasida mambege i, jala marjanji ma nasida mangalehon hepeng perak+ tu ibana. Mulai sian i, sai dilului ibana ma tikki na denggan lao pasahatton Jesus tu nasida.

12 Di ari na parjolo Perayaan Roti na So Marragi,+ somal do akka halak mangalehon binatang lao gabe pelean Paska.+ Di ari i, disukkun akka sisean i ma Jesus, “Didia do lomo roham paradeonnami perayaan Paska i?”+ 13 Disuru Jesus ma dua halak siseanna, ninna ma tu nasida, “Lao ma hamu tu kota. Juppangmuna ma disi sahalak bawa na mamboan gucci inganan ni aek. Ihutton ma ibana.+ 14 Tu jabu na dia pe ibana masuk, dok ma tu nappuna jabu i, ‘Didok Guru i, “Didia do kamar na boi hupakke lao mangallang sipanganon Paska rap dohot akka siseanku?”’ 15 Dung i, patuduonna ma tu hamu kamar parginjang na bidang naung diatur lao pakkeonta. Disi ma parade hamu.” 16 Lao ma sisean na dua i tu kota. Jala pas do songon hata ni Jesus i na masa tu nasida. Dung i, diparade nasida ma na porlu tu Paska i.

17 Dung borngin, ro ma Jesus rap dohot apostel na 12 i.+ 18 Tikki mangan nasida, didok ibana ma, “Tutu do na hudok on tu hamu, adong do sahalak sian hamu na lao menghianati au. Rap mangan do ibana nuaeng dohot au.”+ 19 Marsak ma roha ni nasida mambege i jala sada-sada ma nasida manukkun, “Dang au i kan Tuan?” 20 Didok ibana ma tu nasida, “Sahalak sian apostel na 12 on do ibana. Rap do ibana dohot au pamasukkon roti tu makkuk.+ 21 Na lao mate do nian Anak ni jolma i songon na tarsurat taringot tu ibana. Alai, marjea ma halak na menghianati+ Anak ni jolma i! Sasittongna, dumenggan do molo dang tubu ibana.”+

22 Tikki na mangan i nasida, dibuat Jesus ma roti, ditangiakkon ma jala diponggoli. Dilehon ma i tu akka siseanna, ninna ma, “Buat hamu ma roti on. Ai on do na manggombarhon dagingku.”+ 23 Dung i dibuat ibana ma muse sada makkuk panginuman. Didok ibana ma muse mauliate tu Debata jala dilehon ma i tu akka sisean i. Sude ma nasida minum sian i.+ 24 Didok ma tu nasida, “On ma na manggombarhon mudarhu,+ i ma ‘mudar na mambahen sah parjanjian’+ na lao diusehon manesa dosa ni godang jolma.+ 25 Tutu do na hudok on tu hamu, dang inumokku be anggur sahat tu na huinum anggur na baru di Harajaon ni Debata.” 26 Dung sae mangendehon ende puji-pujian,* nakkok ma nasida tu Dolok Jetun.+

27 Ninna Jesus ma tu nasida, “Na lao sude do hamu manadikkon au.* Ai tarsurat do, ‘Attukonku ma parmahan i+ jala gabe marserak ma akka biru-biru i.’+ 28 Alai dung dipahehe au, parjolo ma au lao sian hamu tu Galilea.”+ 29 Ninna si Petrus ma tu ibana, “Nang pe sude nasida manadikkon ho, alai anggo au dang na lao tadikkonokku ho.”*+ 30 Dung i didok Jesus ma tu ibana, “Tutu do na hudok on tu ho, andorang so martahuak dope manuk paduahalihon di borngin on, nungnga tolu hali dohononmu na so ditanda ho au.”+ 31 Alai lam marsitutu ma si Petrus mandok, “Nang pe ikkon mate au rap dohot ho, dang dohonokku na so hutanda ho.” Jala sude ma akka sisean i mandok songon i.+

32 Dung i, lao ma Jesus rap dohot siseanna tu inganan na margoar Getsemane. Didok Jesus ma tu akka siseanna, “Hundul ma hamu dison, asa lao jo au martangiang.”+ 33 Ditogihon Jesus ma si Petrus, si Jakobus, dohot si Johannes mandongani ibana.+ Di tikki i, massai susa do pakkilalaanna jala massai lungun do rohana. 34 Ninna Jesus ma tu nasida, “Marsak situtu do rohakku,+ naeng mate huhilala. Toktong ma hamu dison jala toktong ma hamu dungo.”+ 35 Dung i mardalan ma ibana tu jolo saotik. Marsinggang ma ibana jala martangiang tu Debata. Dipangido ibana do tu Debata, molo boi nian salpu ma hasusaan i sian ibana. 36 Dung i didok ibana ma, “Abba,* Amang,+ sude do boi tarbahen Ho. Padao ma makkuk* panginuman on sian au. Alai unang ma lomo ni rohakku na saut, lomo ni roham ma.”+ 37 Dung i, mulak ma muse Jesus mandapotton siseanna i. Tarpodom do nasida diida ibana. Alani i, ninna ma tu si Petrus, “Simon, na modom do ho? Na so boi do ho dungo nanggo apala sajom?+ 38 Toktong ma hamu dungo jala sai martangiang, asa unang targoda rohamuna lao mangulahon dosa.+ Ai huboto do, anggo roha i naeng do nian mangulahon na sittong, alai gale do daging i.”+ 39 Lao ma ibana muse martangiang, jala sarupa dope isi ni tangiangna songon na parjolo i.+ 40 Tikki ro muse Jesus mangida akka siseanna i, tong do tarpodom nasida. Ai tung massai borat do mata ni nasida. Alani i, dang diboto nasida be aha na lao dokkononna lao mangalusi Jesus. 41 Dung i ro ma muse Jesus patoluhalihon mandapotton siseanna i. Didok ma tu nasida, “Modom dope hamu jala maradian di tikki sisongon on! Nga sae be na modom i!+ Nungnga dapot be tikkina dipasahat nama Anak ni jolma i tu tangan ni akka pardosa. 42 Dungo ma hamu, lao ma hita. Ida ma! Nungnga ro na menghianati au.”+

43 Tikki makkatai dope Jesus, nungnga sahat be si Judas sahalak sian apostel na 12 i rap dohot godang halak. Diboan nasida do podang dohot attuk-attuk. Jala akka malim kepala dohot akka pangituai* ni bangso i+ do na manuru nasida. 44 Nungnga dipaboa penghianat i hian tanda tu nasida. Didok ibana do, “Manang ise na huumma, ibana ma Jesus i, takkup hamu ma ibana. Manat ma jaga hamu asa unang malua ibana.” 45 Pittor didapotton ibana ma Jesus, ninna ma, “Guru!” Laos diumma ibana ma Jesus. 46 Dung i, ditakkup nasida ma Jesus. 47 Alai disittak sahalak sian na jongjong disi ma podangna. Diroro ibana ma hatoban ni sintua ni malim, jala ditallik ma pinggolna.+ 48 Alai didok Jesus ma tu nasida, “Na dirippu hamu do pangarampok au, umbahen na diboan hamu podang dohot attuk-attuk lao manakkup au?+ 49 Hape, ganup ari do au di tonga-tongamuna jala mangajari di bagas joro,+ dang ditakkup hamu au. Alai masa pe on sude asa saut do hata na adong di Surat na Badia i.”+

50 Dung i lari ma sude sisean i, ditinggalhon ma Jesus.+ 51 Alai adong do sahalak doli-doli na mangihutton Jesus sian na jonok. Holan kain linen do dipakke ibana lao manutupi dagingna. Jala tikki naeng ditakkup nasida ibana, 52 pittor dibolokkon ibana ma kain linenna i, jala lari ma ibana dang marpakkean.*

53 Diboan nasida ma Jesus tu sintua ni malim.+ Marpungu ma sude malim kepala, akka pangituai dohot akka siboto surat.+ 54 Alai sian na dao, sai diihutton si Petrus do Jesus sahat tu alaman ni jabu ni sintua ni malim i. Jala hundul ma ibana massisulu di labbung ni api rap dohot akka hatoban na disi.+ 55 Dilului akka malim kepala dohot saluhut Sanhedrin* ma hatorangan na boi dipakke nasida lao manudu Jesus mangulahon na sala, asa boi dipamate nasida ibana. Alai sada pe dang adong dapot ni nasida.+ 56 Godang do na mangalehon hatorangan na so sittong taringot tu Jesus.+ Alai maralo do hatorangan ni na sada tu hatorangan ni na asing. 57 Dung i adong ma piga-piga halak jongjong lao mangalehon hatorangan na so sittong taringot Jesus. Ninna ma, 58 “Hubege hami do didok ibana, ‘Ruppakkonokku ma bagas joro na pinajongjong ni tangan ni jolma on. Di bagasan tolu ari pajongjongokku ma muse bagas joro na asing jala dang tangan ni jolma na pajongjokkon i.’”+ 59 Alai taringot tusi pe maralo do hatorangan ni nasida.

60 Ujungna, jongjong ma sintua ni malim di tonga-tonga ni nasida jala disukkun ma Jesus, “Boasa dang dialusi ho nasida? Na so dibege ho do akka hata ni nasida lao mangalo ho?”+ 61 Alai sai hohom do Jesus dang adong didok manang aha.+ Dung i, disukkun sintua ni malim i ma muse ibana, ninna ma, “Tutu do ho Kristus Anak ni Debata Natumimbul i?” 62 Dialusi Jesus ma, “Tutu. Au do i, jala idaonmuna ma Anak ni jolma i+ hundul di sabola kanan+ ni Debata na marhuaso i. Jala na lao ro ma ibana idaonmuna di atas ni ombun na di langit.”+ 63 Gabe diribakkon sintua ni malim i ma pakkeanna, ninna ma, “Tu aha be luluan akka saksi na asing?+ 64 Nungnga dibege hamu ibana mangaleai Debata. Boha do didok rohamuna?” Sude ma nasida mandok na patut ibana dipamate.+ 65 Dung i adong ma piga-piga halak manijuri Jesus.+ Ditutup ma bohina, ditubbuk ma ibana jala ninna ma, “Molo panurirang* do ho, paboa ma tu hami ise na mamukkul ho!” Dung i, dipastap ma bohina jala diboan panjaga ni pengadilan i ma ibana.+

66 Tikki di toru si Petrus, ro ma sahalak sian hatoban borua ni sintua ni malim tu alaman i.+ 67 Diida borua i ma si Petrus massisulu, dipanotnoti ma ibana jala ninna ma, “Dongan ni Jesus halak Nasaret i do ho kan?” 68 Alai margabus do si Petrus, ninna ma, “Dang hutanda ise ibana. Jala dang huattusi manang aha na nidokmi.” Dung i kaluar ma si Petrus sian i jala lao ma ibana doppak gerbang. 69 Diida hatoban borua i ma muse si Petrus, didok ibana ma tu akka na jongjong disi, “Sahalak sian sisean ni Jesus i do bawa on.” 70 Alai didok si Petrus do muse na so ditanda ibana Jesus. Dang sadia leleng, didok akka na jongjong i ma muse tu si Petrus, “Toho do, dongan ni nasida do ho. Ai halak Galilea do ho.” 71 Alai takkas ma didok si Petrus na so ditanda ibana Jesus. Marsumpa ma ibana, “Dang hutanda halak na nidokmuna i!” Jala didok ibana do muse, molo margabus ibana, hukumon ni Debata ma ibana. 72 Pittor martahuak ma manuk paduahalihon.+ Gabe diingot si Petrus ma na nidok ni Jesus tu ibana, “Andorang so martahuak dope manuk paduahalihon, nungnga tolu hali dohononmu na so ditanda ho au.”+ Massai lungun ma rohana, jala sai tumatangis ma ibana.

15 Dung torang ari, marpungu ma sude anggota ni Sanhedrin,* i ma akka malim kepala,* akka pangituai dohot akka siboto surat.* Ditali nasida ma Jesus jala dipasahat tu si Latus.+ 2 Disukkun si Latus ma ibana, “Tutu do ho raja ni halak Jahudi?”+ Dialusi Jesus ma, “Tutu, songon na nidokmi ma.”+ 3 Alai, dipandok akka malim kepala do godang hatorangan na so tutu lao manudu Jesus. 4 Gabe disukkun si Latus ma muse tu Jesus, ninna ma, “Boasa dang dialusi ho hatana i?+ Na so dibege ho do akka hata ni nasida lao manudu ho?”+ 5 Alai nanggo sakkababa pe dang adong dialusi Jesus hatana. Gabe longang ma roha ni si Latus.+

6 Di ganup perayaan Paska, somal do dipalua si Latus sasahalak sian penjara. Dipalua ibana do manang ise na dihalomohon godang halak.+ 7 Di tikki i, adong do sahalak bawa na margoar si Barabas. Dipenjarahon do ibana rap dohot na asing. Ai mangalo pamaretta do nasida jala mambunu halak. 8 Dung i, didapotton akka jolma i ma si Latus. Dipangido nasida ma asa dipalua si Latus sasahalak sian penjara songon na somal diulahon ibana. 9 Disukkun si Latus ma nasida, “Lomo do rohamuna molo hupalua raja ni halak Jahudi i?”+ 10 Ai diboto si Latus do, dipasahat akka malim kepala pe Jesus tu ibana, ala na late do roha ni nasida mangida Jesus.+ 11 Alai sai dijujui akka malim kepala ma akka jolma i asa dipangido nasida si Barabas na dipalua tu nasida.+ 12 Didok si Latus ma muse tu nasida, “Attong, aha ma bahenokku tu halak na nidokmuna raja ni halak Jahudi on?”+ 13 Gogo ma didok nasida, “Gattung ma ibana tu hau!”+ 14 Didok si Latus ma tu nasida, “Boasa? Ai aha huroa na jahat diulahon ibana?” Alai lam gogo do didok nasida, “Gattung ma ibana tu hau!”+ 15 Ala naeng mambahen las roha ni akka jolma i, gabe dipalua si Latus ma si Barabas. Disuru ibana ma asa dilissingi Jesus+ jala dipasahat ma Jesus tu nasida asa digattung tu hau.+

16 Dung i, diboan akka tentara i ma Jesus tu alaman ni jabu ni gubernur jala dijou nasida ma sude tentara asa marpungu.+ 17 Dipakkehon nasida ma jubah na ungu tu ibana. Didandan nasida ma suga-suga jala dibahen gabe songon mahkota. Dung i dibahen ma i tu ulu ni Jesus. 18 Didok nasida ma tu ibana, “Horas ma di raja ni halak Jahudi i!”*+ 19 Dung i diattuk nasida ma uluna mamakke hau-hau. Ditijuri ma ibana, marsinggang ma nasida, jala marsomba tu ibana. 20 Ujungna, dung direhei nasida ibana, dibukka nasida ma jubah na ungu i. Dipakkehon ma muse abit luarna tu ibana. Dung i, diboan ma ibana asa dipakkuhon tu hau.+ 21 Di tikki i, lewat ma si Simon halak Kirene, bapak ni si Aleksander dohot si Rupus. Tikki i, baru ro do ibana sian luar ni kota. Dipaksa akka jolma i ma ibana mamboan hau partinaonan* i.+

22 Dung i, diboan nasida ma Jesus tu inganan na digoari Golgata, lapatanna, “Inganan ni Tengkorak.”+ 23 Dung sahat disi, dilehon nasida ma tu Jesus anggur na marcampur mir*+ alai dang olo ibana manginum i. 24 Dipakkuhon nasida ma Jesus tu hau jala dibagi-bagi nasida ma abit luarna i. Dilempar nasida ma undi lao manottuhon manang na dia bagian ni nasida be.+ 25 Hira-hira jam sia manogot,* dipakkuhon nasida ma ibana tu hau. 26 Dibahen do papan di atas ni uluna, jala tarsurat do di papan i hajahaton na dituduh diulahon ibana. Songon on ma isina, “On ma raja ni halak Jahudi.”+ 27 Dipakkuhon do muse dua pangarampok rap dohot ibana. Sada di sabola kananna jala sada nai di sabola kirina.+ 28* —— 29 Mangupir+ do akka halak na lewat sian i mangida ibana, jala dileai nasida do ibana. Ninna nasida ma, “Anggo didok ho, naeng ruppakkononmu do bagas joro jala pajongjongonmu i muse di bagasan tolu ari.+ 30 Palua ma jo dirim! Turun ma ho sian hau partinaonan* i!” 31 Dohot do muse akka malim kepala dohot siboto surat mangarehei Jesus. Didok nasida do, “Anggo halak na asing dipalua do, hape dirina dang boi dipalua!+ 32 Molo Kristus do ibana, Raja ni Israel, lok ma turun ibana sian hau partinaonan* i, asa taida jala asa porsea hita tu ibana.”+ Laos dohot do muse halak na dipakkuhon di labbungna i mangarehei ibana.+

33 Hira-hira jam 12 arian,* makkolom ma sude luat i sahat tu jam 3 botari.*+ 34 Hira-hira jam tolu botari, gogo ma didok Jesus, “Eli, Eli, lama sabakhtani?” lapatanna, “Debatakku, Debatakku, boasa tadikkononmu au?”+ 35 Tikki dibege halak na jongjong disi hatana i, adong ma na mandok, “Dijou ibana do si Elia.” 36 Dung i marlojong ma sasahalak, disornoppon ma bunga karang tu anggur na asom. Dibahen ibana ma i tu hau-hau jala dilehon ma i lao inumonna.+ Alai ninna ma, “Pasombu ma disi! Taida ma jolo manang na ro do si Elia paturunhon ibana.” 37 Dung i, gogo ma soara ni Jesus laos tos ma hosana.*+ 38 Laos di tikki i, ribak dua ma tire ni bagas joro+ sian ginjang sahat tu toru.+ 39 Diida komandan ni tentara na jongjong di jolo ni Jesus i do sude na masa di tikki parmate ni Jesus. Gabe didok ibana ma, “Tutu do ibana Anak ni Debata.”+

40 Adong do disi akka borua na manatap-natap sian na dao. Disi do si Maria Magdalena, si Maria omak ni si Jakobus na upposo dohot si Joses, dohot si Salome.+ 41 Nasida do akka borua na mangihutton Jesus sian Galilea jala na mangalehon na porlu di ibana.+ Jala godang dope borua na asing na rap ro dohot ibana tu Jerusalem.

42 Ala nungnga botari jala ari Sabat do marsogotna i, 43 ro ma si Josep na sian Arimatea. Halak na diparsangapi do ibana di anggota ni Pengadilan Agama Jahudi* jala toktong do dipaima ibana Harajaon ni Debata. Dibaranihon ibana ma dirina mandapotton si Latus lao mangido bakke ni Jesus.+ 44 Alai, dang pos dope roha ni si Latus naung mate Jesus. Dijou ibana ma sahalak perwira jala disukkun ma tu ibana manang naung tutu Jesus mate. 45 Dung dibege si Latus hatorangan ni perwira i, diloas ibana ma buaton ni si Josep bakke ni Jesus. 46 Dituhor si Josep ma abit linen na halus. Dung i, dipaturun ma bakke ni Jesus jala dibukkus tu abit linen i. Dipeakkon ma bakke i tu bagasan kuburan+ naung diliangi di dolok batu. Digulikkon ma batu lao manutup kuburan i.+ 47 Alai, sai dipanotnoti si Maria Magdalena dohot si Maria omak ni si Joses do kuburan ni Jesus i.+

16 Dung salpu ari Sabat,+ dituhor si Maria Magdalena, si Maria+ omak ni si Jakobus, dohot si Salome ma rempah-rempah lao bahenonna tu bakke ni Jesus.+ 2 Di ari na parjolo sian minggu i, tibu ma nasida lao manogotna i tu kuburan. Nungnga bissar mataniari tikki sahat nasida disi.+ 3 Ninna nasida ma sama nasida, “Ise ma na manggulikkon batu na manutup kuburan i di hita?” 4 Alai dung diida nasida kuburan i, nungnga guling be batu na massai balga i.+ 5 Tikki masuk nasida tu kuburan i, diida nasida ma sahalak doli-doli hundul di sabola kanan mamakke jubah na bottar. Gabe tarsonggot ma nasida. 6 Didok ma tu nasida, “Unang pola mabiar hamu.+ Ai huboto do na mangalului Jesus halak Nasaret na digattung di hau i do hamu. Nungnga dipahehe ibana,+ dang dison be. Ida ma, dison hian do dipeakkon nasida ibana.+ 7 Alai lao ma hamu paboahon on tu akka siseanna dohot tu si Petrus. Dokkon ma songon on, ‘Nungnga parjolo ibana sian hamu lao tu Galilea.+ Idaonmuna do ibana disi, songon hatana hian tu hamu.’”+ 8 Gabe longang ma roha ni nasida, hitir-hitir ma nasida alani biarna. Alani i, dung kaluar sian kuburan i, marlojongi ma nasida. Dang adong dihatahon nasida manang aha tu manang ise pe, ai mabiar do nasida.*+