Desember

Didok apostel Petrus songon i, asa marhabengeton do halak Kristen di abad na parjolo manaon pangunjunan sian Sibolis. Pengalaman ni nasida na marhabengeton mangonjar rohanta asa tongtong marsihohot, paposhon rohanta na boi hita monang jala manjalo pasupasu. (Jak. 5:11) Hea do hamu marsitaonon alani haporseaon? Manang godang do tanggung jawabmu di huria ala hamu sahalak sintua manang sintua kaliling? Molo songon i do, sitiruon sian si Paulus boi mangurupi hamu. Godang do sitaonon na masa tu si Paulus alani haporseaonna jala alani na mangaradoti huria. (2 Kor. 11:23-29) Alai, ndang mandele ibana jala sitiruon sian si Paulus, patoguhon dongan sahaporseaonna. (2 Kor. 1:6) Habengetonta pe boi do patoguhon donganta na asing asa marhabengeton. w16.04 2:11, 14

Nunga disurirangkon Jesus, barita na uli taringot Harajaon ingkon dibaritahon tu sude jolma saleleng ari parpudi. (Mat. 24:14) Sitindangi Ni Jahowa, ditanda di liat portibi on alani ulaonnasida marbarita. Adong do na marlomo ni roha tu barita ni nasida, alai na deba nai ndang. Nang pe ndang sude marlomo ni roha tu barita na tapasahat, alai godang do na mangargai ulaonta marbarita. Holan Sitindangi Ni Jahowa do na manggohi surirang ni Jesus laho marbarita. Godang kelompok agama mandok, nasida pe marbarita na uli. Alai, nasida mangulahon i marhite jamita di gareja, TV, internet, manang holan paboahon sambing taringot Jesus. Adong muse mandok, marbarita na uli do nasida marhite mangalehon pangurupion tu halak na asing songon dokter, perawat manang guru. Alai, songon i do na nidok ni Jesus? w16.05 2:1, 2

Ndang diangkui pamarenta na di portibi on Harajaon ni Debata naung mamarenta di surgo taon 1914. Alani i, ndang sadia leleng nai, pasohoton ni Harajaon ni Debata ma sude pamarentaon ni jolma. (Ps. 2:2, 7-9) Dipaloas Debata pe jolma mamarenta ala boi do nasida manjaga hadameon. Alani i, boi hita denggan marbarita na uli. (Rom 13:3, 4) Dijujui do hita manangiangkon pamarenta asa boi hita denggan manomba Jahowa. (1 Tim. 2:1, 2) Tingki hita susa alani halak na asing, boi do tapangido pangurupion sian pamarenta. Songon i ma na hea diulahon apostel Paulus. Nang pe Bibel mandok Sibolis do nampuna harajaon ni portibi on, alai ndang hea didok sude jolma na adong di pamarentaon i dirajai Sibolis. (Luk. 4:5, 6) Alani i, ndang boi hita paroaroahon manang ise pe, songon na didok di Bibel.​—Tit. 3:1, 2. w16.04 4:5, 6

Songon dia do hita mamboto aha na dihalomohon ni Jahowa? Molo ndang tarsurat di Bibel, porlu taantusi manang taboto lomo ni roha ni Jahowa taringot aha na laho taulahon. Songon dia do hita mangulahon i? Martangiang ma hita tu Ibana jala tapaloas ma tondi parbadiaNa manogunogu hita. Diantusi Jesus do aha na dihalomohon Jahowa siulahononna. Umpamana, marhite tanda halongangan, dua hali dilehon Jesus mangan torop halak. (Mat. 14:17-20; 15:34-37) Nang pe male Jesus tingki diunjuni di padang pasir, ndang olo ibana mambahen batu gabe roti. (Mat. 4:2-4) Diboto Jesus do, ndang lomo roha ni Jahowa pangkeonna tondi parbadia holan manarihon dirina sandiri. Pos do roha ni Jesus tu pangurupion ni Jahowa, jala na lehononNa do sipanganon na porlu di ibana. w16.05 3:7, 8

Olo do sipata adong ayat ni Bibel ditujuhon tu sasahalak manang tu sadasada punguan. I do alana, andorang so tajaha Bibel, tajalo ma pangurupion sian Jahowa asa dilehon tu hita pingkiran na rade dohot bisuk laho mangantusi parsiajaran sian Bibel. (Esr. 7:10; Jak. 1:5) Tingki manjaha Bibel, tasungkun ma dirinta, ’Aha do diajarhon ayat on taringot Jahowa? Songon dia do hatorangan on boi pangkeonku? Songon dia do hatorangan on pangkeonku mangurupi na asing?’ Molo tarimangi angka sungkunsungkun on, dapotta ma laba sian na manjaha Bibel. Taida ma sada tudosan. Dipaboa do di Bibel, angka parange na porlu patuduhonon ni sintua. (1 Tim. 3:2-7) Ndang sude sian hita na gabe sintua, alani i olo do ra tadok ndang marlangku on tu hita. Alai, ayat i boi marlangku tu hita. w16.05 5:7, 8

Tingki ditaban halak Jahudi tu Babel, gok do ganaganaan disi jala pangisina manomba begu. Halak Jahudi na marsihohot songon si Daniel dohot tolu donganna, ndang olo mangihuthon halak Babel. (Dan. 1:6, 8, 12; 3:16-18) Diloas do Jahowa manopa nasida jala holan Ibana do na disomba. Nang pe si Daniel mangolu di tongatonga ni halak na so manomba Jahowa, didok surusuruan ni Debata do ibana ”baoa hasudungan ni roha!” (Dan. 10:11, 19) Dipaboa di Bibel, dipamasuk sitopa hudon do tano liat tu sada cetakan. Saonari taboto, marhuaso do Jahowa mamarenta dohot manopa angka bangso. (Jer. 18:6) Marhak do muse Ibana manopa ganup halak. Alai, ndang dipaksa Jahowa sasahalak asa muba. Lomo rohaNa molo rade hita ditopa Ibana. w16.06 2:1, 2

Lomo roha ni Sibolis asa porsea hita arta do na mambahen sonang ngolunta. Dipangke ibana do portibi on dohot ”giotgiot ni roha ni mata” laho mambahen hita mangalului godang arta. (1 Joh. 2:15-17; 1 Mus. 3:6; Poda 27:20) Jotjot do taida jala tabege iklan na manogihon hita manuhor barang na baru. Hea do hamu manuhor barang holan ala bagak idaon manang ala diida hamu di iklan? Dung dituhor hamu, diboto hamu ma na so dihaporluhon do barang i. Molo tatuhori angka barang na so tahaporluhon, susa ma ngolunta. Umpamana, ndang marhiras ni roha be hita manomba Jahowa, ndang adong be tingkinta marsiajar Bibel, paradehon parsiajaran di parpunguan, jala ndang laho be marbarita. Ingot ma hata ni apostel Johannes na mandok, ”Na laho salpu do portibi on rap dohot na pinarhagiotna.” w16.07 1:3, 4

Di huria Kristen abad na parjolo, adong halak Jahudi, halak Junani, halak Rom dohot halak sian bangso na asing. Marasingasing do haroroan ni nasida, hasomalan dohot na dihalomohonna. Ndang mura nasida mangihuthon panombaon na sintong. Alani i, porlu do apostel Paulus paingothon halak Kristen asa manomba sada Debata, i ma Jahowa. Songon dia do di huria Kristen saonari on? Panurirang Jesaya mandok, ”di ujung ni angka ari”, marroan ma halak sian saluhut bangso laho manomba Jahowa. Dohonon ni nasida ma, ”Asa diajarhon tu hita angka dalanna, jala mardalani hita di angka lapangna [dalanNa].” (Jes. 2:2, 3) Las do rohanta ala nunga digohi surirang on saonari! Angka donganta marroan sian marragam bahasa, inganan dohot hasomalan. Nang pe songon i, marsada do hita sude manomba Debata Jahowa. Alai, olo do adong hasusaan na masa ala marasingasing do haroroanta be. w16.06 3:15, 16

Ndang tarrimangan pasupasu na pinarade ni Jahowa tu halak Kristen na miniahan tingki mamarenta nasida raphon Jesus. (Luk. 22:28-30; Plp. 3:20, 21; 1 Joh. 3:2) Gabe ”Jerusalem na imbaru” ma nasida, ”oroan” ni Jesus Kristus. (Pgk. 3:12; 17:14; 21:2, 9, 10) Rap ma nasida dohot Jesus mangalehon ”hahisaron [hahipason] ni angka bangso”. Diurupi nasida ma angka jolma malua sian dosa, hamatean, jala gabe sempurna. (Pgk. 22:1, 2, 17) Dipatudu Jahowa do asi ni roha na umbalga tingki dipahehe Ibana halak naung mate sian kuburan. (Job 14:13-15; Joh. 5:28, 29) Ise do na dipahehe? Angka halak naung mate andorang so mate Jesus, jala angka halak na mate na marsihohot tu Jahowa di ari parpudi. Dipahehe ma nasida sude asa manomba Jahowa.​—Joh. 10:16. w16.07 4:13-15

Aha do na mangurupi hita asa tongtong ”dungo” jala mangarade tu ari rimas ni Jahowa? Ingkon marsitutu ma mangulahon na sintong. Alai ndang sae holan songon i. Andorang so mate Jesus, didok do tu siseanna ringkot mangido pangurupion tu Jahowa. (Luk. 21:36) Asa boi tongtong dungo, ingkon martangiang do hita tu Jahowa ganup tingki. (1 Ptr. 4:7) Jesus mandok, ro ma ajal ni hasiangan on ”di na so pangkirimon” ni roha. (Mat. 24:44) Ingkon sai rade do hita. Ndang tingkina be saonari mangihuthon portibi ni Sibolis na mandok boi hita martua. Gabus do i. Marhite Bibel, dipaboa Jahowa dohot Jesus do songon dia hita asa tongtong dungo. Alani i, taparrohahon ma surirang ni Bibel jala songon dia i digohi. Tapajonok ma dirinta tu Jahowa jala mangkaringkothon ulaon Harajaon. Molo taulahon i, rade ma hita tingki ro ajal ni portibi on. (Pgk. 22:20) Malua ma hita molo tongtong dungo! w16.07 2:15-17

Lam togu do parsaripeon molo na mardongan saripe ”masipauneunean jala masisesaan dosa”. Ala mardosa, olo do nasida na dua mangulahon na sala. Tingki masa sisongon i, masisesaan dosa ma nasida jala patuduhon holong songon na didok di Bibel. Holong ni roha i do ”rahutrahut ni nasa harimpason”. (Kol. 3:14) Dipatudu nasida do holong molo sabar, burju, jala ”ndang dipaingotingot hasalaan ni halak”. (1 Kor. 13:4, 5, Bibel siganup ari) Tingki adong parsoalan, pintor dipasae ma nian. (Eps. 4:26, 27) Porlu do serep ni roha dohot habaranion laho mandok, ”Sala ma ahu da hasian.” Molo diulahon i, sae ma parsoalan jala lam solhot ma parsaripeon. w16.08 2:6

Marsitutu do Jesus marbarita na uli. Alai, dilehon do tingkina mangalatik siseanna. Dipatudu Jesus do cara mangajar jala mangurupi naposo ni Debata. Angka siseanna pe marsiajar do asa boi songon parmahan na mamparrohahon birubiruna. (Mat. 10:5-7) Nang pe ringgas si Pilippus marbarita, dilatik do angka boruna marbarita. (Ul. 21:8, 9) Saonari pe, ringkot do hita mangalatik dongan na asing. Boasa? Di huria na adong di liat portibi on, godang do halak na baru marsiajar na so tardidi dope. Porlu do nasida dilatik. Ingkon taurupi do nasida mangantusi boasa ringkot manjaha jala marsiajar Bibel sahalakna. Porlu do hita mangalatik nasida mangajar dohot marbarita na uli. Donganta baoa na baru tardidi, porlu dilatik asa boi gabe parhobas dohot sintua di huria. Sude hita boi mangurupi nasida. w16.08 4:1, 2

Tingki rap saulaon hita dohot dongan sahaporseaon, lam marsada ni roha ma hita. On pasolhothon paralealeonta jala lam paposhon rohanta tu pasupasu na laho tajalo di Harajaon ni Debata. Tingki tapatogu tangan ni na asing, na mangurupi nasida do hita asa martahan mangadopi sitaonon jala tongtong marpangkirimon tu ari na naeng ro. (Jes. 35:4) Asing ni i, tingki taulahon on, hita sandiri pe dipatogu jala tongtong marpangkirimon. Molo tarimangi cara ni Jahowa mangurupi jala mangalinggomi angka naposoNa najolo, lam togu ma haporseaonta. Alani i, tingki marsitaonon hamu jala marsak, ”unang ma galegale tanganmu”! (Sep. 3:16) Pos ma rohamu, tingki martangiang hamu tu Jahowa, dipargogoi jala pasupasuonNa do hamu marhite HarajaonNa di ari na naeng ro.​—Ps. 73:23, 24. w16.09 1:16-18

Tingki mamillit aha na laho tapangke, taboto martingki do sude ulaon. Mangkorhon do cuaca dohot situasi na marasingasing tingki mamillit na laho tapangke. Alai, ndang hea muba aturan ni Jahowa taringot marpangkean. (Mal. 3:6) Di inganan na mohop, maol do mamillit pangkean na tama idaon. Molo ndang tapangke pangkean na paketathu dohot na so tabo idaon, las ma roha ni donganta mangida hita. (Job 31:1) Jala, tingki di pantai manang di kolam renang, pangkean renang na tapangke ingkon tongtong do tama idaon. (Poda 11:2, 20) Saonari, nang pe godang halak mamangke pangkean renang na hurang tama idaon, ingkon pasangaphon Debata Jahowa ma caranta marpangkean. w16.09 3:11, 12

Jotjot do Jesus manungkun siseanna taringot tu na dihaporseai nasida. Tiru ma cara ni Jesus. Tingki mangkatai manang rap karejo hamu dohot ianakhonmu, sungkun ma aha do na dipingkiri nasida jala denggan ma tangihon. Molo ndang pintor porsea ianakhonmu tu ajaran ni Bibel, sabar ma hamu. Urupi ma nasida mandapot alus ni sungkunsungkunna. Denggan do molo olo ianakhonmuna manungkun, on patuduhon lomo do rohanasida laho mamboto. Tingki remaja, Jesus pe jotjot do manungkun. (Luk. 2:46) Tanda ma ianakhonmuna. Nang pe ianakhonmu dohot marpungu jala marbarita, unang ma dirimpu hamu naung togu haporseaon ni nasida tu Jahowa. Songon dia do pangkilalaan ni nasida taringot tu Jahowa dohot tu Bibel? Molo adong na mambahen nasida maol porsea tu Jahowa, lului ma aha alana. Ganup ari, paboa ma taringot tu Jahowa tingki rap hamu mangulahon sada ulaon dohot ianakhonmuna. Tangiangkon ma nasida manang sadihari pe. w16.09 5:3-5

Saonari, Sitindangi Ni Jahowa nunga manggohi surirang ni Bibel asa marbarita ”tu saluhut bangso dohot marga dohot hata dohot houm”. (Pgk. 14:6) Dohot do hamu marsiajar bahasa na asing? Adong do na gabe misionaris manang marbarita di inganan na mangkaporluhon pangurupion. Adong do muse na olo ro marpungu tu huria na mamangke bahasa na asing di inganannasida. Ingkon togu do naposo ni Debata di partondion jala on ma na diharingkothon nasida di keluarga. Saonari, ala godang ulaonta, olo do gabe maol hita mambahen parsiajaran Bibel sahalakta. Alai, asing do tantangan na diadopi halak na dohot di huria na marbahasa na asing. Angka na dohot di huria na marbahasa na asing ingkon marsiajar bahasa na baru, alai ingkon tongtong do nasida marsiajar asa bagas pangantusionna taringot tu Debata.​—1 Kor. 2:10. w16.10 2:1-3

Saonari, godang do donganta na tongtong marlas ni roha manomba Jahowa nang pe godang sitaonon. Ala ndang olo dohot marporang, marratus donganta dipenjara di Eritrea, Singapura, dohot Korea Selatan. Ndang sude naposo ni Jahowa dipenjara manang dianiaya. Alai, godang do na marsitaonon alani bencana alam, hapogoson, manang porang. Adong do na mangihuthon sitiruon sian si Abraham, si Isak, si Jakkob, dohot si Musa, na manadingkon hasangapon dohot hamoraon asa tongtong manomba Jahowa. Aha do na mambahen donganta tongtong marlas ni roha manomba Jahowa? Holong dohot haporseaon ni nasida na togu tu Jahowa. Diboto nasida, pasupasuon ni Jahowa ma sude naposoNa jala dilehon ngolu salelengna di tano na imbaru.​—Ps. 37:5, 7, 9, 29. w16.10 3:15, 16

Tingki mabiar si Jeremia jala marmetmet ni roha, marjanji do Jahowa laho mangurupi ibana. (Jer. 1:6-10) Disuru Jahowa do sada surusuruan laho patoguhon si Daniel. Surusuruan i mandok si Daniel, ”baoa hasudungan”. (Dan. 10:8, 11, 18, 19) Boi do hamu patoguhon angka dongan sahaporseaon, dohot ma i angka perintis jala angka na matua na so boi be mangulahon godang ulaon? Nang pe nunga leleng Jahowa rap dohot Jesus, alai diboto Jahowa do porlu Jesus dipatogu tingki di tano on. Ditangihon Jesus do AmaNa mangkatai sian surgo dung tardidi ibana, nang di tingki parpudi ibana di tano on. Dua hali ma didok Jahowa, ”On do Anakku, Haholongan i; halomoan ni rohangku do Ibana!” (Mat. 3:17; 17:5) Tontu, gabe togu ma roha ni Jesus tingki diboto na dihaholongi Jahowa ibana. Dipatogu Jahowa do ibana marhite manuru surusuruan paposhon rohana.​—Luk. 22:43. w16.11 1:7, 8

Ndang mura mangorom diri asa unang muruk. Ra, muruk situtu do hita molo adong na mambahen na so denggan manang mangarehei hita alani hasomalanta dohot penampilanta. Jala, lam hansit do rohanta molo dongan sahaporseaonta na mangarehei hita. Rimangi ma sadia godang parsoalan na tapasiding molo taihuthon poda ni Bibel jala ndang muramura muruk! (Poda 16:32) Didok di Bibel, tasalpuhon ma hasalaan ni halak. Jesus mandok, molo ndang tasalpuhon hasalaan ni halak, Jahowa pe ndang olo manalpuhon hasalaanta. (Mat. 6:14, 15) Marsitutu do hamu asa sabar jala rade manalpuhon hasalaan? Molo muramura do hita muruk, boi do hita gabe marsogo ni roha tu sasahalak. On pe boi mambahen donganta na di huria mangkilala na sarupa. Gabe ndang olo jonok angka donganta tu hita.​—3 Mus. 19:17, 18. w16.11 3:4-6

Tingki i, taon 1870, si Charles Taze Russell dohot pigapiga halak ringgas marsiajar Bibel. Mulana, lomo roha ni donganta si Russell mamboto agama dia do na mangajarhon hasintongan. Manat do ibana mambandingkon ajaran ni godang agama Kristen dohot agama na so Kristen tu ajaran ni Bibel. Gabe diboto ibana ma, ndang adong nanggo sada sian agama i na mangihuthon Hata ni Debata. Di sada tingki, mangkatai ma ibana dohot pemimpin ni pigapiga gareja. Lomo roha ni donganta si Russell asa dijalo nasida hasintongan na didapot ibana dohot angka donganna sian Bibel, jala mangajarhon hasintongan i tu huria ni nasida. Alai, ndang olo angka pemimpin ni gareja i manjalo. Gabe diboto Parsiajar Bibel ma, ndang boi nasida manomba Debata rap dohot angka halak sian agama na so sintong. w16.11 4:14

Tutu, ingkon tapasiding do parmainanon, parmabukon, dohot angka dosa na asing. (1 Kor. 6:9-11) Alai asing ni i, ingkon tapasiding do na so dihalomohon Jahowa. Umpamana, ndang holan pasidingkon parmainanon, alai ingkon tapasiding do hiburan na rorang. Ndang holan pasidingkon parmabukon, alai unang ma minum sampe naeng mabuk. Ra maol do pasidingkon on, alai boi do hita pasidingkon i. Nang pe ndang boi tapasiding sude dosa, alai taulahon ma songon na didok si Paulus, ”Unang ma dosa i mangarajai di bagasan dagingmuna na olo mate i, mangoloi hisapna!”​—Rom 6:12; 7:18-20. w16.12 1:16, 19-21

Marjanji do Jesus, lehonon ni Jahowa do tondi parbadia molo tapangido tu Ibana. (Luk. 11:10-13) Tondi parbadia sian Debata mangurupi hita patuduhon parange na denggan songon na adong di Debata. (Kol. 3:10) Di Bibel, parange on didok ”parbue ni Tondi”. Molo tapatudu parange on, lam solhot ma paralealeonta tu na asing jala boi ma tapasiding angka situasi na mambahen hita holsoan. Ingkon serep do rohamuna asa marpos ni roha tu ”tangan ni Debata na gogo” jala ”tinggangkon hamu ma nasa na hinolsohon ni rohamuna tu Ibana”. (1 Ptr. 5:6, 7) Molo marserep ni roha, diurupi jala diparrohahon Jahowa ma hita. Molo taboto na boi dohot na so boi taulahon, ndang olo hita marhaposan tu dirinta. Alai, molo marhaposan tu Jahowa, ndang sai holsoan be hita.​—Mik. 6:8. w16.12 3:7, 12

Songon sahalak ”parjamita hatigoran,” dipasahat si Noak do sipasingot sian Jahowa. On mambahen haporseaonna tongtong togu. Asing ni i, diihuthon si Noak do tudutudu sian Jahowa laho mambahen parau. (Heb. 11:7) Songon si Noak, marsitutu do hita ”di bagasan ulaon ni Tuhan i”. (1 Kor. 15:58) Ra, taurupi do ulaon pajongjongkon Bale Harajaon dohot Bale Kebaktian, gabe relawan di kebaktian, karejo di kantor cabang manang di kantor penerjemahan jarak jauh. Alai na rumingkot, ringgas ma hita marbarita jala on patoguhon pangkirimonta. Molo marbarita hita, on boi patoguhon hita jala mangurupi hita tongtong di dalan tu hangoluan!​—1 Kor. 9:24. w17.01 1:8, 9

Ingkon taargai do hak ni halak laho mamillit. Boasa? Ala dilehon do hak laho mamillit tu hita sude, ndang sai dos na tapillit dohot dongan na asing. Umpamana taringot tu parniulaon dohot panombaonta. Ala taboto martanggung jawab do ganup halak Kristen di sipillitonna, taargai ma hak ni halak laho mamillit, nang pe ndang balga pangkorhonna. (1 Kor. 10:32, 33) Dilehon Jahowa do tu hita hak laho mamillit, na mambahen hita marlas ni roha. (2 Kor. 3:17) Denggan ma tapangke silehonlehon on, ala on mangurupi hita mamillit sipilliton na patuduhon holong ni rohanta tu Jahowa. Alani i, tongtong ma hita mambahen sipilliton na pasangaphon Jahowa, jala taargai ma hak ni halak laho mamillit. w17.01 2:15, 17, 18

Unang ma hita mangkalomohon hasangapon, alani i ringkot do ”martondi na lambok jala na dame”. (1 Ptr. 3:3, 4; Jer. 9:22, 23) Pangkilalaanta taringot dirinta sandiri, tarida sian pangkataion dohot parniulaonta. Umpamana, olo do ra tabahen halak gabe marpingkir molo hita sumurung alani donganta, parniulaonta, dohot parbinotoanta. Manang, tabahen asa dirimpu angka halak naung taulahon na ringkot sian gogonta sandiri, hape adong do halak na asing na mangurupi. Pingkirhon ma Jesus. Tontu dipasangap do ibana ala marbisuk. Alai, jotjot do dienet Jesus Hata ni Debata. Ndang olo ibana dipasangap. Lomo rohana asa Jahowa na dipasangap. w17.01 4:12

Ndang pola maol antusan ni si Adam dohot si Hawa patik i, jala ndang maol mangulahon i. Alana, godang dope sipanganon na tabo di porlak i. Marhite ulok, diotootoi Sibolis ma si Hawa asa unang unduk tu Jahowa. (1 Mus. 3:1-5; Pgk. 12:9) Didok Sibolis, ndang dipaloas Debata nasida mangallang parbue ni ”saluhut hau angka na di porlak” i. Hirahira songon on ma didok Sibolis, ’Na so dipaloas do ho mangulahon na dihalomohon roham?’ Didok Sibolis tu si Hawa, ”Ndang na tutu hamu mate.” Sasintongna, gabus ni Sibolis do i. Dielaela ma si Hawa asa unang manangihon Debata. Didok Sibolis, ”Diboto Debata do, sadari dipangan hamu sian i, tonggor ma matamuna.” Sibolis mandok, ndang lomo roha ni Jahowa molo didapot nasida parbinotoan na dumenggan. Alani i, ndang diloas Ibana nasida mangallang parbue ni hau i. Digabusi Sibolis do nasida tingki didok, ”Gabe doshon Debata hamu umboto na denggan dohot na roa.” w17.02 1:8, 9

Si Jesaya mandok, Pamimpin on laho gabe ”partogi dohot silehon patik”. (Jes. 55:4) Si Daniel manurat taringot tu Messias, na laho gabe ”pangarajai”. (Dan. 9:25) Dipatudu Jesus, ibana do Pamimpin ni naposo ni Debata. (Mat. 23:10) Diihuthon angka siseanna do Jesus, jala porsea nasida Jahowa do na mamillit Jesus. (Joh. 6:68, 69) Aha do na paposhon roha ni nasida? Tingki tardidi Jesus, diida si Johannes ma ”mungkap langit, jadi songgop ma Tondi i songon darapati tu Ibana”. (Mrk. 1:10-12) Saleleng di tano on, diurupi tondi parbadia do Jesus mangajar dohot mambahen tanda halongangan. (Ul. 10:38) Diurupi do muse Jesus patuduhon holong, las ni roha, dohot haporseaon na togu. (Joh. 15:9; Heb. 12:2) Ndang adong pamimpin na asing na dumenggan sian Jesus. Tangkas ma, Jahowa do na mamillit Jesus gabe Pamimpin. w17.02 3:15, 16

Di ari Pentakoste taon 33 M, angka apostel ma na manguluhon huria Kristen. Bibel mandok, ”Hehe ma si Petrus rap dohot na sampulusada i” jala diajarhon ma hasintongan tu natorop i. (Ul. 2:14, 15) Godang sian natorop i gabe halak Kristen. Dung i, ”marsihohot do nasida di poda ni angka apostel marparsaoran”. (Ul. 2:42) Angka apostel do na martanggung jawab mangatur parhepengon di huria. (Ul. 4:34, 35) Diajari nasida do naposo ni Debata jala ditangiangkon, didok, ”Alai anggo hami, tangiang dohot ulaon jamita i ma tong huhapadothon hami.” (Ul. 6:4) Ditugashon nasida do angka na marpengalaman asa marbarita di inganan na baru. (Ul. 8:14, 15) Di pudian ni ari, angka sintua na asing na miniahan dohot angka apostel rap manguluhon huria. Nasida ma na gabe punguan na mangaradoti organisasi di tingki i, na mangalehon tudutudu tu sude huria.​—Ul. 15:2. w17.02 4:4

Portibi on nunga mangalehon pangkorhon na roa tu jolma. Godang do halak gabe mandebatahon sadasada baoa manang borua, jala mangihuthon cara marpangkean dohot pangalaho ni nasida. Jotjot do angka halak mambahen songon i tu angka pamimpin agama, parpolitik, parolahraga, artis, dohot angka na asing. Diboto Sitindangi Ni Jahowa, sala do molo songon i tabahen tu sasahalak. Sian sude jolma, holan Jesus ma na mangalehon sitiruon na dumenggan. (1 Ptr. 2:21) Taingot ma, sude hita nunga ”mardosa jala ndang dapot pujion ni Debata”. (Rom 3:23) Ndang tama jolma tasomba. Molo pasangaphu tabahen tu jolma, ndang las roha ni Jahowa. w17.03 1:6-8

Sian dia do taboto molo hita nunga manomba Jahowa sian nasa roha? Tasungkun ma dirinta: ’Huoloi do Jahowa tingki adong situasi na maol? Marsitutu do ahu manjaga huria asa tongtong badia?’ Umpamana, songon dia do molo adong alealemuna na dipabali sian huria? Marsitutu do hamu asa unang mardongan be tu nasida? Aha do na diulahon hamu molo masa sisongon i? Songon si Asa, sipata olo do tahilala godang na marsogo ni roha tu hita. Ra, direhei dongan singkola manang gurumuna do hamu ala Sitindangi Ni Jahowa hamu. Manang didok dongan sakarejomuna hamu na oto, ala mambuat cuti asa boi kebaktian manang ala ndang jotjot lembur. Tingki masa sisongon i, marhaposan ma tu Jahowa songon si Asa. (2 Kron. 14:10) Martangiang ma hamu, ingkon barani, jala ulahon na denggan. Ingot ma, molo diurupi Debata do si Asa, hamu pe urupanNa do. w17.03 3:6-8

Didok di Bibel, unang ma pintor hatop manontuhon sipilliton. Asa marbisuk manontuhon sipilliton, ingkon manat do tapingkiri taringot tu angka na masa. (1 Tes. 5:21) Andorang so manontuhon sipilliton, sahalak tungganedoli ingkon manulingkiti isi ni Bibel dohot hatorangan sian publikasinta. Denggan do muse molo tatangihon pandapot ni anggota keluarga. Ingot ma, dijujui Debata do si Abraham asa manangihon tungganeboruna. (1 Mus. 21:9-12) Angka sintua pe ingkon mangalehon tingkina laho manulingkiti isi ni Bibel. Molo adong tudutudu na baru na mambahen nasida ingkon manguba angka naung dipillit, ndang mabiar nasida gabe ndang diargai na asing. Molo porlu, ingkon rade do angka sintua manguba pamingkirion dohot na pinillitna. Jala denggan do molo taihuthon sitiruon sian nasida. On mangurupi huria asa tongtong mardame jala marsada.​—Ul. 6:1-4. w17.03 2:16