Juni

Holan sasada boruna i do ianakhon ni si Jepta. Ndang marhasohotan be boruna i jala ndang marianakhon. Alani i, ndang pinomparna be na manean arta ni si Jepta. (Pangh. 11:34) Alai, didok si Jepta, ”Ai nunga tangkas hubahen sada janji tu Jahowa, jala na so tarose ahu!” (Pangh. 11:35, Bibel siganup ari) Dijalo Jahowa do pelean ni si Jepta jala dipasupasu do ibana. Boi do hamu tongtong marsihohot songon si Jepta? Tingki talehon dirinta tu Jahowa, marjanji do hita mangulahon sude na dihalomohon ni Ibana. Sipata, ndang sai mura manggohi janjinta. Songon dia do molo disuru hita mangulahon ulaon na so pola tahalomohon? Molo rade do hita mangoloi Debata, on patuduhon na marsihohot do hita tu janjinta. Sipata, maol do tahilala mangulahon sude lomo ni roha ni Jahowa, alai molo taulahon i, pasupasuon ni Jahowa do hita.​—Mal. 3:10. w16.04 1:11, 14, 15

Marhite tondi parbadia do Jesus manguluhon huria. Boi do tondi parbadia mangurupi hita pasidingkon elaela jala barani marbarita. Diurupi do hita muse mamillit na dumenggan di ngolunta. I do alana, ingkon marsitutu do hita ro tu parpunguan asa tadapot pangurupion sian tondi parbadia. Jotjot do hita mangulas surirang ni Bibel naung digohi. On paposhon rohanta, gohan ni Jahowa do sude janjiNa taringot ari na naeng ro. Angka donganta patoguhon hita ndang holan marhite jamita, alai boi do marhite alus manang ende pujian tu Jahowa na diendehon sian roha. (1 Kor. 14:26) Tingki mangkatahatai andorang so parpunguan manang dung sae, boi do on mambahen dame rohanta ala taboto adong do dongan na manarihon hita.​—1 Kor. 16:17, 18. w16.04 3:6, 7

Didok Jesus tu siihuthon ibana asa marbarita jala pasahathon barita na uli ”di liat portibi on”. (Mat. 24:14) Dung i, disuru do nasida mambahen sisean sian ”saluhut bangso”. On patuduhon, barita na uli ingkon dibaritahon di sandok portibi on. Holan Sitindangi Ni Jahowa do na manggohi surirang ni Jesus marbarita na uli di liat portibi on. Boasa tadok songon i? Adong do hirahira 600.000 halak pandita di Amerika Serikat, alai adong hirahira 1.200.000 Sitindangi Ni Jahowa marbarita na uli disi. Di liat portibi on, adong hirahira 400.000 imam Katolik, alai lobi sian ualu juta Sitindangi Ni Jahowa marbarita na uli di 240 negeri. Tarida ma, Sitindangi Ni Jahowa marbarita na uli di liat portibi on laho pasangaphon dohot mamuji Debata Jahowa!​—Ps. 34:2; 51:17. w16.05 2:13, 14

Saonari, molo taida pangalaho ni godang jolma di portibi on, jotjot nasida mambahen hasusaan tu donganna. Dung i, godang mandok boi nasida mamillit na denggan dohot na so denggan tu dirina. Nasida marginjang ni roha, mangkaringkothon dirina, marsaing jala ndang dipingkiri pambahenanna i manusai donganna. (1 Mus. 3:1-5) Parange sisongon on, parohon parsalisian. Tingki marjamita Jesus di dolok, diajari do siseanna asa mardame jala pasidingkon parsalisian nang pe ndang mura mangulahon i. Umpamana, didok Jesus tu nasida asa burju, mardame dohot dongan na asing, unang mura tarrimas, hatop pasaehon parsalisian jala mangkaholongi musu.​—Mat. 5:5, 9, 22, 25, 44. w16.05 1:4, 5

Andorang so tardidi hita, nunga tabahen godang hamubaon asa boi mangolu hombar tu na didok Bibel. Alai dung tardidi pe, ingkon tongtong do tabahen hamubaon asa boi maniru Debata dohot Kristus. (Eps. 5:1, 2; 1 Ptr. 2:21) Umpamana, marungutungut, manggosip jala mandok hata na so tutu taringot dongan sahaporseaon. Manang, mabiar do hita tu hata ni angka dongan ala ndang taulahon na denggan. Ra, nunga marsitutu hita saleleng martaontaon mambahen hamubaon, alai sai tongtong dope hita mangulahon hahurangan na sarupa. Tongtong ma taingot molo hita jolma na mardosa do. (Kol. 3:9, 10) Alani i, olo dope taulahon na sala nang pe hita nunga martaontaon tardidi. Sian tingki tu tingki, ra adong do sangkap dohot pingkiran na so denggan manang maol do tahilala mangorom hahuranganta. Alani i, porlu do hita mangalo hahurangan na sarupa saleleng martaontaon.​—Jak. 3:2. w16.05 4:3-5

Adong na mandok, ’Andorang so marianakhon ahu, ndang lomo rohangku tingki natuatuangku maminsang ahu.’ Dung lam magodang hita, taboto ma alani holong do umbahen na dipinsang hita. (Heb. 12:5, 11) Dihaholongi Jahowa do hita songon anakNa sandiri. Alani i, sabar do Ibana maminsang manang manopa hita. Lomo rohaNa hita marlas ni roha, marbisuk jala mangkaholongi Ibana. (Poda 23:15) Ndang lomo roha ni Jahowa hita marsitaonon jala ndang lomo rohaNa mate hita songon halak pardosa na so marhamubaon. (Eps. 2:2, 3) Andorang so tatanda Jahowa, godang do ra parangenta na so denggan. Alai, rade do Jahowa manopa jala mangurupi hita marhamubaon asa marparange na denggan.​—Jes. 11:6-8; Kol. 3:9, 10. w16.06 1:7, 8

Las do roha ni dakdanak marsiajar jala mura do nasida diajari. (Mat. 18:1-3) Denggan ma molo natuatua mangurupi ianakhonna mangantusi jala mangkaholongi hasintongan sian na metmet. (2 Tim. 3:14, 15) Ingkon tongtong do adong hasintongan i di bagasan roha ni natuatua jala diulahon di parngoluon. On mangurupi ianakhon ni nasida mangkaholongi hasintongan. Tingki dipinsang, diantusi ianakhonna ma molo pinsangpinsang i patuduhon holong ni Jahowa dohot natuatuana. Molo marserep ni roha jala tongtong taoloi Jahowa, arga ma hita di Ibana songon si Daniel. (Dan. 10:11, 19) Tongtong ma hita ditopa Jahowa marhite HataNa, tondiNa dohot organisasiNa. w16.06 2:14, 17

Godang do parange ni si Daud na denggan na mambahen ibana dihaholongi Jahowa. (1 Sam. 13:13, 14) Alai, hea do si Daud mangulahon na sala. Dilangkup ibana do si Batseba tingki di parporangan si Uria, tungganedolina. Gabegabean ma si Batseba. Ndang olo si Daud diboto halak na diulahonna i. Disuru ibana ma si Uria mulak tu jabuna. Didok roha ni si Daud, molo mulak si Uria tu jabuna, dohonon ni halak ma posoposo i anak ni si Uria. Alai, ndang olo si Uria mulak tu jabuna. Alani i, diatur si Daud ma asa mate si Uria di parporangan. Ala diulahon si Daud dosa na balga i, godang ma hasusaan na masa tu keluargana. (2 Sam. 12:9-12) Nang pe songon i, dipatudu Jahowa do asi ni rohaNa tu si Daud. Diboto Jahowa do na olo si Daud mangulahon na sintong. (1 Raj. 9:4) Molo mangolu hita di tingki i, songon dia do pangkilalaanta mangida si Daud? Ndang tasomba be Jahowa? w16.06 4:7

Diparrohahon Sitindangi Ni Jahowa do sipaingot na dilehon Jesus. Taboto do, hita mangolu di tingki parpudi jala jonok nama hasusaan bolon! (Dan. 12:4; Mat. 24:21) Songon na disurirangkon Jesus, di tingki parpudi, masa ma porang, godang sahit, gempa dohot haleon di godang inganan. Lam godang ma agama na so sintong jala lam jahat do angka jolma. Jala marbarita na uli do naposo ni Jahowa di liat portibi on. (Mat. 24:7, 11, 12, 14; Luk. 21:11) Maimaima ma hita di haroro ni Jesus na laho pasauthon lomo ni roha ni Jahowa. (Mrk. 13:26, 27) Alai, ndang boi taboto andigan masa hasusaan bolon. w16.07 2: 2-4

Jonok ma hita tu Jahowa marhite tangiang. Alani asi ni roha ni Jahowa, boi ma hita martangiang tu Ibana. Ganup tingki, boi do hita martangiang tu Jahowa marhite Jesus. Hak na sumurung do on! Si Paulus mandok, ”Marhitehite Ibana dapot hita hiras ni roha dohot dalan masuk, di bagasan roha na pos, na mangkaporseai Ibana.” (Eps. 3:12) Dijujui si Paulus do hita martangiang tu Debata ganup tingki, ”asa dapot asi ni roha hita bahen pangurupion, di tingki halehetanna”. (Heb. 4:16b) Tingki marsitaonon, pangido ma pangurupion sian Jahowa. Dialusi do tangiangta ala holong rohaNa tu hita. Jotjot do Ibana mangurupi hita marhite dongan sahaporseaonta. Ala dialusi Jahowa tangiangta, ”pos rohanta mandok: Tuhan i do pangurupi di ahu, ndang mabiar ahu; aha ma bahenon ni jolma tu ahu”?​—Heb. 13:6. w16.07 3:12, 13

Holan sada do tungganeboru ni si Noak, songon i nang ianakhonna. Alai dungkon Aek na Sumar, godang do baoa mangoli tu lobi sian sada borua. Di pigapiga inganan, somal do halak mangalangkup nang pe maragama nasida. Tingki pinda si Abraham dohot si Sarah tu Kanaan, godang do halak na mangalangkup disi. Diripashon Jahowa ma kota Sodom dohot Gomorra, ala godang halak disi mangulahon angka na rorang. Alai, si Abraham ndang songon i. Ibana ma tungganedoli na burju jala si Sarah tungganeboru na unduk. Sitiruon na denggan do nasida di hita. (1 Ptr. 3:3-5) Dilului si Abraham do borua na manomba Jahowa laho gabe parumaenna. Songon i nang si Isak, dihalomohon ibana do asa mangoli si Jakkob tu borua na manomba Jahowa. w16.08 1:10

Nunga digohi surirang on saonari. Di taon 2015, adong 8.220.105 Sitindangi Ni Jahowa na marbarita na uli di liat portibi on! Nunga didok Debata, ”Ahu Jahowa mambahensa gira di tingkina.” Alani i, lam godang ma ulaonta di partondion. Talehon do nasa gogonta di ulaon marbarita na uli? Godang donganta gabe perintis biasa manang perintis ekstra. Adong do na pinda tu luat na asing laho marbarita na uli, manang dohot pajongjongkon Bale Harajaon. Tangkas ma, godang do ulaon di angka donganta baoa dohot borua ”di bagasan ulaon ni Tuhan i”.​—1 Kor. 15:58. w16.08 3:1, 2

Dung ruar halak Israel sian Mesir, ro ma halak Amalek mamorangi nasida. Didok si Musa tu si Josua asa manguluhon halak Israel tu parporangan. Dung i, ditogihon si Musa ma muse si Aron dohot si Hur asa laho nasida tu dolok. Sian i, boi ma diida nasida parporangan i. Diihuthon si Musa do tudutudu na boi mangurupi halak Israel asa monang mangalo halak Amalek. Ditiop ibana ma tungkotna jala diangkat ma tu ginjang. Tingki diulahon si Musa i, dilehon Jahowa ma gogo tu halak Israel laho mangalo halak Amalek. Dung lam loja tangan ni si Musa, gabe naeng monang ma halak Amalek. Alai, pintor hatop ma ro si Aron dohot si Hur mangurupi si Musa. ”Dibuat nasida ma batu sada, dibahen ma tu toruna, asa hundul ibana tusi; ro ma si Aron dohot si Hur tumungkol tanganna sambariba be; gabe hot ma tanganna i, paima mate mata ni ari.” Alani hagogoon ni Debata, monang ma halak Israel.​—2 Mus. 17:8-13. w16.09 1:5-7

Pos do roha ni si Paulus na boi ibana monang molo martangiang tu Jahowa, marpangunsandean tu Jahowa, jala porsea tu tobusan ni Jesus. Songon dia do molo hita? Boi do hita monang mangalo hagaleonta? Tontu boi, molo tatiru si Paulus, marpangunsandean tu Jahowa ndang tu gogonta sandiri, jala porsea tu tobusan ni Jesus. Sipata, dipasombu Debata do hita patuduhon caranta mangadopi hasusaan. Umpamana, molo adong keluarganta na marsahit na posi manang manaon ketidakadilan, songon dia do hita mangadopi i? Molo marhaporseaon na togu hita tu Jahowa, pos ma rohanta lehononNa do gogo asa boi hita tongtong marsihohot, mangkilala las ni roha, jala paralealeonta pe tongtong togu tu Ibana. (Plp. 4:13) Angka pengalaman ni donganta najolo dohot saonari patuduhon, tangiang mambahen hita margogo, barani, jala boi tongtong martahan. w16.09 2:14, 15

Hea do halak Jahudi na marhata Junani muruk ala ndang denggan diparrohahon angka ina na mabalu. Laho pasaehon parsalisian i, dipillit angka apostel ma pitu baoa asa denggan diparrohahon angka ina na mabalu i. Dipillit ma baoa sian halak Junani asa lam denggan dihilala angka ina na mabalu i. (Ul. 6:2-6) Mangkorhon do hasomalanta tu parniulaonta. (Rom 12:2) Olo do sipata hombar jabunta, dongan sakarejo, dongan sasingkola mangkatahon na so denggan taringot tu halak na ro sian suku, luat, marga na asing, manang na asing warna ni kulitna. Aha do pangkorhon ni hata sisongon i tu dirinta? Songon dia do bahenonta molo adong na mangarehei bangsonta manang hasomalanta? w16.10 1:7, 8

Tingki taida tompaan di tano on jala tarimangi, taboto ma mansai denggan do cara ni Debata manompa i. Gabe porsea ma hita adong do Debata, nang pe ndang boi taida. Taboto, denggan do pangalahoNa jala marbisuk do Ibana. (Heb. 11:3, 27) Boi do taparsiajari taringot tompaan marhite manjaha hatorangan sian angka ilmuwan. Pigapiga hatorangan i adong di bahan riset, songon video Keajaiban Ciptaan Menyingkapkan Kemuliaan Allah, brosur Benarkah Kehidupan Diciptakan?, Asal Mula Kehidupan—Lima Pertanyaan yang Patut Direnungkan, dohot buku Apakah Ada Pencipta yang Mempedulikan Anda? Di majalah Sadarlah! jotjot do adong wawancara taringot tu angka ilmuwan dohot na asing na patorangkon boasa nasida gabe porsea tu Debata. Artikel ”Apakah Ini Dirancang?” marisi hatorangan taringot binatang dohot angka na adong di tano on, jala paboahon songon dia angka ilmuwan maniru cara kerja ni tompaan. w16.09 4:4, 5

Di Heber bindu 11, dipaboa ma taringot angka halak na porsea, na mate di tingki so ro dope Jesus. (Gal. 3:16) Dipaima nasida do hangoluan salelengna di paradeiso di tano on. (Ps. 37:11; Jes. 26:19; Hos. 13:14) Heber 11:13 mandok taringot naposo ni Debata na marhaporseaon, ”Di bagasan haporseaon do mate nasida sude. Ndang sanga dijalo nasida bagabaga i; sian na dao nama ditatap jala dihalashon.” Maimaima do nasida tu tano na imbaru jala dirimangi do songon dia ngolu ni nasida disi. Si Abraham ma sada sian nasida. Didok Jesus, las do roha ni si Abraham ”ala naeng idaonna” ari na naeng ro. (Joh. 8:56) Maimaima do si Sarah, si Isak, si Jakkob, dohot na asing tu Harajaon, ”na pinandean jala na pinauli ni Debata”, na laho mamarenta di tano on.​—Heb. 11:8-11. w16.10 3:4, 5

Marhite tondi parbadia do Jahowa mangurupi hita mangantusi hasintongan taringot Ibana dohot AnakNa, jala mangurupi hita marhaporseaon tu nasida. (Luk. 10:21) Songon dia do patuduhon hamauliateon tu Jahowa ala sude naung nilehonNa? Sai tadok ma mauliate ala boi hita maraleale tu Ibana marhite Jesus, ”induk ni haporseaon i jala na paujungkonsa”. (Heb. 12:2) Tongtong ma tapatogu haporseaonta marhite martangiang dohot marsiajar Bibel. (1 Ptr. 2:2) Ingkon marhite parniulaon do tapatudu na marhaporseaon na togu hita tu janji ni Jahowa. Umpamana, tapaboa do taringot Harajaon ni Debata jala taurupi do angka halak gabe sisean ni Jesus. Hita pe mangulahon ”na denggan di saluhut halak, alai gumodang ma tu donganta sahaporseaon”. (Gal. 6:10) Marsitutu ma hita pasidingkon angka pangalaho ”na buruk i rap dohot angka parulaonna”.​—Kol. 3: 5, 8-10. w16.10 4:11, 12

Taratur do dibahen Jahowa alam semesta on. Tangkas ma, lomo do rohaNa asa taratur naposoNa manomba Ibana. Sasintongna, nunga diparade Jahowa Bibel, asa taboto cara manomba Ibana. Asa boi marlas ni roha, ingkon taihuthon do tudutudu sian Debata marhite Bibel dohot organisasiNa. Diihuthon halak Israel do Patik na dilehon Debata jala taratur do nasida. Umpamana, adong do diatur ”parompuan angka na marpungu di lambung pintu ni undungundung parluhutan i marhaladoi”. (2 Mus. 38:8) Dung i, Raja Daud mangatur angka malim dohot halak Lepi mangulahon angka ulaon di bagas joro. (1 Kron. 23:1-6; 24:1-3) Angka huria di abad na parjolo pe denggan do diatur. Adong do punguan na mangaradoti, i ma punguan ni angka baoa na mangalehon tudutudu tu huria. Angka apostel hian do anggota ni punguan on. (Ul. 6:1-6) Diurupi Jahowa do punguan na mangaradoti organisasi.​—1 Tim. 3:1-13; Tit. 1:5-9. w16.11 2:3, 6, 8, 9

Taon 607 SM, Raja Nebukadnesar II dohot tentara Babel mamorangi Jerusalem. Didok di Bibel, dibunu raja i do angka na poso mamangke podang. ”Ndang maralangalang rohana mida dolidoli manang namarbaju, nang mida halak na matua dohot na ubanon.” Ujungna, ”joro ni Debata disurbu nasida do, jala dilohai angka parik ni Jerusalem jala sude bagas bolon na disi suda disurbu nasida dohot api; jadi mago ma sandok ulaulanasida angka na arga i.” (2 Kron. 36:17, 19) Ndang pola longang halak Jahudi tingki diripashon Jerusalem. Alana saleleng martaontaon, nunga disuru Jahowa angka panurirang laho paingothon nasida. Molo ndang unduk, diporangi halak Babel ma nasida. Godang do halak Jahudi na mate, alai halak Jahudi na malua ditaban asa tading di Babel. w16.11 4:1, 2

Ala mardosa si Adam, mangkorhon ma i tu sude jolma, na mambahen nasida gabe mardosa jala mate. I do alana Bibel mandok, ”Hamatean manggomgomi, binahen ni na sada ala ni pangalaosionna.” Alai, dipatudu Jahowa do asi ni rohaNa jala dilehon dalan laho paluahon sude jolma marhite ”Jesus Kristus na sada i”. (Rom 5:12, 15, 17) ”Marhite sian pangoloion ni na Sada i gabe torop dipintori.” Boi ma nasida mandapot ”hangoluan na salelenglelengna marhite sian Jesus Kristus”. (Rom 5:19, 21) Pingkirhon ma: Sasintongna, ndang ingkon lehonon ni Jahowa AnakNa bahen tobusan di hita. Alai, dipatudu do asi ni roha marhite paradehon dalan na paluahon hita sian dosa dohot hamatean. Ndang tama hita manjalo asi ni roha ni Debata dohot Jesus. Mandok mauliate ma hita ala disesa dosanta jala boi mangolu salelengna! Tapatudu ma hamauliateonta marhite parniulaonta ganup ari. w16.12 1:1, 6, 7

Si Paulus mandok, ”Hamatean do harohaon ni daging.” (Rom 8:6) Aha do lapatan ni on? Molo ”mangihuthon daging”, sega ma paralealeonta tu Jahowa jala ndang marpangkirimon be hita. Alai, unang ma gabe songon i. Boi do hita marhamubaon. Diingot hamu do baoa na mangulahon parmainanon di Korint na dipabali sian huria? Marhamubaon do ibana jala ndang be mangihuthon hagiot ni daging. Marlas ni roha ma ibana muse manomba Jahowa. (2 Kor. 2:6-8) Sitiruon na denggan do baoa i. Nang pe sanga mangolu ”mangihuthon daging”, olo do ibana muba. Suang songon i, molo adong halak Kristen na mangihuthon hagiot ni daging sian na mangihuthon patik ni Jahowa, boi do ibana marhamubaon. Mangingot sipasingot ni si Paulus mambahen hita rade marhamubaon. w16.12 2:5, 12, 13

Las do rohanta mamboto na disarihon Jahowa do hita molo tapasahat holso ni rohanta tu Ibana. Pos ma rohanta, ”tarpatupa Ibana do andul lumobi sian na tapangido manang tapingkiri”. (Eps. 3:20) Urupan ni Jahowa do hita ”lumobi sian na tapangido”! Asa boi mandapot upa, ingkon porsea do hita tu Jahowa jala unduk tu parentaNa. Didok si Musa tu bangso Israel, ”Buas do pasupasuon ni Jahowa ho di tano silehonon ni Jahowa, Debatam tu ho soluhonmu bahen partalianmu. Asal ditangihon ho situtu soara ni Jahowa, Debatam, huhut mangaringkoti mangulahon sandok tona on, angka na hutonahon tu ho sadarion. Ai pasupasuon ni Jahowa, Debatam do ho.” (5 Mus. 15:4-6) Pos do rohamu na pasupasuon ni Jahowa hamu molo tongtong marsihohot? Adong do alana na mambahen pos rohamuna. w16.12 4:8, 9

Jahowa do na mambahen aturan na dumenggan taringot mamillit. Lomo roha ni Jahowa manggohi janjiNa tu si Abraham. (1 Mus. 22:15-18) Tingki mamangke hak laho mamillit, dipatudu Jahowa do holong dohot hatigoranNa. On taboto sian cara ni Jahowa pasingothon bangso Israel tingki mangalo nasida tu Jahowa. Tingki marhamubaon nasida, dipatudu Jahowa do holong dohot asi ni roha. Didok Ibana, ”Pamalumonku ma panundalionnasida, girgir ma ahu mangkaholongi nasida.” (Hos. 14:5) Jahowa mangalehon sitiruon taringot mamangke hak laho mamillit laho mangurupi na asing! Tingki manompa surusuruan dohot jolma, dilehon Jahowa do hak laho mamillit tu nasida. Jesus ma tompaan na parjolo. Ditompa do Jesus tumiru Debata jala dilehon hak laho mamillit. (Kol. 1:15) Andorang so tu tano on, marsihohot do Jesus tu Jahowa jala ndang mangihuthon Sibolis dohot angka begu. w17.01 2:3, 4

Sipata, olo do muba tanggung jawabta alani situasi. Ra, gabe boi hita mangulahon godang ulaon, manang ndang boi mangulahon i. Alai, na poso manang na matua, sehat manang na ndang, diboto Jahowa do songon dia hita mangalehon na dumenggan tu Ibana. Ndang dihirim rohaNa asa taulahon na so tolap gogonta. Las do rohaNa molo taulahon na ringkot di Ibana. Marlas ni roha do Jesus alani tanggung jawab na nilehon ni Jahowa, jala hita pe boi songon i. (Poda 8:30, 31) Dihasabamhon halak na unduk do tanggung jawabna di huria. Ndang sai dipingkiri na boi diulahon halak. Las rohana mangulahon na boi ulahononna di organisasi ni Debata. Didok rohana, silehonlehon sian Jahowa do i. Diargai halak na unduk do na asing jala las rohana mangurupi. Diboto ibana, Jahowa pe mangalehon tanggung jawab tu nasida.​—Rom 12:10. w17.01 3:13, 14

Sada tingki, dilehon do tanggung jawab tu na poso laho mangaradoti ulaon ni na umtua, angka baoa naung marpengalaman. Marbisuk do nasida molo marsiajar sian na umtua. Umposo do si Timoteus sian si Paulus, alai rap saulaon do nasida saleleng martaontaon. Didok si Paulus tu halak Korint, ”Husuru tu hamu Timoteus, anakkonku, haholongan jala haposan ni rohangku marhitehite Tuhan i, asa ibana paingot hamu di angka dalanku na marhitehite Kristus Jesus.” (1 Kor. 4:17) Tangkas ma taida, si Paulus dohot si Timoteus rap saulaon jala masiurupan. Diajari si Paulus do si Timoteus taringot angka dalanna marhite Jesus Kristus, jala dijangkon si Timoteus do i. Mansai holong do roha ni si Paulus tu si Timoteus, jala pos rohana na denggan do diparrohahon angka dongan di Korint. Angka sintua boi do maniru si Paulus tingki mangalatik baoa di huria. w17.01 5:13, 14

Jahowa do Mual ni hangoluan. Tingki Jahowa pahehehon angka naung mate, Ibana ma gabe Ama di nasida. (Ps. 36:10) Di tangiang na diajarhon Jesus, ibana manjou Jahowa ”Amanami na di banua ginjang”. (Mat. 6:9) Nunga dilehon Jahowa tanggung jawab tu Jesus laho pahehehon angka naung mate. Jesus mandok, ”Ahu do haheheon dohot hangoluan.” (Joh. 6:40, 44; 11:25) Jesus mandok, ”Ai na mangulahon lomo ni roha ni Debata, i do anggingku, i do ibotongku, i do dainang!” (Mrk. 3:35) Marsangkap do Debata laho mambahen sude jolma sian marragam bangso dohot bahasa gabe naposoNa. Didok do nasida na ”mansai torop, na so dapot bilangan ni jolma”. Marhaporseaon do nasida tu tobusan jala unduk tu Debata. Dipuji nasida do Debata jala didok, ’Haluaon sian Debatanta, na hundul di habangsa i, dohot di Birubiru i!’​—Pgk. 7:9, 10. w17.02 2:10, 11

Asa boi mangurupi halak na marbahasa na asing mamboto hasintongan ni Bibel, dibahen ma badan hukum Zion’s Watch Tower Tract Society di taon 1884, jala si Charles Taze Russell ma na manguluhon di tingki i. Disulingkiti ma Bibel jala ndang mabiar ibana paboahon na sala do ajaran ni gareja, songon ajaran debata sitolu sada dohot tondi na so boi mate. Diparsiajari ibana do molo haroro ni Jesus na paduahalihon ndang boi diida, jala ”paima gok angka tingki ni parbegu” di taon 1914. (Luk. 21:24) Dipangke si Russell do tingkina, gogona, dohot hepengna laho mangajari na asing taringot tu hasintongan on. Tangkas ma, dipangke Jahowa dohot Jesus do si Russell manguluhon ulaon na ringkot on. Ndang olo si Russell pasangaphon dirina sandiri. Taon 1896, dipaboa do molo ibana dohot angka baoa na martanggung jawab, ndang olo dipasangap. Nasida pe ndang olo mambahen goar ni punguan i mamangke goar ni nasida. Di pudian ni ari, didok ibana ma, ”Ndang ulaon ni jolma on.” w17.02 4:8, 9

Hita sude ingkon manontuhon sipilliton di ngolunta. Adong do pigapiga sipilliton na balga pangkorhonna, alai sipilliton na asing ndang songon i. Molo tapillit mangulahon na denggan, ndang pola godang be sitaononta jala lam dame ma ngolunta. Alai molo tapillit mangulahon na sala, godang ma sitaononta jala gabe marmetmet ni roha. Asa marbisuk manontuhon sipilliton, ingkon marhaporseaon do hita tu Debata. Pos ma rohanta, olo do Ibana mangurupi hita jala mangalehon bisuk asa boi tapillit na denggan. Hita pe ingkon porsea tu poda ni Debata na adong di Bibel. (Jak. 1:5-8) Molo jonok tu Jahowa jala mangoloi HataNa, on mambahen pos rohanta, diboto Debata do na dumenggan tu hita. Andorang so manontuhon sipilliton, ingkon jolo taparsiajari do Bibel. w17.03 2:2, 3

Songon amana, marhaposan do si Josapat tu Jahowa tingki ro godang tentara laho mamorangi Juda. (2 Kron. 20:2-4) Mabiar do ibana jala dipangido ma pangurupion tu Jahowa. Tingki martangiang, didok ibana do ndang boi taluhononna musuna i. Didok muse, ndang diboto nasida laho mangulahon aha. Alai pos do roha ni si Josapat tu pangurupion ni Jahowa, songon na didok di ayat sadari on. Songon si Josapat, sipata ndang taboto aha na laho taulahon molo adong sitaonon, jala olo do gabe mabiar hita. (2 Kor. 4:8, 9) Alai ingot ma na diulahon si Josapat. Di jolo ni rakyatna, martangiang ma ibana jala dipaboa ma na mabiar situtu nasida. (2 Kron. 20:5) Hamu angka tungganedoli, tiru ma si Josapat. Pangido ma pangurupion tu Jahowa asa boi hamu dohot keluargamuna mamboto na ingkon siulahononmu molo adong sitaonon. Unang maila martangiang di jolo ni keluargamuna. Alana, gabe diboto nasida ma na pos rohamuna tu Jahowa. Molo diurupi Jahowa do si Josapat, hamu pe urupanNa do. w17.03 3:12, 13