Mei

Diboto si Jepta do porlu pangurupion ni Debata paluahon halak Israel sian halak Amon. Marjanji si Jepta tu Jahowa molo monang ibana, lehononna ma ise na parjolo ruar sian jabuna manomu ibana gabe ”pelean situtungon”. (Pangh. 11:30, 31) Aha do lapatan ni on? Ndang jolma na laho tutungon ni si Jepta gabe pelean. Diboto ibana do, ndang dihalomohon Jahowa jolma ditutung laho pelean. (5 Mus. 18:9, 10) Alai, songon na dipaboa di Patik ni si Musa, pelean situtungon, i ma silehonlehon na ummarga tu Jahowa. Alani i, pelean dison lapatanna, laho marhobas di tabernakel saleleng ni ngoluna. Ditangihon Jahowa do tangiang ni si Jepta, jala diurupi do ibana asa monang di parporangan. (Pangh. 11:32) Dung mulak si Jepta sian parporangan, na parjolo ruar manomunomu ibana, i ma boru haholonganna jala holan i do ianakhonna. Marsihohot do si Jepta tu janjina i? w16.04 1:11-13

Nunga diparsiajari di godang huria buku Mendekatlah kepada Yehuwa di parpunguan Parsiajaran Bibel di Huria. Songon dia do pangkilalaanta manaringoti parange ni Jahowa manang tingki tatangihon donganta patorangkon parangeNa i? Tontu, on mambahen tamba holongta tu Jahowa. Di parpunguan, taparsiajari do Bibel marhite manangihon jamita dohot pertunjukan manang tingki tabege dijahahon ayat ni Bibel. Parpunguan mangajari hita laho mangulahon na taparsiajari sian Bibel di parngoluonta. (1 Tes. 4:9, 10) Umpamana, hea do ditangihon hamu sian Joujou Paboahon na mambahen hamu lam ringgas marbarita, jala ringgas martangiang manang asa manalpuhon hasalaan ni donganta? Parpunguanta di tonga pokan, mangajari hita marbarita na uli jala mangajari hita lam denggan pasahathon hasintongan na sian Bibel tu halak na asing.​—Mat. 28:19, 20. w16.04 3:4, 5

Hea do dijaha hamu di Bibel taringot parsalisian? Di buku sada Musa dipaboa do taringot si Kain na mambunu anggina si Abel (1 Mus. 4:3-8); si Lamek mambunu sahalak dolidoli (1 Mus. 4:23); naposo ni si Abraham marbadai dohot naposo ni si Lot (1 Mus. 13:5-7); si Hagar marginjang ni roha tu si Sarah, jala si Sarah marungutungut tu si Abraham (1 Mus. 16:3-6); si Ismael mangalo sude halak, jala sude halak mangalo ibana. (1 Mus. 16:12) Boasa disurat taringot parsalisian di Bibel? Sian tudosan na disurat di Bibel, hita boi marsiajar taringot halak na manaon hasusaan alani parsalisian. Songon nasida, hita ndang tipak jala olo do masa tu hita sisongon i. Alani i, taihuthon ma cara na denggan laho pasaehon parsalisian songon na dipaboa di Bibel. On mangurupi hita tongtong manjaga hadameon tu na asing. w16.05 1:1, 2

Songon dia do dibahen Jesus dohot siseanna marbarita? Laho do nasida manjumpangi halak. Umpamana, marbarita do nasida di dalan, di pasar manang sian jabu tu jabu. (Mat. 10:11; Luk. 8:1; Ul. 5:42; 20:20) Marbarita sian jabu tu jabu, i ma na dumenggan asa boi pajumpang dohot godang halak. Songon dia do molo Sitindangi Ni Jahowa? Holan nasida do na mamaritahon naung gabe Raja Jesus di taon 1914. Diulahon nasida do parenta ni Jesus, jala patujolohon ulaon i di ngolu ni nasida. Buku Pillars of Faith—American Congregations and Their Partners mandok, ”Sitindangi Ni Jahowa ndang hea lupa paboahon taringot haluaon dohot ajal ni hasiangan on.” Sitindangi Ni Jahowa, marbarita na uli maniru Jesus dohot angka siseanna. w16.05 2:10, 12

Molo tatontuhon na tapillit hombar tu lomo ni roha ni Jahowa, on mambahen hita jonok tu Ibana. (Jak. 4:8) Haporseaonta tu Jahowa pe lam togu. Alani i, tarimangi ma aha na tajaha sian Bibel asa taboto pingkiran ni Jahowa. Godang do na boi taparsiajari taringot Jahowa. (Job 26:14) Molo marsitutu do hita mananda Ibana, marbisuk ma hita laho mamillit na dumenggan di ngolunta. (Poda 2:1-5) Nang pe mubauba pamingkirion dohot sangkap ni jolma, alai Jahowa ndang hea muba. Buku Psalmen mandok, ”Sangkap ni Jahowa sai na hot do salelenglelengna, pingkiran ni rohana pe marsundutsundut do.” (Ps. 33:11) Nunga tangkas taida, boi do hita mamillit na dumenggan molo taboto pingkiran ni Jahowa jala taulahon hombar tu lomo ni rohaNa. w16.05 3:17

Pos do rohanta, dipillit Jahowa do na burju. Alani i, unang ma tauhumi halak na asing dohot na di huria. (Joh. 6:44) Molo olo hita ditopa Jahowa, ingkon olo do hita manguba pingkiranta maradophon angka donganta. (Jes. 64:8) Taboto ma na marsitutu nasida mambahen hamajuon. Suang songon i ma Jahowa mangida nasida. Jahowa mangida roha jala diboto do na boi dope nasida muba. Tangkas do diboto Jahowa taringot hita. (Ps. 130:3) Jahowa do na tatiru molo denggan pamingkirionta maradophon angka donganta. Songon na saulaon dohot Jahowa ma hita molo taurupi donganta mambahen hamajuon. (1 Tes. 5:14, 15) Gabe sitiruon ma angka sintua mangulahon on di huria.​—Eps. 4:8, 11-13. w16.06 1:4-6

Tingki marbarita, ingkon denggan do parangenta jala ingkon tapatudu parbue ni tondi. (Gal. 5:22, 23) Molo tatiru Jesus, rade ma halak manangihon barita na tapasahat jala muba ma pandapot ni nasida tu hita. Umpamana, dua halak Sitindangi di Australia marbarita tu sahalak borua, alai muruk ma borua on jala diusir ma nasida. Burju do Sitindangi on mangalusi jala laho ma nasida sian i. Dung i, disolsoli borua on ma pambahenanna, jala ditongos ma surat tu kantor cabang. Didok ma, ”Loak hian do huhilala ala sogo rohangku tu dua Sitindangi na pasahathon hata ni Debata jala palaohon nasida.” Sian pengalaman on, taida ma labana molo lambok hita tingki marbarita. Tutu ma, tingki marbarita hita mangurupi na asing, hita pe diurupi patuduhon parange na denggan. w16.06 2:12, 13

Alani dosa ni si Adam do sude jolma mardosa. (Rom 5:12, 19) Olo do adong sasahalak di huria na mambahen hansit rohanta. Songon dia do bahenonta? Tongtong do togu holongta tu Jahowa? Marsihohot do hita tu Ibana dohot tu naposoNa? Taida ma parsiajaran aha na tadapot sian nasida. Umpamana, sintua ni malim do si Eli di Israel, alai dua anakna ndang mangoloi patik ni Jahowa. Bibel mandok, ”Ndang hasea pangalaho ni anak ni si Eli. Ndang dipardulihon nasida Jahowa.” (1 Sam. 2:12, Bibel siganup ari) Diboto si Eli do hajahaton ni anakna na dua i, alai ndang olo ibana maminsang. Ujungna, diuhum Jahowa ma si Eli dohot anakna na dua i. Ndang diloas be pinompar ni si Eli gabe malim. (1 Sam. 3:10-14) Molo mangolu hita di tingki i, jala taboto dipasombu si Eli anakna mangulahon hajahaton, gabe gale do haporseaonta? Gabe gale do haporseaonta tu Jahowa jala ndang tasomba be Ibana? w16.06 4:5, 6

Boasa didok Jesus songon na didok di ayat on? Dipatorang Jesus do boasa pos rohanta tu janji i. Didok ibana, ”Diboto Amamuna na di banua ginjang i do, naung ringkot angka i di hamu.” Umbotoan do Jahowa tu na tahaporluhon sian hita. (Plp. 4:19) Diboto Jahowa do na tahaporluhon sipanganon dohot pangkean. Diboto Ibana do porlu jabu laho ingananta. Dilehon Jahowa do angka na porlu di hita. Pos ma rohanta, molo taharingkothon HarajaonNa di ngolunta, lehononNa do sude na tahaporluhon. Paralealeonta tu Jahowa do na palashon rohanta, jala on mangurupi hita asa mangkasabamhon ”sipanganon dohot parabiton” na adong di hita.​—1 Tim. 6:6-8. w16.07 1:17, 18

Alani tobusan, boi ma hita mardame jala maraleale tu Debata. Dipatorang si Paulus do taringot on tu halak Kristen na miniahan, ”Dung dipintori hita dalan haporseaon, mardame ma hita dohot Debata marhitehite Tuhanta Jesus Kristus. Laos marhitehite Ibana do saut masuk hita tu asi ni roha, hajongjonganta nuaeng dalan haporseaon.” (Rom 5:1, 2) Mandok mauliate do hita ala boi maraleale tu Jahowa! Disurat si Daniel, ”angka na pantas marroha”, i ma angka na miniahan, manogunogu ”torop halak tu hatigoran” di tingki parpudi. (Dan. 12:3) Songon dia do angka na miniahan mangulahon i? Nasida marbarita na uli jala mangajarhon patik ni Jahowa tu marjuta halak. (Joh. 10:16) Alani asi ni roha ni Jahowa, diurupi ma nasida gabe partigor di adopan ni Debata.​—Rom 3:23, 24. w16.07 3:10, 11

Dung ”ditopot angka anak ni Debata angka boru ni jolma”, tubu ma ianakhonna, i ma raksasa na jahat na digoari Nepilim. Ndang patut bahenon ni nasida songon i. ”Lam [godang] hajahaton ni jolma di tano on.” (1 Mus. 6:1-5) Didok Jahowa, paroonNa ma aek na sumar laho mangaripashon sude parjahat di tano on. ”Si Noak, parjamita hatigoran”, mamaritahon taringot on tu sude jolma. (2 Ptr. 2:5) Alai, ndang ditangihon nasida si Noak. Suda do tingki ni nasida mangulahon ulaon siganup ari, songon marhasohotan. Didok Jesus, harorona dos songon haroro ni Aek na Sumar. (Mat. 24:37-39) Saonari, godang do halak na so olo manangihon barita na uli. Nang pe songon i, tabaritahon ma barita on andorang so ro dope ari i. Parsiajaran aha do na tadapot sian na masa di tingki Aek na Sumar? Unang ma gabe rumingkot di hita marhasohotan manang marianakhon, laos gabe lupa hita naung jonok ari rimas ni Jahowa. w16.08 1:8, 9

Ala mangolu ”di angka tingki parpudi”, hita mangadopi ”angka ari hasusaan”. (2 Tim. 3:1-5) Dibahen i, ingkon lam solhot ma paralealeonta tu Jahowa. Di ayat sadari on, na didok si Paulus, ndang na gabe ndang mamparrohahon dongan saripe. Ala hita mangolu di tingki parpudi, taharingkothon ma panombaonta tu Jahowa. (Mat. 6:33) Saonari, godang do parsaripeon na so martua. Alai, boi do martua parsaripeon? Boi, molo tongtong hita maraleale tu Jahowa dohot naposoNa, mangulahon poda sian Bibel jala manjalo pangurupion sian tondi parbadia. Molo taulahon i, na patuduhon pangargaion do hita tu ”naung pinadomu ni Debata”.​—Mrk. 10:9. w16.08 2:17, 18

Ringkot do mangalatik donganta baoa asa boi denggan manguluhon huria. Didok si Paulus ma tu si Timoteus, ”Jadi ma binegem sian ahu di adopan ni torop sitindangi, i ma pasahat tu halak haposan, angka na tau mangajari na asing.” (2 Tim. 2:1, 2) Ala sahalak sintua jala apostel do si Paulus, godang na diparsiajari si Timoteus sian ibana. Umpamana, songon dia asa lam denggan marbarita dohot mangurupi angka dongan di huria. (2 Tim. 3:10-12) Leleng do si Paulus raphon si Timoteus, laho mangurupi si Timoteus asa lam denggan manguluhon huria. (Ul. 16:1-5) Molo angka sintua manogihon parhobas laho manggembalahon dongan na asing, na maniru si Paulus do nasida. Boi do tiruon ni parhobas cara ni sintua mangajari na asing, asa boi patuduhon holong, sabar, jala mangasahon Jahowa tingki manguluhon birubiruNa. w16.08 4:16, 17

Disurat do di Bibel taringot halak na gale tanganna. On patuduhon, ibana ndang togu jala ndang marpangkirimon. (2 Kron. 15:7; Heb. 12:12) Tingki marsak hita manang lam gale paralealeonta tu Jahowa, on boi mambahen hita ndang marhiras ni roha. Ala mangolu di portibi na dirajai Sibolis, godang do sitaonon na taadopi. Songon jangkar na mambahen kapal ndang boi meret, holso ni roha pe boi mambahen lam borat sitaononta. (Poda 12:25) Aha do na mambahen hita gabe holsoan? Boi do ala marujung ngolu na tahaholongi, marsahit na posi, susa di parhepengon, manang alani penganiayaan. Ala marsak rohanta, boi do on mambahen hita ndang marhiras ni roha. Alai pos ma rohanta, rade do Debata mangurupi hita.​—Jes. 41:10, 13. w16.09 1:2, 4

Ala mardosa dope hita, ingkon marjuang do hita mangalo giotgiot na sala. Na asing, ingkon marjuang asa tongtong marhiras ni roha di ulaon partondion. Na asing marjuang ala marsahit manang ala lungunlungunan. Adong do na maol manalpuhon hasalaan ni sasahalak na mambahen hansit rohanta. Ndang soal nunga sadia leleng hita manomba Jahowa, unang ma tapaloas manang aha pe mangambati hita manomba Jahowa. Molo songon i na dihilala hamu, martangiang ma tu Jahowa jala pangido ma tondi parbadiaNa. Tangiang dohot tondi parbadia boi mangurupi hamu asa margogo laho mangulahon na sintong, jala dapotmuna ma pasupasu ni Debata. Marsitutu ma patuduhon parniulaon hombar tu tangiangmuna. Jaha ma Bibel ganup ari, marsiajar Bibel, dohot panombaon na sasaripe.​—Ps. 119:32. w16.09 2:10, 11

Ra, adong na mandok, ”Porsea do ahu tu evolusi, alana tutu do i didok ilmuwan. Boasa porsea tu Debata, hape ndang adong na hea mangida Ibana.” Godang do na mandok songon i. Tutu do, ndang adong na hea mangida Debata jala mangida Ibana manompa. (Joh. 1:18) Alai, songon dia do halak na porsea tu evolusi? Nasida pe porsea do tu na so boi diida. Ndang adong ilmuwan manang halak na asing na hea mangida molo na tinompa ni Debata muba gabe bentuk na asing. Umpamana, ndang adong na hea mangida bodat muba gabe jolma. (Job 38:1, 4) Alani i, ingkon taboto do buktina, tarimangi, jala ingkon taboto do aha na dipatudu bukti i. Godang do na mamparrohahon nasa na mangolu di tano on jala mangantusi adong do Debata. Diboto nasida, Debata do Sipanompa, pargogo na so hatudosan, jala denggan do sude pangalahoNa.​—Rom 1:20. w16.09 4:4

Diparrohahon Jahowa do halak na manompang di Israel. Umpamana, tingki manabi, ingkon ditadingkon halak Israel do deba biur ni gandum tu nasida. (3 Mus. 19:9, 10) Ndang sae holan burju tu halak panompang, alai ingkon diingot halak Israel do na hea nasida gabe halak panompang. (2 Mus. 23:9) Andorang so diparhatoban di Mesir, sogo do roha ni halak Mesir tu bangso Israel ala ndang sabangso nasida. (1 Mus. 43:31; 46:34; 2 Mus. 1:11-14) Susa do dihilala halak Israel tingki gabe panompang. Alani i, lomo roha ni Jahowa asa diingot nasida i, jala burju tu halak panompang na rap dohot nasida. (3 Mus. 19:33, 34) Tingki ro halak na so tatanda tu hurianta, taingot ma na dipatudu Jahowa do burju ni roha tu halak sisongon i. (5 Mus. 10:17-19; Mal. 3:5, 6) Pingkirhon ma taringot tantangan na diadopi nasida. Ra, ndang diantusi nasida dope bahasa na baru, jala olo do ndang denggan pambahenan ni halak tu nasida. Marsitutu ma hita mangurupi nasida jala burju ma tu nasida.​—1 Ptr. 3:8. w16.10 1:3-5

Si Jakobus patorangkon taringot haporseaon. Disurat ibana, ”Patuduhon ma di ahu haporseaonmu so padohot angka pangulaon, asa ahu patuduhon tu ho haporseaon sian angka pangulaonku.” (Jak. 2:18) Didok ibana, asa boi marhaporseaon, ndang sae holan porsea. Angka begu pe porsea do na adong Debata, alai ndang marhaporseaon nasida jala dialo do Jahowa. (Jak. 2:19, 20) Molo marhaporseaon sasahalak, diulahon do na denggan na mambahen las roha ni Jahowa. On ma na diulahon si Abraham. Si Jakobus manurat, ”Nda gabe tigor si Abraham, amanta i, marhite sian ulaon, di na binoanna i si Isak, anakna i, tu pamelean? Diida ho disi, manumpak do haporseaon i tu angka ulaonna, jala sian angka ulaon i gabe rimpas haporseaon i.” (Jak. 2:21-23) Dipaboa muse, marisuang do haporseaon i molo so adong parniulaon. Didok ibana ma songon na di ayat sadari on. w16.10 4:8

Godang do na diparsiajari angka ilmuwan taringot angka tompaan laho mambahen lam denggan ngolunta. Alai, ndang boi dope didapot nasida alus ni godang sungkunsungkun na ringkot di parngoluon. Umpamana, ndang boi dipatorang angka astronom songon dia mula ni alam semesta manang boasa jolma, binatang, dohot angka suansuanan ditompa. Ndang adong na boi patorangkon boasa lomo roha ni jolma mangolu salelengna. Gabe maol sungkunsungkun i dialusi, ala pigapiga ilmuwan mandok ndang adong Debata jala mangajarhon evolusi. Alai, dipaboa Debata do alusna tu hita marhite BukuNa, i ma Bibel. Dibahen Jahowa do godang hukum alam. Hukum on ndang hea muba. Ahli listrik, ahli pipa, ahli mesin, pilot, ahli bedah, dohot na asing mangihuthon hukum on asa boi mangulahon ulaonna. w16.11 2:4, 5

Godang do na mambahen hita ingkon mandok mauliate tu Jahowa! Umpamana, ”di bagasan Ibana do hita mangolu”. Ibana pe mangalehon HataNa, i ma Bibel. Songon halak Kristen di Tessalonik, marlas ni roha do hita ala boi mamboto Hata ni Debata. (1 Tes. 2:13) Bibel mangurupi hita jonok tu Jahowa, jala Ibana pe nunga jonok tu hita. (Jak. 4:8) Mandok mauliate do hita ala ditogihon Jahowa hita dohot tu organisasiNa! Sarupa ma pangkilalaanta songon panurat ni psalmen, ”Mandok mauliate ma hamu tu Jahowa, ai pardengganbasa do Ibana, ai ro di salelenglelengna do asi ni rohana.” (Ps. 136:1) Di ganup ayat di psalmen i, jotjot do disurat ”ai ro di salelenglelengna do asi ni rohana”. Molo marsihohot tu Jahowa jala taihuthon tudutudu sian organisasiNa, dilehon ma tu hita ngolu salelengna jala ndang tadingkononNa hita! w16.11 3:18, 19

Jotjot do ayat on dipangke di buku Apa yang Sebenarnya Alkitab Ajarkan? dohot buku Aha do na Diajarhon Bibel tu Hita? Tingki taparsiajari pasal 3, 5, dohot 6 rap dohot ianakhonta manang dohot na asing, jotjot do tajaha Rom 5:12. Tapangke do ayat on mangurupi nasida mangantusi boasa ndang paradeiso be tano on, boasa tahaporluhon tobusan, jala boasa mate jolma. Alai, ayat on mangurupi hita mandok mauliate tu Jahowa ala boi hita maraleale tu Ibana. On mangurupi hita palashon roha ni Jahowa jala mangkirim tu janjiNa. Sude hita nunga mardosa. Jotjot do taulahon na sala ganup ari. Alai, marasi ni roha do Jahowa. Diboto Ibana do ndang tipak hita, jala rade do Ibana manalpuhon hasalaanta. (Ps. 103:13, 14) Dijujui Jesus do asa tapangido hasesaan ni dosa sian Debata. (Luk. 11:2-4) Molo naung disalpuhon Jahowa hasalaanta, unang be tapaingotingot i. Taulas ma songon dia Jahowa manalpuhon hasalaanta. w16.12 1:1-3

Halak Kristen di Rom porlu mamareso dirina, jala mamboto aha na dipingkirhon nasida di ngoluna. ”Mangihuthon daging” do na dipingkirhon nasida? Saonari, hita pe porlu mamingkirhon na rumingkot di ngolunta. Aha na jotjot tahatai? Aha na jotjot laho taulahon? Adong do halak na sai mamingkirhon laho manginum pigapiga jenis anggur, padengganhon jabu asa lam bagak, manuhor baju na baru, manimpan hepeng, manang rekreasi. Ndang sala mamingkirhon jala mangulahon i. Umpamana, diparade Jesus do anggur tingki adong pesta parbogason, jala didok si Paulus tu si Timoteus boi do manginum ”anggur sasaotik”. (1 Tim. 5:23; Joh. 2:3-11) Alai, ndang anggur na gabe rumingkot di nasida. Songon dia do hita? Aha do na rumingkot di ngolunta? w16.12 2:5, 10, 11

Janji ni Jahowa mangurupi hita porsea tu hata ni Jesus di Mateus 6:33. Sada tingki, disungkun si Petrus ma Jesus, ”Saluhut do hutadingkon hami mangihuthon Ho. Aha ma balos ni i tu hami?” (Mat. 19:27) Ndang muruk Jesus ala disungkun si Petrus songon i. Alai didok Jesus tu siseanna, dilehon do upa tu nasida molo marsitutu. Rap mamarenta ma annon angka apostel dohot angka na miniahan raphon Jesus di surgo. Alai, didok Jesus saonari pe adong do upa, ”Ganup na manadingkon hahaanggina, ibotona, amana, inana, anakkonna, haumana manang jabuna pe ala ni Goarhu, manjalo ma i marlompitlompit, angkup ni i teanonna hangoluan na saleleng ni lelengna i.” (Mat. 19:29) Saonari pe, sude sisean ni Jesus mandapot ama, ina, hahaanggi, dohot ianakhon di huria jala ummarga do i sian aha naung talehon tu Harajaon ni Debata. w16.12 4:4, 5

Dilehon Jahowa do tu hita pangkirimon na mansai denggan. Marjanji do Ibana laho pabadiahon goarNa jala pasauthon lomo ni rohaNa di surgo dohot di tano on. (Mat. 6:9, 10) On ma na ringkot tapaimaima. Marjanji do Jahowa laho mangalehon ngolu salelengna tu hita, di surgo manang di tano on. Las situtu do roha mamboto janji i! (Joh. 10:16; 2 Ptr. 3:13) Maimaima do hita laho mangida songon dia Jahowa manogunogu jala mangurupi naposoNa di tingki parpudi on. Didok di Bibel, haporseaon, i ma ”pos ni roha” tu pangkirimon. Lapatanna, halak na marhaporseaon, porsea situtu na ingkon saut do janji ni Jahowa. Godang do halak saonari marpangkirimon, alai ndang pos rohanasida na boi saut pangkirimonna i. Umpamana, sasahalak lomo rohana asa monang marlotre, alai ndang pos rohana na boi ibana monang. Alani i, molo togu haporseaonta, pos ma rohanta paimahon pangkirimonta. w16.10 3:1, 2

Dilehon Jahowa do haboion dohot bakat tu hita, jala boi do tontuhononta songon dia hita mamangke i. Molo unduk hita, tapangke ma haboion on laho mangulahon parentaNa. (Rom 12:4-8) Taboto, lomo do roha ni Jahowa asa tapangke i laho pasangaphon Ibana jala mangurupi na asing. Sipata, olo do muba tanggung jawabta. Pingkirhon ma na masa tu Jesus. Parjolo, holan ibana dohot Jahowa do na adong. (Poda 8:22) Diurupi do Jahowa manompa surusuruan, tano on, dohot jolma. (Kol. 1:16) Ro ma Jesus tu tano on, tubu gabe posoposo jala lam magodang. (Plp. 2:7) Dung mate, dipahehe ma Jesus tu surgo, dung i gabe Raja di Harajaon ni Debata taon 1914. (Heb. 2:9) Dung mamarenta Jesus saleleng saribu taon, lehononna ma Harajaon i tu Jahowa, asa ”Debata gabe saluhut di bagasan saluhut”.​—1 Kor. 15:28. w17.01 3:11, 12

Tingki mamillit sipilliton, sahalak borua mandok tu donganna, ”Unang bahen ahu marpingkir; paboa ma na ingkon huulahon.” Ndang lomo rohana mamangke hak laho mamillit na dilehon Debata, alai lomo rohana adong na manontuhon sipillitonna. Songon dia molo hamu? Hamu sandiri do na manontuhon sipilliton, manang ingkon adong na manontuhon? Songon dia do pangantusionmu taringot hak laho mamillit? Marasingasing do pandapot ni halak taringot hak laho mamillit. Adong na mandok, ndang adong di hita hak laho mamillit ala Debata do na manontuhon sudena. Na asing mandok, hak laho mamillit boi adong molo holan hita sandiri na mambahen aturan di ngolunta. Alai Bibel paboahon, tingki ditompa Debata hita, dilehon do hak laho mamillit. w17.01 2:1, 2

Ra, didok roha ni si Daud ndang rade dope si Salomo manguluhon ulaon na ringkot on, i ma pature bagas joro ni Jahowa. Bagas joro i, ”ingkon balga situtu bahenon”, hape si Salomo ”bajar dope” jala ndang marpengalaman. Alai diboto si Daud, urupan ni Jahowa do si Salomo mangulahon ulaon na sumurung on. Alani i, marsitutu do si Daud mangurupi si Salomo asa boi manguluhon ulaon on. Suang songon i ma, tingki mangalehon tanggung jawab tu na poso, unang ma metmet roha ni na umtua. Ulaon na mansai ringkot saonari, i ma ulaon ni Jahowa. Molo dilatik angka na poso mandalanhon tanggung jawab, boi ma denggan i diulahon. w17.01 5:8, 9

Ala gabe Raja di Harajaon ni Debata, ripashonon ni Jesus ma Sibolis jala ndang adong be hasusaan. Diurupi Jesus do siseanna mangantusi ringkot ni Harajaon ni Debata. Songon dia carana? Dung tardidi Jesus, dibaritahon ibana ma barita na uli taringot tu ”harajaon ni Debata” tudia pe ibana laho. (Luk. 4:43) Didok muse tu siseanna asa mangkatindangkon ibana ”sahat ro di ujung ni tano on”. (Ul. 1:6-8) Saonari marhite ulaon parbaritaon, godang halak marsiajar taringot tu tobusan jala gabe rakyat ni Harajaon ni Debata. Tapatudu ma na marsihohot do hita gabe rakyat ni Harajaon ni Debata, marhite mangurupi na miniahan pasahathon barita na uli di liat portibi on.​—Mat. 24:14; 25:40. w17.02 2:7, 8

Nang pe punguan na mangaradoti organisasi manguluhon huria, diantusi nasida do holan Jesus na gabe Pamimpin ni nasida. Didok si Paulus, ”Gabe parhasintongan hita tahe di bagasan haholongon i, jala lam magodang ma hita di na saluhut, mangeahi Ibana, Ulu i, i ma Kristus.” (Eps. 4:15) Angka sisean ni Jesus ndang olo mambahen goar ni angka apostel gabe goar ni punguan ni nasida, alai ”targoar . . . halak Kristen” do nasida. (Ul. 11:26) Diboto si Paulus do ringkot ni mangihuthon hasintongan sian Surat na Badia na diajarhon angka apostel dohot angka sintua. Nang pe songon i, didok apostel Paulus do, ”Naeng ma botoonmuna di rohangku: Kristus i do ulu ni ganup baoa.” Ayat on pe marlangku do tu punguan na mangaradoti organisasi. Didok si Paulus muse, ”Debata do ulu ni Kristus i.” (1 Kor. 11:2, 3) Tangkas ma, Jesus Kristus do na dipillit Jahowa laho manguluhon huria. w17.02 4:7

Molo tapasangap na asing, on mambahen hita ndang mangkaringkothon diri jala tongtong marserep ni roha tingki adong na mamuji hita. Jala mangurupi hita asa unang tartuktuk tingki na tapasangap mambahen jut rohanta. Asing ni i, on mambahen hita tongtong marsada di organisasi ni Jahowa. Ndang dibahen organisasi sasahalak gabe pasangaphu. Laba na rumingkot ala pasangaphon na asing, i ma mambahen las roha ni Debata. Marsihohot ma hita jala taulahon na dihalomohon rohaNa. Molo taulahon i, boi ma Jahowa mangalusi Sibolis na mandok, ndang adong sada pe jolma na olo marsihohot. (Poda 27:11) Godang do na so mangantusi cara na denggan pasangaphon sasahalak. Mandok mauliate ma hita ala taboto cara pasangaphon sasahalak hombar tu lomo ni roha ni Jahowa! w17.03 1:13, 20, 21

Songon amana, i ma si Asa, dipatogu si Josapat do angka halak asa tongtong manomba Jahowa. Disuru ibana do sampulu baoa tu Juda laho mangajarhon angka ”buku patik ni Jahowa”. (2 Kron. 17:7-10) Jala laho do ibana tu harajaon ni Israel di utara, manjumpangi angka halak di dolok Epraim, asa ”mulak nasida ditogihon tu Jahowa”. (2 Kron. 19:4) Saonari, lomo do roha ni Jahowa asa sude halak di liat portibi on diajari taringot tu Ibana, jala boi do hita dohot mangulahon i. Olo do hamu marbarita ganup bulan? Olo do hamu mangajarhon Bibel tu na asing asa boi nasida manomba Jahowa? Ditangiangkon hamu do taringot on? Molo marsitutu hamu, urupan ni Jahowa ma hamu asa mandapot parsiajar Bibel. Olo do hamu mangajari sasahalak nang pe ingkon godang tingkimuna laho mangulahon i? Songon si Josapat na mangurupi na asing asa manomba Jahowa muse, hita pe boi mangurupi halak na so aktif. w17.03 3:10, 11